Eko ɔ, E He Maa Hia Nɛ O Hla Nihi Konɛ O Fiɛɛ Ha Mɛ
1. Mɛni heje nɛ a to asafohi nɛ a tuɔ gbi slɔɔtohi a sisi ngɛ zugba kpɔhi nɛ nihi tuɔ gbi ekpaekpahi ngɛ mi ɔ a mi ɔ?
1 Benɛ mumi klɔuklɔu ɔ ba Yesu kaseli ɔmɛ a nɔ ngɛ Pentekoste jeha 33 M.B. ɔ, kaseli ɔmɛ “bɔni gbi slɔɔtoslɔɔtohi tumi” kɛ ngɛ nihi nɛ a je zugba a kɔnya he slɔɔtohi nɛ a ngɛ lejɛ ɔ tsɔɔe. (Níts. 2:4) Enɛ ɔ ha nɛ a baptisi nimli maa pee 3,000. Bua jɔmi sane ji kaa e ngɛ kaa nɔ́ nɛ nihi nɛ a ba lejɛ ɔ a kpɛti nihi fuu tuɔ Hebri loo Hela gbi nɛ ji gbihi nɛ nihi fuu pɔɔ tumi ɔ. Se Yehowa suɔ nɛ a fiɛɛ Matsɛ Yemi sɛ gbi ɔ kɛ ha mɛ ngɛ mɛ nitsɛmɛ a je gbi mi. Atsinyɛ jemi ko be he kaa yi mi tomi kake heje nɛ Yehowa pee jã a ji, nihi pɔɔ sane kpakpa a nɔ kplɛɛmi mla ke a fiɛɛ kɛ ha mɛ ngɛ mɛ nitsɛmɛ a je gbi mi. Enɛ ɔ he ɔ, mwɔnɛ ɔ, a to asafohi nɛ a tuɔ gbi slɔɔtohi a sisi ngɛ zugba kpɔhi nɛ nihi tuɔ gbi ekpaekpahi ngɛ mi ɔ mi. (Organized, bf. 107, kk. 2-3) A ha we kuuhi nɛ a tuɔ ma se gbi ɔ zugba kpɔ nɛ e sa kaa a fiɛɛ ngɛ mi, mohu ɔ, a fiɛɛɔ kɛ haa nihi nɛ tuɔ ma se gbi ɔ nɛ a ngɛ zugba kpɔ nɛ asafo nɛ hyɛɛ kuu ɔ nɔ, kɛ asafo kpahi hu nɛ a ngɛ kpɔ ɔ mi ɔ tsuɔ mi ní ɔ mi.
2. (a) Ke a ke a hla nihi ɔ, mɛni lɔɔ tsɔɔ, nɛ jije a ma nyɛ maa pee jã ngɛ? (b) Mɛni blɔ nɔ asafohi ma nyɛ maa gu kɛ ye bua a sibi kɛ tsu ní ngɛ zugba kpɔ nɛ nihi tuɔ gbi ekpaekpahi ngɛ mi ɔ mi? (d) Mɛni e sa kaa waa pee ke wa na nɔ ko nɛ e tuɔ gbi kpa nɛ e bua jɔ munyu ɔ he?
2 Ke o ngɛ he ko nɛ nɔ tsuaa nɔ tuɔ gbi kake ngɛ ɔ, o ma nyɛ maa fiɛɛ ngɛ we tsuaa we mi. Se ke o ngɛ he ko nɛ e slo gbi nɛ nɔ tsuaa nɔ tuɔ ɔ, lɛɛ eko ɔ, o be nyɛe maa pee jã. Eko ɔ, asafo kpahi hu fiɛɛɔ ngɛ jamɛ a kpɔ ɔ nɔuu mi. E ngɛ mi kaa eko ɔ, asafo ɔmɛ maa tsɔɔ nyɛ nihi nɛ a tuɔ nyɛ je gbi ɔ mohu lɛɛ, se e ji nyɛ blɔ nya nítsumi titli kaa nyɛ ma hla nihi nɛ a tuɔ gbi nɛ nyɛ asafo ɔ loo kuu ɔ tuɔ ɔ konɛ nyɛɛ fiɛɛ ha mɛ. (Hyɛ daka nɛ ji “Nyɛɛ Ye Bua Nyɛ Sibi” ɔ mi.) Enɛ ɔ he ɔ, eko ɔ, e he maa hia nɛ o hla nihi nɛ a tuɔ gbi pɔtɛɛ ko nɛ o fiɛɛ kɛ ha mɛ. Mɛni blɔ nɔ o ma nyɛ maa gu kɛ hla mɛ?
