Blɔ Ehehi Nɛ Wa Maa Gu Nɔ Kɛ Ye Odase Ngɛ Ma Nɔ
1. Mɛni nɔ hyɛmi nɔ́ nɛ kekle Kristofoli ɔmɛ pee?
1 Tsa pi wehi a mi pɛ nɛ kekle Kristofoli ɔmɛ fiɛɛ ngɛ. A fiɛɛ ngɛ ma nɔ hulɔ. (Níts. 20:20) Kaa nɔ hyɛmi nɔ ɔ, a ya fiɛɛɔ ngɛ sɔlemi we ɔ kɛ hehi nɛ a le kaa a maa na nihi ngɛ. (Níts. 5:42) Benɛ bɔfo Paulo ngɛ Atene ɔ, e fiɛɛɔ kɛ haa nihi ngɛ jua nɔ daa ligbi. (Níts. 17:17) Mwɔnɛ ɔ, wehi a mi fiɛɛmi ɔ ji blɔ titli nɛ wa guu nɔ kɛ gbɛɛ sane kpakpa a kɛ fia a. Se wa ya fiɛɛɔ ha nihi ngɛ he tsuaa he nɛ wa maa na mɛ ngɛ, kaa lɔle si dami hehi, nítsumi hehi, he nɛ nihi pɔɔ a he jɔɔmi ngɛ, gbɛjegbɛhi nɛ nihi beɔ ngɛ nɔ wawɛɛ, kɛ he kpahi. E ngɛ mi kaa a woɔ fiɛɛli tsuo he wami kaa a kɛ a he nɛ wo ma nɔ odase yemi mi mohu lɛɛ, se fiɛɛli fuu ma ná he blɔ konɛ a kɛ a he nɛ wo blɔ ehehi enyɔ nɛ wa maa gu nɔ kɛ fiɛɛ ngɛ ma nɔ ɔ mi.
2. Mɛni odase yemi blɔ nya tomi nɛ a ka nɛ a hyɛ ngɛ November 2011?
2 Ma Nɔ Odase Yemi Klɛdɛɛ Ngɛ Ma Ngua Mi: Jeha 2013 Yearbook ɔ bafa 16 kɛ 17 ɔ bɔ amaniɛ kaa, a ka ma nɔ odase yemi blɔ nya tomi ehe ko nɛ a hyɛ ngɛ New York City ngɛ November 2011 ɔ mi. A kɛ okplɔɔhi kɛ atsɛ̃sehi nɛ a ngɔ wa womi ɔmɛ ekomɛ a he fonihi kɛ mɛtɛ a he, nɛ a to womihi ngɛ gbi slɔɔtohi a mi ngɛ a nɔ ɔ ma hehi nɛ nihi beɔ ngɛ wawɛɛ. Daa ligbi ɔ, nihi akpehi abɔ beɔ ngɛ lejɛ ɔ. Nimli nɛ ɔmɛ a kpɛti ni komɛ ngɛ wehi nɛ Odasefoli nyɛ we lejɛ ɔ yami ɔ mi, nɛ a kpɛti ni komɛ hu pɔɛ wemi hi mi. Nihi babauu ngɔ wa womi ɔmɛ eko. Lingmi nɛ ɔ, a ha womi tɛtlɛɛ ɔmɛ 3,797 kɛ womihi 7,986 ngɛ nyɔhiɔ kake mi. Nihi nɛ a beɔ ngɛ lejɛ ɔ a kpɛti nihi fuu bi nɛ a kɛ mɛ nɛ ba kase Baiblo ɔ. Akɛnɛ yi mi tomi ɔ ji kaa a je Baiblo mi níkasemi sisi heje ɔ, a kɛ adrɛs nɛ nihi nɛ ngɛ munyu ɔ he bua jɔmi ɔ si ɔ maneɔ asafohi nɛ sa a amlɔ nɔuu konɛ a ya slaa mɛ ngɛ a wehi a mi.
