O Kɛ Bua Jɔmi Nɛ Dla O Tsui Kɛ Ha Kaimi ɔ Yemi ɔ
1. Kaimi ɔ yemi be ɔ ji be klɛdɛɛ nɛ waa kɛ maa pee mɛni?
1 Kaimi ɔ nɛ́ wa maa ye ngɛ Pɛplɛgbi, March 26 ɔ, ha wɔ he blɔ nɛ pe kulaa konɛ wa kɛ ná bua jɔmi ngɛ nɔ́ nɛ Mawu pee nɛ e kɛ he wa yi wami ɔ he. (Yes. 61:10) Bua jɔmi nɛ wa ma ná loko Kaimi ɔ yemi be ɔ maa su ɔ ma ha nɛ wa ma dla wa he saminya. Ngɛ mɛni blɔ nɔ?
2. Mɛni woɔ wɔ he wami nɛ wa dlaa wa he kɛ haa Kaimi ɔ Yemi ɔ?
2 Wa He Nɛ Wa Ma Dla Kɛ Ha Kaimi ɔ Yemi ɔ: Nyɔmtsɛ ɔ Gbɔkuɛ Niye Ní ɔ ji nɔ́ ngua se a peeɔ lɛ ngɛ blɔ kpiti nɔ. Se kɛ̃ ɔ, e sa nɛ nyɛɛ sɛ hlami nɛ nyɛɛ to níhi a he blɔ nya konɛ nyɛ hɛ ko je níhi nɛ a he hia amɛ eko nɔ. (Abɛ 21:5) E sa nɛ nyɛɛ to be, nɛ nyɛ hla he nɛ sa kɛ ha ní peemi ɔ. E sa nɛ a to abolo kɛ wai nɛ sa he blɔ nya. Jehanɛ ɔ, e sa nɛ nyɛ dla he nɛ ní peemi ɔ maa ya nɔ ngɛ ɔ nyaii nɛ nɔ́ tsuaa nɔ́ nɛ pee klaalo. Nɛ e sa nɛ munyu tulɔ ɔ nɛ e dla e munyu ɔ saminya, nɛ́ a tsɔɔ nihi nɛ a maa ngɔ Kaimi ní ɔmɛ kɛ ha a, kɛ nibwɔhi a kpeeli ɔmɛ nɔ́ nɛ e sa kaa a pee. Atsinyɛ jemi ko be he kaa nyɛ to ní nɛ ɔmɛ hiɛhiɛ a he blɔ nya momo. Hɛsa nɛ wa ngɛ kɛ ha he wami nɛ kpɔmi nɔ́ ɔ ngɛ kaa e ma he wa yi wami ɔ lɛ woɔ wɔ gɛjɛmi nɛ wa dlaa wa he kɛ haa ní peemi nɛ ngɛ klɔuu nɛ ɔ nɛ.—1 Pet. 1:8, 9.
3. Mɛni blɔ nɔ wa maa gu kɛ dla wa tsui kɛ ha Nyɔmtsɛ ɔ Gbɔkuɛ Niye Ní ɔ?
3 Wa Tsui Nɛ Wa Ma Dla: E he hia hu nɛ wa dla wa tsui konɛ waa nu nɔ́ nɛ Kaimi ɔ daa si ha a sisi kɛ pi si. (Ezra 7:10) Enɛ ɔ he ɔ, e sa nɛ waa to be konɛ wa kane Kaimi ɔ he Ngmami klɛdɛɛ ɔmɛ, konɛ wa susu Yesu nyagbe si himi ngɛ zugba a nɔ ɔ he. Ke wa pue wa yi mi tɛ ngɛ he kɛ afɔle sami su nɛ Yesu je kpo ɔ he ɔ, e maa wo wɔ he wami konɛ waa kase lɛ.—Gal. 2:20.
4. Kpɔmi nɔ́ ɔ he se nami te nɛɛ lɛ haa nɛ o naa bua jɔmi wawɛɛ?
4 Ke wa susu se namihi nɛ ngɛ kpɔmi nɔ́ ɔ he loko Kaimi ɔ Yemi su, nɛ wa pee jã ngɛ Kaimi ɔ se ɔ, e ma ha nɛ wa maa ná bua jɔmi wawɛɛ. Pi be nɛ a ngmɛɛ okplɔɔ loo be nɛ a ngmaa sɛ gbi nɛ a kɛ haa nɔ ayekoo kɛ maneɔ ngɛ mobile phone nɔ ji nɛ ɔ. Mohu ɔ, e ji be nɛ waa kɛ maa susu Kaimi ɔ he. Kristo gbenɔ ɔ bu Yehowa nɔyemi ɔ bemi. E je wɔ kɛ je yayami kɛ gbenɔ mi. (1 Yoh. 2:2) E bli blɔ kɛ ha wɔ nɛ́ wa dla waa kɛ Mawu wa kpɛti, konɛ wa ná neneene wami. (Kol. 1:21, 22) E yeɔ bua wɔ nɛ waa hi si ngɛ wa he nɔ nɛ wa jɔɔ kɛ ha Yehowa a nya konɛ wa fi si kaa Kristo kaseli. (Mat. 16:24) O kɛ bua jɔmi nɛ dla o he kɛ ha Kaimi ɔ Yemi ɔ, nɛ́ o kɛ gɛjɛmi nɛ ya ní peemi ɔ sisi!