3. Mɛni nɔ asafo ko loo kuu ko daa kɛ hlaa nihi, nɛ be enyɛmɛ a kɛ peeɔ jã?
3 Bɔnɛ A Ma Plɛ Kɛ To Ni Ɔmɛ A Hlami He Blɔ Nya Ha: Be abɔ nɛ a kɛ ma hla nihi nɛ a tuɔ gbi pɔtɛɛ ko ngɛ hehi nɛ a tuɔ gbi ekpaekpahi ngɛ ɔ daa si ngɛ si fɔfɔɛ nɛ ngɛ zugba kpɔ ɔ mi ɔ nɔ. Kaa nɔ hyɛmi nɔ́ ɔ, ni enyɛmɛ ngɛ kpɔ ɔ mi nɛ a tuɔ gbi ɔ? Fiɛɛli enyɛmɛ ngɛ lejɛ ɔ? Adrɛs enyɛmɛ nɛ asafo ɔ loo kuu ɔ nine su nɔ momo? Asafo ɔ ma nyɛ maa ngɔ be fuu kɛ hla nihi ngɛ kpɔ ko mi pe bɔnɛ e maa pee ngɛ kpɔ kpa mi, se eko ɔ, a kɛ a juɛmi ma nyɛ maa ma hehi nɛ nihi fuu ngɛ ngɛ zugba kpɔ ɔ mi kɛ hehi nɛ a kɛ we tsɔ ɔ nɔ. Se e he hia nɛ a to blɔ nya kpakpa kɛ hla ni ɔmɛ bɔnɛ pee nɛ a na nihi fuu nɛ a tsɔɔ mɛ nɛ a tsɛ Yehowa biɛ ɔ.—Rom. 10:13, 14.
4. (a) Kɛ e sa kaa a to ni ɔmɛ a hlami ɔ he blɔ nya ha kɛɛ? (b) Mɛni ji blɔ komɛ a nɔ nɛ o ma nyɛ maa gu kɛ na nihi nɛ a tuɔ o je gbi?
4 Bɔnɛ pee nɛ ke wa ngɛ ni ɔmɛ hlae nɛ wa ko ya he ko nɛ nyɛmi ko ya momo heje ɔ, e sa nɛ nikɔtɔmahi a kuu ɔ, titli ɔ, sɔmɔmi nítsumi nɔ hyɛlɔ ɔ nɛ e to ni ɔmɛ a hlami ɔ he blɔ nya nɛ e hyɛ nɔ. (1 Kor. 9:26) Ngɛ kuuhi nɛ a tuɔ ma se gbihi ɔ a mi ɔ, e sa nɛ nyɛminyumu nɛ sa, nɛ e ji asafo mi nɔkɔtɔma loo asafo mi sɔmɔlɔ ko nɛ nikɔtɔmahi a kuu nɛ ngɛ asafo nɛ hyɛɔ kuu ɔ nɔ ɔ mi ɔ hla lɛ ɔ nɛ nyɛɛ hɛ mi. Asafohi kɛ kuuhi fuu toɔ blɔ nya nɛ a sɛɔ hlami ya hlaa nihi setsɔsetsɔ. A yaa zugba kpɔhi a mi ya hlaa ni ɔmɛ konɛ a le hehi nɛ a ma kɛ piɛɛ a zugba kpɔ ɔ he. Ke e maa hi ɔ, nikɔtɔmahi a kuu nɛ ngɛ asafo nɛ hyɛɔ kuu ɔ nɔ ɔ mi ɔ, ma nyɛ maa to blɔ nya konɛ ke pee ɔ, asafo mluku ɔ tsuo nɛ a kɛ a he nɛ wo ni ɔmɛ a hlami ɔ mi.—Hyɛ daka nɛ ji, “Bɔnɛ O Ma Plɛ Kɛ Hla Nihi Nɛ A Tuɔ O Je Gbi ɔ Ha” a mi.