3. Mɛni blɔ nɔ a ngɛ blɔ nya tomi nɛ ɔ mi blie ngɛ?
3 Akɛnɛ blɔ nya tomi nɛ ɔ wo yiblii heje ɔ, wa ngɛ hlae nɛ a kɛ blɔ nya tomi nɛ ɔ nɛ tsu ní ngɛ ma nguahi nɛ nihi hiɛ ngɛ mi ɔ a mi ngɛ je kɛ wɛ. Asafo ɔ nítsumi he kɔni ɔ nɛ maa tsɔɔ ma nguahi nɛ e sa kaa a kɛ blɔ nya tomi nɛ ɔ nɛ tsu ní ngɛ mi. Behi fuu ɔ, akɛnɛ lɔle si dami he nguahi, ɔfisi nguahi aloo we nguahi ngɛ ma nɛ ɔmɛ a mi heje ɔ, nihi a he hiɛ ngɛ lejɛ ɔ. Asafo ɔ nítsumi he kɔni ɔ maa ngma sɛ womi kɛ ha asafohi nɛ a ma tsu nítsumi nɛ ɔ, nɛ a kɛ blɔ tsɔɔmi kpahi ma ha mɛ. E ngɛ mi kaa ngɛ he komɛ ɔ, blɔ gbali a wali tsuɔ nítsumi nɛ ɔ eko mohu lɛɛ, se daa blɔ gbali kɛ blɔ gbali klɛdɛɛ titli ji nihi nɛ tsuɔ nítsumi nɛ ɔ.
4. Kɛ a tsuɔ ma nɔ odase yemi ngɛ ma ngua mi ɔ ha kɛɛ?
4 Bɔnɛ A Tsuɔ Odase Yemi Nɛ ɔ He Ní Ha: Behi fuu ɔ, nihi nɛ tsuɔ ma nɔ odase yemi klɛdɛɛ ngɛ ma ngua mi ɔ mlɛɛ konɛ nɔ ko nɛ e ba da okplɔɔ loo atsɛ̃se nɛ a to womihi ngɛ a nɔ ɔ he. Ke nɔ ko ba da okplɔɔ ɔ aloo atsɛ̃se ɔ he ɔ, a haa nɛ e ngɔɔ womi nɛ e suɔ. Ke nɔ ɔ bi sane ko ɔ, blɔ gbali ɔmɛ kɛ bua jɔmi haa lɛ heto kɛ jeɔ Ngmami ɔ mi. Ke nɔ ɔ ngɔ womi ɔmɛ eko ɔ, blɔ gbali ɔmɛ wui yemi kɛ buami blɔ nya tomi ɔ nɔ ta. Se ke nɔ ɔ bi si kaa mɛni blɔ nɔ wa guu kɛ náa sika kɛ hyɛɔ wa fiɛɛmi nítsumi ɔ nɔ ɔ, a ma ha nɛ e le kaa e ma nyɛ ma ha yemi kɛ buami kɛ gu adrɛs nɛ a ngma ngɛ womi ɔ mi ɔ eko nɔ. Ke e maa hi ɔ, a ma nyɛ ma bi nɔ ɔ ke: “Anɛ o maa suɔ nɛ nɔ ko nɛ ba slaa mo ngɛ o we ɔ mi lo?” aloo “Anɛ o le kaa waa kɛ nihi kaseɔ Baiblo ɔ nɛ a wui he hiɔ lo?”
