Wa Suɔ Yehowa Nɛ Ji Wa Tsɛ ɔ Wawɛɛ

1-2. Mɛni he je nɛ Yehowa ha wɔ he blɔ kaa waa piɛɛ e weku ɔ he ɔ, nɛ mɛni blɔ nɔ e gu kɛ pee jã?

YEHOWA fɔ wɔ nine kɛ ba piɛɛ e weku nɛ a sɔmɔɔ lɛ ɔ a he. Enɛ ɔ ji he blɔ nɛ se be! Wa weku ɔ mi bimɛ ji nihi nɛ a jɔɔ a he nɔ kɛ ha Mawu nɛ a ngɛ hemi kɛ yemi ngɛ e Bi ɔ kpɔmi afɔle sami ɔ mi. Nihi nɛ a ngɛ weku nɛ ɔ mi ɔ ngɛ bua jɔmi wawɛɛ. Wa ngɛ si himi kpakpa amlɔ nɛ ɔ, nɛ wa ngɛ hɛ nɔ kami hu kaa hwɔɔ se ɔ, wa maa hi si kɛ ya neneene ngɛ hiɔwe aloo paradeiso zugba a nɔ.

² Yehowa ha nɛ wa ba piɛɛ e weku ɔ he ejakaa e suɔ wɔ wawɛɛ. Se loko e nyɛ pee jã a, e kɛ nɔ́ ko sã afɔle. (Yoh. 3:16) A he wɔ kɛ “jua wawɛ.” (1 Kor. 6:20) Kɛ gu kpɔmi nɔ́ ɔ nɔ ɔ, Yehowa ha wɔ he blɔ konɛ huɛ bɔmi kpakpa nɛ hi waa kɛ lɛ wa kpɛti. Wa ngɛ he blɔ kaa wa sɔleɔ kɛ haa wa Tsɛ nɛ ji Nɔ nɛ pe kulaa ngɛ je ɔ mi ɔ. Nɛ kaa bɔ nɛ wa kase kɛ sɛ hlami ɔ, Yehowa ji Tsɛ nɛ hi pe kulaa.

3. Ke wa susu níhi nɛ Yehowa pee ha wɔ ɔ he ɔ, mɛni sane bimihi wa ma nyɛ ma bi? (Hyɛ daka nɛ ji “Anɛ Yehowa Le Mi Lo?” ɔ hulɔ.)

³ Kaa bɔ nɛ Baiblo ngmalɔ ko pee ɔ, eko ɔ, wa ma bi ke: ‘Mɛni ma kɛ na Yehowa si ngɛ kpakpa tsuo nɛ e pee mi ɔ he?’ (La 116:12) Heto ɔ ji kaa wa be nyɛe maa wo wa hiɔwe Tsɛ ɔ hiɔ gblegbleegble. Se loloolo ɔ, akɛnɛ e suɔ wɔ he je ɔ, wɔ hu wa suɔ lɛ. Bɔfo Yohane ngma ke: “Wa jeɔ suɔmi kpo, ejakaa lɛ nɛ e suɔ wɔ kekle.” (1 Yoh. 4:19) Mɛni wa ma nyɛ maa pee kɛ tsɔɔ kaa wa suɔ wa hiɔwe Tsɛ ɔ?

MOO HƐ KƐ SU YEHOWA HE HAA

4. Ngɛ Yakobo 4:8 ɔ nya a, mɛni he je nɛ e sa nɛ waa bɔ mɔde nɛ waa hɛ kɛ su Yehowa he ɔ?

⁴ Yehowa suɔ nɛ waa hɛ kɛ su e he nɛ waa kɛ lɛ nɛ sɛɛ ní. (Kane Yakobo 4:8.) E wo wɔ he wami kaa waa “hɛɛ sɔlemi mi,” nɛ e buɔ wɔ tue be fɛɛ be. (Rom. 12:12) E ngɛ wa he deka, nɛ e pee klaalo kaa e maa bu wɔ tue be fɛɛ be. Enɛ ɔ he ɔ, wɔ hu wa buɔ lɛ tue kɛ gu e Munyu nɛ ji Baiblo ɔ kɛ Baiblo kasemi womihi nɛ wa kaneɔ ɔ nɔ. Womi nɛ ɔmɛ yeɔ bua wɔ nɛ wa nuɔ Baiblo ɔ sisi. Jehanɛ hu ɔ, wa buɔ lɛ tue kɛ gu tue bumi nɛ wa peeɔ ngɛ Kristofohi a kpehi a sisi ɔ nɔ. Kaa bɔ nɛ ní sɛɛmi nɛ hiɔ jokuɛwi kɛ a fɔli a kpɛti ɔ yeɔ bua jokuɛ ɔmɛ nɛ a nyɛɔ hɛɛ kɛ suɔ a fɔli a he ɔ, jã nɔuu kɛ̃ nɛ ní sɛɛmi nɛ maa hi waa kɛ Yehowa wa kpɛti ɔ maa ye bua wɔ konɛ waa ya nɔ nɛ waa hi e kasa nya haa.

