Blɔ Nɔ Nɛ Wa Bɔlɔ ɔ Gu Kɛ Ha Nɛ Wa Le E Si Womi Ɔmɛ

Kɛ je benɛ wa Bɔlɔ ɔ bɔ adesahi ɔ, e kɛ mɛ tu munyu kɛ gu bɔfohi kɛ gbali a nɔ. Jehanɛ se hu ɔ, e ha nɛ a ngma e sɛ gbi ɔ kɛ jɔɔmihi nɛ e wo a he si ɔ kɛ fɔ si. Mawu wo si kaa o ma nyɛ ma ná hwɔɔ se si himi nɛ ngɛ bua jɔmi. Se jije o maa na Mawu si womi ɔmɛ ngɛ mwɔnɛ ɔ?

Sɛ gbi nɛ Mawu ngɛ kɛ ha wɔ ɔ ngɛ Ngmami Klɔuklɔu ɔmɛ a mi. (2 Timoteo 3:16) Mɛni blɔ nɔ Mawu gu nɛ e kɛ gbali tsu ní kɛ ngma e sɛ gbi ɔ? (2 Petro 1:21) Mawu de nihi nɛ́ a ngma e sɛ gbi ɔ níhi nɛ ngɛ e juɛmi mi nɛ a ngma kɛ fɔ si. Jã nɛ níhi yaa nɔ mwɔnɛ ɔ. Nitsumitsɛ ko ma nyɛ ma de e womi ngmalɔ ko kaa e ngma sɛ gbi ko ha lɛ. Se kɛ̃ ɔ, munyuhi nɛ ngɛ sɛ gbi ɔ mi ɔ ji nitsumitsɛ ɔ nɔ́. Jã nɔuu nɛ e ji ngɛ Mawu blɔ fami. E ngɛ mi kaa Mawu ha nɛ nyumu komɛ ngma e sɛ gbi ɔ mohu lɛɛ, se lɛ ji Ngmami Klɔuklɔu ɔmɛ a Ngmalɔ.

MAWU MUNYU Ɔ PƆ HE WAWƐƐ

Mawu sɛ gbi ɔ he hia wawɛɛ, enɛ ɔ he ɔ, e suɔ kaa nihi tsuo nɛ a kane nɛ a nu sisi. Mwɔnɛ ɔ, Mawu “neneene sane kpakpa a” ngɛ “je ma fɛɛ je ma kɛ wɛtso kɛ gbi” slɔɔtohi a mi. (Kpo Jemi 14:6, sisi ningma) Ngɛ Mawu yemi kɛ buami nya a, wa ma nyɛ maa na Ngmami Klɔuklɔu ɔ mluku aloo e fã ko ngɛ gbihi nɛ hiɛ pe 3,000 mi. Womi ko be je ɔ mi nɛ e ngɛ gbihi fuu a mi kaa kikɛ.