5. Mɛni blɔ nɔ nɛ nyumu ko kɛ e yo nɛ a kɛ a he wo odase yemi nɛ ɔ mi ɔ ná he se ngɛ?
5 Nihi nɛ a kɛ a he wo odase yemi nɛ ɔ mi ɔ ná he se wawɛɛ nitsɛ. Nyumu ko kɛ e yo ngma ke: “Ke wa daa si ngɛ okplɔɔ ɔ he, nɛ wa na bɔnɛ nihi akpehi abɔ ngɛ yae nɛ a ngɛ bae daa ligbi ɔ, e haa nɛ wa naa kaa nítsumi nɛ wa ngɛ tsue ngɛ je kɛ wɛ konɛ wa kɛ ye bua nihi tsuo ɔ kle. Nihi babauu nɛ wa naa mɛ ɔ haa nɛ wa susuɔ bɔnɛ Yehowa susuɔ nɔ tsuaa nɔ he ha a he, lɔɔ he ɔ, wa ma wa juɛmi nya si kaa wa maa ya nɔ maa ngɔ fiɛɛmi nítsumi ɔ kɛ pee oti ngɛ wa si himi mi. Wa poɔ Yehowa he foni ngɛ wa juɛmi mi kaa e ngɛ nihi tsuo nɛ a bee ngɛ wa okplɔɔ ɔ he ɔ a tsui mi hyɛe, nɛ e ngɛ nihi nɛ sa a hlae. Wa nuɔ he kaa bɔfo ɔmɛ nɛ a piɛɛ wa he kɛ ngɛ ní ɔ tsue ɔ ngɛ wa kasa nya.”
6. (a) Mɛni blɔ nya ehe nɛ asafohi fuu to, nɛ e slo lɔɔ ngɛ ma nɔ odase yemi klɛdɛɛ ngɛ ma ngua mi ɔ he ngɛ mɛni blɔ nɔ? (b) Kɛ asafohi ma plɛ kɛ pee kake kɛ tsu ma nɔ odase yemi ɔ kɛɛ?
6 Ma Nɔ Odase Yemi Nɛ Asafohi To He Blɔ Nya: Nikɔtɔmahi a kuu babauu ngɛ blɔ nya ehe toe nɛ a kɛ ma tsu ní ngɛ a zugba kpɔ ɔmɛ a mi kɛ piɛɛ ma nɔ odase yemi klɛdɛɛ ngɛ ma ngua mi ɔ he. Bɔnɛ blɔ nya tomi nɛ ɔ ngɛ ha ji, fiɛɛli toɔ okplɔɔ aloo atsɛ̃se nɛ́ a kɛ wa womi ɔmɛ eko he fonihi mɛtɛ a he ɔ ngɛ a zugba kpɔ ɔ mi hehi nɛ nihi beɔ ngɛ wawɛɛ. E slo odase yemi nɛ ɔ ngɛ ma nɔ odase yemi klɛdɛɛ ngɛ ma ngua mi ɔ he. Bɔnɛ a tsuɔ ma nɔ odase yemi klɛdɛɛ ngɛ ma ngua mi ɔ ha ji, asafo ɔ nítsumi he kɔni ɔ hlaa ma ngua mi hehi nɛ nihi beɔ ngɛ wawɛɛ ɔ, nɛ fiɛɛli nɛ a je asafo slɔɔtohi a mi ɔ peeɔ kake kɛ fiɛɛɔ ngɛ lejɛ ɔ.—Hyɛ daka nɛ ji, “Kake Peemi He Hia.”
7. Ke ma nɔ odase yemi he blɔ nya tomi ɔ maa hi ngɛ zugba kpɔ ko mi ɔ, mɛni blɔ nɔ nɛ asafo mi nikɔtɔma amɛ maa gu kɛ to he blɔ nya?
