Yaa Nɔ Nɛ O Ná O Baiblo Kanemi ɔ He Se Wawɛɛ

1. Mɛni tsɔɔ kaa Yesu bua jɔ Ngmami ɔ he?

MOO po he foni kaa Yesu ngɛ ní tsɔɔe nɛ o ngɛ lɛ tue bue. E pɔɔ Ngmami Klɔuklɔu ɔ se tsɛmi ejakaa e kase kɛ wo e yi mi. Ngɛ anɔkuale mi ɔ, benɛ a baptisi Yesu se pɛ ɔ, e kekleekle munyu nɛ e tu kɛ munyu komɛ nɛ e tu loko e gbo ɔ ji munyuhi nɛ e tsɛ se kɛ je Ngmami ɔ mi.b (5 Mose 8:3; La 31:5; Luka 4:4; 23:46) Ngɛ jeha etɛ kɛ fã nɛ Yesu kɛ tsu e sɔmɔmi ní tsumi ɔ mi ɔ, e pɔɔ Ngmami ɔ se tsɛmi, e kaneɔ, nɛ e tsɔɔ mi.​​—Mat. 5:17, 18, 21, 22, 27, 28; Luka 4:16-20.

2. Benɛ Yesu ngɛ wae ɔ, mɛni ye bua lɛ nɛ e le Ngmami ɔ saminya? (Hyɛ foni nɛ ngɛ womi ɔ hɛ mi ɔ.)

² Jeha komɛ a se loko Yesu maa je e sɔmɔmi ní tsumi ɔ sisi ɔ, e nu nɛ a kane Mawu Munyu si abɔ, nɛ lɛ nitsɛ hu e kane si abɔ. Atsinyɛ jemi ko be he kaa ke Yesu kɛ Yosef kɛ Maria ngɛ we mi ɔ, e nuɔ nɛ a tsɛɔ ngmamihi a se daa ligbi ke a ngɛ ní sɛɛe.c (5 Mose 6:6, 7) E ngɛ heii kaa daa otsi ɔ, Yesu piɛɛɔ e weku ɔ he kɛ yaa kpe he ɔ ngɛ He Jɔɔmi Ligbi ɔ nɔ. (Luka 4:16) Ke e ya lejɛ ɔ nɛ a ngɛ Ngmami ɔ kanee hu ɔ, e buɔ tue saminya. Pee se ɔ, Yesu nitsɛ kane Ngmami Klɔuklɔu ɔ ngɛ e dɛ he. Enɛ ɔ ha nɛ Yesu ba le Ngmami ɔ saminya, nɛ e bua jɔ he, nɛ e kɛ nɔ́ nɛ e kase ngɛ ngmami ɔ mi ɔ tsu ní. Kaa nɔ hyɛmi nɔ́ ɔ, o ma kai kaa nɔ́ ko ya nɔ ngɛ sɔlemi we ɔ benɛ Yesu ye jeha 12 pɛ ɔ. Tsɔɔli ɔmɛ nɛ a le Mose Mlaa a saminya a “nya kpɛ a he wawɛɛ ngɛ [Yesu] níhi a sisi numi, kɛ hetohi nɛ e ngɛ hae ɔ he.”​​—Luka 2:46, 47, 52.

