He Blɔhi Fuu Nɛ Waa Kɛ Ma Je Yehowa Yi
1. Mɛni blɔ nya ehe lɛ a to nɛ ma ha wɔ he blɔ nɛ waa ‘je Yehowa yi saminya’?
1 Kɛ je March nyɔhiɔ ɔ nɛ be ɔ nɔ ɔ, a to blɔ nya ehe konɛ fiɛɛli a ná he blɔ nɛ a ngɔ ngmlɛfia 30 kɛ sɔmɔ kaa blɔ gbali a wali ngɛ March kɛ April, kɛ ngɛ nyɔhiɔ nɛ kpokpa nɔ hyɛlɔ ɔ ma ba slaa asafo ɔ nɔ. Ke kpokpa nɔ hyɛlɔ ɔ slaami ɔ maa je sisi ngɛ nyɔhiɔ ɔ nyagbe kɛ ya sɛ nyɔhiɔ nɛ nyɛɛ se ɔ mi ɔ, fiɛɛli nɛ a kɛ ngmlɛfia 30 ma tsu blɔ gbali a wami nítsumi ɔ maa hla nyɔhiɔ nɛ a suɔ nɛ a ma tsu ní ngɛ mi ɔ. Blɔ gbali a wali tsuo ma nyɛ maa ya kpe nɛ kpokpa nɔ hyɛlɔ ɔ kɛ daa blɔ gbali kɛ blɔ gbali klɛdɛɛ ɔmɛ maa pee ɔ eko, nɛ a maa hi si kɛ ya si benɛ a maa gbe kpe ɔ nya. Enɛ ɔ tsɔɔ kaa ke wa be nyɛe ma ha ngmlɛfia 50 ɔ, loloolo ɔ, wa ma nyɛ maa ngɔ ngmlɛfia 30 kɛ pee blɔ gbali a wali si eywiɛ sɔuu ngɛ jeha a mi kɛ ‘je Yehowa yi saminya’!—La 109:30; 119:171.
2. Mɛni he blɔhi lɛ nihi nɛ a maa pee blɔ gbali a wali ngɛ be nɛ kpokpa nɔ hyɛlɔ ɔ ma ba sla asafo ɔ ma ná?
2 Be Nɛ Kpokpa Nɔ Hyɛlɔ ɔ Ba Slaa Nyɛ Asafo ɔ: Amlɔ nɛ ɔ, nihi fuu ma ná he blɔ nɛ a kɛ a he maa wo blɔ gbali a wami nitsumi ɔ mi ke kpokpa nɔ hyɛlɔ ɔ ba slaa asafo ɔ, nɛ a maa wo a sibi he wami ke a kɛ lɛ ya fiɛɛmi. (Rom. 1:11, 12) Eko ɔ, blɔ gbali a wali hiɛhiɛɛ nɛ a yaa nítsumi ngɛ otsi ɔ mi ɔ maa to blɔ nya nɛ́ a ngɔ ligbi kake konɛ a kɛ kpokpa nɔ hyɛlɔ ɔ nɛ ya fiɛɛmi. Nihi nɛ a maa ya nítsumi ngɛ otsi ɔ mi tsuo ɔ hu ma nyɛ ma de lɛ konɛ e kɛ mɛ nɛ ya fiɛɛmi Hɔ loo Hɔgba. Jehanɛ hu ɔ, kpe nɛ kpokpa nɔ hyɛlɔ ɔ kɛ blɔ gbali kɛ blɔ gbali klɛdɛɛ ɔmɛ maa pee nɛ́ blɔ gbali a wali maa ya eko ɔ maa wo mɛ he wami wawɛɛ!
3. Mɛni heje nɛ Kaimi ɔ yemi be ɔ ji be nɛ hi wawɛɛ nɛ waa kɛ ma tsu blɔ gbali a wami nítsumi ɔ?
3 Ngɛ March Kɛ April Mi: Nihi nɛ a kɛ ngmlɛfia 30 tsu blɔ gbali a wami nítsumi ɔ nyɔhiɔ kake be ko nɛ be ɔ ngɛ Kaimi ɔ yemi be ɔ mi ɔ ma nyɛ maa ha nɛ a ‘yi jemi afɔle sami’ ɔ nɛ bɔ he enyɔ! (Heb. 13:15) March kɛ April ji nyɔhiɔhi nɛ a hi wawɛɛ nɛ waa kɛ ma bli wa sɔmɔmi nítsumi ɔ mi kaa blɔ gbali a wali. Daa jeha ngɛ nyɔhiɔ nɛ ɔmɛ a mi ɔ, waa kɛ bua jɔmi fɔɔ nihi nine kɛ baa Kaimi ɔ yemi. Jehanɛ se hu ɔ, akɛnɛ nihi fuu bliɔ a sɔmɔmi nítsumi ɔ mi ngɛ Kaimi be ɔ mi heje ɔ, waa kɛ fiɛɛli slɔɔtohi ma nyɛ maa ya fiɛɛmi. Ngɛ Kaimi ɔ se ɔ, wa woɔ nihi nɛ a bua jɔ munyu ɔ he nɛ a ba Kaimi ɔ eko ɔ he wami konɛ a ba bu magbɛ nɔ munyu klɛdɛɛ ɔ tue. Anɛ o tsui maa wo mo gɛjɛmi konɛ o ngɔ he blɔ nɛ ɔmɛ kɛ tsu blɔ gbali a wami nítsumi ɔ eko lo?—Luka 6:45.