Bɔnɛ Wa Ma Plɛ Kɛ Ye Bua Nihi Nɛ A Tuɔ Ma Se Gbi Ha
1. Ke wa ngɛ fiɛɛe ngɛ wa zugba kpɔ ɔ mi ɔ, mɛnɔmɛ hu lɛ e sa kaa waa fiɛɛ kɛ ha?
1 Yesu Kristo gba kɛ fɔ si kaa a maa fiɛɛ sane kpakpa a kɛ kpa je ɔ mi tsuo nɛ a kɛ maa ‘ye jema amɛ tsuo odase.’ Nihi tsuo nɛ a ngɔɔ a he kɛ woɔ fiɛɛmi nítsumi ɔ mi nɛ a tsɔɔ nihi ní ɔ le bɔnɛ munyu nɛ ɔ he hia ha. (Mat. 24:14; 28:19, 20) Eko ɔ, ke wa ngɛ fiɛɛmi kɛ kaselɔ peemi nítsumi ɔ tsue ɔ, waa kɛ nihi maa kpe nɛ a je ma kpahi a nɔ nɛ́ a tuɔ gbi komɛ kaa Arabic, French, kɛ Chinese. E sa nɛ nimli nɛ ɔmɛ hu nɛ a nu Matsɛ Yemi ɔ he sɛgbi ɔ nɛ́ a pɛtɛ anɔkuale ɔ he kpɛii loko Yehowa ligbi nɛ ngɛ gbeye ɔ nɛ su. (Mal. 3:18) Mɛni blɔ nɔ wa maa gu kɛ ye bua nihi nɛ a tuɔ ma se gbi nɛ a ngɛ wa zugba kpɔ ɔ mi ɔ?
2. Ke wa fiɛɛɔ kɛ haa nihi nɛ a tuɔ gbi kpahi ɔ, lɔɔ tsɔɔ kaa wa ngɛ Yehowa kasee ngɛ mɛni blɔ nɔ?
2 Moo Bu Nihi Nɛ Tuɔ Ma Se Gbi ɔ Kaa Bɔnɛ Yehowa Buu Mɛ ɔ: Ngɛ gbi saisaa nɛ nihi tuɔ tsuo se ɔ, ke wa kase suɔmi nɛ Yehowa ngɛ kɛ ha nihi tsuo nɛ a ngɛ wa zugba kpɔ ɔ mi ɔ, lɔɔ ma ha nɛ wa ma ná bua jɔmi wawɛɛ kaa wa maa ye bua nihi konɛ a ba ná Yehowa, nɛ ji anɔkuale Mawu ɔ he anɔkuale nile. (La 83:18; Níts. 10:34, 35) E ngɛ mi kaa nihi titli nɛ wa fiɛɛɔ kɛ haa mɛ ɔ ji nihi nɛ a tuɔ gbi nɛ waa kɛ peeɔ nikasemi ngɛ wa we asafo ɔ mi ɔ mohu lɛɛ, se e sa kaa wa susu nihi nɛ a tuɔ gbi kpahi ɔ hu a he konɛ wa hla blɔhi a nɔ nɛ wa maa gu kɛ fiɛɛ Matsɛ Yemi sɛgbi ɔ kɛ ha mɛ. Ke wa ma wa hɛ kɛ fɔ nihi nɛ a tuɔ gbi kpahi a nɔ ɔ, lɔɔ kɛ Yehowa yi mi tomi kaa a ye nihi nɛ a ngɛ je ma amɛ tsuo a mi ɔ odase ɔ be kɔe. Lɛɛ mɛni blɔ nɔ wa maa gu kɛ ye bua nihi nɛ a nui wa gbi ɔ?
