KRISTOFOHI A SI HIMI
Mo Tsu Blɔ Gbami Ní Tsumi ɔ Kɛ Je Yehowa Yi
Israel bi ɔmɛ ngɛ yi mi tomi kpakpahi nɛ a maa da nɔ kɛ je Yehowa yi. Yehowa je mɛ kɛ je Egipt, nɛ e kpɔ̃ mɛ kɛ je Farao tabo ɔ dɛ mi! (2Mo 15:1, 2) Mwɔnɛ ɔ, Yehowa yaa nɔ nɛ e peeɔ ní kpakpahi kɛ haa e we bi. Mɛni wa ma nyɛ maa pee kɛ na lɛ si?—La 116:12.
Nɔ́ kake nɛ wa ma nyɛ maa pee ji kaa, wa ma sɔmɔ kaa blɔ gbali a wali aloo daa blɔ gbali. O ma nyɛ maa sɔle konɛ Yehowa nɛ e ha mo suɔmi ɔ kɛ he wami ɔ nɛ́ o kɛ sɔmɔ kaa blɔ gbalɔ. (Flp 2:13) Ni komɛ tsuɔ blɔ gbali a wami ní tsumi ɔ kɛ jeɔ sisi. Fiɛɛli ma nyɛ maa ngɔ ngmlɛfia 30 loo 50 kɛ fiɛɛ ngɛ March kɛ April, kɛ nyɔhiɔ nɛ kpɔ mi nɔ hyɛlɔ ɔ ma ba slaa a we asafo ɔ. Ke o na bɔ nɛ blɔ gbali a wami ní tsumi ɔ ha nɛ o ná bua jɔmi ha a, eko ɔ, lɔ ɔ maa wo mo he wami konɛ o sɔmɔ kaa daa blɔ gbalɔ. Ni komɛ nɛ a tsuɔ ní otsi ɔ mi tsuo aloo nihi nɛ a be nɔmlɔ tso mi he wami po ɔ nyɛ nɛ a ngɛ sɔmɔe kaa daa blɔ gbali. (mwb16.07 8) Niinɛ, Yehowa ji nɔ nɛ e sa kaa waa bɔ mɔde fɛɛ nɛ wa ma nyɛ nɛ́ wa je e yi!—1Kron 16:25.
NYƐƐ HYƐ VIDEO NƐ JI, NYƐMIMƐ YIHI ETƐ NGƐ MONGOLIA MA A MI, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:
Mɛni nyagbahi nɛ nyɛmimɛ yi etɛ ɔmɛ tsu he ní konɛ a nyɛ nɛ a sɔmɔ kaa blɔ gbali?
Mɛni jɔɔmihi nɛ a ná?
Mɛni sɔmɔmi he blɔhi nɛ blɔ gbami ní tsumi ɔ nɛ a tsu ɔ ha nɛ a ná?
Kɛ a nɔ hyɛmi nɔ́ ɔ ná ni kpahi a nɔ he wami ha kɛɛ?