KRISTOFOHI A SI HIMI
“Paulo Na Mawu Si Nɛ E Ná Kã”
Benɛ asafo nɛ ngɛ Roma a nu kaa Paulo ma a, a ha nɛ nyɛmimɛ komɛ hia blɔ maa pee si tomi 40 aloo kilomita 64 nɛ a ya kpee lɛ ngɛ blɔ ɔ nɔ. Kɛ a he nɛ a kɛ sã afɔle kɛ suɔmi nɛ a je kpo ɔ ná Paulo nɔ he wami ha kɛɛ? “Benɛ Paulo hɛ ngmɛ gba a nɔ ɔ, e na Mawu si, nɛ e ná kã.” (Nít 28:15) A le Paulo kaa e woɔ asafohi nɛ e ya slaa mɛ ɔ he wami, se amlɔ nɛ ɔ nɛ a wo lɛ tsu nɛ a wo lɛ kɔsɔkɔsɔ ɔ, lɛ mohu nɛ e ná he wami womi kɛ je nyɛmimɛ ɔmɛ a ngɔ.—2Ko 13:10.
Mwɔnɛ ɔ, kpɔ mi nɔ hyɛli ya slaa asafohi konɛ a wo a nyɛmimɛ nyumuhi kɛ yihi he wami. Kaa bɔ nɛ e ji ngɛ Mawu we bi tsuo a blɔ fa mi ɔ, be komɛ ɔ, mɛ hu pɔ tɔɔ a he, a peeɔ yeyeeye, nɛ a kɔni mi jɔ̃ɔ. Ke kpɔ mi nɔ hyɛlɔ ɔ kɛ e yo ɔ ba slaa nyɛ asafo ɔ ekohu ɔ, mɛni o ma nyɛ maa pee kɛ ye bua mɛ konɛ a ná kã, bɔ nɛ pee nɛ ‘nyɛɛ wo nyɛ sibi he wami’?—Ro 1:11, 12.
Moo ya kpe ɔmɛ nɛ a maa pee kɛ ha fiɛɛmi yami ɔ. Ke kpɔ mi nɔ hyɛli na kaa fiɛɛli ngɔ níhi kɛ sã afɔle konɛ a ná otsi klɛdɛɛ ɔ he se kɛ pi si ɔ, e woɔ mɛ he wami. (1Tɛ 1:2, 3; 2:20) Moo hyɛ kaa o ma nyɛ ma tsu blɔ gbali a wami ní tsumi ɔ ngɛ nyɔhiɔ nɛ e ma ba slaa nyɛ ɔ mi lo? Anɛ o kɛ kpɔ mi nɔ hyɛlɔ ɔ kɛ e yo ɔ ma nyɛ ma tsu ní ngɛ fiɛɛmi mi loo o kɛ a ti nɔ kake ma ya slaa o Baiblo mi ní kaselɔ ko lo? A suɔ kaa a kɛ fiɛɛli slɔɔtoslɔɔtohi ma tsu ní ngɛ fiɛɛmi mi, nɛ a bua jɔɔ ke ji kaa a kɛ fiɛɛli ehehi aloo nihi nɛ a be níhi a si kpami tsu ní ngɛ fiɛɛmi mi.
Moo pee mɛ nibwɔ. Anɛ o ma nyɛ ma ha nɛ a ba hwɔ o we ɔ mi, aloo o ma nyɛ ma tsɛ mɛ ní yemi lo? Ke o pee jã a, kpɔ mi nɔ hyɛlɔ ɔ kɛ e yo ɔ naa kaa o suɔ mɛ. A hyɛ we blɔ kaa o nibwɔ peemi ɔ nɛ pee kɛ̃tsɛɛ.—Luk 10:38-42.
Moo bu e ga womi kɛ e blɔ tsɔɔmi tue nɛ o kɛ tsu ní. Kpɔ mi nɔ hyɛlɔ ɔ jeɔ suɔmi mi kɛ yeɔ bua wɔ konɛ waa na bɔ nɛ wa ma nyɛ maa ya wa hɛ mi ngɛ Yehowa sɔmɔmi mi. Be komɛ ɔ, e ma bi nɛ e kã wa hɛ mi. (1Ko 5:1-5) Ke wa ba wa he si nɛ wa bu tue ɔ, e bua jɔɔ.—Heb 13:17.
Mo je hɛ sa kpo. Mo de kpɔ mi nɔ hyɛlɔ ɔ kɛ e yo ɔ bɔ nɛ o ná a slaa mi ɔ he se ha. O ma nyɛ maa ngma mɛ sɛ womi loo o ma ha mɛ kaadi aloo nɛ o ma de mɛ ngɛ a hɛ mi tɛɛ.—Kol 3:15.