Nyɛɛ Kase Gbali Ɔmɛ A Nɔ Hyɛmi Nɔ́ ɔ—Mika
1. Mɛni sane bimi nɛ eko ɔ, Mika susu he, nɛ mɛni heje nɛ e fiɛɛmi ɔ pee we yaka a?
1 ‘Mɛni be je yaya nɛ ɔ maa ba nyagbe?’ Eko ɔ, gbalɔ Mika susu sane bimi nɛ ɔ he hyɛ benɛ e ngɛ Yehowa kojomi sɛ gbi nɛ kɔ Israel kɛ Yuda matsɛ yemi ɔmɛ a he ɔ fiɛɛe ɔ. Se e fiɛɛmi ɔ pee we yaka. Yehowa munyu nɛ e gba kɛ si Samaria ma a ba mi ngɛ Mika be ɔ mi ngɛ jeha 740 L.M.B. (Mika 1:6, 7) Pee se ɔ, a kpata Yerusalem ma a hɛ mi ngɛ jeha 607 L.M.B. (Mika 3:12) Mɛni blɔ nɔ wa maa gu kɛ kase Mika be mi nɛ wa ngɛ Yehowa kojomi ɔ blɔ hyɛe ngɛ wa be nɛ ɔ mi ɔ?
2. Benɛ wa ngɛ Yehowa ligbi ɔ blɔ hyɛe nɛ ɔ, mɛni blɔ nɔ wa toɔ wa tsui si ngɛ, nɛ mɛni heje?
2 Moo To O Tsui Si: Mika ngma ke: ‘Se imi lɛɛ, ma hyɛ Yehowa blɔ. I kɛ ye hɛ maa fɔ Mawu nɔ, ejakaa lɛ ji nɔ nɛ ma he ye yi wami.’ (Mika 7:7) Ngɛ anɔkuale mi ɔ, benɛ Mika ngɛ nyagbe ɔ blɔ hyɛe ɔ, e hí si gu kɛkɛ. E ya nɔ nɛ e tsu ní kaa Yehowa gbalɔ. Be mi nɛ wa ngɛ Yehowa ligbi ɔ blɔ hyɛe nɛ ɔ, e sa nɛ ‘waa pee klɔuklɔu, nɛ waa ngɔ wa he kɛ ha Mawu.’ (2 Pet. 3:11, 12) Yehowa tsui si tomi ɔ haa nihi he blɔ konɛ a tsake a tsui. (2 Pet. 3:9) Enɛ ɔ he ɔ, waa kɛ ga nɛ Baiblo ɔ wo wɔ kaa waa kase gbali ɔmɛ a tsui si tomi ɔ tsuɔ ní.—Yak. 5:10.
3. Mɛni heje e sa nɛ wa bi Yehowa nɛ e ha wɔ e mumi klɔuklɔu ɔ?
3 Moo Ngɔ O He Kɛ Fɔ Yehowa He Wami ɔ Nɔ: E ngɛ mi kaa nítsumi nɛ a ha Mika a he wa mohu lɛɛ, se e ngɛ hɛ kɛ nɔ fɔmi kaa Yehowa ma ha lɛ he wami nɛ́ e kɛ ma tsu ní ɔ. (Mika 3:8) E be nyakpɛ kaa Baiblo ɔ woɔ wɔ he wami kaa wa bi Mawu nɛ e ha wɔ he wami. E haa nihi nɛ pɔ tɔ mɛ ɔ he wami konɛ a nyɛ nɛ a tsu a teokrase blɔ nya nítsumihi. (La 84:5, 7; Yes. 40:28-31) Anɛ o ná enɛ ɔ mi níhi a si kpami ngɛ o sɔmɔmi nítsumi ɔ mi hyɛ lo? Anɛ o biɔ Yehowa daa kaa e ngɔ e mumi klɔuklɔu ɔ kɛ ye bua mo lo?—Luka 11:13.
4. Mɛni blɔ nɔ nɛ bɔnɛ Mika hi si ha a peeɔ nɔ hyɛmi nɔ́ kpakpa kɛ haa wɔ mwɔnɛ ɔ?
4 Mika ngɔ Mawu suɔmi nya ní peemi kɛ pee nɔ́ titli ngɛ e si himi mi. E ngɛ mi kaa nihi nɛ a hi si ngɛ he nɛ Mika hi ɔ a je mi bami puɛ mohu lɛɛ, se Mika ma e juɛmi nya si kaa e maa ya nɔ maa ye Yehowa anɔkuale. Jã kɛ̃ nɛ waa kɛ anɔkuale yemi he ka kpeɔ daa ligbi. Lɔɔ he ɔ, nyɛ ha nɛ waa mwɔ wa yi mi kpɔ kaa ‘wa maa nyɛɛ ngɛ Yehowa wa Mawu ɔ biɛ mi kɛ ya neneene.’—Mika 4:5.