Nyɛɛ Na Nihi “Mɔbɔ”
1. Mɛni ji nɔ́ nɛ nihi babauu hia mwɔnɛ ɔ?
1 Be nɛ wa ngɛ mi nɛ ɔ ji be nɛ e he hia kaa a je mɔbɔ nami kpo kɛ tsɔɔ nihi babauu pe kulaa ngɛ yinɔ sane mi. Akɛnɛ níhi nɛ ngɛ nɔ yae ngɛ je ɔ mi ɔ mi ngɛ wae heje ɔ, nihi nɛ ngɛ je ɔ mi he tsuaa he be bua jɔmi, a peeɔ yeyeeye, nɛ a be hɛ kɛ nɔ fɔmi ko. Nimli ayɔhi abɔ hia yemi kɛ buami, nɛ e sa kaa wɔ nɛ wa ji Kristofoli ɔ, wa mi mi nɛ sã wɔ ngɛ wa nyɛmi nɔmlɔ he. (Mat. 22:39; Gal. 6:10) Mɛni blɔ nɔ wa maa gu kɛ je mɔbɔ nami kpo kɛ tsɔɔ nihi?
2. Mɛni ji blɔ nɛ hi pe kulaa nɛ wa ma nyɛ maa gu nɔ kɛ je mɔbɔ nami kpo kɛ tsɔɔ nihi?
2 Mo Je Mɔbɔ Nami Kpo Ngɛ Fiɛɛmi Nítsumi ɔ Mi: Mawu pɛ ji nɔ nɛ ma nyɛ ma ha nɛ wa ma ná bua jɔmi nitsɛnitsɛ kɛ ya neneene. (2 Kor. 1:3, 4) Yehowa woɔ wɔ he wami konɛ waa kase lɛ nɛ waa ‘na nihi mɔbɔ,’ nɛ e tsɔ wɔ nɛ wa ya fiɛɛ Matsɛ Yemi ɔ he sane kpakpa a kɛ tsɔɔ nihi. (1 Pet. 3:8) Kã nɛ waa kɛ ma tsu nítsumi nɛ ɔ ji blɔ nɛ hi pe kulaa nɛ wa maa gu nɔ kɛ wo nihi nɛ a hao ɔ a bua, ejakaa Mawu Matsɛ Yemi ɔ pɛ ji adesahi nɛ a ngɛ nɔ́ nae ɔ, a hɛ kɛ nɔ fɔmi. (Yes. 61:1) Akɛnɛ nihi a he mɔbɔ peeɔ Yehowa heje ɔ, e be kɛe nɛ e ma je ní yayahi kɛ je nɛ e kɛ dami je ehe maa ba.—2 Pet. 3:13.
3. Kɛ wa ma plɛ kɛ bu nihi kaa bɔnɛ Yesu buu mɛ ɔ ha kɛɛ?
3 Moo Bu Nihi Kaa Bɔnɛ Yesu Buu Mɛ ɔ: Ke Yesu ngɛ fiɛɛe kɛ ngɛ nimli asafo tsɔɔe po ɔ, e susuɔ a ti nɔ tsuaa nɔ he kakaaka. E le nɔ́ nɛ he hia a ti nɔ tsuaa nɔ nɛ ma ha nɛ huɛ bɔmi kpakpa maa hi e kɛ Mawu a kpɛti. A ngɛ kaa tohi nɛ a be hyɛlɔ. Yesu mi mi sã lɛ ngɛ nihi nɛ e na mɛ ɔ a he, nɛ lɔɔ ha nɛ e to e tsui si kɛ tsɔɔ mɛ ní. (Mar. 6:34) Ke wa buu nihi kaa bɔnɛ Yesu buu mɛ ɔ, lɔɔ ma ha nɛ wa ma je mɔbɔ nami nitsɛnitsɛ kpo kɛ tsɔɔ mɛ kakaaka. Enɛ ɔ maa je kpo ngɛ bɔnɛ waa kɛ mɛ tuɔ munyu ha, kɛ bɔnɛ wa peeɔ wa hɛ mi ha ke waa kɛ mɛ ngɛ munyu tue ɔ mi. Lɔɔ hu ma ha nɛ waa kɛ fiɛɛmi nítsumi ɔ maa pee nɔ́ titli ngɛ wa si himi mi, nɛ ke wa ngɛ fiɛɛe hu ɔ, wa maa tu munyuhi nɛ a ti nɔ tsuaa nɔ bua maa jɔ he.—1 Kor. 9:19-23.
4. Mɛni heje nɛ e sa kaa waa wo mɔbɔ nami kaa tade ngɛ?
4 Nimli asafo ko nɛ a je je mahi tsuo a mi ɔ kɛ bua jɔmi ngɛ Matsɛ Yemi sɛgbi ɔ nɔ kplɛɛe nɛ a tsui hu nɔ a mi kaa wa ngɛ a he bua jɔmi. Ke wa ya nɔ nɛ wa wo mɔbɔ nami kaa tade ɔ, lɔɔ ma ha nɛ wa maa sa Yehowa, nɛ ji wa Mawu nɛ nihi a he mɔbɔ peeɔ lɛ ɔ hɛ mi, nɛ wa maa wo e hɛ mi nyami.—Kol. 3:12.