3. Mɛni womi lɛ a pee kɛ ha wɔ, nɛ mɛni blɔ nɔ wa maa gu nɛ waa ngɔ kɛ tsu ní ngɛ?
3 Moo Ngɔ Womi Nɛ Ji Good News for People of All Nations ɔ Kɛ Tsu Ní: A pee womi nɛ ɔ konɛ wa kɛ tsu ní ke waa kɛ nihi kpe nɛ a nui gbi nɛ wa tuɔ ɔ. Be tsuaa be ɔ, moo hɛɛ womi nɛ ɔ, nɛ o le níhi nɛ ngɛ mi konɛ o dla o he kaa o kɛ ma tsu ní. O ma nyɛ ma kadi gbi kpahi nɛ nihi tuɔ ngɛ o zugba kpɔ ɔ mi ɔ ngɛ womi ɔ mi bɔnɛ pee nɛ ke o ngɛ hlae ɔ nɛ o na mla. Ke womihi nɛ a pee ngɛ gbi nɛ ɔmɛ a mi ɔ eko ngɛ ɔ, e maa hi wawɛɛ kaa o maa hɛɛ eko konɛ ke o kɛ nɔ ɔ susu sɛgbi nɛ ngɛ Nations womi ɔ mi ɔ he ta a, nɛ o kɛ ha lɛ.
4. Mɛni blɔ nɔ wa ma nyɛ maa ngɔ Nations womi ɔ kɛ tsu ní ngɛ wa sɔmɔmi nítsumi ɔ mi ngɛ?
4 Ke o kɛ nɔ ko kpe ngɛ fiɛɛmi nítsumi ɔ mi nɛ e tuɔ gbi kpa se o li gbi pɔtɛɛ nɛ e tuɔ ɔ, moo ngɔ womi ɔ hɛ mi kɛ tsɔɔ lɛ. Moo tsɔɔ lɛ ma nɔ he nɛ o je, nɛ o ha nɛ lɛ hu e tsɔɔ mo ma nɔ he nɛ e je kɛ gbi nɛ e tuɔ. Ke o na gbi nɛ e tuɔ ɔ, hyɛ he nɛ a to gbi ɔmɛ a nya ngɛ ngɛ womi ɔ mi ɔ, lɔɔ se ɔ, mo hla womi ɔ bafa he nɛ e gbi ɔ ngɛ nɛ o ha nɛ e kane munyu nɛ a ngma lɛ agbo nɛ ngɛ yinɔ ɔ, kɛkɛ ɔ, mo ha nɛ e le kaa o ngɛ hlae nɛ e kane sɛgbi nɛ ngɛ lejɛ ɔ. Ke e kane ta a, moo ngɔ dɛ womi nɛ a pee ngɛ e gbi ɔ mi ɔ eko kɛ ha lɛ, aloo o ha nɛ e kane munyuza nɛ a ngɔ lazu su kɛ diki nɔ nɛ tsɔɔ kaa o maa suɔ nɛ o ba slaa lɛ ekohu konɛ o ba ha lɛ womi nɛ a pee ngɛ e gbi ɔ mi ɔ. Lɔɔ se ɔ, ngɔɔ o nine kɛ tsɔɔ munyu nɛ a ngma lɛ agbo nɛ ji “ye biɛ” ɔ konɛ o tsɛ o biɛ kɛ tsɔɔ lɛ. Moo ngɔ o nine kɛ tsɔɔ munyu nɛ a ngma lɛ agbo nɛ ji “o biɛ” ɔ, konɛ o mlɛ nɛ e tsɛ e biɛ kɛ tsɔɔ mo. Moo to be pɔtɛɛ ko nɛ́ o kpale kɛ ya slaa lɛ.
5. Mɛni hu wa ma nyɛ maa pee kɛ ye bua nihi nɛ a ná munyu ɔ he bua jɔmi se a tuɔ gbi kpa a?
5 Moo To Blɔ Nya Nɛ O Ya Slaa Mɛ Ekohu: Ngɛ gbihi nɛ nihi tuɔ tsuo se ɔ, e sa nɛ waa bɔ mɔde nɛ wa ya slaa nihi nɛ a ná Matsɛ Yemi sɛgbi ɔ he bua jɔmi ɔ ekohu. Ke wa na kaa a bua jɔ Mawu Munyu ɔ nɛ ji Baiblo ɔ kasemi he ɔ, e sa nɛ waa ngma Please Follow Up (S-43) womi ɔ nɔ ní nɛ waa ngɔ kɛ ha asafo ɔ mi womi ngmalɔ ɔ amlɔ nɛ́ a ngɔ kɛ mane asafo ɔ nítsumi he kɔni ɔ bɔnɛ pee nɛ a ha nɛ nɔ nɛ e kɛ lɛ tuɔ gbi kake ɔ nɛ e ya slaa lɛ. Lɔɔ se ɔ, asafo ɔ nítsumi he kɔni ɔ maa ngɔ Please Follow Up (S-43) womi ɔ kɛ mane kuu nɛ tuɔ e gbi ɔ. Ke kuu ɔ nine su womi ɔ nɔ ɔ, a ma ya slaa nɔ ɔ amlɔ nɔuu. Asafo ɔ mi womi ngmalɔ ɔ ma nyɛ maa pee womi ɔ henɔ kɛ ha sɔmɔmi nítsumi nɔ hyɛlɔ ɔ konɛ e hyɛ bɔnɛ kuu ɔ ngɛ nɔ nɛ ná munyu ɔ he bua jɔmi ɔ ye buae ha. Ja nɔ ɔ ná munyu ɔ he bua jɔmi nitsɛnitsɛ pɛ loko nyɛ ma nyɛ maa ngma Please Follow Up (S-43) womi ɔ nɔ ní.