5. Mɛni wa ma nyɛ maa pee konɛ wa sɔlemi nɛ nu tso wawɛɛ?

⁵ Mo susu ní sɛɛmi kpakpa nɛ maa ya nɔ ngɛ o kɛ Yehowa nyɛ kpɛti ɔ he nɛ o hyɛ. Yehowa suɔ nɛ wa plɛ wa tsui mi susumihi tsuo kɛ pue si ngɛ e hɛ mi kɛ gu sɔlemi nɔ. (La 62:8) Wa biɔ wa he sane komɛ kaa: ‘Anɛ i jeɔ ye tsui mi kɛ sɔleɔ kaa bɔ nɛ nɔ ko jeɔ e tsui mi kɛ ngmaa nɔ ko sɛ womi ɔ lo, aloo i deɔ níhi nɛ nɔ ko ngma kɛ fɔ si momo ɔ ngɛ ye sɔlemi mi be fɛɛ be?’ Wa le kaa o suɔ Yehowa wawɛɛ, nɛ o suɔ nɛ huɛ bɔmi nɛ ngɛ o kɛ lɛ nyɛ kpɛti ɔ mi nɛ wa. Loko o ma nyɛ maa pee jã a, jã o kɛ lɛ sɛɛɔ ní be fɛɛ be. Mo de lɛ o laami mi sanehi tsuo. De lɛ níhi nɛ haa nɛ o bua jɔɔ kɛ níhi nɛ haa nɛ o haoɔ ɔ tsuo. Mo ná nɔ mi mami kaa o ma nyɛ maa ya e ngɔ konɛ e ye bua mo.

6. Mɛni e sa nɛ waa pee konɛ wa nyɛ nɛ waa hɛ kɛ su wa hiɔwe Tsɛ ɔ he haa?

⁶ Ja wa jeɔ hɛ sa kpo loko wa ma nyɛ maa hɛ wɔ kɛ su wa hiɔwe Tsɛ ɔ he wawɛɛ. Waa kɛ la polɔ ɔ kpaa gbi ngɛ munyu ko nɛ e tu ɔ he. E de ke: ‘Yehowa, ye Mawu! O tsu nyakpɛ ní babauu ha wɔ; o to yi mi kpakpa babauu ngɛ wa he; mɛnɔ po kɛ mo sɔ? Ke i ke ma tu ní nɛ ɔmɛ tsuo a he munyu ɔ, i be nyɛe; ejakaa a he hiɛ tsɔ.’ (La 40:5) Pi hɛ sa kɛkɛ kpo nɛ wa jeɔ, wa ngɔɔ wa munyu tutui kɛ wa ní peepee kɛ tsɔɔ kaa wa hɛ sa níhi nɛ Yehowa pee ha wɔ ɔ. Enɛ ɔ ha nɛ wa je ekpa kulaa ngɛ nihi nɛ a ngɛ je ɔ mi mwɔnɛ ɔ a he. Nihi nɛ a ngɛ je ɔ mi mwɔnɛ ɔ je we hɛ sa kpo ngɛ níhi nɛ Mawu pee ha mɛ ɔ he. Ngɛ anɔkuale mi ɔ, nɔ́ kake nɛ tsɔɔ kaa wa ngɛ “nyagbe ligbi ɔmɛ” a mi ɔ ji kaa nihi pee a he nihi nɛ a li sina. (2 Tim. 3:1, 2) Wa ko je su nɛ ɔ kpo kɔkɔɔkɔ!