3. Mɛni he wa ma susu ngɛ ní kasemi nɛ ɔ mi?

³ Ke wɔ hu wa kaneɔ Mawu Munyu ɔ be fɛɛ be ɔ, wa bua maa jɔ he, nɛ wa maa le Ngmami ɔ mi saminya. Se kɛ wa ma plɛ kɛ ná nɔ́ nɛ wa kaneɔ ɔ he se ha kɛɛ? Wa ma nyɛ maa kase nɔ́ ko ngɛ nɔ́ nɛ Yesu de nihi nɛ a le Mlaa a saminya a mi. Nihi nɛ a le Mlaa a saminya a a kpɛti ni komɛ ji womi ngmali ɔmɛ, Farisi bi ɔmɛ kɛ Saduki bi ɔmɛ. E ngɛ mi kaa jami hɛ mi nyɛɛli nɛ ɔmɛ pɔɔ Ngmami ɔ kanemi mohu lɛɛ, se a ná we nɔ́ nɛ a kaneɔ ɔ he se. Yesu tsɔɔ níhi etɛ nɛ nyumu nɛ ɔmɛ ko pee konɛ a ná Ngmami ɔ he se wawɛɛ. Nihi nɛ Yesu de mɛ ɔ maa ye bua wɔ nɛ waa bɔ mɔde nɛ (1) waa nu nɔ́ nɛ wa kaneɔ ɔ sisi, (2) wa hla juetlihi nɛ ngɛ Ngmami ɔ mi, kɛ (3) wa ha nɛ Mawu Munyu ɔ nɛ tsake wɔ.

MOO KANE KONƐ O NU SISI

4. Mɛni Luka 10:25-29 ɔ tsɔɔ wɔ ngɛ Mawu Munyu ɔ kanemi he?

⁴ Wa suɔ nɛ waa nu nɔ́ nɛ wa kaneɔ ngɛ Baiblo ɔ mi ɔ sisi, ejakaa ja wa nu sisi loko wa ma ná he se wawɛɛ. Kaa nɔ hyɛmi nɔ́ ɔ, mo susu nɔ́ nɛ ya nɔ ngɛ Yesu kɛ “nyumu ko nɛ e le Mlaa a saminya a” a kpɛti ɔ he nɛ o hyɛ. (Kane Luka 10:25-29.) Benɛ nyumu ɔ bi Yesu nɔ́ nɛ e sa nɛ e pee konɛ e ná neneene wami ɔ, Yesu gbla e juɛmi kɛ ya Mawu Munyu ɔ nɔ nɛ e bi lɛ ke: “Mɛni a ngma ngɛ Mlaa a mi ɔ? Kɛ o kaneɔ lɛ kɛɛ?” Heto nɛ nyumu ɔ ha Yesu ɔ da. E tsɛ ngmamihi nɛ tsɔɔ kaa e sa nɛ waa suɔ Mawu kɛ wa nyɛmi nɔmlɔ ɔ se. (3 Mose 19:18; 5 Mose 6:5) Se mo kadi sane nɛ nyɛɛ se nɛ ɔ nɛ nyumu ɔ bi Yesu ɔ. E bi lɛ ke: “Mɛnɔ tutuutu ji ye nyɛmi?” Sane nɛ nyumu ɔ bi Yesu ɔ tsɔɔ kaa e nui nɔ́ nɛ e kane ɔ sisi saminya. Enɛ ɔ he ɔ, e nyɛ we nɛ e ngɔ nɔ́ nɛ e le ngɛ jamɛ a ngmami ɔmɛ a mi ɔ kɛ tsu ní saminya.

5. Ke o sɔle nɛ o to o tsui si kɛ kane Baiblo ɔ, kɛ lɔ ɔ maa ye bua mo nɛ o nu nɔ́ nɛ o ngɛ kanee ɔ sisi saminya ha kɛɛ?

⁵ Ke wa to blɔ nya kɛ ha Mawu Munyu ɔ kanemi ɔ, e maa ye bua wɔ nɛ waa nu sisi wawɛɛ. Ga womi komɛ nɛ ma nyɛ maa ye bua mo ji nɛ ɔ nɛ. Moo sɔle loko o je Mawu Munyu ɔ kanemi sisi. Ja Yehowa ye bua wɔ loko wa maa nu Ngmami ɔ sisi. Enɛ ɔ he ɔ, e sa nɛ wa bi lɛ nɛ e ye bua wɔ kɛ e mumi klɔuklɔu ɔ konɛ wa juɛmi nɛ hi nɔ́ nɛ wa ngɛ kanee ɔ nɔ. Jehanɛ hu ɔ, koo kane Baiblo ɔ kɛfokɛfo. Lɔ ɔ maa ye bua mo nɛ o nu nɔ́ nɛ o ngɛ kanee ɔ sisi. O ma nyɛ maa kane nɛ o gbi nɛ je kpo, loo o bu nɔ́ nɛ a record ɔ tue nɛ o nyɛɛ se ngɛ o Baiblo ɔ mi. Ke o ngɛ recording ɔ tue bue nɛ o ngɛ se nyɛɛe ɔ, e maa ye bua mo konɛ o nu sisi, o kai nɔ́ nɛ o kase ɔ, nɛ o maa kase níhi fuu ngɛ mi. (Yosh. 1:8) Ke o kane ta a, moo sɔle ekohu, nɛ o na Yehowa si ngɛ e Munyu ɔ nɛ e kɛ ha wɔ kaa nike ní ɔ he, nɛ o de lɛ nɛ e ye bua mo konɛ o ngɔ nɔ́ nɛ o kane ɔ kɛ tsu ní.