6. Ke waa kɛ nɔ ko nɛ e ngɛ munyu ɔ he bua jɔmi kpe se e nui gbi nɛ wa tuɔ ɔ, mɛni e sa kaa waa pee?
6 Eko ɔ, ke a ngɔ S-43 womi ɔ kɛ mane ɔ, e se maa kɛ loko fiɛɛlɔ nɛ e kɛ nɔ ɔ tuɔ gbi kake nɛ a maa hla lɛ ɔ ma ya slaa lɛ. Enɛ ɔ heje ɔ, bɔnɛ pee nɛ bua jɔmi nɛ nɔ ɔ ná a nɛ ko laa a, fiɛɛlɔ nɛ e ngɔ S-43 womi ɔ kɛ mane ɔ ma nyɛ ma tsa nɔ nɛ e kɛ lɛ maa hi ní ɔ kasee kɛ ya si benɛ nɔ nɛ e kɛ lɛ tuɔ gbi kake ɔ ma ya slaa lɛ. Be komɛ ɔ, fiɛɛlɔ ɔ kɛ nɔ nɛ e ná munyu ɔ he bua jɔmi ɔ ma nyɛ maa pee Baiblo mi nikasemi. Se kɛ ya si benɛ fiɛɛlɔ ɔ maa ngɔ nɔ nɛ ná munyu ɔ he bua jɔmi ɔ kɛ ha nɔ nɛ e kɛ lɛ tuɔ gbi kake ɔ, mɛni blɔ nɔ fiɛɛlɔ ɔ maa gu konɛ e nine nɛ e su womihi nɛ a pee ngɛ nɔ ɔ gbi ɔ mi ɔ a nɔ kɛ ha lɛ?
7. Mɛni blɔ nya nɛ a to konɛ e ye bua wɔ nɛ wa ná womi kɛ ha nihi nɛ a nui wa gbi ɔ nɛ waa kɛ mɛ maa kpe ngɛ wa sɔmɔmi nítsumi ɔ mi ɔ?
7 Womihi Nɛ A Pee Ngɛ Gbi Kpahi A Mi: E sɛ kaa asafohi sɛɔ womihi nɛ a pee ngɛ gbi kpahi a mi kpɛ̃kpɛ̃ɛkpɛ̃ ba pueɔ si. Se ke sɔmɔmi nítsumi nɔ hyɛlɔ ɔ na kaa nihi nɛ a tuɔ gbi pɔtɛɛ ko ngɛ anɔkuale ɔ he bua jɔmi ɔ, e ma nyɛ maa sɛ womihi nɛ a pee ngɛ jamɛ a gbi ɔ mi ɔ bɔnɛ sa ba pue si ha fiɛɛli nɛ a kɛ tsu ní. Ke asafo ɔ be womi nɛ a pee ngɛ jamɛ a gbi ɔ mi ɔ eko ɔ, a ma nyɛ maa sɛ. Ke a sɛ womihi ngɛ gbi nɛ ɔmɛ a mi ɔ, e se ma nyɛ maa kɛ loko e maa ba. Enɛ ɔ he ɔ, a to blɔ nya konɛ nihi nɛ a printi womi ɔ kɛ je Internet ɔ nɔ ngɛ www.watchtower.org. Fiɛɛli kɛ nihi nɛ a ngɛ munyu ɔ he bua jɔmi ɔ ma nyɛ maa na womihi fuu nɛ a pee ngɛ gbi lafahi abɔ mi ngɛ Internet ɔ nɔ mla. Atsinyɛ jemi ko be he kaa blɔ nya tomi nɛ ɔ maa ye bua wɔ ke wa ngɛ nihi nɛ a ná munyu ɔ he bua jɔmi se a nui gbi nɛ wa tuɔ ɔ ye buae.