5. (a) Mɛni ji ga womi nɛ a kɛ ha fiɛɛli nɛ a ngɛ nihi nɛ a tuɔ gbi pɔtɛɛ ko ɔ hlae ɔ? (b) Ke wa ngɛ ni ɔmɛ hlae ɔ, mɛni wa ma nyɛ ma de?
5 Be tsuaa be nɛ wa ma ya hla ni ɔmɛ ɔ, e sa nɛ waa le yi mi tomi pɔtɛɛ heje nɛ wa ngɛ jã pee ngɛ. Akɛnɛ nítsumi nɛ ɔ hu piɛɛ wa sɔmɔmi nítsumi ɔ he heje ɔ, e sa nɛ ke wa yaa hla ni ɔmɛ ɔ, waa wo tade nɛ tsɔɔ kaa wa ji Mawu sɔmɔli. Nihi fuu na kaa ke a kase munyu nɛ a maa tu ɔ, nɛ a tu gbi nɛ ni ɔmɛ tuɔ ɔ kɛ hla ni ɔmɛ ɔ, lɔɔ yeɔ bua fiɛɛli ɔmɛ nɛ a náa kã nɛ a he beɔ ngɛ gbi ɔ tumi mi. Wa ma nyɛ maa bu be nɛ waa kɛ ya hlaa ni ɔmɛ a he akɔtaa, se wa be nyɛe maa bu be nɛ waa kɛ ngɛ zugba kpɔ ɔ he womi pee ɔ he akɔtaa. Ke wa na nɔ ko nɛ e tuɔ gbi ɔ, e sa nɛ waa bɔ mɔde nɛ waa kɛ lɛ nɛ susu sane kpakpa a he, nɛ lɔɔ se ɔ, wa ha sɔmɔmi nítsumi nɔ hyɛlɔ ɔ loo nɔ ko nɛ sɔmɔmi nítsumi nɔ hyɛlɔ ɔ hla lɛ ɔ sisi numi amlɔ nɔuu, konɛ e kɛ jamɛ a nɔ ɔ biɛ nɛ piɛɛ nihi nɛ a tuɔ gbi ɔ ngɛ zugba kpɔ ɔ mi ɔ a he. Ke nɔ ɔ bua jɔ munyu ɔ he jio, e bua jɔɛ he jio, e sa nɛ a kɛ e biɛ nɛ piɛɛ nihi nɛ a tuɔ gbi ɔ a he. E ngɛ mi kaa ni ɔmɛ a hlami ɔ he hia mohu lɛɛ, se e sa kaa waa kɛ wa he nɛ wo sɔmɔmi nítsumi ɔ mimi slɔɔto ɔmɛ tsuo a mi hulɔ.—Hyɛ daka nɛ ji, “Nɔ́ Nɛ O Ma De Ke O Ngɛ Ni Ɔmɛ Hlae” ɔ mi.
6. Mɛni nyagbahi waa kɛ ma nyɛ maa kpe ke wa ngɛ mumuihi hlae?
6 Mumuihi A Hlami: Mumuihi a hlami yee nɛ e biɔ mɔde bɔmi wawɛɛ. O be nyɛe maa da nɔ ko biɛ nɛ a ngma, loo bɔnɛ nɔ ko nɔmlɔtso ngɛ ha, loo nɔ ko tade womi nɔ kɛ tsɔɔ kaa nɔ ɔ ji mumui. Jehanɛ se hu ɔ, huɛmɛ kɛ wekuli ma nyɛ maa laa e nɔ nɛ eko ɔ, a be suɔe nɛ a de fiɛɛlɔ ɔ mumui ɔ he sanehi. Ga womihi nɛ nyɛɛ se nɛ ɔ ma nyɛ maa ye bua fiɛɛli kɛ hla mumuihi kɛ nihi nɛ a tuɔ munyu tsuo.
7. (a) Mɛni blɔ nɔ o ma nyɛ maa gu kɛ bi mumuihi a si ngɛ wehi a mi? (b) Mɛni wa ma nyɛ maa pee konɛ wetsɛ ɔ nɛ ko ná wa he juɛmi yaya?
