Ko Susu Kaa O Be Nyɛe—O Ma Nyɛ Maa Ye He Numi Kaa O He Sui ɔ Nɔ
1. Mɛni heje nɛ ni komɛ sume kaa a maa pee Baiblo mi nikasemi ɔ?
1 Anɛ o sume kaa o maa pee Baiblo mi nikasemi akɛnɛ o be he kɛ nɔ fɔmi kaa o ma nyɛ maa pee nɛ e nu tso ɔ lo? Ngɛ be komɛ a mi ɔ, Mawu sɔmɔli anɔkualetsɛmɛ nɛ a hi si blema kaa Mose kɛ Yeremia nu he kaa a be nyɛe ma tsu nítsumi nɛ a kɛ wo a dɛ ɔ. (2 Mose 3:10, 11; 4:10; Yer. 1:4-6) Nihi fuu hu nuɔ he jã nɔuu. Kɛ wa maa pee kɛɛ konɛ waa ye he numi nɛ ɔ nɔ?
2. Mɛni heje nɛ e sɛ kaa wa bua jɔɔ wehi a mi fiɛɛmi ɔ pɛ he, nɛ wa siɔ Baiblo mi nikasemi ɔ kɛ haa ni kpahi ɔ?
2 Nyɛ ha nɛ wa kai kaa Yehowa be hae nɛ wa tsu nɔ́ ko nɛ wa be nyɛe tsumi kɔkɔɔkɔ. (La 103:14) Lɔɔ ɔ he ɔ, nítsumi nɛ a kɛ wo wa dɛ kaa waa ‘pee nihi kaseli,’ nɛ waa ‘tsɔɔ mɛ ní’ ɔ, wa ma nyɛ ma tsu. (Mat. 28:19, 20) Tsa pi wa kpɛti nihi nɛ a ngɛ níhi a si kpami loo dloomi nike ní ko ɔ pɛ nɛ Yehowa kɛ he blɔ nɛ ɔ ha. (1 Kor. 1:26, 27) Enɛ ɔ he ɔ, e sɛ kaa wa bua nɛ jɔ wehi a mi fiɛɛmi ɔ pɛ he nɛ wa si Baiblo mi nikasemi ɔ kɛ ha ni kpahi.
3. Mɛni blɔ nɔ Yehowa ha nɛ wa sa kɛ ha Baiblo mi nikasemi peemi?
3 Yehowa Lɛ Haa Nɛ Wa He Suu: Yehowa nɛ ha nɛ wa he su kaa waa pee nihi kaseli ɔ nɛ. (2 Kor. 3:5) Yehowa gu e we asafo ɔ nɔ nɛ e tsɔɔ wɔ Baiblo mi anɔkualehi nɛ́ nihi nɛ a le womi mi ngɛ je ɔ mi ɔ po li. (1 Kor. 2:7, 8) E baa blɔ nɛ Ní Tsɔɔlɔ Ngua nɛ ji Yesu gu nɔ kɛ tsɔɔ ní ɔ yi kɛ ha wɔ konɛ waa kase, nɛ e yaa nɔ nɛ e kɛ tsɔsemi haa wɔ ngɛ asafo ɔ mi. Jehanɛ ɔ, Yehowa ha wɔ womihi nɛ wa maa hia kɛ tsɔɔ nihi Baiblo ɔ. E ha wɔ womihi, kaa Baiblo Tsɔɔmi womi ɔ konɛ waa tsɔɔ anɔkuale ɔ mi ngɛ blɔ nɛ e sisi numi yi nɔ. Baiblo mi nikasemi peemi ma nyɛ maa pee gbɔjɔɔ pe bɔnɛ wa susuɔ ɔ.
4. Mɛni heje nɛ wa ma nyɛ ma ná nɔ mi mami kaa Yehowa maa ye bua wɔ ɔ?
4 Yehowa ye bua Mose kɛ Yeremia nɛ a nyɛ nɛ a tsu nítsumi nɛ e kɛ wo a dɛ ɔ. (2 Mose 4:11, 12; Yer. 1:7, 8) Wɔ hu wa ma nyɛ ma bi Yehowa nɛ e ye bua wɔ. Ejakaa ke wa pee Baiblo mi nikasemi ɔ, wa ngɛ nɔ ɔ anɔkualehi nɛ kɔɔ Yehowa he ɔ tsɔɔe, nɛ lɔɔ saa Mawu hɛ mi. (1 Yoh. 3:22) Lɔɔ he ɔ, mo kɛ pee oti ngɛ o hɛ mi kaa o maa pee Baiblo mi nikasemi, e ji wa sɔmɔmi nítsumi ɔ fã ko nɛ bua jɔmi kɛ jɔɔmi ngɛ mi.