Sɔlemi Kɛ Yi Mi Tɛ Puemi Ma Ha Wa Maa Pee Fiɛɛli Nɛ A Ngɛ Kã
1. Mɛni ye bua Yesu nɛ e nyɛ nɛ e ngɔ e juɛmi kɛ fɔ e nítsumi titli ɔ nɔ?
1 Gbɔkuɛ ɔ, Yesu tsa hiɔtsɛmɛ nɛ e hia mumi yayamihi kɛ je nihi a mi. E nɔ jena a, benɛ e kaseli ɔmɛ na lɛ ɔ, a de lɛ ke: “Ni ɔmɛ tsuo ngɛ mo hlae,” nɛ a hla kaa a maa tsi e nya konɛ e ya nɔ nɛ e pee nyakpɛ ní ɔ. Se Yesu ngmɛ́ blɔ nɛ a tsi e nya ngɛ nítsumi titli nɛ ji sane kpakpa a fiɛɛmi ɔ he. E de mɛ ke: “Nyɛ ha waa ya ma kpa amɛ nɛ bɔle wɔ nɛ ɔ a mi, konɛ ma ya fiɛɛ ngɛ lejɛ ɔmɛ hulɔ; ejakaa lɔɔ he i ba ngɛ.” Mɛni ye bua Yesu nɛ e nyɛ nɛ e ngɔ e juɛmi kɛ fɔ e nítsumi ɔ nɔ? E te si makɛ nɛ e ya sɔle nɛ e pue e yi mi tɛ. (Mar. 1:32-39) Mɛni blɔ nɔ nɛ wa yi mi tɛ nɛ wa ma pue ɔ ma nyɛ maa ye bua wɔ konɛ waa pee fiɛɛli nɛ a ngɛ kã ngɛ?
2. Mɛni ji níhi nɛ ke wa susuɔ a he ɔ, lɔɔ maa ye bua wɔ konɛ waa pee fiɛɛli nɛ a ngɛ kã?
2 Mɛni Níhi A He Lɛ E Sa Nɛ Wa Pue Wa Yi Mi Tɛ Ngɛ? Yesu yɔse kaa ni ɔmɛ “dɛ yaa kaa tohi nɛ be hyɛlɔ.” (Mat. 9:36) Jã kɛ lɛ wɔ hu wa ma nyɛ ma susu bɔnɛ e he hia ha kaa nihi nɛ a nu sane kpakpa a he. Wa ma nyɛ ma susu be bɔɔ ko pɛ nɛ piɛ nɛ nyagbe ɔ maa ba a hu he. (1 Kor. 7:29) Wa ma nyɛ ma susu Yehowa nítsumihi, kɛ e suhi, kɛ he blɔ nɛ wa ná kaa wa ji Yehowa Odasefoli, kɛ anɔkualehi nɛ a he jua wa nɛ wa kase kɛ je Mawu Munyu ɔ mi nɛ́ nihi nɛ a ngɛ wa zugba kpɔ ɔ mi ɔ li ɔ he hulɔ.—La 77:11-13; Yes. 43:10-12; Mat. 13:52.
3. Mɛni be lɛ wa ma nyɛ ma pue wa yi mi tɛ?
3 Mɛni Be Lɛ E Sa Kaa Wa Pue Wa Yi Mi Tɛ? Kaa bɔnɛ Yesu pee ɔ, ni komɛ teɔ si makɛ benɛ je mi jɔ dii nɛ a pueɔ a yi mi tɛ. Ni komɛ na kaa ke a pue a yi mi tɛ gbɔkuɛ loko a ya hwɔ si ɔ, e hi wawɛɛ. (1 Mose 24:63) Ke wa be deka po ɔ, wa ma nyɛ ma ná be kɛ pue wa yi mi tɛ. Ni komɛ peeɔ jã ke a ngɛ lɔle mi kɛ ngɛ blɔ hiae. Ni komɛ ngɔɔ a piani he jɔɔmi be ɔ eko kɛ ya hiɔ si ngɛ he ko nɛ jɔ dii nɛ a pueɔ a yi mi tɛ ngɛ lejɛ ɔ. Ni komɛ hu yɔse kaa ke a ngɔ be bɔɔ ko po kɛ pue a yi mi tɛ loko a je fiɛɛmi sisi ɔ, lɔɔ yeɔ bua mɛ nɛ a fiɛɛɔ kɛ kã.
4. Mɛni heje nɛ e sa nɛ wa pue wa yi mi tɛ?
4 Sɔlemi nɛ wa maa sɔle kɛ wa yi mi tɛ nɛ wa ma pue ɔ ma ha nɛ suɔmi nɛ wa ngɛ kaa wa ma sɔmɔ Yehowa a mi maa wa, nɛ lɔɔ hu ma ha nɛ wa maa bu wa jami ɔ kaa nɔ́ titli ngɛ wa si himi mi, nɛ e maa wo wɔ he wami nɛ wa maa ya nɔ maa fiɛɛ daa. Kaa bɔnɛ yi mi tɛ puemi ye bua Yesu nɛ ji Mawu Sɔmɔlɔ Kpanaa a, jã nɔuu nɛ wɔ hu ke wa pue wa yi mi tɛ ɔ, e maa ye bua wɔ.