Nyɛɛ Kase Gbali Ɔmɛ A Nɔ Hyɛmi Nɔ́ ɔ—Zefania
1. Mɛni si fɔfɔɛ mi gbalɔ Zefania fiɛɛ ngɛ, nɛ mɛni blɔ nɔ enɛ ɔ peeɔ nɔ hyɛmi nɔ́ kpakpa kɛ ha wɔ mwɔnɛ ɔ?
1 Maa pee jeha 650 loko a fɔ Yesu ɔ, Baal jami he si ngɛ Yuda. A gbe Amon nɛ ji matsɛ yaya a, nɛ e bi niheyo wayoo Yosia bɔni matsɛ yemi. (2 Kron. 33:21–34:1) Ngɛ jamɛ a be ɔ mi ɔ, Yehowa fa Zefania kaa e fiɛɛ Yehowa kojomi sɛ gbi ɔ. Eko ɔ, Zefania je Yuda matsɛ we ɔ mi, se e gbɔjɔɔ we fɔ bumi sɛ gbi nɛ Yehowa fa lɛ kaa e de Yuda ma hɛ mi nyɛɛli ɔmɛ ɔ mi. (Zef. 1:1; 3:1-4) Jã nɔuu kɛ̃ nɛ e sa nɛ waa kase kã nɛ Zefania je kpo ɔ, nɛ wa ko ngmɛ weku li blɔ nɛ a tsi wa nya ngɛ jami nɛ waa kɛ ngɛ Yehowa hae ɔ he. (Mat. 10:34-37) Mɛni ji sɛ gbi nɛ Zefania fiɛɛ, nɛ mɛni je mi kɛ ba?
2. Mɛni nɛ e sa kaa waa pee konɛ Yehowa nɛ he wa yi wami ngɛ e mi mi fumi ligbi ɔ nɔ?
2 Mo Hla Yehowa Se Blɔ: Yehowa pɛ nɛ e ma nyɛ ma he nihi a yi wami ngɛ e mi mi fumi ligbi ɔ nɔ. Enɛ ɔ he ɔ, Zefania wo Yuda bi ɔmɛ he wami nɛ a hla Yehowa, kɛ dami, kɛ he si bami se blɔ loko e mi mi fumi ligbi ɔ nɛ su. (Zef. 2:2, 3) E sa nɛ wɔ hu waa pee jã nɔuu mwɔnɛ ɔ. Kaa bɔ nɛ Zefania pee ɔ, waa wo nihi he wami nɛ a hla Yehowa se blɔ, se e sa nɛ wɔ hu waa tsu he ní, nɛ waa mwɔ wa juɛmi kpɔ kaa wa be ‘kpalee kɛ je Yehowa se’ gblegbleegble. (Zef. 1:6) Mohu ɔ, ke wa toɔ wa tsui si kɛ kaseɔ Mawu Munyu ɔ, nɛ waa sɔleɔ kɛ biɔ e blɔ tsɔɔmi ɔ, lɔ ɔ tsɔɔ kaa wa ngɛ Yehowa se blɔ hae. Ke wa ha nɛ wa je mi bami he tsɔ ɔ, e tsɔɔ kaa wa ngɛ dami se die. Jehanɛ, ke waa kɛ blɔ tsɔɔmihi nɛ Yehowa guu asafo ɔ nɔ nɛ e kɛ haa wɔ ɔ tsuɔ ní ɔ, lɔ ɔ hu tsɔɔ kaa wa baa wa he si.
3. Mɛni he je nɛ e sa nɛ wa ná juɛmi nɛ da ngɛ fiɛɛmi ní tsumi ɔ he ɔ?
3 Yiblii Kpakpahi: Yuda bi komɛ bu Zefania kojomi sɛ gbi ɔ tue. A kpɛti nɔ nɛ sa kadimi wawɛɛ ji Yosia, nɛ e ji niheyo. E hla Yehowa se blɔ kɛ je e jokuɛwi a si tɔɔ. Pee se ɔ, Yosia ha nɛ a kpa amaga jami ngɛ e be ɔ mi. (2 Kron. 34:2-5) Mwɔnɛ ɔ, e ngɛ mi kaa Matsɛ Yemi ɔ he wu ɔ ekomɛ pue blɔ he, nɛ ekomɛ pue tɛsa nɔ, nɛ ekomɛ pue mio mi mohu lɛɛ, se ekomɛ hu ya pue zugba kpakpa nɔ nɛ a wo yiblii. (Mat. 13:18-23) Wa ngɛ nɔ mi mami kaa Yehowa maa ya nɔ maa jɔɔ mɔde nɛ wa ngɛ bɔe kaa wa ma fia Matsɛ Yemi ɔ he wu ɔ nɔ.—La 126:6.
4. Mɛni he je nɛ e sa nɛ waa ‘hyɛ Yehowa blɔ ɔ’?
4 Yuda bi komɛ susu kaa Yehowa be nɔ́ ko pee. Se kɛ̃ ɔ, Yehowa ma nɔ mi kɛ ha mɛ tsuo kaa e ligbi ngua a su ta. (Zef. 1:12, 14) Nihi nɛ a kɛ a hɛ fɔɔ Yehowa nɔ ɔ pɛ nɛ a ma he a yi wami. (Zef. 3:12, 17) Be mi nɛ wa ngɛ ‘Yehowa blɔ hyɛe’ nɛ ɔ, e ba mi kaa waa kɛ wa nyɛmimɛ tsuo maa pee kake kɛ sɔmɔ wa Mawu Yehowa a!—Zef. 3:8, 9.