Bɔ Nɛ A Kɛ Jeha Lafa Fia Matsɛ Yemi ɔ He Gɔgɔ Ha!
1. Maa pee jeha lafa nɛ be ɔ, mɛni a wo Yehowa we bi he wami kaa a pee?
1 “Nyɛɛ hyɛ, Matsɛ ɔ ngɛ nɔ yee! Nyɛ ji e gɔgɔ fiali. Enɛ ɔ he ɔ, nyɛɛ fia, nyɛɛ fia, nyɛɛ fia Matsɛ ɔ kɛ e matsɛ yemi ɔ he gɔgɔ.” Benɛ Nyɛminyumu Rutherford tu munyu nɛ ɔ maa pee jeha lafa ji nɛ ɔ, e wo Yehowa we bi he wami kaa a fiɛɛ Matsɛ Yemi sɛ gbi ɔ ngɛ je ɔ mi tsuo. Nɛ jã pɛpɛɛpɛ wa pee ɔ nɛ! Wa fiɛɛ Matsɛ Yemi ɔ he sane kpakpa a kɛ tsɔɔ “bɔ níhi tsuo ngɛ je ɔ mi” kaa bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ pee ɔ. (Kol. 1:23) Mɛni wa nyɛ nɛ wa pee kɛ fia Mawu Matsɛ Yemi ɔ he gɔgɔ ngɛ jeha lafa nɛ be ɔ mi? Be mi nɛ e piɛ bɔɔ nɛ Matsɛ Yemi ɔ maa ná jeha lafa nɛ ɔ, mɛni blɔ nɔ wa maa gu kɛ tsa gɔgɔ fiami ɔ nɔ?
2. Mɛni blɔ nɔ nɛ wa womi ɔmɛ fia Mawu Matsɛ Yemi ɔ he gɔgɔ ngɛ?
2 Níhi Nɛ Wa Tsu Kɛ Be: Jehahi babauu nɛ be ɔ, wa womihi ye bua ngɛ Mawu Matsɛ Yemi ɔ he gɔgɔ fiami ɔ mi. Kɛ je 1939 mi ɔ, womi tɛtlɛɛ nɛ waa kɛ tsu ní titli ɔ yi ji: Hwɔɔmi Mɔ, E Ngɛ Mawu Matsɛ Yemi ɔ He Gɔgɔ Fiae. Womi tɛtlɛɛ nɛ ɔ pɔɔ Matsɛ Yemi ɔ kɛ níhi nɛ e maa pee ɔ a he munyu tumi. Awake! womi tɛtlɛɛ ɔ hu tsɔɔ kaa Mawu Matsɛ Yemi ɔ pɛ ji adesahi a hɛ nɔ kami. E be nyakpɛ kaa womi tɛtlɛɛ enyɔ nɛ ɔmɛ ji womihi nɛ a tsɔɔ sisi kɛ ya gbihi fuu a mi nɛ a gba kɛ ha nihi pe womi kpahi tsuo!—Kpoj. 14:6.
3. Mɛni blɔhi a nɔ wa gu kɛ fia Matsɛ Yemi ɔ he gɔgɔ?
3 Yehowa we bi gu blɔ slɔɔtohi a nɔ kɛ fia Matsɛ Yemi ɔ he gɔgɔ. Be ko nɛ be ɔ, wa ngɔ hleedio, lɔlehi nɛ munyu tumi klamahi ngɛ a yi mi, kɛ gramafoo kɛ fiɛɛ. Jamɛ a be ɔ mi ɔ, fiɛɛli a he pi, lɔ ɔ he ɔ, blɔ nɛ ɔmɛ a nɔ nɛ wa gu kɛ fiɛɛ ɔ ye bua nɛ wa fiɛɛ sane kpakpa a kɛ ha nihi babauu. (La 19:4) Lingmi nɛ ɔmɛ a mi ɔ, wa ngɔ níhi fuu kɛ wo jw.org nɔ, nɛ e ha nɛ Matsɛ Yemi ɔ he sɛ gbi ɔ ngɛ nihi ayɔhi abɔ a ngɔ sue. Nihi nɛ a ngɛ mahi nɛ a tsi wa ní tsumi ɔ nya ngɛ a mi ɔ mi po ngɛ he se náe.
