Moo Ma Baiblo Mi Nikasemi Nɛ A Maa Je Sisi Ngɛ Kekleekle Hɔ ɔ Nɔ ɔ Nɔ Mi

Ke je May 2011 nyɔhiɔ ɔ nɔ nɛ a wo fiɛɛli tsuo he wami kaa a bɔ mɔde nɛ a je Baiblo mi nikasemi sisi ngɛ kekleekle Hɔ ngɛ nyɔhiɔ ɔ mi ɔ nɔ. Bɔnɛ pee nɛ wa nyɛ nɛ waa pee jã a, a ngma munyu nɛ e yi ji, “Baiblo Mi Sane Bimihi Nɛ A Ha Heto” ngɛ Hwɔɔmi Mɔ ɔ se. Enɛ ɔ he ɔ, ke a ngɛ kpe kɛ ha fiɛɛmi yami ngɛ kekleekle Hɔ nɛ ngɛ nyɔhiɔ ɔ mi ɔ pee ɔ, e sa kaa a susu bɔnɛ a ma nyɛ maa ngɔ munyu nɛ ɔ kɛ tsu ní kɛ je Baiblo mi nikasemi sisi ɔ he, nɛ a pee he peemi kɛ tsɔɔ.

Asafo mi nikɔtɔma amɛ ma nyɛ ma ha fiɛɛmi yami kuu ɔmɛ nɛ kpe ngɛ hehi nɛ a kpeɔ ngɛ ɔ ngɛ kekleekle Hɔ ɔ nɔ, aloo a ma nyɛ ma ha nɛ kuu ɔmɛ tsuo nɛ ba kpe ngɛ Matsɛ Yemi Asa a nɔ. Se ke asafohi nɛ hiɛ pe kake lɛ kpeɔ ngɛ Matsɛ Yemi Asa a nɔ ɔ, e sɛ kaa asafo ko nɛ tsake ligbi klɛdɛɛ nɛ a kɛ jeɔ Baiblo mi nikasemi sisi nɛ ɔ kɛ ya ligbi kpa, akɛnɛ a suɔ kaa kuu ɔmɛ tsuo nɛ a bla kɛ ya fiɛɛmi ɔ heje.