6. Ke o ngɛ Mawu Munyu ɔ kanee nɛ o bi o he sanehi nɛ o ngma oti komɛ kɛ fɔ si ɔ, kɛ lɔ ɔ maa ye bua mo ha kɛɛ? (Hyɛ foni ɔ hulɔ.)

⁶ Ní enyɔ komɛ hu nɛ o ma nyɛ maa pee konɛ o nu Baiblo ɔ sisi saminya ji nɛ ɔ nɛ. Mo bi o he sanehi ngɛ nɔ́ nɛ o ngɛ kanee ɔ he. Ke o ngɛ nɔ́ ko kanee ngɛ Baiblo ɔ mi ɔ, mo hla sane bimi nɛ ɔmɛ a heto: ‘Mɛnɔmɛ ji nihi pɔtɛɛ nɛ a ngɛ a he munyu tue ɔ? Mɛnɔ lɛ ngɛ munyu ɔ tue ɔ? Mɛnɔ nɛ e kɛ lɛ ngɛ munyu ɔ tue ɔ, nɛ mɛni he je? Jije sane ɔ ya nɔ ngɛ, nɛ mɛni be nɛ e ya nɔ?’ Sane bimi nɛ ɔmɛ maa ye bua mo konɛ o susu otihi pɔtɛɛ nɛ ngɛ nɔ́ nɛ o kane ɔ mi ɔ he, konɛ o nyɛɛ se. Jehanɛ hu ɔ, be mi nɛ o ngɛ kanee ɔ, moo ngma otihi nɛ o kadi ɔ kɛ fɔ si. Ke o pee jã a, e maa ye bua mo nɛ o pue o yi mi tɛ ngɛ nɔ́ nɛ o kane ɔ he, nɛ o maa nu sisi saminya. E maa ye bua mo hulɔ konɛ o kai nɔ́ nɛ o kane ɔ. O ma nyɛ maa ngma sane bimi komɛ hu kɛ fɔ si, nɛ ke o hla níhi a mi hu ɔ, o ma nyɛ maa ngma nɔ́ nɛ o na a kɛ fɔ si. Moo ngma oti ɔmɛ pɛ kɛ fɔ si, nɛ o ngma bɔ nɛ o suɔ kaa o kɛ nɔ́ nɛ o kane ɔ ma tsu ní ha a hu kɛ fɔ si. Moo ngma bɔ nɛ o nu he ha ngɛ nɔ́ nɛ o kane ɔ he ɔ kɛ fɔ si. Ke o pee jã a, e maa ye bua mo nɛ o maa na Mawu Munyu ɔ kaa sɛ gbi nɛ Yehowa ngma kɛ ha mo nitsɛ.

