Sane Bimi He

◼ Mɛni nɛ e sa kaa jokuɛwi nɛ a kase konɛ a nane nɛ pi si ngɛ anɔkuale ɔ mi?

Fɔli nɛ a ji Kristofohi bɔɔ mɔde kaa a ma tsɔse a bimɛ, nɛ ‘a wo mɛ ga kpakpa nɛ maa sa Yehowa hɛ mi.’ (Efe. 6:4) Kaa nɔ hyɛmi nɔ́ ɔ, fɔli yɔse kaa se nami ngɛ he kaa a kɛ a bimɛ ma susu daa ngmami ɔ he daa mɔtu. Ngɛ weku Mawu jami be loo be kpahi a mi ɔ, wekuhi ma nyɛ maa pee kake kɛ hyɛ asafo ɔ videohi, nɛ a susu munyu komɛ ngɛ Young People Ask blɔ he ɔ he, loo nɛ a pee Baiblo mi sanehi a he peemi kɛ tsɔɔ. Se loko jokuɛwi maa ‘ya a hɛ mi’ ɔ, e sa nɛ a tsɔɔ mɛ Baiblo mi anɔkualehi nɛ a mi kuɔ ɔmɛ.​—Heb. 6:1.

Mo susu níhi nɛ wa tsɔɔ nihi ngɛ wa zugba kpɔ ɔ mi ɔ he nɛ o hyɛ. Ke wa ya nɔ ko ngɔ kekle be, loo wa kpale ya slaa lɛ ɔ, wa bɔɔ mɔde nɛ waa kɛ lɛ jee Baiblo mi ní kasemi sisi ngɛ Mɛni Tutuutu Ji Baiblo ɔ Tsɔɔmi? womi ɔ mi. Ke waa kɛ nɔ ɔ gbe lɔ ɔ kasemi nya a, waa kɛ lɛ kaseɔ “Nyɛɛ To Nyɛ He Ngɛ Mawu Suɔmi ɔ Mi” womi ɔ. Mɛni he je? Ejakaa Baiblo ɔ Tsɔɔmi womi ɔ haa nɛ ní kaselɔ ɔ náa Ngmami ɔ mi sisije nile. “Mawu Suɔmi” womi ɔ tsɔɔ mɛ bɔ nɛ a kɛ Baiblo sisi tomi mlaa nɛ ɔmɛ ma tsu ní ha ngɛ a daa ligbi si himi mi. Ke waa kɛ ni hehi kase womi enyɔ ɔmɛ ɔ, e yeɔ bua mɛ nɛ a ‘mɛtɛɛ’ Kristo he nɛ a ‘nane piɔ si ngɛ asafo ɔ mi.’ (Kol. 2:6, 7) Anɛ wa bimɛ ɔmɛ be womi nɛ ɔ he se náe lo? Mɛ hu e sa nɛ waa tsɔɔ mɛ kpɔmi nɔ́ ɔ, Matsɛ Yemi ɔ, kɛ gbogboehi a si fɔfɔɛ he ní. E sa nɛ jokuɛwi ɔmɛ hu nɛ a le nɔ́ he je nɛ Mawu ngmɛ nɔ́ nami blɔ, kɛ okadihi nɛ a kɛ yɔseɔ je nɛ ɔ nyagbe be ɔ. E sa nɛ a ná nɔ mi mami kaa Yehowa Odasefohi a jami ɔ ji anɔkuale jami ɔ nɛ. E sa nɛ jokuɛwi ɔmɛ nɛ a nu Baiblo mi sisi tomi mlaa amɛ a sisi, nɛ́ a le bɔ nɛ a ma plɛ kɛ “tsɔse a juɛmi” ha. (Heb. 5:14) Anɔkuale, e sa nɛ fɔli nɛ a hyɛ jeha nɛ a bimɛ ɔmɛ ye kɛ bɔ nɛ a nuɔ níhi a sisi ha. Se kɛ̃ ɔ, jokuɛwi fuu nyɛɛ kaseɔ Baiblo mi anɔkualehi nɛ a mi kuɔ ɔ be mi nɛ a wɛ po.​—Luka 2:42, 46, 47.