Ko Susu Kaa O Be Nyɛe—Bɔnɛ O Maa Pee Kɛ To O Be He Blɔ Nya
1. Mɛni heje nɛ ni komɛ gblaa a nane si kaa a maa pee Baiblo mi nikasemi ɔ?
1 Ni komɛ gblaa a nane si kaa a maa pee Baiblo mi nikasemi ejakaa a be deka. Baiblo mi nikaselɔ nɛ a maa ye bua lɛ ɔ biɔ be. E biɔ nɛ o ná be kɛ dla o he kɛ ha nikasemi ɔ, konɛ o ya pee nikasemi ɔ, nɛ o ye bua nikaselɔ ɔ nɛ́ e ye blɔ tsimi nihi nɛ ma ha nɛ e be hɛ mi yae ngɛ mumi mi ɔ nɔ. Bɔfo Paulo de kaa e ngɔ e wami tete ngɔ fɔ si ha nihi nɛ ngɛ Tesalonika a konɛ e ye bua mɛ nɛ a le Yehowa. (1 Tes. 2:7, 8) Ke wa be deka po ɔ, mɛni blɔ nɔ wa maa gu kɛ pee Baiblo mi nikasemi?
2. Mɛni blɔ nɔ nɛ suɔmi nɛ wa ngɛ kɛ ha Yehowa a náa bɔnɛ waa kɛ wa be tsuɔ ní ha a nɔ he wami ngɛ?
2 Yehowa Sɔmɔmi Biɔ Be: Anɔkuale sane nɛ mi tɛ̃ heii ji kaa Yehowa sɔmɔmi biɔ be. Kaa nɔ hyɛmi nɔ́ ɔ, níhi nɛ wa peeɔ daa kaa asafo mi kpe yami, fiɛɛmi yami, Baiblo ɔ kanemi, kɛ sɔlemi ɔ biɔ be. Nɔ ko nɛ sɛ gba si himi mi nɛ be deka a bua jɔ he kaa e ma ná be kɛ ha e huno loo e yo. Hyɛ bɔnɛ e sa kaa wa bua nɛ jɔ kaa wa ma ‘he be’ kɛ sɔmɔ Yehowa akɛnɛ wa suɔ lɛ ɔ heje. (Efe. 5:15-17; 1 Yoh. 5:3) Kaa bɔnɛ Yesu tsɔɔ ɔ, kaselɔ peemi nítsumi ɔ ji wa sɔmɔmi ɔ fã ko nɛ he hia wawɛɛ. (Mat. 28:19, 20) Ke wa susu enɛ ɔ he ɔ, e maa ye bua wɔ nɛ wa be wa blɔ nya nítsumi kaa wa maa pee Baiblo mi nikasemi ɔ kuae.
3. Ke si fɔfɔɛ komɛ poɔ wa blɔ nya tomi kɛ ha fiɛɛmi yami mi po ɔ, mɛni blɔ nɔ wa maa gu kɛ pee Baiblo mi nikasemi?
3 Nɛ ke wa nítsumi, hiɔ nɛ hi tsa mi loo teokrase nítsumihi ha we nɛ o ná deka hu nɛɛ? Fiɛɛli komɛ nɛ a pɔɔ blɔ haimi ɔ peeɔ Baiblo mi nikasemi kɛ gu tɛlifoo loo Internet ɔ nɔ. Nihi nɛ hiɔ pɔɔ mɛ haomi ɔ to blɔ nya nɛ a Baiblo mi nikaseli ɔmɛ baa a we mi nɛ a peeɔ nikasemi ɔ. Ni komɛ to blɔ nya konɛ ke a be ɔ, fiɛɛlɔ ko nɛ pɔɔ fiɛɛmi yami ɔ nɛ e ya pee nikasemi ɔ.
4. Mɛni jɔɔmihi wa náa kɛ jeɔ Baiblo mi nikasemi peemi mi?
4 Paulo ná bua jɔmi wawɛɛ nitsɛ be mi nɛ e ngɔ e be kɛ e he wami kɛ ye bua nihi nɛ a ba le anɔkuale ɔ. (Níts. 20:35) Benɛ e susu nihi tsuo nɛ e nyɛ nɛ e ye bua mɛ ngɛ Tesalonika a he ɔ, e na Yehowa si. (1 Tes. 1:2) Ke wa to wa be he blɔ nya nɛ wa pee Baiblo mi nikasemi ɔ, wa ma ná bua jɔmi babauu nɛ wa tsui maa nɔ wa mi.