Bɔ Nɛ O Ma Plɛ Kɛ Da Yeyeeye Peemi Nya Ha

YEYEEYE peemi ngɛ kaa nyagba ko nɛ haa nɛ wa yeɔ tsui wawɛɛ. (Abɛ 12:25) Anɛ nyagba ko ha nɛ o pee yeyeeye hyɛ lo? Anɛ o hao wawɛɛ nɛ o nu he kaa o be nyɛe maa da nyagba a nya hu lo? Ke jã a, lɛɛ pi mo pɛ nɛ o nu he jã hyɛ. Nyagba slɔɔtohi nɛ waa kɛ kpeɔ ɔ haa nɛ wa ti nihi fuu haoɔ, wa yeɔ tsui, nɛ wa nuɔ he kaa wa kã nya ta. Kaa nɔ hyɛmi nɔ́ ɔ, wa kpɛti ni komɛ hyɛɛ wa weku li nɛ a be he wami ɔ a nɔ, wa ti ni komɛ a suɔli gbo, nɛ ni komɛ hu kɛ adebɔ mi oslaahi kpe. Mɛni ma nyɛ maa ye bua wɔ kɛ da yeyeeye peemi nya?a

Wa ma nyɛ maa kase níhi fuu ngɛ Matsɛ David nɔ hyɛmi nɔ́ ɔ mi. Ke wa susu e nɔ hyɛmi nɔ́ ɔ he ɔ, lɔ ɔ ma nyɛ maa ye bua wɔ nɛ waa da yeyeeye peemi nya. E kɛ si fɔfɔɛ slɔɔtohi nɛ a mi wa kpe ngɛ e si himi mi, nɛ be komɛ po ɔ, e wami ya jeɔ oslaa mi. (1 Sam. 17:34, 35; 18:10, 11) Mɛni ye bua David nɛ e fĩ si benɛ e pee yeyeeye ɔ? Mɛni blɔ nɔ wa maa gu kɛ kase e nɔ hyɛmi nɔ́ ɔ?

BƆ NƐ DAVID PLƐ KƐ DA YEYEEYE PEEMI NYA

David kɛ nyagba slɔɔtohi kpe ngɛ be kake mi. Mo susu nɔ́ nɛ ba e nɔ benɛ Matsɛ Saul ngɛ hlae nɛ e gbe lɛ nɛ e ngɛ e nya fo tue ɔ he nɛ o hyɛ. Benɛ David kɛ e we bi ɔmɛ kɛ ni komɛ ya hwu ta nɛ a kpale kɛ ba we mi ngɛ Ziklag ɔ, a na kaa he nyɛli ba ju a nɔ́ fɛɛ nɔ́, a sã a wehi, nɛ a nuu a yihi kɛ a bimɛ nyɔguɛ kɛ ho. Kɛ David pee e ní ha kɛɛ? “David kɛ e we bi ɔmɛ wo yana hluu kɛ ya si a he wami ta.” Nɔ́ nɛ ha nɛ David hao wawɛɛ ji kaa e we bi ɔmɛ ngɛ ‘dee ke a maa fia lɛ tɛ.’ (1 Sam. 30:1-6) David kɛ nyagba nguahi etɛ kpe ngɛ be kake mi. E weku ɔ ya je oslaa mi, e we bi ɔmɛ ngɛ hlae nɛ a gbe lɛ, nɛ Matsɛ Saul hu ngɛ e se fiee loloolo. Enɛ ɔ he ɔ, e ma nyɛ maa ba kaa David hao wawɛɛ nitsɛ!

Mɛni nɛ David pee ngɛ lɔ ɔ se? Oya nɔuu nɛ David ‘wo e he he wami ngɛ Yehowa, e Mawu ɔ mi.’ Mɛni blɔ nɔ nɛ eko ɔ, David gu kɛ pee enɛ ɔ? Wa le kaa David pɔɔ sɔlemi ha Yehowa, nɛ e susuɔ bɔ nɛ Yehowa ye bua lɛ ha blema a he. (1 Sam. 17:37; La 18:2, 6) David le kaa e he hia nɛ e bi Yehowa blɔ tsɔɔmi, lɔ ɔ he ɔ, e bi Yehowa nɔ́ nɛ e sa nɛ e pee. Benɛ David nine su Yehowa blɔ tsɔɔmi nɔ ɔ, e kɛ tsu ní oya nɔuu. Enɛ ɔ he je ɔ, Yehowa jɔɔ e kɛ e we bi ɔmɛ nɛ a ya kpɔ̃ a weku ɔ kɛ a níhi nɛ laa a. (1 Sam. 30:7-9, 18, 19) Anɛ okadi níhi etɛ nɛ David pee ɔ lo? E sɔle kɛ bi Yehowa yemi kɛ buami, e susu bɔ nɛ Yehowa ye bua lɛ ha be ko nɛ be ɔ he, nɛ e kɛ Yehowa blɔ tsɔɔmi tsu ní. Mɛni blɔ nɔ wa ma nyɛ maa gu kɛ kase David? Ha nɛ waa hyɛ blɔhi etɛ nɛ wa ma nyɛ maa gu nɔ kɛ pee jã.

