Anɛ Mawu Munyu Nɛ A Ngma a Tsake Lo?

Ni komɛ susuɔ ke ji kaa Mawu Munyu nɛ a ngma a tsake loo e tsakee we. Gbalɔ Yesaya de kaa Mawu munyu ɔ “ngɛ kɛ yaa neneene.” (Yesaya 40:8) Kɛ wa ma plɛ kɛ ná nɔ mi mami kaa a tsakee we Mawu si womi ɔmɛ ngɛ Ngmami Klɔuklɔu ɔmɛ a mi ha kɛɛ?

Mawu ngɛ he wami nɛ e kɛ maa po e Munyu ɔ he piɛ konɛ nɔ ko nɛ ko puɛ lɛ. Blema a, benɛ nyumu komɛ ngɛ Ngmami Klɔuklɔu ɔ nɛ a kɛ nine ngma a henɔ ngmae ɔ, a bɔ mɔde nɛ a kane ningma okadi ɔmɛ tsuo konɛ a ná nɔ mi mami kaa a kɛ nɔ́ ko piɛɛ we he, nɛ a tsakee we nɔ́ ko, nɛ a je we nɔ́ ko hu ngɛ mi. Se akɛnɛ adesahi yi mluku he je ɔ, tɔ̃tɔ̃mi bɔɔ komɛ ngɛ nɔ́ nɛ a ti ni komɛ ngma a he.

KƐ WA MA PLƐ KƐ NÁ NƆ MI MAMI KAA MAWU SƐ GBI Ɔ NGƐ NGMAMI KLƆKLƆU ƆMƐ NƐ A NGƐ MWƆNƐ Ɔ MI HA KƐƐ?

Ngmami Klɔuklɔu ɔmɛ nɛ a kɛ nine ngma a henɔ akpehi abɔ ngɛ. Ke eko je ekpa bɔɔ po ɔ, a ma nyɛ kɛ maa to ekpa amɛ a he konɛ a na he nɛ tɔ̃tɔ̃mi ɔ ngɛ ɔ.​—Ke o suɔ nɛ o le enɛ ɔ he ní fuu ɔ, hyɛ munyu nɛ ji “Anɛ Sɛ Gbi Nɛ Ngɛ Baiblo ɔ Mi ɔ Tsake Lo?” nɛ ngɛ jw.org ɔ nɔ ɔ.

Kaa nɔ hyɛmi nɔ́ ɔ, mo susu blema womihi nɛ ji Ngo Wo ɔ Womi Kpo ɔmɛ nɛ Arab bi komɛ ya na ngɛ muɔhi nɛ a ngɛ Ngo Wo ɔ kasa nya a mi ngɛ jeha 1947 ɔ mi ɔ he nɛ o hyɛ. Ngmami Klɔuklɔu ɔmɛ ekomɛ nɛ a ye pe jeha 2,000 kɛ se ɔ fã komɛ ngɛ blema womi kpo nɛ ɔmɛ a mi. Womi mi leli komɛ ngɔ blema womi kpo nɛ ɔmɛ nɛ a kɛ nine ngma a kɛ to Ngmami Klɔuklɔu ɔmɛ nɛ a ngɛ mwɔnɛ ɔ he. Mɛni a na?

Womi mi leli ɔmɛ na kaa Mawu sɛ gbi nɛ ngɛ blema womi kpo nɛ ɔmɛ a mi ɔ nɔuu lɛ ngɛ mwɔnɛ ɔ Ngmami Klɔuklɔu ɔmɛ a mi ɔ nɛ.a Níhi a mi hlami nɛ a pee nɛ ɔ ha nɛ a na kaa sɛ gbi nɛ wa kaneɔ ngɛ mwɔnɛ ɔ Ngmami Klɔuklɔu ɔmɛ a mi ɔ tsakee we. Wa ma nyɛ ma ná nɔ mi mami kaa Mawu baa sɛ gbi nɛ ngɛ Ngmami Klɔuklɔu ɔmɛ a mi ɔ yi kɛ ha wɔ mwɔnɛ ɔ.

Enɛ ɔ he ɔ, wa ma nyɛ ma ná nɔ mi mami kaa sɛ gbi nɛ ngɛ Mawu Munyu ɔ nɛ wa kaneɔ ɔ mi ɔ da pɛpɛɛpɛ. Be mi nɛ enɛ ɔ ngɛ wa juɛmi mi ɔ, ha nɛ waa hyɛ nɔ́ nɛ wa ma nyɛ maa kase ngɛ Mawu he kɛ je e gbali ɔmɛ a ngɔ.