Wa He Nɛ Maa Be Ngɛ Fiɛɛmi Ní Tsumi ɔ Mi—Hla Nihi Nɛ O Ma Ha Mɛ Womi Tɛtlɛɛ Ɔmɛ Daa Nyɔhiɔ

Nɔ́ He Je Nɛ E He Hia: Nihi fuu ngɛ nɛ a kaneɔ wa womi tɛtlɛɛ ɔmɛ, se a sume kaa waa kɛ mɛ nɛ kase Baiblo ɔ. Eko ɔ, a bua jɔ jami nɛ a ngɛ mi ɔ pɛ he, aloo a susuɔ kaa a be deka nɛ a kɛ maa kase ní. Se ke a pɔɔ wa womi tɛtlɛɛ ɔmɛ kanemi ɔ, e ma ha nɛ a bua maa jɔ Mawu Munyu ɔ he. (1 Pet. 2:2) Eko ɔ, nɔ́ ko nɛ a kane ɔ ma nyɛ maa ta a tsui he, aloo a si fɔfɔɛ ma nyɛ ma tsake. Ke wa pɔɔ mɛ slaami kpitikpiti nɛ waa kɛ mɛ sɛɛɔ ní ɔ, a bua maa jɔ wa he, nɛ wɔ hu wa maa le níhi nɛ a bua jɔ he. Kɛ yaa kɛ yaa a, a ma nyɛ maa ngmɛ blɔ konɛ waa kɛ mɛ nɛ kase Baiblo ɔ.

Blɔ Nɔ Nɛ O Maa Gu Kɛ Pee:

Daa nyɔhiɔ ɔ, moo to be nɛ o ya ha mɛ Hwɔɔmi Mɔ ɔ, kɛ Awake! ehe ɔmɛ eko. O ma nyɛ ma ya slaa mɛ be kpa ngɛ nyɔhiɔ ɔ mi konɛ o de mɛ munyu ko nɛ je kpo ngɛ womi tɛtlɛɛ nɛ o kɛ ha mɛ ɔ mi, aloo o ma nyɛ ma ha mɛ womi nɛ a tsɔɔ kaa waa ngɔ kɛ ha ngɛ nyɔhiɔ ɔ mi ɔ eko. Enɛ ɔ maa wo mɛ he wami nɛ a maa kane womi ɔ. Be tsuaa be nɛ o ma ya slaa wetsɛ ɔ, moo ngma níhi nɛ o kɛ lɛ susu he ɔ kɛ fɔ si.—Hyɛ January 2014 Wa Matsɛ Yemi Sɔmɔmi ɔ bf. 3.
Be tsuaa be nɛ o ma ya slaa wetsɛ ɔ, e sa nɛ o dla o he loko o ya. Koo ngɔ womi tɛtlɛɛ ɔmɛ kɛ ha wetsɛ ɔ kɛkɛ, mohu ɔ, o kɛ lɛ nɛ sɛɛ ní konɛ huɛ bɔmi kpakpa nɛ hi nyɛ kpɛti.
Pee klaalo kaa ke o ná he blɔ ɔ, o kɛ wetsɛ ɔ maa je Baiblo mi ní kasemi sisi nɔuu. Ke nɔ ko nɛ o haa lɛ womi tɛtlɛɛ ɔmɛ ɔ bi mo nɔ́ nɛ Baiblo ɔ de ngɛ sane ko he ɔ, ngɔɔ wa Baiblo kasemi womi nɛ haa e sane bimi ɔ heto ɔ eko kɛ ya ha lɛ nɛ nyɛ susu he. Loko o maa je ɔ, moo ngɔ sane bimi ko nɛ kɔɔ nɔ́ nɛ nyɛ kase ɔ he kɛ si lɛ, nɛ o kɛ lɛ ya susu he be kpa. Ke o kɛ nɔ ɔ pɔɔ ní sɛɛmi kpitikpiti ngɛ Baiblo ɔ mi aloo wa Baiblo kasemi womi ɔmɛ eko mi ɔ, o ma nyɛ maa bu he akɔtaa kaa Baiblo mi ní kasemi. Anɛ o ha wetsɛ ɔ Sane Kpakpa womiyo ɔ eko, nɛ o tsɔɔ lɛ bɔ nɛ waa kɛ nihi kaseɔ Baiblo ɔ ha lo? Anɛ o je Mɛni He Je Nɛ E Sa Kaa Waa Kase Baiblo ɔ? kɛ Kɛ Wa Peeɔ Baiblo Mi Ní Kasemi Ha Kɛɛ? video ɔmɛ kɛ tsɔɔ lɛ lo? Ke be ko nɛ be ɔ, wetsɛ ɔ bua jɔɛ he kaa waa kɛ lɛ nɛ kase Baiblo ɔ po ɔ, e si fɔfɔɛ ma nyɛ ma tsake. Anɛ o ma nyɛ maa ka ekohu nɛ o hyɛ kaa e maa kplɛɛ nɛ nyɛɛ kase Baiblo ɔ lo?

Moo Ka Enɛ ɔ Ngɛ Nyɔhiɔ ɔ Mi:

Moo ngma nihi nɛ o ma nyɛ ma ha mɛ womi tɛtlɛɛ ɔmɛ eko daa nyɔhiɔ ɔ a biɛ kɛ fɔ si. Ha mɛ womi tɛtlɛɛ ehe ɔmɛ eko, nɛ o de mɛ kaa ke ehe ba a, o ma ba ha mɛ eko.