8. Mɛni asafo ɔ peeɔ kɛ yeɔ bua nihi nɛ a ngɛ anɔkuale ɔ he bua jɔmi se a tuɔ gbi kpa a?
8 Asafo ɔ Blɔ Nya Nítsumi: Be komɛ ɔ, nihi nɛ a tuɔ ma se gbi a he ma nyɛ maa hiɛ, se eko ɔ, asafo ko be jamɛ a kpɔ ɔ mi nɛ peeɔ nikasemi ngɛ gbi nɛ ɔ mi. Ke e ba jã a, nyɛ ma nyɛ maa fɔ nihi nɛ a ngɛ anɔkuale ɔ he bua jɔmi se a tuɔ gbi kpa a nine konɛ a ba nikasemi ngɛ nyɛ asafo ɔ mi. Ke nyɛ nya a he nɛ nyɛ je suɔmi kpo kɛ tsɔɔ mɛ ɔ, lɔɔ maa wo mɛ he wami nɛ a maa ba nikasemi ɔ daa. Kekleekle ɔ, e ngɛ mi kaa e slo gbi nɛ a tuɔ kɛ bɔnɛ a peeɔ a ní ha mohu lɛɛ, se e sa kaa wa je Kristofoli a suɔmi nɛ Yehowa Odasefoli nɛ a ngɛ je kɛ wɛ ɔ jeɔ kpo kɛ haa a he ɔ kpo kɛ tsɔɔ mɛ. (Zef. 3:9; Yoh. 13:35) Anɛ o nu gbi kpa ko saminya lo? Ke o nu gbi kpa ko nɛ o suɔ nɛ o kpale kɛ ya slaa nɔ ko nɛ tuɔ jamɛ a gbi ɔ, wa kpa mo pɛɛ nɛ o ha asafo ɔ mi womi ngmalɔ ɔ lemi konɛ a ha asafo ɔ nítsumi he kɔni ɔ hu lemi. Enɛ ɔ maa ye bua asafo ɔ nítsumi he kɔni ɔ nɛ ke a ngɛ fiɛɛlɔ ko nɛ tuɔ jamɛ a gbi ɔ hlae nɛ́ e ya ye bua nɔ nɛ ná munyu ɔ he bua jɔmi ɔ, a ma tsɛ mo.
9. Mɛni be mi lɛ e he ma nyɛ maa hia kaa a to gbi ko kasemi sukuu he blɔ nya, nɛ mɛni blɔ nɔ a maa gu kɛ pee enɛ ɔ?
9 Gbi Kasemi Sukuu: Ke nyɛ ngɛ nihi nɛ a tuɔ gbi kpa a ye buae ɔ, e hi kaa nyɛ maa wo mɛ he wami konɛ a bɔni nikasemi yami ngɛ mɛ nitsɛmɛ a gbi ɔ mi ke asafo ko nɛ tuɔ a gbi ɔ ngɛ a kasa mi. Se ke asafo ko be a kasa mi nɛ tuɔ a gbi ɔ, fiɛɛli komɛ ma nyɛ maa kase a gbi ɔ konɛ a nyɛ nɛ a ye bua mɛ saminya. Ke nibwɔ ɔmɛ a he hiɛ nɛ asafo ko be a kasa mi nɛ tuɔ a gbi ɔ, asafo ɔ nítsumi he kɔni ɔ ma nyɛ maa ma e juɛmi nya si kaa e maa to gbi kasemi sukuu ko sisi. Ke e he hia kaa a pee jã a, asafo ɔ nítsumi he kɔni ɔ ma nyɛ ma ha asafohi nɛ a ngɛ jamɛ a kpɔ ɔ mi ɔ lemi konɛ a to gbi ɔ kasemi sukuu he blɔ nya nɛ a fia he adafi kɛ ha nyɛmimɛ ɔmɛ. Oti nɛ e sa kaa nihi nɛ a maa ya gbi ɔ kasemi sukuu ɔ nɛ a kɛ ma a hɛ mi ji kaa a, a maa ya nikasemi ngɛ kuu, aloo asafo nɛ tuɔ jamɛ a gbi ɔ mi.
