Ke Nyɛ Ya Fiɛɛmi ɔ, Ko Ma O Nya
1. Mɛni blɔ nɔ wa maa gu kɛ kase su nɛ bɔfo Paulo je kpo ɔ ke waa kɛ nɔ ko ya fiɛɛmi?
1 Bɔfo Paulo na be nɛ e kɛ e nyɛmimɛ Kristofoli hi si ɔ kaa e ji he blɔ nɛ mɛ tsuo a ná nɛ a kɛ maa ‘wo a sibi he wami.’ (Rom. 1:12) Ke o kɛ fiɛɛlɔ ko ya fiɛɛmi ɔ, anɛ o ngɔɔ he blɔ ɔ kɛ woɔ lɛ he wami, nɛ o yeɔ bua lɛ lo? Ke o kɛ nɔ ko ya fiɛɛmi ɔ, o kɛ lɛ nɛ sɛɛ níhi nɛ ye bua mo nɛ ha nɛ o sɔmɔmi nítsumi ɔ pi si ɔ he ní.
2. Mɛni wa ma nyɛ maa pee kɛ ye bua nɔ nɛ waa kɛ lɛ ya fiɛɛmi ɔ konɛ e ná kã, nɛ mɛni heje nɛ enɛ ɔ he hia a?
2 Moo Wo Lɛ Kã: Fiɛɛli fuu ngɛ nɛ bɔnɛ a peeɔ a hɛ mi ha, loo bɔnɛ a tuɔ munyu ngɛ fiɛɛmi tso mi ɔ ma nyɛ maa tsɔɔ kaa a yeɔ gbeye. Wa ma nyɛ maa ye bua mɛ nɛ a ná kã ke wa je wa tsui mi nɛ wa je a yi. Mɛni ji blɔ kpahi a nɔ nɛ wa maa gu kɛ wo mɛ kã? Nɔ́ nɛ Kpokpa nɔ hyɛlɔ ko pɔɔ peemi ji, ke e kɛ nɔ ko ya fiɛɛmi ɔ, e deɔ nɔ ɔ kaa be komɛ ɔ, e yeɔ gbeye, nɛ e sɔleɔ konɛ e ye gbeye yemi ɔ nɔ. Nyɛminyumu ko hu de ke: “Muɔ hɛlii nɛ hii ye nya he ɔ ji nɔ́ nɛ yeɔ bua mi nɛ i náa kã. Be komɛ ɔ, i sɔleɔ konɛ ma nyɛ ma pee jã.” Anɛ nɔ́ ko ye bua mo nɛ o ná kã ngɛ sɔmɔmi nítsumi ɔ mi lo? O kɛ nɔ nɛ o kɛ lɛ ya fiɛɛmi ɔ nɛ sɛɛ he ní.
3. Mɛni wa ma nyɛ ma de nɔ nɛ waa kɛ lɛ ngɛ fiɛɛe ɔ nɛ ma nyɛ maa ye bua lɛ konɛ e sɔmɔmi nítsumi ɔ nɛ pi si?
3 Nyɛɛ Sɛɛ Blɔhi A Nɔ Nɛ O Guɔ Kɛ Fiɛɛ ɔ He Ní: Anɛ o kɛ nya blimi munyu loo sane bimi kpiti ko aloo eko ɔ, nɔ́ ko nɛ yaa nɔ ngɛ nyɛ kpɔ ɔ mi ɔ tsuɔ ní kɛ jeɔ ní sɛɛmi sisi, nɛ e haa o munyu ɔ nuu tso lo? Anɛ o ngɔ fiɛɛmi munyu ko kɛ tsu ní ngɛ blɔ ko nɔ, nɛ e ngɛ yiblii woe lo? Mo de nɔ nɛ o kɛ lɛ ya fiɛɛmi ɔ. (Abɛ 27:17) Ke nyɛ kpale yaa slaa nɔ ko ɔ, o ma nyɛ ma de nɔ nɛ o kɛ lɛ ngɛ fiɛɛe ɔ nɔ́ nɛ o to kaa o maa tsɔɔ nɔ ɔ, kɛ bɔnɛ o ma tsu he ní ha. Ke nyɛɛ kɛ nɔ ko gbe Baiblo mi nikasemi ko nya a, o ma nyɛ maa tsɔɔ nɔ nɛ o kɛ lɛ ya fiɛɛmi ɔ nɔ́ heje nɛ o tu nɔ́ ko he munyu, loo o kɛ ngmami ko tsu ní, aloo nɔ́ heje nɛ o tsɔɔ ní ɔ ngɛ blɔ ko nɔ kɛ ye bua nikaselɔ ɔ.
4. Mɛni heje nɛ e sa nɛ wa bua nɛ jɔ he kaa wa maa ye bua wa nyɛmimɛ fiɛɛli ɔ?
4 Pi nihi nɛ a he we yi ɔ pɛ nɛ fiɛɛli nɛ a hi si ngɛ kaseli ɔmɛ a be ɔ mi suɔ kaa a maa ye bua. A na se nami nɛ ngɛ he wami womi kɛ yemi kɛ buami nɛ a kɛ ma ha a sibi ɔ he ɔ hulɔ. (Níts. 11:23; 15:32) Bɔfo Paulo tsɔse niheyo wayoo Timoteo, nɛ e wo lɛ he wami kaa e tsɔɔ ni kpahi níhi nɛ e kase ɔ. (2 Tim. 2:2) Ke wa ye bua wa nyɛmimɛ Kristofoli ngɛ fiɛɛmi mi ɔ, a bua maa jɔ, nɛ a sɔmɔmi nítsumi ɔ maa pi si, nɛ wa maa sa wa Tsɛ nɛ ngɛ hiɔwe ɔ hɛ mi.—Heb. 13:15, 16.