7. Mɛni Yehowa suɔ nɛ waa pee, nɛ mɛni he je?

⁷ Fɔli sume nɛ a bimɛ sãa nya, mohu ɔ, a suɔ nɛ a pee huɛmɛ. Jã nɔuu kɛ̃ nɛ Yehowa suɔ nɛ e bimɛ tsuo nɛ a kɛ a sibi nɛ hi si saminya. Ngɛ anɔkuale mi ɔ, suɔmi nɛ ngɛ wa kpɛti ɔ kadiɔ wɔ kaa anɔkuale Kristofohi. (Yoh. 13:35) Waa kɛ la polɔ nɛ e tu munyu nɛ nyɛɛ se nɛ ɔ kpa gbi: “Hyɛ bɔ nɛ e hi, bɔ nɛ e ngɛ fɛu, ke nyɛmimɛ pee kake kɛ hi si!” (La 133:1) Ke wa suɔ wa nyɛmimɛ ɔ, wa tsɔɔ kaa wa suɔ Yehowa. (1 Yoh. 4:20) Hyɛ bɔ nɛ e ngɛ bua jɔmi ha kaa o piɛɛ weku ko nɛ a ‘mi mi jɔ kɛ ha a sibi nɛ a mi mi sãa mɛ ngɛ a sibi a he’ ɔ he!​—Efe. 4:32.

MOO BU YEHOWA TUE KƐ TSƆƆ KAA O SUƆ LƐ

8. Ngɛ 1 Yohane 5:3 ɔ nya a, mɛni ji yi mi tomi titli he je nɛ wa buɔ Yehowa tue?

⁸ Yehowa hyɛɛ blɔ kaa jokuɛwi nɛ a bu a fɔli tue, nɛ jã kɛ̃ nɛ e suɔ kaa wɔ hu waa bu lɛ tue. (Efe. 6:1) E sa nɛ waa bu lɛ tue, ejakaa lɛ ji wa Bɔlɔ, wa wami Yi Baalɔ, kɛ Tsɛ nɛ e le ní pe kulaa. Se nɔ́ titli he je nɛ wa buɔ Yehowa tue ji kaa wa suɔ lɛ. (Kane 1 Yohane 5:3.) Níhi fuu ngɛ nɛ wa ma nyɛ maa da nɔ kɛ bu Yehowa tue mohu lɛɛ, se e nyɛ we wa nɔ kaa waa pee jã. Yehowa ha wɔ he blɔ nɛ waa hla nɔ́ nɛ wa suɔ, enɛ ɔ he ɔ, ke ji kaa suɔmi nɛ wa ngɛ kɛ ha lɛ ɔ he je nɛ wa buɔ lɛ tue ɔ, e bua jɔɔ.

9-10. Mɛni he je nɛ e sa nɛ waa le mlaahi nɛ Yehowa ha wɔ ɔ nɛ wa kɛ tsu ní ɔ?

⁹ Fɔli suɔ nɛ a bimɛ nɛ a hi slɔkee. Enɛ ɔ he je nɛ a kɛ blɔ tsɔɔmihi nɛ ma kudɔ a bimɛ ɔmɛ ɔ haa mɛ ɔ nɛ, nɛ enɛ ɔ poɔ a bimɛ ɔmɛ a he piɛ. Ke bimɛ ɔmɛ kɛ blɔ tsɔɔmi nɛ ɔmɛ tsu ní ɔ, a tsɔɔ kaa a ngɛ hɛ kɛ nɔ fɔmi ngɛ a fɔli ɔmɛ a mi, nɛ a ngɛ bumi kɛ ha mɛ. Ke jã a, lɛɛ anɛ e sɛ nɛ waa le mlaahi nɛ wa hiɔwe Tsɛ ɔ kɛ haa wɔ ɔ nɛ wa kɛ tsu ní lo? Ke wa pee jã a, wa tsɔɔ kaa wa suɔ Yehowa, nɛ wa ngɛ bumi kɛ ha lɛ, nɛ wɔ nitsɛmɛ hu wa náa he se. (Yes. 48:17, 18) Nihi nɛ a sume Yehowa, nɛ a kɛ e mlaa amɛ tsu we ní ɔ lɛɛ, mɛ nitsɛmɛ nɛ a yeɔ a he awi.​—Gal. 6:7, 8.

