Mɛni O Ma Nyɛ Maa Kase Ngɛ Asafo ɔ La Kpa Amɛ A Mi?

Asafo ɔ la kpa amɛ a kpɛti te nɛɛ lɛ o bua jɔ he wawɛɛ? Nɛ mɛni he je? Anɛ o yɔse kaa la a mi video ɔmɛ kɔɔ wa daa ligbi si himi he lo? Akɛnɛ e slo munyuyi nɛ a daa nɔ kɛ poɔ la amɛ kɛ bɔ nɛ a fiaa la amɛ ha he je ɔ, nɔ fɛɛ nɔ naa nɔ́ nɛ e bua jɔ he ngɛ mi. Se kɛ̃ ɔ, pi nɛ a pee la nɛ ɔmɛ konɛ waa fia kɛ je wa hɛ ja pɛ kɛkɛ.

Ní kasemi ngɛ la amɛ eko fɛɛ eko mi nɛ wa ma nyɛ kɛ tsu ní ngɛ wa si himi mi kaa Kristofohi kɛ ngɛ wa fiɛɛmi ní tsumi ɔ mi. La amɛ ekomɛ kɔɔ nibwɔ peemi, kake peemi, huɛ bɔmi, kã peemi, suɔmi aloo hemi kɛ yemi he. Ekpa komɛ hu kɔɔ Yehowa nɛ wa maa kpale kɛ ba e ngɔ, nihi a tɔmihi nɛ waa kɛ maa pa mɛ, anɔkuale nɛ wa maa ye daa, kɛ Mawu jami mi otihi nɛ waa kɛ maa ma wa hɛ mi ɔ he. La a eko po tsɔɔ bɔ nɛ waa kɛ fon ma tsu ní ha. Mɛni ní kpa komɛ lɛ o kase ngɛ la nɛ ɔmɛ a mi?

NYƐƐ HYƐ LA FIAMI VIDEO NƐ JI, E PIƐ BƆƆ NƐ E MAA BA, LƆ Ɔ SE Ɔ, NYƐ HA SANE BIMIHI NƐ NYƐƐ SE NƐ ƆMƐ A HETO:

• Mɛni hwɔɔ se jɔɔmihi lɛ nyɛminyumu nɔkɔtɔma a kɛ e yo ɔ ngɛ he susue?​—1Mo 12:3

• Mɛni wa maa pee kɛ ha nɛ hemi kɛ yemi nɛ wa ngɛ kaa Yehowa ma nyɛ ma ha nɛ e si womi ɔmɛ maa ba mi ɔ mi nɛ wa?

• Mɛni si himi nɛ ngɛ bua jɔmi lɛ e be kɛe nɛ e maa ba?

• Kɛ Matsɛ Yemi ɔ he hɛ nɔ kami nɛ wa ngɛ ɔ yeɔ bua wɔ nɛ wa fĩɔ si ngɛ kahi a mi ha kɛɛ?​—Ro 8:25