Nihi Nɛ Wa Haa Mɛ Womi Tɛtlɛɛ Ɔmɛ Daa a Nɛ Waa Kɛ Mɛ Maa Je Baiblo Mi Nikasemi Sisi
1. Mɛni heje nɛ kɛ je blema a, Yehowa asafo ɔ bɔni fiɛɛli he wami womi kaa a hla nihi nɛ a ma ha mɛ womi tɛtlɛɛ ɔmɛ daa a?
1 Nihi fuu ngɛ nɛ a sume kaa waa kɛ mɛ nɛ kase Baiblo ɔ, se a suɔ kaa a maa kane wa womi tɛtlɛɛ ɔmɛ. Enɛ ɔ he ɔ, pi mwɔnɛ ɔ nɛ Yehowa asafo ɔ bɔni fiɛɛli he wami womi kaa a hla nihi nɛ a suɔ kaa a maa kane wa womi tɛtlɛɛ ɔmɛ ɔ, nɛ a ha mɛ eko daa. Behi fuu ɔ, nihi nɛ a pɔɔ wa womi tɛtlɛɛ ɔmɛ kanemi ɔ náa suɔmi kɛ haa Mawu Munyu ɔ. (1 Pet. 2:2) Be ko maa ba nɛ nɔ́ ko nɛ a kane ɔ ma nyɛ maa ta a tsui he, nɛ e ma ha nɛ a maa ngmɛ blɔ konɛ waa kɛ mɛ nɛ kase Baiblo ɔ.
2. Nihi nɛ wa haa mɛ womi daa a, kɛ wa maa pee kɛɛ konɛ a bua jɔmi ko ta?
2 Mo Pue Anɔkuale Wu ɔ Nɔ “Nyu”: Koo ngɔ womi tɛtlɛɛ ɔmɛ kɛ ha wetsɛ ɔ kɛkɛ, mohu ɔ, o kɛ wetsɛ ɔ nɛ sɛɛ ní, nɛ o bɔ mɔde kaa o ma ha nɛ huɛ bɔmi nɛ hi o kɛ lɛ nyɛ kpɛti. Enɛ ɔ ma ha nɛ o maa le e si fɔfɔɛ, níhi nɛ e bua jɔ he, kɛ níhi nɛ e heɔ yeɔ, nɛ lɔɔ maa ye bua mo konɛ o kɛ nɔ́ se kɔmi nɛ tu munyu. (Abɛ 16:23) Be tsuaa be nɛ o ma ya slaa lɛ ɔ, e sa nɛ o dla o he. Ke e maa hi ɔ, moo tu oti ko nɛ ngɛ womi tɛtlɛɛ ɔmɛ a mi, kɛ ngmamihi nɛ kɔɔ he ɔ he munyu kpiti konɛ o kɛ pue anɔkuale wu ɔ nɔ nyu ngɛ e tsui mi. (1 Kor. 3:6) Be tsuaa be nɛ o ma ya slaa lɛ ɔ, moo ngma be nɛ o kɛ ya lejɛ ɔ, womi nɛ o kɛ ha lɛ, munyuyi kɛ ngmamihi nɛ o kɛ lɛ susu he ɔ kɛ fɔ si.
3. Si enyɛmɛ nɛ e sa kaa wa kpale ya slaa nihi nɛ wa haa mɛ womi tɛtlɛɛ ɔmɛ daa a?
3 Si Enyɛmɛ Nɛ E Sa Kaa Waa Kpale Ya Slaa Mɛ? E sa nɛ o kpale ya slaa nihi nɛ o haa mɛ womi tɛtlɛɛ ɔmɛ ɔ si kake daa nyɔhiɔ, konɛ o ha mɛ womi tɛtlɛɛ ɔmɛ ehehi nɛ ba a eko. Se o ma nyɛ maa pɔ lejɛ ɔ yami ngɛ bɔnɛ nɔ ɔ si fɔfɔɛ ngɛ ha kɛ bɔnɛ e bua jɔ munyu ɔ he ha a nya. Kaa nɔ hyɛmi nɔ́ ɔ, ke o ha nɔ ɔ womi tɛtlɛɛ ɔmɛ ɔ, o ma nyɛ maa kpale ya slaa lɛ ngɛ otsi kake loo otsi enyɔ se, nɛ o de lɛ ke, “I ba slaa mo konɛ ma tsɔɔ mo nɔ́ ko kpiti ko ngɛ womi tɛtlɛɛ ɔ nɛ i ha mo lingmi ɔ mi.” Lɔɔ ma ha nɛ nɔ ɔ bua maa jɔ kaa e maa kane jamɛ a munyu ɔ. Ke e kane momo ɔ, o ma nyɛ ma bi lɛ e juɛmi ngɛ nɔ́ nɛ e kane ɔ he, konɛ o kɛ lɛ nɛ susu he kpiti. Aloo ke nɔ ɔ bua jɔ wa womi ɔmɛ a kanemi he ɔ, o ma nyɛ ma ya slaa lɛ nɛ o ha lɛ dɛ womi, womiyo, loo womi nɛ waa kɛ ngɛ hae ngɛ jamɛ a nyɔhiɔ ɔ mi ɔ eko.
4. Ke e ngɛ mi hluu ɔ, mɛni wa ma nyɛ maa pee kɛ hyɛ kaa nihi nɛ wa haa mɛ womi tɛtlɛɛ ɔmɛ daa a suɔ nɛ waa kɛ mɛ nɛ kase Baiblo ɔ?
4 Mo ko mlɛ nɛ wetsɛ ɔ nɛ de mo kaa e suɔ nɛ o kɛ lɛ nɛ kase Baiblo ɔ. Moo sɛ hlami nɛ o de lɛ. Ke e ha we blɔ nɛ o kɛ lɛ nɛ kase Baiblo ɔ ngɛ be nɛ be ɔ mi po ɔ, ke e ngɛ mi hluu ɔ, o ma nyɛ kɛ lɛ maa sɛɛ Hwɔɔmi Mɔ ɔ mi munyu nɛ e yi ji, “Baiblo Mi Sane Bimihi Nɛ A Ha Heto” ɔ he ní, konɛ o kɛ hyɛ kaa e maa suɔ nɛ nyɛ susu he lo. Eko ɔ, o kɛ lɛ ma nyɛ maa je Baiblo mi nikasemi sisi ngɛ e sinya nya. Se ke o nyɛ we nɛ o kɛ lɛ nɛ je Baiblo mi nikasemi sisi po ɔ, o ma nyɛ maa ya nɔ nɛ o ha lɛ womi tɛtlɛɛ ɔmɛ bɔnɛ pee nɛ e bua jɔmi nɛ ko ta.