7. Ke wa ngɛ Baiblo ɔ kanee ɔ, mɛni su nɛ wa hia, nɛ mɛni he je? (Mateo 24:15)

⁷ Yesu tsɔɔ su ko nɛ maa ye bua wɔ konɛ waa nu Mawu Munyu ɔ sisi. Lɔ ɔ ji nɔ́ se kɔmi. (Kane Mateo 24:15.) Mɛni ji nɔ́ se kɔmi? Lɔ ɔ ji nyɛmi nɛ wa ngɛ nɛ waa kɛ naa tsakpa nɛ ngɛ oti enyɔ a kpɛti kɛ slɔɔto nɛ ngɛ mi, kɛ nyɛmi nɛ waa kɛ yɔseɔ oti pɔtɛɛ komɛ nɛ a tui he munyu tɛɛ. Jehanɛ hu ɔ, Yesu tsɔɔ kaa wa hia nɔ́ se kɔmi loko wa maa na bɔ nɛ níhi nɛ ngɛ nɔ yae ɔ ha nɛ Baiblo gbamihi ngɛ mi bae ha. Wa hia su nɛ ɔ hulɔ bɔ nɛ pee nɛ wa ná nɔ́ fɛɛ nɔ́ nɛ wa kaneɔ ngɛ Baiblo ɔ mi ɔ he se wawɛɛ.

8. Ke wa ngɛ Baiblo ɔ kanee ɔ, mɛni maa ye bua wɔ nɛ wa kɔ nɔ́ se?

⁸ Yehowa yeɔ bua e sɔmɔli nɛ a kɔɔ nɔ́ se. Enɛ ɔ he ɔ, moo sɔle nɛ o bi Yehowa nɛ e ye bua mo nɛ o ná su nɛ ɔ. (Abɛ 2:6) Mɛni o ma nyɛ maa pee kɛ tsu o sɔlemi ɔ nya ní? Mo susu nɔ́ nɛ o ngɛ kanee ɔ he saminya, nɛ o kadi tsakpa nɛ ngɛ níhi nɛ o le momo kɛ nɔ́ nɛ o ngɛ kanee ɔ a kpɛti. Wa Baiblo kasemi womi ɔmɛ ma nyɛ maa ye bua mo konɛ o pee jã. Kaa nɔ hyɛmi nɔ́ ɔ, o ma nyɛ ma hla níhi a mi ngɛ Research Guide for Jehovah’s Witnesses ɔ mi. Womi nɛ ɔmɛ maa ye bua mo konɛ o nyɛ nɛ o nu Baiblo mi sane ko sisi saminya, nɛ o maa na bɔ nɛ o kɛ ma tsu ní ha ngɛ o si himi mi. (Heb. 5:14) Ke o kɔɔ nɔ́ se be mi nɛ o ngɛ ní kanee ɔ, o maa nu Ngmami ɔmɛ a sisi saminya.

KE O NGƐ NGMAMI Ɔ KANEE Ɔ, MO HLA JUETLIHI NƐ NGƐ MI

9. Mɛni ji Baiblo mi anɔkuale ko nɛ he hia nɛ Saduki bi ɔmɛ ma a hɛ kɛ fɔ nɔ?

⁹ Saduki bi ɔmɛ le níhi nɛ ngɛ Baiblo mi womi enuɔ nɛ je Hebri Ngmami ɔ sisi ɔ mi saminya, se a ma a hɛ kɛ fɔ anɔkualehi nɛ a he hia nɛ a ngɛ jamɛ a womi ɔmɛ a mi ɔ nɔ. Kaa nɔ hyɛmi nɔ́ ɔ, benɛ a bi Yesu sane kɛ kɔ gbogboehi a si tlemi ɔ he ɔ, mo kadi heto nɛ e ha mɛ. E bi mɛ ke: “Anɛ nyɛ kane we ngɛ Mose womi ɔ mi kaa ngɛ mio tso ɔ he sane ɔ mi ɔ, Mawu de lɛ ke: ‘Imi ji Abraham Mawu kɛ Isak Mawu kɛ Yakɔb Mawu ɔ’ lo?” (Maak. 12:18, 26) E ngɛ mi kaa Saduki bi ɔmɛ kane gbogboehi a si tlemi ɔ he ní si abɔ mohu lɛɛ, se sane nɛ Yesu bi mɛ ɔ ha nɛ wa na kaa a ma a hɛ kɛ fɔ anɔkuale nɛ ngɛ Ngmami ɔ mi nɛ kɔɔ gbogboehi a si tlemi ɔ he ɔ nɔ.​​—Maak. 12:27; Luka 20:38.d

