KRISTOFOHI A SI HIMI
Bɔ Nɛ Wa Ma Plɛ Kɛ Ná Suɔmi Ha Mawu Kɛ Wa Nyɛmi Nɔmlɔ
Kristofohi be Mose Mlaa a sisi. Se loloolo ɔ, Mlaa enyɔ nɛ pe kulaa nɛ ngɛ Mose Mlaa mi ɔ tsɔɔ kaa e sa nɛ waa suɔ Mawu kɛ wa nyɛmi nɔmlɔ. Mlaa enyɔ nɛ ɔ tsɔɔ wɔ nɔ́ pɔtɛɛ nɛ Yehowa ngɛ hlae nɛ waa pee. (Mat 22:37-39) A kɛ suɔmi nɛ ɔ fɔ we wɔ, enɛ ɔ he ɔ, e sa nɛ waa bɔ mɔde nɛ wa ná suɔmi nɛ ɔ. Mɛni blɔ nɔ wa maa gu kɛ pee jã? Blɔ kake nɛ wa ma nyɛ maa gu nɔ kɛ pee jã ji Baiblo ɔ nɛ wa maa kane daa ligbi. Ke wa kaseɔ Mawu su slɔɔto ɔmɛ a he ní ngɛ Ngmami ɔ mi ɔ, lɔ ɔ ma ha nɛ wa ‘maa na Yehowa he fɛu ɔ.’ (La 27:4) Ke wa pee jã a, suɔmi nɛ wa ngɛ ha Yehowa a mi maa wa, nɛ wa ma susu níhi a he kaa bɔ nɛ e susuɔ níhi a he ɔ. Enɛ ɔ maa wo wɔ he wami nɛ wa maa ye e kita amɛ a nɔ. Kita nɛ ɔmɛ eko ji suɔmi nɛ he kɛ afɔle sami piɛɛ he nɛ wa ma je kpo kɛ tsɔɔ ni kpahi. (Yo 13:34, 35; 1Yo 5:3) Ga womi etɛ nɛ nyɛɛ se ɔ maa ye bua mo konɛ o bua nɛ jɔ Baiblo ɔ kanemi he wawɛɛ.
Poo ní kanemi ɔ he foni, nɛ o juɛmi nɛ hi nɔ́ nɛ o ngɛ kanee ɔ nɔ́. Ngɔɔ lɛ kaa o ngɛ lejɛ ɔ. Mɛni o maa na, mɛni o maa nu, nɛ mɛni he via loo mɛni he fu o maa nu? Ke o hyɛ ɔ, kɛ nihi nɛ a ngɛ lejɛ ɔ jamɛ a be ɔ mi ɔ maa pee a ní ha kɛɛ?
Tsake blɔ nɔ nɛ o guu kɛ kaneɔ Baiblo ɔ hɛ mi. Níhi nɛ nyɛɛ se ɔ maa ye bua mo: Moo kane nɛ o gbi nɛ je kpo, aloo ke o suɔ nɛ o bu tue ngɛ klama nɔ ɔ, moo nyɛɛ ní kanemi ɔ se ngɛ Baiblo ɔ mi. Se nami ngɛ he kaa o maa kane nɔ ko nɛ a tu e he munyu ngɛ Baiblo ɔ mi ɔ he ní, aloo nɔ́ ko pɔtɛɛ ko nɛ Baiblo ɔ tu he munyu ɔ he ní, pe nɛ o maa kane yi ɔmɛ setsɔsetsɔ. Kaa nɔ hyɛmi nɔ́ ɔ, o ma nyɛ maa hyɛ Mawu Munyu ɔ Kasemi Womi ɔ fã 4 ɔ loo fã 16, konɛ o kɛ kane Yesu he ní. Ke o ngɛ daa ligbi ngmami ɔ he susue ɔ, moo kane Baiblo ngmami nɛ a ngɔ ligbi ɔ ngmami ɔ kɛ da nɔ ɔ yi ɔ tsuo. Kane Baiblo womi ɔmɛ setsɔsetsɔ ngɛ be nɛ a kɛ ngma mɛ ɔ nya.
Kane ngmami ɔ saminya konɛ o nu sisi. Ke o kaneɔ yi kake daa ligbi, nɛ o nuɔ sisi, nɛ o pueɔ o yi mi tɛ ngɛ he ɔ, e hi pe nɛ o maa kane yi babauu nɛ o be sisi nue. Mo susu si fɔfɔɛ ɔ he, nɛ o susu níhi nɛ ya nɔ nɛ kɔɔ nɔ́ nɛ o ngɛ kanee ɔ he ɔ he. Susu nɔ́ nɛ o ngɛ kanee ɔ he saminya. Ngɔɔ map kɛ marginal references ɔ kɛ tsu ní. Ke e hí kulaa a, mo hla níhi a mi kɛ kɔ otihi nɛ o nui a sisi ɔ kake he. Ke e maa hi ɔ, ngmlɛfia abɔ nɛ o kɛ kane ní ɔ, ngɔɔ ngmlɛfia kaa jã nɔuu kɛ pue o yi mi tɛ ngɛ nɔ́ nɛ o kane ɔ he.