Moo Ngɔ Níhi Nɛ Ngɛ Baiblo Tsɔɔmi Womi ɔ Mi ɔ Kɛ Tsu Ní Saminya

Ke Baiblo mi ní kaselɔ ko kase nɔ́ nɛ Baiblo ɔ tsɔɔ ɔ nɛ e kɛ tsu ní ngɛ e si himi mi ɔ, e maa wo mumi mi yiblii. (La 1:1-3) Wa ma nyɛ maa ye bua mɛ konɛ a ya a hɛ mi kɛ gu níhi nɛ ngɛ Baiblo Tsɔɔmi womi ɔ mi ɔ nɛ waa kɛ ma tsu ní saminya a nɔ.

Sane Bimihi Nɛ Ngɛ Ní Kasemi ɔ Sisije: Ngɛ yi tsuaa yi nɛ a maa kase ɔ sisije ɔ, a bi sane komɛ, nɛ a ha a heto ngɛ womi ɔ mi. Mo bi sane nɛ ɔmɛ konɛ ní kaselɔ ɔ nɛ e kɛ bua jɔmi nɛ hyɛ níhi nɛ nyɛ maa kase ɔ blɔ. O ma nyɛ ma bi lɛ konɛ e tsɔɔ e juɛmi ngɛ sane bimi ɔmɛ a he hulɔ. Ke heto nɛ e ha a dɛ po ɔ, mo ko bɔ mɔde kaa o maa tsɔɔ lɛ nya. Heto nɛ e ma ha a maa ye bua mo nɛ o maa le níhi nɛ e sa kaa o tsɔɔ lɛ nya saminya.​—Abɛ 16:23; 18:13.

Mi Tsɔɔmi Munyuhi: Ke o Baiblo mi ní kaselɔ ɔ nu nɔ́ nɛ nyɛ kase ɔ sisi, nɛ mi tsɔɔmi munyu ngɛ nɔ́ nɛ nyɛ kase ɔ mi ɔ, wo lɛ he wami nɛ e kane ngɛ e dɛ he. Pee se ke o kɛ lɛ yaa kase ní ɔ, o ma nyɛ maa ngɔ hɛngmɛfia bɔɔ kɛ hyɛ kaa e nu mi tsɔɔmi munyu nɛ e kane ɔ sisi lo. Se ke o na kaa e nui sisi saminya a, o kɛ lɛ nɛ susu mi tsɔɔmi munyu ɔ tsuo he. Aloo o ma nyɛ ma ha nɛ e kane kuku ɔ ekomɛ, nɛ o bi lɛ sanehi nɛ maa ye bua lɛ nɛ e nu oti ɔmɛ a sisi.

Mi Nylɔmi Daka: A ha sane bimihi nɛ ngɛ ní kasemi ɔ sisije ɔmɛ a heto ngɛ mi nylɔmi dakahi nɛ ngɛ yi tsuaa yi nyagbe ɔ mi. O ma nyɛ maa ngɔ munyu nɛ ngɛ daka a mi ɔ kɛ hyɛ kaa e nu nɔ́ nɛ nyɛ kase ɔ sisi, nɛ e ma nyɛ maa tsɔɔ mi lo. Nyɛɛ kane munyuhi nɛ ngɛ daka a mi ɔ, kɛ ngmamihi tsuo nɛ piɛɛ he ɔ. Ha nɛ e ngɔ ngmami ɔmɛ kɛ tsɔɔ munyu ɔmɛ a mi, nɛ e tsɔɔ nɔ́ he je nɛ e susu kaa heto ɔmɛ da a.​—Níts. 17:2, 3.