10. Mɛni nɛ e sa kaa waa ngɔ wa juɛmi kɛ ma nɔ ke wa ngɛ Baiblo ɔ kanee?

¹⁰ Mɛni wa kaseɔ ngɛ Yesu kɛ Saduki bi ɔmɛ a sane ɔ mi? Ke wa kane Baiblo ngmami ko loo sane ko ngɛ Baiblo ɔ mi ɔ, e sa nɛ waa ngɔ wa juɛmi kɛ ma níhi tsuo nɛ wa ma nyɛ maa kase ngɛ mi ɔ nɔ. E sɛ nɛ waa ngɔ wa juɛmi kɛ ma níhi nɛ a sisi numi yi pɛ ɔ a nɔ. E sa nɛ waa ngɔ wa juɛmi kɛ ma anɔkualehi nɛ a mi kuɔ kɛ Baiblo sisi tomi mlaahi a nɔ hulɔ, ejakaa e biɔ mɔde bɔmi wawɛɛ loko no ko maa na.

11. Mɛni blɔ nɔ nɛ 2 Timoteo 3:16, 17 ɔ maa ye bua mo nɛ o na juetlihi ngɛ Baiblo ɔ mi?

¹¹ Ke o ngɛ Baiblo ɔ kanee ɔ, mɛni maa ye bua mo konɛ o hla juetlihi nɛ ngɛ mi ɔ? Mo susu nɔ́ nɛ 2 Timoteo 3:16, 17 ɔ de ɔ he nɛ o hyɛ. (Kane.) Mo kadi kaa ‘Ngmami ɔ tsuo he ngɛ se nami’ kɛ ha (1) ní tsɔɔmi, (2) kɛ ha hɛ mi kami, (3) kɛ ha níhi a dlami tlɔmɔɔ, (4) kɛ ha tsɔsemi. O ma nyɛ ma ná ní eywiɛ nɛ ɔmɛ a he se ngɛ Baiblo mi womihi nɛ o pɔɛ kanemi ɔ po a mi. Mo susu Baiblo mi sane nɛ o ngɛ kanee ɔ he konɛ o na nɔ́ nɛ e tsɔɔ mo ngɛ Yehowa, e yi mi tomi kɛ e sisi tomi mlaahi a he. Mo susu bɔ nɛ Baiblo mi sane ɔ ma nyɛ ma kã nɔ hɛ mi ha a he. Moo hyɛ bɔ nɛ Baiblo ɔ ma nyɛ maa ye bua mo nɛ o na su yayahi nɛ o ngɛ, kɛ bɔ nɛ o ma plɛ kɛ yu o he ngɛ su nɛ ɔmɛ a he ha konɛ o ya nɔ nɛ o ye Yehowa anɔkuale. Mo pue o yi mi tɛ ngɛ bɔ nɛ a kɛ Baiblo ɔ ma nyɛ ma dla níhi loo a kɛ ma nyɛ ma dla susumi ko nɛ dɛ ɔ he. E ma nyɛ maa pee susumi nɛ nɔ ko nɛ o kɛ lɛ kpe ngɛ fiɛɛmi mi ɔ hɛɛ. Jehanɛ hu ɔ, moo hyɛ kaa o maa na bɔ nɛ jamɛ a ngmami ɔ ma nyɛ ma tsɔse mo ha konɛ o na níhi kaa bɔ nɛ Yehowa naa níhi ɔ. Ke oti eywiɛ nɛ ɔmɛ ngɛ o juɛmi mi ɔ, e maa ye bua mo nɛ o maa na Ngmami ɔ mi juetlihi nɛ ma ha nɛ o ná o Baiblo kanemi ɔ he se wawɛɛ.