7 Nikɔtɔma amɛ maa hyɛ kaa he komɛ ngɛ a zugba kpɔ ɔ mi nɛ nihi fuu beɔ ngɛ lo, konɛ ke e maa hi ɔ, a to ma nɔ odase yemi he blɔ nya. Hehi nɛ a ma nyɛ maa ngɔ okplɔɔ aloo atsɛ̃se kɛ ma ji; lɔle si dami hehi, magbɛhi a nɔ, hehi nɛ nihi jɔɔ a he ngɛ, hehi nɛ nihi beɔ ngɛ wawɛɛ, tsuapo nguahi (shopping malls) a he, kɔlejihi a mi, kɔɔhiɔ mi lɛ si dami hehi, kɛ hehi nɛ nihi buaa a he nya ngɛ daa jeha. E maa hi kaa a maa to okplɔɔ ɔ ngɛ he pɔtɛɛ ko ngɛ ligbi pɔtɛɛ komɛ a nɔ, kɛ be pɔtɛɛ ko mi. Wa yɔse kaa okplɔɔhi nɛ a toɔ ngɛ tsuapo nguahi a he ɔ yeɔ manye wawɛɛ pe okplɔɔhi nɛ a toɔ ngɛ tsuapo wawi a he ɔ, ejakaa behi fuu ɔ, nihi nɛ a ya heɔ ní ngɛ tsuapo wawi a mi ɔ kɛ a juɛmi maa níhi nɛ a yaa he ɔ nɔ. E maa hi wawɛɛ kaa a kɛ atsɛ̃sehi maa ma gbɛjegbɛhi a he ngɛ hehi nɛ nihi beɔ ngɛ wawɛɛ. A je blɔ pee Hwɔɔmi Mɔ ɔ kɛ Awake! womi tɛtlɛɛ ɔmɛ kɛ Baiblo Tsɔɔmi womi ɔ he foni agbohi nɛ a kɛ maa mɛtɛ okplɔɔ aloo atsɛ̃se nɛ a kɛ ma tsu ní ngɛ ma nɔ odase yemi mi ɔ he. Foni nɛ ɔmɛ ngɛ wa Internet nítsumi he ɔ nɔ, nɛ asafo mi nikɔtɔma amɛ ma nyɛ maa gbla. A ma tsu ma nɔ odase yemi ɔ kaa bɔnɛ a tsuɔ ma nɔ odase yemi ngɛ ma ngua mi ɔ nɔuu. E sa nɛ a kɛ sɔmɔmi nítsumi nɔ hyɛlɔ ɔ blɔ tsɔɔmi nɛ tsu ní. Ke a ngɔ adrɛs ngɛ nɔ ko nɛ e ngɛ munyu ɔ he bua jɔmi nɛ e be a zugba kpɔ ɔ mi ɔ dɛ ɔ, e sa nɛ a ngma Please Follow Up (S-43) womi ɔ nɔ ní amlɔ nɔuu, nɛ a ngɔ kɛ ha a we asafo ɔ mi womi ngmalɔ ɔ.
8. Ke a tui ma nɔ odase yemi he blɔ nya ngɛ nyɛ asafo ɔ mi po ɔ, mɛni a woɔ fiɛɛli he wami nɛ a pee?
8 Ma Nɔ Odase Nɛ O Maa Ye: Asafo komɛ ngɛ nɛ hehi be a zugba kpɔ ɔ mi nɛ nihi fuu beɔ ngɛ. Lɔɔ he ɔ, e be hiae nɛ a to okplɔɔ aloo atsɛ̃se. Se kɛ̃ ɔ, ngɛ asafo nɛ ɔmɛ a mi ɔ, a woɔ fiɛɛli he wami nɛ a ngɔ a he kɛ wo ma nɔ odase yemi ɔ mi. Anɛ jua yemi he, tsuapohi nɛ a tsa a si bi a nɔ, loo tsuapo ko nɛ nihi fuu yaa lejɛ ɔ ngɛ nyɛ zugba kpɔ ɔ mi lo? Anɛ he ko ngɛ nɛ nihi jɔɔ a he ngɛ aloo a buaa a he nya ngɛ lo? Anɛ he ko ngɛ nɛ nihi pɔɔ a he nya buami daa jeha lo? Ke jã a, nyɛ ma nyɛ maa ngɔ nyɛ he kɛ wo ma nɔ odase yemi ɔ mi.
