Wa He Nɛ Maa Be Ngɛ Fiɛɛmi Ní Tsumi ɔ Mi​—Ye Bua Nɔ Nɛ O Kɛ Lɛ Ya Fiɛɛmi ɔ

Nɔ He Je Nɛ E He Hia: Yesu le se nami nɛ ngɛ nihi enyɔ nɛ a maa ya fiɛɛmi ɔ he. Enɛ ɔ he ɔ, benɛ e tsɔ e kaseli 70 ɔmɛ kaa a sɛ e hlami nɛ a fiɛɛ ngɛ he nɛ e maa ya a, e gba mɛ enyɔɔnyɔ. (Luka 10:1) He piɛɛlɔ ngɛ fiɛɛmi tso mi ma nyɛ maa ye bua ke e nyɛmi fiɛɛlɔ kɛ si fɔfɔɛ nɛ mi wa ko ya kpe, loo ke e li bɔ nɛ e maa pee kɛ ha wetsɛ ko heto ha. (Fiɛlɔ 4:9, 10) E ma nyɛ ma de fiɛɛlɔ ɔ e níhi a si kpamihi, loo e ma nyɛ maa wo lɛ ga nɛ maa ye bua lɛ konɛ e pee fiɛɛlɔ nɛ e he be. (Abɛ 27:17) Ke a je we ko mi kɛ yaa we kpa mi ɔ, a ma nyɛ maa sɛɛ ní kɛ wo a sibi he wami.​—Filip. 4:8.