NGƆƆ NƆ́ NƐ O KANE Ɔ KƐ TSU NÍ

12. Mɛni he je nɛ Yesu bi Farisi bi ɔmɛ ke ‘Anɛ nyɛ kane we Ngmami ɔ lo’ ɔ?

¹² Yesu kpale bi Farisi bi ɔmɛ ke: ‘Anɛ nyɛ kane we Ngmami ɔ lo?’ E pee jã konɛ e kɛ je susumi nɛ dɛ nɛ a ná ngɛ Ngmami ɔmɛ a he ɔ kpo. (Mat. 12:1-7)e Jamɛ a be ɔ mi ɔ, Farisi bi ɔmɛ tsɔɔ kaa Yesu kaseli ɔmɛ yi He Jɔɔmi Ligbi ɔ he mlaa a nɔ. Yesu tsɛ ngmami enyɔ komɛ a se kɛ ha mɛ heto. E tsɛ ngmami ko se ngɛ Hosea womi ɔ mi konɛ e kɛ ha nɛ a na kaa a nui nɔ́ he je nɛ a wo He Jɔɔmi Ligbi ɔ he mlaa a sisi, nɛ e ha nɛ a na kaa a nɛ nɔ mɔbɔ. Mɛni he je nɛ a kɛ nɔ́ nɛ a kaneɔ ngɛ Mawu Munyu ɔ mi ɔ tsu we ní ɔ? Ejakaa a kaneɔ Mawu Munyu ɔ konɛ a kɛ hla tɔmihi ngɛ ni kpahi a he, nɛ a kɛ wo a he nɔ hulɔ. Su nɛ ɔ ha we nɛ a nu nɔ́ nɛ a kaneɔ ɔ sisi.​​—Mat. 23:23; Yoh. 5:39, 40.

13. Ke wa ngɛ Baiblo ɔ kanee ɔ, mɛni su nɛ e sa nɛ wa ná, nɛ mɛni he je?

¹³ Nɔ́ nɛ wa kaseɔ ngɛ Yesu munyu nɛ ɔ mi ji kaa e sa nɛ wa ná juɛmi nɛ da ke wa ngɛ Baiblo ɔ kanee. E sɛ nɛ waa pee kaa Farisi bi ɔmɛ, mohu ɔ, e sa nɛ waa ba wa he si nɛ waa pee klaalo kaa wa maa kase ní kpahi. E sa nɛ waa kɛ ‘he jɔmi nɛ kplɛɛ munyu ɔ nɛ a du kɛ wo wa mi ɔ nɔ.’ (Yak. 1:21) Ke wa he jɔ ɔ, wa ma ha nɛ Mawu Munyu ɔ nɛ tsake wɔ. Ke wa baa wa he si, nɛ wa kane we Baiblo ɔ kɛ hla tɔmihi ngɛ ni kpahi a he ɔ, e ma ha nɛ níhi nɛ wa kaseɔ kɛ kɔɔ mɔbɔ nami, mi mi sami kɛ suɔmi he ɔ ma ná wa nɔ he wami.

14. Mɛni ma ha nɛ waa na kaa Baiblo ɔ ngɛ wa nɔ he wami náe loo e ná we wa nɔ he wami? (Hyɛ foni ɔmɛ hulɔ.)

¹⁴ Bɔ nɛ waa kɛ nihi hiɔ si ha a lɛ maa tsɔɔ kaa wa ha nɛ Baiblo ɔ ngɛ wa nɔ he wami náe loo e ná we wa nɔ he wami. Farisi bi ɔmɛ ha we nɛ Mawu Munyu ɔ nɛ sɛ a tsui mi, enɛ ɔ he ɔ, a ‘buɔ nihi nɛ a yi fɔ ɔ fɔ.’ (Mat. 12:7) Jã kɛ̃ nɛ bɔ nɛ waa kɛ nihi hiɔ si ha a maa tsɔɔ kaa waa kɛ Mawu Munyu ɔ nɛ wa ngɛ kasee ɔ ngɛ ní tsue loo waa kɛ tsu we ní. Kaa nɔ hyɛmi nɔ́ ɔ, anɛ wa pɔɔ su kpakpahi nɛ nihi ngɛ ɔ he munyu tumi aloo waa kɛ oya yemi tuɔ a gbɔjɔmihi a he munyu lo? Anɛ wa naa nihi mɔbɔ nɛ wa pee klaalo kaa ke a tɔ̃ wa nɔ ɔ, waa kɛ maa ke mɛ lo? Aloo wa hlaa tɔmihi ngɛ a he nɛ wa yaa nɔ nɛ wa náa a he abofu lo? Ke wa bi wa he sanehi kaa jã a, e ma ha nɛ wa maa na ke ji nɔ́ nɛ wa ngɛ kanee ɔ ngɛ wa susumi, wa he numi, kɛ wa ní peepee nɔ he wami náe.​​—1 Tim. 4:12, 15; Heb. 4:12.

