Sane Bimi He

◼ Ke nyɛmiyo ko ngɛ Baiblo mi níkasemi pee ngɛ sinya nya nɛ fiɛɛlɔ nɛ piɛɛ e he ɔ ji nyumu ɔ, anɛ e sa kaa e ha e yi nɔ lo?

Ke nyɛmiyo ko ngɛ Baiblo mi níkasemi nɛ e to he blɔ nya nɛ e peeɔ daa pee, nɛ nyɛminyumu ko piɛɛ e he ɔ, e sa nɛ nyɛmiyo ɔ nɛ ha e yi nɔ. (1 Kor. 11:3-10) July 15 2002, Blɛfo gbi Hwɔɔmi Mɔ ɔ, bafa 27 ɔ tsɔɔ mi ke: “Enɛ ɔ ji ní tsɔɔmi nɛ a sɛ hlami to he blɔ nya, nɛ fiɛɛlɔ nɛ ngɛ nikasemi ɔ pee ɔ hyɛɔ nɔ. Ngɛ si fɔfɔɛhi kaa kikɛ mi ɔ, Baiblo mi nikasemi ba peeɔ asafo ɔ mi nikasemi fã ko. Ke nyɛmiyo nɛ a baptisi lɛ kɛ nɔ ko ngɛ Baiblo mi níkasemi pee, nɛ Odasefono nyumu nɛ a baptisi lɛ piɛɛ e he ɔ, e sa kaa nyɛmiyo ɔ nɛ ha e yi nɔ.” Ke e maa pee Baiblo mi níkasemi ɔ ngɛ nɔ ɔ we mi jio, e sinya nya jio, loo he kpa ko jio ɔ, e sa kaa e ha e yi nɔ.

Se ke nyɛmiyo ko kɛ wetsɛ ko to we Baiblo mi níkasemi he blɔ nya lolo, nɛ e kpale ya slaa lɛ kɛ yi mi tomi ɔ kaa e maa tsɔɔ lɛ bɔnɛ waa kɛ nihi kaseɔ Baiblo ɔ ha loo e kɛ lɛ ma susu nɔ́ ko he ngɛ wa womi ɔmɛ eko mi po ɔ, e he be hiae kaa e ha e yi nɔ ke nyɛminyumu ko piɛɛ e he. Akɛnɛ behi fuu ɔ, wa kpaleɔ ya slaa nihi si abɔ loko wa toɔ Baiblo mi níkasemi he blɔ nya heje ɔ, e sa nɛ fiɛɛli nɛ a ngɔ nile kɛ tsu ní konɛ a hyɛ si fɔfɔɛhi nɛ e ma bi kaa nyɛmiyo nɛ ha e yi nɔ.