Jamɛ a Be ɔ Maa Pee Odase Yemi Agbo Kɛ Ha Nihi
1. Ngɛ Kaimi ɔ he munyu nɛ a maa tu ɔ se ɔ, mɛni hu lɛ ma ha nɛ nihi nɛ a maa ba Kaimi ɔ yemi ɔ ma ná bua jɔmi? Moo tsɔɔ nya.
1 Mɛni be? Gbɔkuɛ nɛ a maa ye Kaimi ɔ. Enɛ ɔ he ɔ, wa bɔ mɔde wawɛɛ nɛ wa fɔ nihi nine konɛ a ba piɛɛ wa he kɛ ye Kaimi ɔ. Pi níhi nɛ nihi nɛ a maa ba Kaimi ɔ yemi ɔ maa nu ɔ pɛ nɛ a bua maa jɔ he. Benɛ yo ko ya Kaimi ɔ yemi ɔ, pee se ɔ, nɔ́ tutuutu nɛ e na nɛ e tu he munyu ji, huɛ bɔmi su nɛ nɔ tsuaa nɔ je kpo, kɛ Matsɛ Yemi Asa a nɛ nihi ngɔ a he kɛ ha nɛ a ma nɛ ngɛ fɛu nɛ a hyɛ nɔ saminya a. Enɛ ɔ he ɔ, pi munyu tulɔ ɔ pɛ nɛ haa nɛ gbijlɔ nɛ he hia pe kulaa nɛ ɔ nɛ wa yeɔ daa jeha a peeɔ odase yemi kɛ haa nihi, se mohu wɔ tsuo wa ma nyɛ ma ha nɛ e pee odase yemi kɛ ha nihi.—Efe. 4:16.
2. Mɛni blɔ nɔ wa ti nɔ tsuaa nɔ ma nyɛ maa gu kɛ ha nɛ Kaimi ɔ yemi ɔ nɛ pee odase yemi kɛ ha nihi nɛ maa ba a?
2 Mo Fɔ Nihi Nɛ A Maa Ba a Kɛ Bua Jɔmi: Muɔ hɛlii nɛ maa hi wa nya he kɛ fɔmi nɛ wa ma fɔ nihi nɛ a maa ba Kaimi ɔ yemi ɔ kɛ bua jɔmi ɔ ma nyɛ maa pee odase yemi kɛ ha mɛ. (Yoh. 13:35) Ke o kɛ nihi tsuo nɛ maa ba Kaimi ɔ yemi ɔ nyɛ we nɛ sɛɛ ní po ɔ, o ma nyɛ ma fɔ nihi nɛ a hi si ngɛ o kasa nya a kɛ bua jɔmi konɛ o je o he si kɛ tsɔɔ mɛ. (Heb. 13:1, 2) Moo to nihi nɛ a ba Kaimi ɔ yemi ɔ nɛ a li nɔ ko ɔ a he hɛ. Eko ɔ, benɛ wa ngɛ nine fɔmi womi ɔ gbae ɔ nɛ a ha mɛ eko. O ma nyɛ ma bi mɛ ke, “Kekleekle be nɛ o ba hiɛ ɔ ji nɛ ɔ lo?” Mo ha nɛ a ba hi si ngɛ o kasa nya, nɛ o ha sane bimi saisaa nɛ a ma bi ɔ heto. Ke e ba kaa e sa nɛ nyɛ we asafo ɔ nɛ je he nɛ nyɛ ye Kaimi ɔ ngɛ ɔ mla kɛ ha asafo kpa a, o ma nyɛ ma bi mɛ ke: “Kɛ o na ní peemi ɔ ha kɛɛ? Mɛni blɔ nɔ ma gu konɛ ye nine nɛ su o nɔ?”
3. Kɛ wa ma plɛ kɛ nya nihi nɛ a kpa fiɛɛmi yami nɛ a maa ba Kaimi ɔ yemi ɔ a he ha kɛɛ?
3 Mo Nya Nihi Nɛ A Kpa Fiɛɛmi Yami ɔ A He: Atsinyɛ jemi ko be he kaa nihi nɛ a kpa fiɛɛmi yami kɛ nihi nɛ daa jeha pɛ nɛ a baa Kaimi ɔ yemi ɔ hu maa ba. Mo nya a he nɛ o ha nɛ a le kaa o bua jɔ kaa o na mɛ. (Rom. 15:7) Asafo mi nikɔtɔma amɛ ma nyɛ ma ya slaa nihi kaa jã a pee se konɛ a wo mɛ he wami nɛ a ya nɔ nɛ a kɛ asafo ɔ nɛ bɔ. Wa ngɛ sɔlee konɛ níhi nɛ nihi babauu nɛ a maa ba Kaimi ɔ yemi ɔ maa nu, kɛ ‘ní kpakpahi nɛ wa maa pee nɛ a maa na’ a nɛ wo mɛ he wami konɛ a wo Mawu hɛ mi nyami.—1 Pet. 2:12.