MOO KASE DAVID KE O PEE YEYEEYE

1. Moo sɔle. Be fɛɛ be nɛ wa maa pee yeyeeye ɔ, wa ma nyɛ maa sɔle kɛ bi yemi kɛ buami kɛ nile kɛ je Yehowa ngɔ. Ke wa de Yehowa nɔ́ fɛɛ nɔ́ nɛ ngɛ wɔ haoe ɔ, lɔ ɔ ma ha nɛ wa be yeyeeye pee tsɔ. Wa ma nyɛ maa sɔle kpiti ngɛ wa yi mi ke lɔ ɔ pɛ ji nɔ́ nɛ wa ma nyɛ maa pee ngɛ si fɔfɔɛ ko mi. Kaa bɔ nɛ David pee ɔ, be fɛɛ be nɛ wa maa sɔle kɛ bi Yehowa yemi kɛ buami ɔ, e tsɔɔ kaa wa he lɛ ye. David de ke: ‘Yehowa ji nɔ nɛ heɔ ye yi wami; ye tɛ sa, kɛ ye mɔ nguaa. Lɛ ji ye Mawu, kɛ ye wesa he.’ (La 18:2) Anɛ sɔlemi yeɔ bua niinɛ lo? Nyɛmiyo ko nɛ a tsɛɛ lɛ ke Kahlia nɛ e ji daa blɔ gbalɔ ɔ de ke: “Ke i sɔle ta a, i náa tue mi jɔmi. Sɔlemi yeɔ bua mi nɛ i susuɔ níhi a he kaa bɔ nɛ Yehowa peeɔ ɔ, nɛ e haa nɛ hemi kɛ yemi nɛ i ngɛ ngɛ e mi ɔ mi waa.” Ngɛ anɔkuale mi ɔ, sɔlemi ji nike ní nɛ he jua wa nɛ je Yehowa ngɔ nɛ yeɔ bua wɔ nɛ wa daa yeyeeye peemi nya.

2. Mo susu bɔ nɛ Yehowa ye bua mo ha be ko nɛ be ɔ he. Ke o susu níhi nɛ ya nɔ ngɛ o si himi mi ɔ he ɔ, anɛ o kaiɔ ka komɛ nɛ o kɛ kpe nɛ Yehowa ye bua mo kɛ da nya lo? Ke wa susu bɔ nɛ Yehowa ye bua wɔ ha, kɛ bɔ nɛ e ye bua e sɔmɔli blema a he ɔ, wa náa tue mi jɔmi, nɛ hemi kɛ yemi nɛ wa ngɛ ngɛ e mi ɔ mi waa. (La 18:17-19) Asafo mi nɔkɔtɔma ko nɛ a tsɛɛ lɛ ke Joshua de ke: “I ngma ye sɔlemi slɔɔtohi nɛ Yehowa ha heto ɔ kɛ fɔ si. Enɛ ɔ yeɔ bua mi nɛ i kaiɔ behi nɛ i bi Yehowa nɔ́ pɔtɛɛ ko, nɛ e ha mi nɔ́ nɛ i ngɛ hlae ɔ tutuutu.” Niinɛ, ke wa susu si abɔ nɛ Yehowa ye bua wɔ be ko nɛ be ɔ he ɔ, wa náa he wami nɛ wa hia a konɛ wa nyɛ nɛ waa da yeyeeye peemi nya.

3. Ngɔɔ Yehowa blɔ tsɔɔmi kɛ tsu ní. Loko wa maa mwɔ wa yi mi kpɔ ngɛ nɔ́ ko he ɔ, wa ma nyɛ ma hla blɔ tsɔɔmi nɛ sa ngɛ Mawu Munyu ɔ mi kekle. (La 19:7, 11) Nihi fuu yɔse kaa ke a hla níhi a mi ngɛ ngmami pɔtɛɛ ko he ɔ, a nuɔ jamɛ a ngmami ɔ sisi saminya nɛ a naa bɔ nɛ e kɔɔ a si himi he ha. Asafo mi nɔkɔtɔma ko nɛ a tsɛɛ lɛ ke Jarrod de ke: “Níhi a mi hlami yeɔ bua mi nɛ i kaseɔ níhi fuu ngɛ kuku ko mi, nɛ i nuɔ nɔ́ nɛ Yehowa ngɛ mi dee ɔ sisi. Enɛ ɔ yeɔ bua mi nɛ i nuɔ nɔ́ nɛ i kane ɔ sisi, nɛ i kɛ e mi ga womi ɔ tsuɔ ní.” Ke wa hla Yehowa blɔ tsɔɔmi ngɛ Ngmami ɔ mi nɛ waa kɛ tsu ní ɔ, wa nyɛɔ nɛ wa daa yeyeeye peemi nya saminya.

YEHOWA MAA YE BUA MO NƐ O FĨ SI

David le kaa e hia Yehowa yemi kɛ buami konɛ e nyɛ nɛ e da yeyeeye peemi nya. E hɛ sa níhi nɛ Yehowa pee kɛ ye bua lɛ ɔ wawɛɛ nɛ e de ke: Ngɛ ‘Mawu he wami nya a, ma nyɛ ma tu gbogbo. Anɔkuale Mawu ɔ nɛ haa mi he wami.’ (La 18:29, 32) Eko ɔ, wa maa nu he kaa wa nyagba amɛ ngɛ kaa gbogbo nɛ wa be nyɛe maa tu, loo a mi wa tsɔ nɛ wa be nyɛe maa da nya. Se ngɛ Yehowa yemi kɛ buami nya a, ke nyagba a mi wa kaa mɛni po, wa ma nyɛ ma fĩ si nɛ waa da nya! Niinɛ, ke wa sɔle kɛ bi Yehowa yemi kɛ buami, wa susu níhi tsuo nɛ e pee kɛ ha wɔ ɔ he, nɛ waa kɛ e blɔ tsɔɔmihi tsu ní ɔ, wa ma nyɛ ma ná nɔ mi mami kaa Yehowa ma ha wɔ he wami kɛ nile nɛ wa hia konɛ wa nyɛ nɛ waa da yeyeeye peemi nya saminya!