¹⁰ Ke wa baa wa je mi kaa bɔ nɛ Yehowa suɔ ɔ, lɔ ɔ poɔ wa he piɛ kɛ jeɔ níhi nɛ ma nyɛ maa ye wɔ awi ngɛ he lo mi, he numi mi kɛ mumi mi. Yehowa le nɔ́ nɛ hi ha wɔ. Nyɛmiyo ko nɛ a tsɛɛ lɛ ke Aurora nɛ e ngɛ United States ɔ de ke, “I le kaa Yehowa tue nɛ wa maa bu be fɛɛ be ɔ ma ha nɛ wa ná si himi kpakpa bɔ nɛ sa.” Wɔ tsuo waa kɛ nyɛmiyo nɛ ɔ kpa gbi. Ngɛ mɛni blɔ nɔ nɛ o ná blɔ tsɔɔmihi nɛ Yehowa je suɔmi mi nɛ e kɛ ha wɔ ɔ he se?

11. Kɛ sɔlemi yeɔ bua wɔ ha kɛɛ?

¹¹ Sɔlemi yeɔ bua wɔ nɛ wa peeɔ tue bumi ke e he wa ha wɔ kaa wa maa pee jã po. Be komɛ ɔ, e he waa ha wɔ kaa wa maa bu Yehowa tue akɛnɛ wɔ tsuo wa yi mluku ɔ he je, se wa ma nyɛ maa bɔ mɔde konɛ wa ko gbo Yehowa nɔ tue. La polɔ ɔ kpa Mawu pɛɛ ke: “Ha nɛ ma bu mo tue daa.” (La 51:12) Nyɛmiyo ko nɛ a tsɛɛ lɛ ke Denise nɛ e ji daa blɔ gbalɔ ɔ de ke, “Ke e he wa ha mi kaa ma ye Yehowa mlaa amɛ eko nɔ ɔ, i sɔleɔ kɛ biɔ he wami womi konɛ ma nyɛ ma pee nɔ́ nɛ da.” Wa ma nyɛ ma ná nɔ mi mami kaa Yehowa maa bu sɔlemi kaa kikɛ nɛ ɔ tue be fɛɛ be.​—Luka 11:9-13.

MOO YE BUA NI KPAHI NƐ A SUƆ WA TSƐ Ɔ

12. Ngɛ Efeso Bi 5:1 ɔ nya a, mɛni e sa nɛ waa pee?

¹² Kane Efeso Bi 5:1. Akɛnɛ wa ji Yehowa “bimɛ nɛ [e] suɔ” he je ɔ, wa bɔɔ mɔde kaa wa maa kase lɛ. Wa jeɔ suɔmi kpo, wa peeɔ nihi kpakpa, nɛ waa kɛ nihi a yayamihi keɔ mɛ kɛ tsɔɔ kaa wa ngɛ Mawu kasee. Ke nihi nɛ a li Mawu ɔ na wa su kpakpa nɛ ɔmɛ ɔ, eko ɔ, lɔ ɔ maa wo mɛ he wami konɛ a kase Mawu he ní fuu. (1 Pet. 2:12) Fɔli nɛ a ji Kristofohi ngɛ yi mi tomi kpakpa he je nɛ e sa nɛ a kase Yehowa ngɛ bɔ nɛ a kɛ a bimɛ hii si ha a mi. Ke a pee jã a, lɔ ɔ ma nyɛ ma ha nɛ a bimɛ ɔmɛ nitsɛmɛ kɛ wa Tsɛ nɛ ngɛ suɔmi ɔ ma ná huɛ bɔmi.

13. Mɛni wa ma nyɛ maa pee konɛ waa pee kã?

¹³ Jokuɛwi bua jɔ a tsɛmɛ a he, nɛ a kɛ bua jɔmi tuɔ a he munyu. Jã nɔuu kɛ̃ nɛ wɔ hu wa bua jɔɔ kaa Yehowa ji wa hiɔwe Tsɛ, nɛ wa suɔ nɛ ni kpahi nɛ a ba le lɛ. Wa nuɔ he ngɛ wa tsui mi kaa bɔ nɛ Matsɛ David nu he ɔ. E de ke: ‘Ma fĩa kɛ fɔ Yehowa nɔ.’ (La 34:2) Nɛ ke wa gboɔ zo hu nɛɛ? Kɛ wa maa pee kɛɛ kɛ pee kã? Ke wa ngɔ wa juɛmi kɛ ma Yehowa nɛ wa ma ha nɛ e bua nɛ jɔ, kɛ ni kpahi nɛ a ma ba kase Yehowa he ní nɛ a ná he se ɔ nɔ ɔ, lɔ ɔ haa nɛ wa peeɔ kã. Yehowa ma ha wɔ kã nɛ wa hia a. E ye bua wa nyɛmimɛ Kristofohi nɛ a hi si ngɛ kaseli ɔmɛ a be ɔ mi ɔ, nɛ a pee kã, nɛ e maa ye bua wɔ hulɔ.​—1 Tɛs. 2:2.