7 Mumuihi asafohi kɛ kuuhi yeɔ manye ke a bi mumuihi a si ngɛ wehi a mi. Eko ɔ, wetsɛ ɔ na nɔ ko ngɛ e kpɔ ɔ mi, loo nɔ ko nɛ e kɛ lɛ tsuɔ ní, loo nɔ ko nɛ e kɛ lɛ yaa sukuu, nɛ e ngɛ mumuihi a gbi tue. Eko ɔ, e to mumuihi a sukuu ko he hɛ. Eko ɔ, e ngɛ wekuno ko nɛ e ji mumui. E sa nɛ o le kaa nihi ma nyɛ maa hɛɛ juɛmi yaya ngɛ a si nɛ o ma bi ɔ he. Se ke o je o tsui mi nɛ o je huɛ bɔmi su kpo, nɛ o kɛ bumi tsɔɔ mɛ níhi a nya kpiti ɔ, lɔɔ be hae nɛ a ye mo gbeye. Ni komɛ ye manye ngɛ enɛ ɔ peemi mi kɛ gu Baiblo ɔ loo DVD nɛ a pee ngɛ mumuihi a gbi mi nɛ a kɛ tsɔɔ wetsɛ ɔ nɛ a biɔ lɛ kaa e le mumui ko lo ɔ nɔ. Lɔɔ se ɔ, a deɔ kɛkɛ kaa a suɔ kaa a kɛ mumuihi nɛ susu hɛ kɛ nɔ fɔmi nɛ ngɛ Baiblo ɔ mi ɔ he. Ke wetsɛ ɔ sume nɛ e maa tsɔɔ mo mumui ko ɔ, eko ɔ, ke o ha lɛ asafo mi kpehi a he nine fɔmi womi ko kaa e kɛ ha e wekuno ko loo mumui ko ɔ, e bua maa jɔ kaa e maa pee jã.
8. Mɛni blɔ nɔ asafo nɛ e kɛ asafo nɛ tuɔ mumuihi a gbi he kɛ we ɔ ma nyɛ maa ye bua kɛ hla mumuihi ngɛ?
8 Ngɛ ma nguahi a mi ɔ, ligbi kake loo ligbi enyɔ ngɛ jeha a mi ɔ, asafo nɛ tuɔ mumuihi a gbi ma nyɛ ma tsɛ asafo ko nɛ tuɔ gbi kpa konɛ a ye bua mɛ kɛ hla mumuihi ngɛ a zugba kpɔ ɔ kake mi. Ke asafo nɛ tuɔ mumuihi a gbi ɔ ngɛ fiɛɛmi yami kpe pee ɔ, a kɛ blɔ tsɔɔmihi nɛ a kɛ hlaa mumuihi ɔ ma nyɛ maa piɛɛ he konɛ a pee he peemi kɛ tsɔɔ. Ke e hí kulaa a, e sa nɛ a kɛ fiɛɛlɔ kake nɛ e ngɛ asafo nɛ tuɔ mumuihi a gbi mi ɔ nɛ piɛɛ fiɛɛmi yami kuu tsuaa fiɛɛmi yami kuu nɛ ngɛ lɔle kake mi ɔ he konɛ a ha mɛ zugba kpɔ pɔtɛɛ ko kɛ e he womi nɛ a ya hla ni ɔmɛ ngɛ mi.
9. Mɛni blɔ nɔ waa maa gu kɛ hla mumuihi ngɛ hehi nɛ mumuihi pɔɔ a he nya buami loo a jeɔ a hɛja loo hehi nɛ a yaa nɛ nihi ya yeɔ bua mɛ ngɛ?
9 A ma nyɛ ma hla mumuihi ngɛ hehi nɛ mumuihi pɔɔ a he nya buami loo a jeɔ a hɛja loo hehi nɛ a yaa nɛ nihi ya yeɔ bua mɛ ngɛ. E sa nɛ fiɛɛli nɛ a wo tade nɛ sa kɛ tsu nítsumi nɛ ɔ. E maa hi wawɛɛ kaa o kɛ nɔ kake loo ni enyɔ maa tu munyu konɛ o kɛ ga nɛ tsu ní mohu pe nɛ o kɛ kuu ɔ kulaa maa tu munyu. Ke wa ye manye ɔ, wa ma nyɛ ma de ni ɔmɛ konɛ a ha wɔ a we adrɛs konɛ wɔ hu wa ha mɛ wa nɔ́.
