“I Ngɛ Hiɛ ɔ! Moo Tsɔ Mi!”

Yesaya je e tsui mi kɛ tsu ní tsumihi tsuo nɛ a kɛ wo e dɛ ɔ. Wa ma nyɛ maa kase lɛ. Be ko nɛ Yehowa ngɛ nɔ ko hlae nɛ e maa tsɔ lɛ ɔ, Yesaya kplɛɛ nɔ kaa e maa ya tsɔmi ɔ, be mi nɛ e li nɔ́ pɔtɛɛ nɛ e yaa tsu. Enɛ ɔ tsɔɔ kaa e ngɛ hemi kɛ yemi nitsɛnitsɛ. (Yes 6:8) Anɛ o ma nyɛ maa pee tsakemi ngɛ o si himi mi konɛ o nyɛ nɛ o ya fiɛɛ ngɛ he nɛ Matsɛ Yemi fiɛɛli fuu a he hia ngɛ lo? (La 110:3) Ngɛ anɔkuale mi ɔ, e he hia nɛ ‘o hi si nɛ o susu he’ kaa o ma nyɛ maa pee jã lo. (Luka 14:27, 28) Se kɛ̃ ɔ, e sa nɛ o je o tsui mi nɛ o ngɔ níhi kɛ sã afɔle konɛ o nyɛ nɛ o tsu babauu ngɛ fiɛɛmi ní tsumi ɔ mi. (Mat 8:20; Mar 10:28-30) Kaa bɔ nɛ wa na ngɛ video nɛ ji, Wa Ma Nyɛ Ma Ya Sɔmɔ Ngɛ He Nɛ Fiɛɛli A He Hia Ngɛ ɔ mi ɔ, ke wa ngɔ níhi kɛ sã afɔle ngɛ Yehowa sɔmɔmi mi ɔ, jɔɔmihi nɛ wa ma ná a maa hiɛ kulaa pe níhi nɛ waa kɛ sã afɔle ɔ.

KE NYƐ HYƐ VIDEO Ɔ TA A, NYƐ HA SANE BIMI NƐ ƆMƐ A HETO:

• Mɛni ji ní komɛ nɛ Nyɛminyumu Williams kɛ e weku ɔ kɛ sã afɔle loko a nyɛ ya sɔmɔ ngɛ Ecuador?

• Benɛ a ngɛ he ko hlae nɛ a ma ya sɔmɔ ngɛ ɔ, mɛni ji ní komɛ nɛ a susu he?

• Mɛni jɔɔmihi a ná?

• Ke o ngɛ hlae nɛ o ya sɔmɔ ngɛ he nɛ fiɛɛli fuu a he hia ngɛ ɔ, jije o ma ná ga womi nɛ maa ye bua mo kɛ je?

NYƐ SUSU SANE BIMI NƐ ƆMƐ A HE NGƐ NYƐ WEKU MAWU JAMI NƐ MAA NYƐƐ SE Ɔ MI:

• Mɛni wa ma nyɛ maa pee kɛ bli wa sɔmɔmi ní tsumi ɔ mi kaa weku? (km 8/11 4-6)

• Ke wa nyɛ we nɛ wa ya sɔmɔ ngɛ he nɛ fiɛɛli fuu a he hia ngɛ po ɔ, mɛni wa ma nyɛ maa pee kɛ ye bua asafo nɛ wa ngɛ mi ɔ? (w16.03 3-5)