9. Mɛni heje nɛ e sa kaa waa bɔ mɔde nɛ waa fiɛɛ kɛ ha nihi ngɛ he tsuaa he nɛ wa maa na mɛ ngɛ ɔ?
9 Yehowa suɔ kaa “nimli tsuo nɛ a le anɔkuale ɔ konɛ a he a yi wami.” (1 Tim. 2:4) Enɛ ɔ he ɔ, wa ngɛ mɔde bɔe nɛ waa fiɛɛ Matsɛ Yemi sɛ gbi ɔ kɛ ha nihi babauu loko nyagbe ɔ nɛ ba. (Mat. 24:14) Ngɛ hehi fuu ɔ, e yee kaa wa maa na nihi ngɛ we mi. Se wa ma nyɛ maa na mɛ ngɛ ma nɔ, nɛ waa kɛ mɛ nɛ tu munyu. Ni komɛ ngɛ nɛ ma nɔ odase yemi ɔ pɛ nɔ a ma nyɛ maa gu kɛ nu sane kpakpa a. Enɛ ɔ he ɔ, e ba mi kaa wa maa fiɛɛ ngɛ he tsuaa he nɛ wa maa na nihi ngɛ, konɛ waa gbe wa sɔmɔmi ɔ nya kulaa a.—2 Tim. 4:5.
[Daka ngɛ bafa 5]
Kake Peemi He Hia
Amaniɛ bɔmi tsɔɔ kaa be komɛ ɔ, gbɛjegbɛ, lɔle mami he, nítsumi he aloo lɔle si dami he kake ɔ nɔuu nɛ fiɛɛli nɛ a je asafohi nɛ a kɛ a he kɛ we ɔ mi ɔ ya yeɔ ma nɔ odase ngɛ. Fiɛɛli nɛ a je asafo kpahi a mi ɔ ya ha nihi womi tɛtlɛɛ ɔmɛ ngɛ nibwɔhi a kpeemi he aloo nítsumi he kake ɔ nɔuu mi. Enɛ ɔ haa nɛ ke fiɛɛli fiɛɛ we ngɛ be kake mi po ɔ, nítsuli ɔmɛ kɛ nihi nɛ a ngɛ kpɔ ɔ mi ɔ a mi mi fuɔ be komɛ. Enɛ ɔ he ɔ, ke a maa ye odase ngɛ ma nɔ ɔ, e maa hi kaa asafo tsuaa asafo ma tsu ní ngɛ e we asafo ɔ zugba kpɔ ɔ mi.
Ke fiɛɛli suɔ kaa a maa ye odase ngɛ ma nɔ ngɛ asafo kpa ko zugba kpɔ mi ɔ, e sa nɛ a de a we asafo ɔ mi sɔmɔmi nítsumi nɔ hyɛlɔ ɔ. Kɛkɛ ɔ, lɛ hu e ma bi blɔ ngɛ sɔmɔmi nítsumi nɔ hyɛlɔ ngɛ asafo kpa a mi ɔ dɛ, loko fiɛɛli nɛ a ngɛ e we asafo ɔ mi ɔ ma nyɛ ma ya fiɛɛ ngɛ lejɛ ɔ. E sa nɛ sɔmɔmi nítsumi nɔ hyɛli nɛ a ngɛ asafohi nɛ a tuɔ gbi kpahi a mi, nɛ a fiɛɛɔ ngɛ zugba kpɔ kake mi ɔ nɛ a kɛ a sibi nɛ sɛɛ a we asafo ɔ fiɛɛmi yami blɔ nya tomi he ní bɔnɛ pee nɛ a ko ya hao nihi nɛ a ngɛ zugba kpɔ ko mi. Ke a pee kake ɔ, e ma ha nɛ nɔ́ tsuaa nɔ́ maa ya nɔ “bɔnɛ sa ngɛ blɔ nya tomi nya.”—1 Kor. 14:40.
[Foni ngɛ bafa 6]
[Foni ngɛ bafa 6]