10. Mɛni blɔ nɔ fiɛɛli maa gu kɛ hla nihi ngɛ nítsumi hehi nɛ ngɛ kpɔ ɔ mi ɔ?
10 Blɔ kpa ko hu nɛ a maa gu nɔ kɛ tsu enɛ ɔ ji nɛ a maa ya nítsumi hehi nɛ ngɛ kpɔ ɔ mi ɔ kaa petrol pomi he, níhi a he fɔmi he, ní yemi he, kɛ nítsumi he kpahi. Ke wa ya lejɛ ɔmɛ ɔ, wa ma nyɛ ma bi si kaa nihi nɛ a tsuɔ ní ngɛ lejɛ ɔ loo nihi nɛ a kɛ mɛ yeɔ jua a, a ti nɔ ko tuɔ mumuihi a gbi lo. Ke mumuihi a sukuu ko ngɛ zugba kpɔ ɔ mi ɔ, wa ma nyɛ ma ha mɛ wa DVD ɔ eko konɛ a kɛ wo a womi to he ɔ.
11. Mɛni heje nɛ nihi a hlami he hia ngɛ wa fiɛɛmi nítsumi ɔ mi ɔ?
11 Nítsumi Ko Nɛ He Hia: E yee kaa o maa na nɔ ko nɛ e tuɔ o gbi ɔ. Jehanɛ se hu ɔ, benɛ nihi ngɛ kpɔ ko mi bae nɛ nihi hu ngɛ jee ɔ, lɔɔ ma nyɛ ma ha nɛ tsakemi maa ba nihi nɛ a tuɔ gbi pɔtɛɛ ko ngɛ kpɔ ɔ mi ɔ he, nɛ enɛ ɔ ma nyɛ maa sa zugba kpɔ ɔ he womi nɛ ngɛ asafo ɔ dɛ ɔ he. Se ngɛ hehi fuu ɔ, nihi a hlami he hia wawɛɛ ngɛ wa sɔmɔmi nítsumi ɔ mi. Yehowa nɛ ji nɔ nɛ ha wɔ nítsumi kaa waa fiɛɛ ɔ hyɛ we nɔ hɛ mi. (Níts. 10:34) E “suɔ kaa nimli tsuo nɛ le anɔkuale ɔ, konɛ a he a yi wami.” (1 Tim. 2:3, 4) Enɛ ɔ he ɔ, nyɛ ha nɛ waa kɛ Yehowa kɛ wa nyɛmimɛ ɔmɛ nɛ pee kake kɛ hla nihi nɛ a tuɔ gbi slɔɔtohi tsuo nɛ “a tsui mi hi ɔ.”—Luka 8:15.
[Daka ngɛ bafa 5]
Nyɛɛ Ye Bua Nyɛ Sibi
Ke asafo loo kuu ko suɔ nɛ asafo kpahi nɛ a ye bua lɛ kɛ hla nihi nɛ a tuɔ gbi nɛ a tuɔ ɔ, sɔmɔmi nítsumi nɔ hyɛlɔ ɔ ma nyɛ ma ya na nikɔtɔmahi nɛ a ngɛ asafo kpahi nɛ a tuɔ gbi kpa nɛ a ngɛ a kasa nya a mi. Eko ɔ, e maa hi wawɛɛ kaa e ma ya na nikɔtɔmahi nɛ a ngɛ asafohi nɛ a kɛ mɛ he kɛ we tsɔ ɔ mi, aloo asafohi nɛ a ngɛ fiɛɛli nɛ a tuɔ gbi ɔ nɛ a he hiɛ bɔnɛ sa a. Asafohi nɛ e ma ya na a, ma nyɛ ma ha a fiɛɛli ɔmɛ lemi kaa ke a na nɔ ko nɛ e tuɔ jamɛ a gbi ɔ, a ngma jamɛatsɛ ɔ adrɛs nɛ a kɛ ha sɔmɔmi nítsumi nɔ hyɛlɔ ɔ konɛ lɛ hu e kɛ ha asafo loo kuu nɛ ngɛ yemi kɛ buami ɔ bie ɔ. Sɔmɔmi nítsumi nɔ hyɛli nɛ a ngɛ asafo ɔmɛ a mi ɔ maa pee kake kɛ tsu zugba kpɔ nɛ nɔ tsuaa nɔ tuɔ gbi ekpaekpa ngɛ mi ɔ mi ní, konɛ a tsɔɔ nihi nɛ a ngɛ munyu ɔ he bua jɔmi ɔ blɔ kɛ ya asafo loo kuu nɛ tuɔ a gbi ɔ mi.
