Sane Bimi He

◼ E sa kaa fiɛɛlɔ nɛ a baptisi we lɛ lolo ɔ nɛ e ba asafo mi kpehi, nɛ e ya fiɛɛmi kɛ ya si mɛni be loko a kplɛɛ e nɔ kɛ ha baptisimi?

Yi mi kpɔ mwɔmi nɛ he hia wawɛɛ nɛ nɔ ko maa pee ji kaa e ma ha nɛ a baptisi lɛ. Enɛ ɔ he ɔ, loko a maa kplɛɛ nɔ ko nɔ kɛ ha baptisimi ɔ, e sa nɛ e nu níhi nɛ Mawu ngɛ hlae ngɛ e dɛ ɔ sisi bɔnɛ sa. E sa nɛ e si himi nɛ tsɔɔ kaa e ngɛ e juɛmi nya si nɛ e ma kaa e maa pee Mawu suɔmi nya ní ɔ he ní tsue.

A fã Kristofoli kaa a ko jɔɔ a he nya buami. Enɛ ɔ he ɔ, e sa nɛ fiɛɛlɔ nɛ a baptisi we lɛ ɔ nɛ e pee nɔ ko nɛ e baa asafo mi kpehi daa. (Heb. 10:24, 25) Jehanɛ hu, e pɔɔ munyuhi a heto hami ke e ba asafo mi kpehi. Eko ɔ, e ha nɛ a ngma e biɛ ngɛ Teokrase Sɔmɔmi Sukuu ɔ mi, e ngɛ mi kaa enɛ ɔ piɛɛ we hlami ní ɔmɛ a he mohu.

Jehanɛ hu, akɛnɛ a fã Kristofoli kaa a fiɛɛ sane kpakpa a nɛ a pee nihi kaseli heje ɔ, e sa nɛ fiɛɛlɔ nɛ a baptisi we lɛ lolo ɔ nɛ ya fiɛɛmi daa loko a baptisi lɛ. (Mat. 24:14; 28:19, 20) Nyɔhiɔ enyɛmɛ nɛ e sa kaa e fiɛɛ loko a baptisi lɛ? Nile ngɛ mi kaa a ma ha lɛ be nɛ sa nɛ e kɛ tsɔɔ kaa e ma e juɛmi nya si kaa e kɛ kã maa fiɛɛ daa nyɔhiɔ nɛ e be mi poe gblee. (La 78:37) Se ke e bɔni fiɛɛmi ɔ, e sɛ kaa e se nɛ kɛ tsɔ loko a kplɛɛ e nɔ kaa a baptisi lɛ, eko ɔ ngɛ nyɔhiɔ bɔɔ ko mɛ a se. Ngmlɛfia enyɛmɛ nɛ e sa kaa e bu he akɔtaa? A wui mlaa ko ngɛ enɛ ɔ he. E sa kaa asafo mi nikɔtɔma amɛ nɛ a susu fiɛɛlɔ tsuaa fiɛɛlɔ si himi he konɛ a pee juɛmi nɛ da.—Luka 21:1-4.

E sa kaa asafo mi nikɔtɔmahi (aloo asafo mi sɔmɔli nɛ a ngɛ asafohi nɛ nikɔtɔmahi a he pi ngɛ mi ɔmɛ a mi ɔ) nɛ a kɛ nɔ ko nɛ maa suɔ kaa a baptisi lɛ ɔ maa kpe ɔ nɛ a kai kaa e slɔ bɔnɛ nɔ tsuaa nɔ ngɛ ha. E sa nɛ a kɛ níhi a se kɔmi nɛ tsu ní kɛ hyɛ kaa nɔ ɔ sa kɛ ha baptisimi lo. E sa nɛ a hyɛ kaa nɔ ɔ suɔ kaa e maa pee Yehowa Odasefoli ɔmɛ a kpɛti nɔ kake, nɛ e bua jɔ he blɔ nɛ e ná kaa e kɛ Yehowa asafo ɔ ngɛ bɔe ɔ he, nɛ e bua jɔ fiɛɛmi nɛ e yaa a hu he. Asafo mi nikɔtɔma amɛ le kaa nɔ ɔ nane pí si ngɛ Mawu jami mi lolo, nɛ e be kaa fiɛɛli nɛ a baptisi mɛ nɛ a he be ɔ. Ke asafo mi nikɔtɔma amɛ susu kaa e he sui kɛ ha baptisimi ɔ, e sa nɛ a je mi mi jɔmi mi nɛ a kɛ Ngmami ɔ nɛ tsɔɔ lɛ nɔ́ heje, konɛ a ye bua lɛ nɛ e ya e hɛ mi ngɛ Mawu jami mi.