10. Mɛni be mi nɛ a ma nyɛ maa to kuu ko sisi ngɛ gbi ko mi?
10 Kuu Sisi Tomi: Loko a ma nyɛ maa to kuu ko sisi ngɛ gbi ko mi ɔ, hlami níhi eywiɛ nɛ nyɛɛ se nɛ ɔ a he hia. (1) E sa kaa a na nihi nɛ a he hiɛ bɔnɛ sa, nɛ a ngɛ munyu ɔ he bua jɔmi nɛ a ma nyɛ ma ha nɛ kuu ɔ maa ya hɛ mi. (2) E sa kaa a ná fiɛɛli nɛ a hiɛ bɔnɛ sa nɛ a nu gbi ɔ, aloo a maa suɔ kaa a maa kase. (3) E sa kaa a ná asafo mi nɔkɔtɔma kake, aloo asafo mi sɔmɔlɔ kake nɛ ke e hí kulaa a, e maa hyɛ nikasemi nɔ ngɛ gbi ɔ mi si kake daa otsi. (4) E sa kaa nikɔtɔmahi a kuu ɔ nɛ ná bua jɔmi kaa a maa hyɛ kuu ɔ nɔ. Ke nikɔtɔmahi a kuu ɔ na kaa a su hlami ní nɛ ɔmɛ a he ɔ, lɛɛ a ngma kɛ ya asafo ɔ nítsumi he kɔni ɔ kɛ bi kuu ɔ he sanehi konɛ a ha nɛ a le mɛ kaa a ji asafo nɛ hyɛɔ kuu nɛ tuɔ ma se gbi ko nɔ. (Moo hyɛ Organized, bf. 106-107.) A ma tsɛ asafo mi nɔkɔtɔma nɛ hyɛɔ kuu nɔ ɔ ke “kuu nɔ hyɛlɔ,” nɛ a ma tsɛ asafo mi sɔmɔlɔ nɛ hyɛɔ kuu nɔ ɔ ke “sɔmɔlɔ nɛ hyɛɔ kuu nɔ.”
11. Mɛni heje nɛ e ji he blɔ nɛ wa ná kaa wa maa ye bua nihi nɛ a tuɔ ma se gbi ɔ?
11 Nihi nɛ a tuɔ ma se gbi nɛ a ngɛ wa zugba kpɔ ɔ mi nɛ wa maa ye bua mɛ ɔ ji je kɛ wɛ fiɛɛmi nítsumi ɔ nɛ wa Nɔ Hyɛmi Nɔ́ Peelɔ, nɛ ji Yesu Kristo je sisi ɔ fã nɛ he hia. E ngɛ mi kaa munyu nɛ ɔ kɔɔ nihi nɛ a tuɔ ma se gbi nɛ wa maa ye bua mɛ ɔ a he mohu, se wa ma nyɛ maa ngɔ blɔ tsɔɔmi nɛ ɔ nɔuu kɛ tsu ní ke waa kɛ wa ma nɛ ɔ mi nihi nɛ a tuɔ gbi kpa kpe. Nyɛ ha nɛ waa kɛ kã nɛ e tsu wa blɔ fa mi nɔ́ konɛ waa hyɛ bɔnɛ Yehowa maa ya nɔ ma mimiɛ jema amɛ konɛ e je nihi nɛ e bua jɔ a he ɔ ngɛ a mi kɛ ba e ngɔ ha. (Hag. 2:7) Keji kaa wa yeɔ bua nihi nɛ a tuɔ ma se gbi ɔ, wa tsui maa nɔ wa mi nitsɛnitsɛ! Yehowa nɛ e jɔɔ mɔde nɛ wɔ tsuo wa ngɛ bɔe kaa wa maa ye bua nihi nɛ a tuɔ ma se gbi nɛ a ngɛ wa zugba kpɔ ɔmɛ a mi ɔ nɔ, ejakaa wa le kaa ngɛ gbi slɔɔtohi nɛ nihi tuɔ tsuo se ɔ, Mawu ma nyɛ ma ha nɛ wa mɔde bɔmi ɔ maa wo yiblii!—1 Kor. 3:6-9.