Ke fiɛɛli na nɔ ko nɛ e tuɔ gbi kpa nɛ e bua jɔ munyu ɔ he wawɛɛ (loo mumui) ɔ, e sa nɛ a ngma Please Follow Up (S-43) womi ɔ nɔ ní amlɔ nɛ a kɛ ha asafo ɔ mi womi ngmalɔ ɔ. Enɛ ɔ ma ha nɛ a kɛ nɔ ɔ nɛ je Baiblo ɔ kasemi sisi mla.—Hyɛ km 5/11 bf. 3.
[Daka ngɛ bafa 6]
Bɔnɛ O Ma Plɛ Kɛ Hla Nihi Nɛ A Tuɔ O Je Gbi ɔ Ha
• Mo bi nihi—Baiblo kaseli, wekuli, nihi nɛ o kɛ mɛ tsuɔ ní, kɛ ni kpahi.
• Nyɛɛ kɛ ga nɛ bi a si ngɛ hehi nɛ nihi tsuɔ ní ngɛ kɛ yeɔ bua ma bi kaa womi to hehi, amlaalo nítsumi hehi, kɛ sukuu nguahi a mi.
• Moo hyɛ nyɛ ma a mi adafi fiami womihi a mi kaa o maa na ní peemi ko nɛ nihi nɛ a tuɔ ma se gbi ɔ to he blɔ nya lo.
• Moo ya tsuapohi a mi kɛ nítsumi hehi nɛ a kɛ nihi nɛ a tuɔ ma se gbi yeɔ jua ngɛ ɔ.
• Mo bi blɔ ngɛ nihi nɛ a ngɛ nítsumi ɔ nɔ hyɛe ɔ a ngɔ nɛ́ o kɛ wa womi ɔmɛ nɛ pue okplɔɔ nɔ ngɛ hehi nɛ a tuɔ gbi ɔ ngɛ kaa nítsumi he, sukuu nguahi a mi, aloo lɔle si dami hehi.
[Daka ngɛ bafa 7]
Nɔ́ Nɛ O Ma De Ke O Ngɛ Ni Ɔmɛ Hlae
Ke o je o tsui mi nɛ o je huɛ bɔmi su kpo, nɛ o tsɔɔ o munyu ɔ nya kpiti ɔ, lɔɔ be hae nɛ a ye gbeye. E maa hi kaa o kɛ womi ko nɛ a ngma ngɛ gbi ɔ mi ɔ maa tsɔɔ mɛ kekle.
Ke o fɔ mɛ ta a, o ma nyɛ ma de ke: “Wa ngɛ nihi nɛ a tuɔ ․․․․․ hlae konɛ waa kɛ mɛ nɛ susu hɛ kɛ nɔ fɔmi nɛ ngɛ Baiblo ɔ mi ɔ he. Anɛ o le nɔ ko nɛ waa kɛ lɛ ma nyɛ maa sɛɛ ní lo?”
Ke o ngɛ mumuihi hlae ɔ, o ma nyɛ ma de ke: “I kpa mo pɛɛ nɛ o hyɛ nɔ́ ko. [Moo fia New World Translation—On DVD ɔ mi ngmami ko ngɛ DVD fiami klama nɛ o hɛɛ ɔ nɔ kɛ tsɔɔ lɛ.] Baiblo nɛ a pee ngɛ Amerika Mumuihi a gbi mi ɔ fã ko ji nɛ ɔ nɛ. Ngɛ Baiblo ɔ se ɔ, wa ngɛ video slɔɔtohi nɛ a pee konɛ a kɛ tsɔɔ mumuihi Baiblo ɔ mi anɔkuale ɔ, nɛ waa kɛ haa yaka. Anɛ o le nɔ ko nɛ e ji mumui loo nɔ ko nɛ e nui nɔ́ kpakpa ko nɛ e tuɔ mumuihi a gbi lo?” Ke wetsɛ ɔ nyɛ we nɛ e kai nɔ ko ɔ, behi fuu ɔ, e maa hi kaa o ma bi lɛ kaa eko ɔ, e na a ti nɔ ko ngɛ nítsumi he, sukuu, loo kpɔ ɔ mi lo.