4. Mɛni blɔ klɛdɛɛhi a nɔ wa guu kɛ fiɛɛ?
4 Yehowa we bi gu blɔ klɛdɛɛhi hu a nɔ kɛ gbɛ Matsɛ Yemi sɛ gbi ɔ kɛ fia. Kaa nɔ hyɛmi nɔ́ ɔ, kɛ je 1995 ɔ, wa bɔ mɔde nɛ wa ngɔ fiɛɛmi ngɛ magbɛhi a nɔ, lɔle si dami hehi kɛ ní tsumi hehi kɛ piɛɛ wehi a mi fiɛɛmi ɔ he. Lingmi nɛ ɔ, wa to ma nɔ odase yemi klɛdɛɛ ngɛ ma nguahi a mi ɔ he blɔ nya ngɛ je ɔ mi tsuo. Jehanɛ se hu ɔ, asafohi fuu ngɔ a he kɛ ngɛ ma nɔ odase yemi mi woe ngɛ a zugba kpɔ ɔmɛ a mi kɛ gu atsɛ̃sehi kɛ okplɔɔhi nɛ a toɔ womihi ngɛ a nɔ nɛ a kɛ maa hehi nɛ nihi fuu beɔ ngɛ ɔ nɔ. Se loloolo ɔ, wehi a mi fiɛɛmi ɔ ji blɔ titli nɔ nɛ wa guu kɛ fiɛɛ Matsɛ Yemi sɛ gbi ɔ.—Níts. 20:20.
5. Mɛni he blɔhi nɛ sɔmɔmi jeha ehe ɔ ma bli ha wɔ?
5 Níhi Nɛ Wa Ma Tsu Hwɔɔ Se: Nihi fuu maa je blɔ gbami ní tsumi ɔ sisi ngɛ sɔmɔmi jeha ehe nɛ maa je sisi ngɛ September mi ɔ mi. Mo hu o ma nyɛ maa piɛɛ a he lo? Ke o be nyɛe ɔ, anɛ o ma nyɛ maa ngɔ o he kɛ wo blɔ gbali a wami ní tsumi ɔ mi lo? Ke o nyɛ nɛ o pee blɔ gbalɔ, aloo o nyɛ we nɛ o pee jã po ɔ, mo ná nɔ mi mami kaa Yehowa maa jɔɔ mo ngɛ níhi nɛ o kɛ maa sã afɔle ngɛ Matsɛ Yemi ɔ he ɔ he.—Mal. 3:10.
6. Mɛni he je nɛ October 2014 nyɔhiɔ ɔ maa pe nyɔhiɔ nɛ ngɛ slɔɔto ɔ?
6 Ngɛ October 2014 mi ɔ, Matsɛ Yemi ɔ maa ná jeha 100. Enɛ ɔ he ɔ, Hwɔɔmi Mɔ nɛ a pee ha mabi nɛ maa je kpo ngɛ jamɛ a nyɔhiɔ ɔ mi ɔ maa tu Mawu Matsɛ Yemi ɔ he munyu titli. Moo bɔ mɔde nɛ o ha nɛ nihi babauu a nine nɛ su eko nɔ. Be mi nɛ wa ngɛ hwɔɔ se blɔ hyɛe nɛ ɔ, nyɛ ha nɛ wɔ tsuo waa ya nɔ nɛ waa ‘fiɛɛ sane kpakpa nɛ kɔɔ Mawu Matsɛ yemi ɔ’ he ɔ kɛ tsɔɔ nihi tsuo nɛ a maa bu tue ɔ.—Níts. 8:12.