MAWU MUNYU Ɔ KANEMI HAA NƆ BUA JƆMI

15. Kɛ Yesu nu he ha kɛɛ ngɛ Ngmami Klɔuklɔu ɔ he?

¹⁵ Yesu suɔ Ngmami Klɔuklɔu ɔ. Munyu nɛ ngɛ La 40:8 ɔ tsɔɔ bɔ nɛ Yesu nu he ha ngɛ Mawu Munyu ɔ he. Lejɛ ɔ de ke: “I suɔ kaa ma pee o suɔmi nya ní; o mlaa a, a ngma ngɛ ye tsui mi.” Akɛnɛ Yesu suɔ Ngmami ɔ he je ɔ, e ná bua jɔmi, nɛ e ye manye ngɛ Yehowa sɔmɔmi mi. Ke wa kaneɔ Mawu Munyu ɔ nɛ waa kɛ tsuɔ ní ɔ, wɔ hu wa bua maa jɔ nɛ wa maa ye manye.​​—La 1:1-3.

16. Mɛni o maa pee konɛ o ná Mawu Munyu ɔ kanemi he se wawɛɛ? (Hyɛ daka nɛ ji, ““Yesu Munyu Ɔmɛ Maa Ye Bua Mo Nɛ O Nu Nɔ́ Nɛ O Kaneɔ Ngɛ Baiblo ɔ Mi ɔ Sisi.”)

¹⁶ Kaa bɔ nɛ Yesu munyu ɔmɛ kɛ e nɔ hyɛmi nɔ́ ɔ tsɔɔ ɔ, nyɛ ha nɛ waa ya wa hɛ mi ngɛ wa Baiblo kanemi ɔ mi. Ke wa sɔleɔ, wa toɔ wa tsui si, wa biɔ wa he sanehi, nɛ wa kadiɔ oti komɛ kɛ fɔɔ si ke wa ngɛ Baiblo ɔ kanee ɔ, e maa ye bua wɔ konɛ waa nu sisi saminya. Ke wa susu nɔ́ nɛ wa ngɛ kanee ɔ he saminya, nɛ wa hlaa níhi a mi ngɛ wa womi ɔmɛ a mi ɔ, lɔ ɔ maa ye bua wɔ konɛ wa kɔ nɔ́ se. Ke wa ngɛ Baiblo mi sanehi nɛ wa li he nɔ́ ko tsɔ kanee nɛ wa to wa tsui si kɛ hla juetlihi nɛ a ngɛ mi ɔ, e maa ye bua wɔ nɛ waa kɛ Baiblo ɔ nɛ tsu ní saminya. Jehanɛ hu ɔ, ke wa bɔɔ mɔde kaa waa kɛ juɛmi nɛ da maa kane Mawu Munyu ɔ, e maa ye bua wɔ konɛ waa kɛ nɔ́ nɛ wa ngɛ kanee ɔ nɛ tsu ní. Ke wa bɔ mɔde nɛ wa pee ní nɛ ɔmɛ ɔ, wa ma ná Baiblo ɔ nɛ wa kaneɔ ɔ he se, nɛ wa maa hɛ kɛ su Yehowa he wawɛɛ.​​—La 119:17, 18; Yak. 4:8.