La Ehehi Nɛ Waa Kɛ Ma Je Mawu Yi!
1 Ngɛ October 4, 2014 mi ɔ, Watch Tower Bible and Tract Society of Pennsylvania a kpe kaa bɔ nɛ a peeɔ daa jeha a. Ngɛ kpe nɛ ɔ sisi ɔ, a fia adafi kaa a maa pee tsakemi komɛ ngɛ la womi nɛ waa kɛ ngɛ ní tsue amlɔ nɛ ɔ he. Adafi nɛ a fia nɛ ɔ ji bua jɔmi sane! A kai nyɛmimɛ tsuo nɛ a ya kpe nɛ ɔ sisi ɔ kaa wa Matsɛ Yemi la amɛ a ji lahi nɛ a he hia wawɛɛ ngɛ wa sɔmɔmi mi.—La 96:2.
2 Eko ɔ, o ma bi ke, ‘Mɛni he je nɛ a ma tsake la womi ɔ?’ A maa pee jã ngɛ yi mi tomihi fuu a he je. Kekleekle ɔ, bɔ nɛ wa nu Ngmami ɔ sisi ha a ngɛ hɛ mi yae, nɛ lɔ ɔ saa wa la a mi munyu ɔmɛ a he. (Abɛ 4:18) Nɔ́ kpa ko hu he je nɛ́ a ma tsake la womi ɔ ji: A je la a mi munyu ɔmɛ kɛ je blema New World Translation ɔ mi. E biɔ nɛ a tsake la amɛ a mi munyu ɔmɛ ekomɛ konɛ e kɛ New World Translation ehe ɔ nɛ kɔ. Akɛnɛ a maa pee tsakemihi fuu ngɛ la womi mi konɛ e kɛ bɔ nɛ wa nu níhi a sisi ha amlɔ nɛ ɔ nɛ kɔ he je ɔ, a to kaa a maa ngɔ la ehe komɛ kɛ piɛɛ momo ɔ he.
3 Anɛ e sa nɛ waa mlɛ kɛ ya si benɛ a ma je la womi ɔ kpo loko wa ma bɔni la ehe ɔmɛ lami lo? Dɛbi. Waa kɛ bua jɔmi ngɛ nyɛ lemi hae kaa ngɛ nyɔhiɔhi nɛ ma ngɛ wa hɛ mi ɔ mi ɔ, a maa ngɔ la ehehi kɛ ma bɔni wa Intanɛti ní tsumi he ɔ nɔ fɔmi. Ke a kɛ la ehe ko fɔ wa Intanɛti ní tsumi he ɔ nɔ ɔ, a maa to blɔ nya konɛ wa la kɛ gbe wa Sɔmɔmi Kpe ɔ eko nya. A ma kadi lɛ ke “la ehe.”
4 Blɔ Nɔ Nɛ Wa Maa Gu Kɛ Kase La Ehe Ɔmɛ: La ehe kasemi be gbɔjɔɔ. Se kɛ̃ ɔ, kaa bɔ nɛ la polɔ ɔ de ɔ, ‘wa be wa nya mae’, mohu ɔ, waa kɛ gɛjɛmi ma la ngɛ wa kpehi a sisi. (La 30:12) Blɔ tsɔɔmi nɛ nyɛɛ se nɛ ɔmɛ maa ye bua wɔ konɛ wa nyɛ nɛ waa kase la ehe ɔmɛ.
Ke a ngɔ la a kɛ fɔ Intanɛti ɔ nɔ ɔ, moo fia nɛ o bu tue saminya. Ke o bu tue hluu ɔ, e maa tlɔ o yi mi.
Kase la a mi munyu ɔmɛ, nɛ o ha nɛ e tlɔ o yi mi.
Mo la kɛ to saku ɔ he, nɛ o pee jã hluu kɛ ya si benɛ o nya maa da la a nɔ.
Nyɛ ma nyɛ maa ngɔ nyɛ Weku Mawu Jami be ɔ eko kɛ kase la amɛ kɛ ya si benɛ nyɛ maa le lami saminya.
5 Ke a kɛ la ehe ɔ eko nɛ maa gbe Sɔmɔmi Kpe ɔ nya a, a maa fia la a tsuo si kake nɛ asafo ɔ maa bu tue. Lɔ ɔ se ɔ, tue buli ɔmɛ ma la kɛ to saku ɔ he kaa bɔ nɛ wa peeɔ daa a.
6 Ke o susu lami nɛ wa laa ngɛ asafo mi kpehi a sisi ɔ he ɔ, o maa na kaa e haa nɛ waa kɛ wa nyɛmimɛ peeɔ kake kɛ jeɔ Yehowa yi. Enɛ ɔ he ɔ, ke e su be nɛ wa ma la ngɛ asafo mi kpehi a sisi ɔ, e sɛ nɛ wa kɛ pee wa su kaa wa maa hi kpo jee.
7 Blɔ kpa ko hu ngɛ nɛ wa ma nyɛ maa gu nɔ kɛ tsɔɔ kaa wa bua jɔ lahi nɛ waa kɛ jaa Mawu ɔmɛ a he. Ngɛ kpɔ mi kpehi kɛ kpokpa nɔ kpehi a sisi ɔ, a fiaa la bɔɔ loko mɔtu kɛ piani blɔ nya tomi ɔ jeɔ sisi. Nyɛmimɛ nyumuhi kɛ yihi nɛ a je je kɔ̃ nya eywiɛ ɔmɛ ɔ woɔ mɛ nitsɛmɛ a blɔ hiami he hiɔ kɛ yaa Patterson, New York si enyɔ daa jeha nɛ a ya poɔ la ngɔngɔɛhi konɛ wa kɛ je Mawu yi. Lɔ ɔ he ɔ, ke sɛnɔhilɔ ɔ fɔ wɔ nine kaa waa hi si nɛ waa bu lahi nɛ a gbo he dengme ɔ tue ɔ, e sa nɛ waa pee jã. Ke wa pee jã a, e maa ye bua wɔ nɛ wa ma dla wa juɛmi kɛ ha níhi nɛ maa ya nɔ ngɛ kpe ɔ sisi ɔ.—Ezra 7:10.
8 Waa kɛ la ehe nɛ e yi ji “Matsɛ Yemi ɔ Nɛ O To Sisi ɔ—Ha Nɛ E Ba!” a ma kpa mwɔnɛ ɔ kpe ɔ. A je la nɛ ɔ kpo ngɛ daa jeha kpe nɛ a pee lingmi nɛ ɔ sisi kaa Matsɛ Yemi ɔ nɛ ná jeha lafa a he la klɛdɛɛ.
9 Atsinyɛ jemi ko be he kaa la ehe nɛ ɔmɛ ji “ní kpakpahi” nɛ je Yehowa ngɔ. (Mat. 12:35a) Nyɛ ha nɛ waa fia wa pɛɛ si kaa wa maa kase la nɛ ɔmɛ, konɛ waa je wa tsui mi nɛ waa ngɔ yi jemi nɛ sa kɛ ha Mawu!—La 147:1