Nine Fɔmi Klɛdɛɛ
1. Mɛni be nɛ wa maa je 2014 kpe ngua a he nine fɔmi womi ɔ gbami sisi?
1 Ke o ngɛ niye ní klɛdɛɛ ko nɛ e hoomi biɔ be kɛ mɔde bɔmi he blɔ nya toe kɛ ha o huɛmɛ kɛ o weku li ɔ, atsinyɛ jemi ko be he kaa o kɛ bua jɔmi maa fɔ mɛ nine. Jã a kɛ̃ nɛ a ngɛ dengme gboe kɛ ngɛ mumi mi niye ní nɛ a ma gba ngɛ 2014 kpe ngua a kɛ mahi a kpɛti kpe ɔ sisi ɔ he blɔ nya toe. Ke e piɛ otsi etɛ nɛ wa maa ya kpe ɔ, waa fɔ nihi nine nɛ a ba kpe ɔ eko. Mɛni maa ye bua wɔ konɛ waa kɛ bua jɔmi nɛ fɔ nihi nine ɔ?
2. Mɛni maa ye bua wɔ konɛ waa ngɔ wa he kɛ wo nine fɔmi womi ɔ gbami mi kɛ pi si?
2 Ke wa susu se nɛ wɔ nitsɛmɛ wa náa ngɛ mumi mi niye ní nɛ Yehowa haa ngɛ kpe ɔmɛ a sisi ɔ he ɔ, lɔ ɔ maa wo wɔ he wami konɛ waa ngɔ wa he kɛ wo nine fɔmi womi ɔ gbami mi wawɛɛ. (Yes. 65:13, 14) E sa nɛ wa kai hu kaa nine fɔmi womi nɛ wa gbaa daa jeha a woɔ yiblii. Ni komɛ nɛ wa maa fɔ mɛ nine ɔ maa ba kpe ɔ. Ke nihi bɔɔ ko po nɛ a maa ba a, nine fɔmi womi ɔ nɛ wa maa bɔ mɔde nɛ wa ma gba a maa ngɔ yi jemi kɛ ha Yehowa nɛ e maa tsɔɔ kaa e ngɛ mi mi himi.—La 145:3, 7; Kpoj. 22:17.
3. Mɛni blɔ nɔ wa maa gu kɛ gba nine fɔmi womi ɔ?
3 E sa kaa asafo mi nikɔtɔma amɛ nɛ a hyɛ bɔ nɛ a asafo ɔ ma plɛ kɛ gba nine fɔmi womi ɔ ha, keji a ma si nine fɔmi womi ɔ ngɛ nihi nɛ a be we mi ɔ a sinya nya loo a ma gba ngɛ ma nɔ ngɛ a zugba kpɔ ɔ mi. Ngɛ Hɔ kɛ Hɔgba a, e sa nɛ a ngɔ nine fɔmi womi ɔ kɛ piɛɛ womi tɛtlɛɛ ɔmɛ a he kɛ ha. Ke nine fɔmi womi ɔ gbami ya da kekleekle Hɔ ngɛ nyɔhiɔ ɔ mi ɔ nɔ ɔ, wa ma gba nine fɔmi womi ɔ titli mohu pe nɛ wa maa je Baiblo mi ní kasemi sisi. Ke nine fɔmi womi ɔ gbami ba nyagbe ɔ, hyɛ bɔ nɛ wa bua maa jɔ ha kaa wa fɔ nihi babauu nine kaa a ba piɛɛ wa he kɛ ye mumi mi niye ní nɛ Yehowa to he blɔ nya a!