14. Mɛni yi mi tomi komɛ a he je nɛ e he hia nɛ waa fiɛɛ sane kpakpa a?

¹⁴ Yehowa hyɛ we nɔ hɛ mi, nɛ e bua jɔɔ ke e na kaa wa jeɔ suɔmi kpo kɛ ha ni kpahi, wa hyɛ we ma nɔ nɛ a je kɛ si fɔfɔɛ nɛ a ngɛ mi. (Níts. 10:34, 35) Blɔ kake nɔ nɛ wa ma nyɛ maa gu kɛ je suɔmi kpo kɛ tsɔɔ ni kpahi ji kaa wa maa fiɛɛ sane kpakpa a kɛ ha mɛ. (Mat. 28:19, 20) Mɛni ma nyɛ maa je ní tsumi nɛ ɔ mi kɛ ba? Nihi nɛ a buɔ wɔ tue ɔ ma nyɛ ma ná si himi kpakpa bɔ nɛ sa amlɔ nɛ ɔ, nɛ a ma nyɛ ma ná nɔ mi mami kaa a maa hi si kɛ ya neneene ngɛ paradeiso mi.​—1 Tim. 4:16.

MOO SUƆ WA TSƐ Ɔ NƐ O BUA NƐ JƆ

15-16. Mɛni ji yi mi tomi komɛ a he je nɛ wa ngɛ bua jɔmi?

¹⁵ Yehowa ji tsɛ nɛ ngɛ suɔmi, lɔ ɔ he ɔ, e suɔ nɛ e weku mi bimɛ nɛ a ná bua jɔmi. (Yes. 65:14) E ngɛ mi kaa waa kɛ si himi nɛ mi wa ngɛ kpee mohu lɛɛ, se wa ngɛ yi mi tomihi fuu a he je nɛ wa ma nyɛ ma ná bua jɔmi amlɔ nɛ ɔ. Kaa nɔ hyɛmi nɔ́ ɔ, wa ngɛ nɔ mi mami kaa wa hiɔwe Tsɛ ɔ suɔ wɔ wawɛɛ. Wa le Mawu Munyu ɔ nɛ ji Baiblo ɔ mi anɔkuale ɔmɛ. (Yer. 15:16) Nɛ wa piɛɛ weku ko nɛ ngɛ slɔɔto, nɛ e mi bi ɔmɛ suɔ Yehowa a he. A suɔ e mlaa amɛ, nɛ a suɔ a sibi hulɔ.​—La 106:4, 5.

¹⁶ Wa bua ma nyɛ maa jɔ, ejakaa wa le kaa wa ma ná si himi nɛ hi pe kulaa hwɔɔ se. Wa le kaa e be kɛe nɛ Yehowa maa gu e Matsɛ Yemi ɔ nɔ kɛ je nimli yayahi tsuo kɛ je zugba a nɔ, nɛ zugba a maa pee Paradeiso ekohu. Jehanɛ hu ɔ, wa ngɛ hɛ kɛ nɔ fɔmi kaa nihi nɛ a gbo ɔ maa ba wami mi, nɛ a kɛ a suɔli maa pee kake ekohu. (Yoh. 5:28, 29) Enɛ ɔ maa pee bua jɔmi wawɛɛ! Nɛ nɔ́ nɛ pe kulaa a, wa ngɛ nɔ mi mami kaa e be kɛe nɛ nihi tsuo nɛ a ngɛ hiɔwe kɛ zugba a nɔ ɔ maa ngɔ bumi kɛ yi jemi kɛ ha wa hiɔwe Tsɛ nɛ ngɛ suɔmi ɔ, nɛ́ a sɔmɔ lɛ.