Bɔnɛ O Ma Dla Nya Blimi Munyuhi Ha Nɛ Maa Nu Tso
1. Mɛni heje nɛ e he hia kaa wa ma ha nɛ wa nya blimi munyu maa nu tso?
1 Kaa bɔnɛ ke niye ní ko ngɛ via jee nɛ e haa nɛ niye ní ɔ jloɔ nɔ ɔ, jã kɛ̃ nɛ nya blimi munyu nɛ nuu tso ɔ bliɔ blɔ nɛ a kɛ nɔ susuɔ Ngmami ɔ he. E ngɛ mi kaa e slo bɔnɛ nya blimi munyuhi nɛ nuu tso ɔ eko tsuaa eko nya kɛmi ngɛ ha, nɛ e slo níhi nɛ a ma de ɔ hulɔ, se kaa bɔnɛ ke a hoo niye ní ko saminya nɛ e ngɔɔ ɔ, jã kɛ̃ nɛ e sa kaa waa sɛ hlami nɛ wa susu níhi a he, nɛ wa dla wa he saminya loko wa nya blimi munyuhi maa nu tso. (Abɛ 15:28) Mɛni haa nɛ nya blimi munyu nuu tso?
2. Mɛni blɔ nɔ wa ma nyɛ maa gu kɛ dla nya blimi munyu nɛ ma tle nihi a bua jɔmi si?
2 Moo Ngɔ Munyuhi Nɛ Nihi A Bua Maa Jɔ He Kɛ Tsu Ní: E sa nɛ wa nya blimi munyu ɔ nɛ tle wetsɛ ɔ bua jɔmi si, ke pi jã a, wetsɛ ɔ maa po ní sɛɛmi ɔ nɔ. Lɔɔ he ɔ, ke wa ngɛ wa he dlae ɔ, e sa nɛ wa susu níhi nɛ nihi a bua maa jɔ he ɔ he. Anɛ nihi nɛ a ngɛ zugba kpɔ ɔ mi ɔ a bua jɔ níhi kaa nɔ yemi kpakpa, weku si himi nɛ bua jɔmi ngɛ mi, loo ta nɛ a be hwue hu ɔ he lo? Behi fuu ɔ, nihi suɔ kaa a maa tsɔɔ a juɛmi ngɛ níhi a he, lɔɔ he ɔ, e sa nɛ waa ngɔ sane bimihi nɛ ma ha nɛ nihi ma je a juɛmi kpo ɔ kɛ tsu ní. O ma nyɛ maa ngɔ nya blimi munyuhi nɛ ngɛ Wa Matsɛ Yemi Sɔmɔmi ɔ mi ɔ eko kɛ tsu ní ngɛ o zugba kpɔ ɔ mi. Ke o kɛ o weku ɔ ngɛ gbɔkuɛ Weku Mawu Jami pee ɔ, nyɛ ma nyɛ maa kase nya blimi munyu nɛ ɔmɛ ekomɛ.
3. Mɛni heje nɛ ke wa ngɛ wa nya blimi munyu dlae ɔ, e sa nɛ wa susu nihi nɛ a ngɛ zugba kpɔ ɔ mi ɔ a kusumihi kɛ a si fɔfɔɛhi a he ɔ?
3 Mo Susu Nihi A Kusumi Kɛ A Si Fɔfɔɛ He: Ngɛ he komɛ ɔ, e biɔ nɛ waa tu wa munyu ɔ tɛ̃ɛ. Se ngɛ he komɛ hu ɔ, ke nibwɔ ya sla wetsɛ ko, nɛ e bi we bɔnɛ wetsɛ ɔ kɛ e weku ɔ a ngɛ ha, nɛ eko ɔ, é je e he si ɔ, a naa nibwɔ ɔ kaa nɔ builɔ. Ngɛ he komɛ ɔ, jami nɛ ni ɔmɛ ngɛ mi ɔ ma nyɛ ma ha nɛ waa ngɔ Baiblo ɔ kɛ tsu ní ngɛ wa nya blimi munyu ɔ mi. (Níts. 2:14-17) Se ke ni ɔmɛ a pi nihi nɛ a tsɛɛ a he Kristofoli, aloo ke a be jami ko mi kulaa a, e maa hi kaa waa kɛ Baiblo ɔ ma tsu ní ke wa kpale ya sla mɛ mohu pe nɛ waa kɛ ma tsu ní ngɛ kekleekle ligbi ɔ nɔ.—Níts. 17:22-31.
4. Kɛ e sa kaa munyuhi nɛ waa kɛ maa je wa nya blimi munyu sisi ɔ nɛ hi ha kɛɛ?
4 Munyuhi Nɛ O Kɛ Maa Je Sisi: Mo dla munyuhi nɛ o kɛ maa je o nya blimi munyu ɔ sisi ɔ saminya. Behi fuu ɔ, e hi saminya kaa waa kɛ munyu kpiti nɛ a sisi numi yi ma tsu ní. Bɔnɛ wa tuɔ munyu kɛ jeɔ ní sɛɛmi sisi ɔ he hia wawɛɛ. O kɛ bua jɔmi nɛ tu munyu. Mo ha nɛ muɔ hɛlii nɛ hi o nya he kɛ tsɔɔ kaa o susuɔ wetsɛ ɔ he. Ke waa kɛ ga womi nɛ ɔ tsu ní ɔ, e maa ye bua wɔ konɛ wa dla nya blimi munyuhi nɛ maa wo nihi nɛ a ngɛ wa zugba kpɔ ɔ mi ɔ he wami konɛ a ye ní ngɛ ‘Yehowa we okplɔɔ ɔ’ nɔ.—1 Kor. 10:21.