Sane Bimihi Nɛ Je Ní Kaneli A Ngɔ
Mɛnɔmɛ nɛ a ma tle mɛ si kɛ ba zugba a nɔ, nɛ mɛni gbogboehi a si tlemi a ma ná?
Nyɛ ha nɛ waa hyɛ bɔ nɛ Baiblo ɔ ha sane bimi nɛ ɔmɛ a heto ha.
Ní Tsumi 24:15 ɔ ha nɛ wa na kaa a ma tle “nihi nɛ a da kɛ nihi nɛ a dɛ tsuo si.” Nihi nɛ a da a ji nihi nɛ a bu Mawu tue loko a gbo. Enɛ ɔ he ɔ, a ngma a biɛ kɛ wo wami womi ɔ mi. (Mal. 3:16, NW.) Nihi nɛ a ná we he blɔ kpakpa ko kɛ kase Yehowa he ní ɔ piɛɛ nihi nɛ a dɛ ɔ a he. Enɛ ɔ he ɔ, a ngmɛ a biɛ ngɛ wami womi ɔ mi.
Yohane 5:28, 29 ɔ tu kuu enyɔ nɛ a ma tle mɛ si a he munyu, mɛ nɔuu nɛ Ni tsumi 24:15 ɔ hu tu a he munyu ɔ nɛ. Yesu de ke, nihi nɛ “a pee ní kpakpahi ɔ,” a maa je kpo “kɛ ya wami he gbogboehi a si tlemi mi, nɛ ni nɛmɛ nɛ a pee ní yayamihi ɔ maa je kpo kɛ ya kojomi he gbogboehi a si tlemi mi.” Nihi nɛ a da a pee ní kpakpahi loko a gbo. A maa je kpo kɛ ya wami he gbogboehi a si tlemi mi ejakaa loloolo ɔ, a biɛ ngɛ wami womi ɔ mi. Se nihi nɛ a dɛ ɔ lɛɛ a pee ní yayahi loko a gbo. Lɔ ɔ he ɔ, a maa je kpo kɛ ya kojomi he gbogboehi a si tlemi mi. A ngmɛ a biɛ ngɛ wami womi ɔ mi, lɔ ɔ he ɔ, a ma ha mɛ be nɛ a kɛ tsɔɔ kaa e sa nɛ a biɛ nɛ hi wami womi ɔ mi loo e sɛ nɛ e hi mi. Ngɛ jamɛ a be ɔ mi ɔ, a ma ná he blɔ kɛ kase Yehowa he ní, bɔ nɛ pee nɛ a ngma a biɛ kɛ wo wami womi ɔ mi.
Kpo Jemi 20:12, 13 tsɔɔ nya kaa, e he maa hia nɛ nihi nɛ a ma tle mɛ si ɔ tsuo nɛ a bu “níhi nɛ a ngma ngɛ womi kpo ɔmɛ a mi ɔ” tue. Níhi nɛ ngɛ womi kpo ɔmɛ a mi ji mlaa ehe nɛ a kɛ ma tsu ní ngɛ je ehe ɔ mi. Nihi nɛ a be tue bue ɔ, Yehowa ma kpata a hɛ mi.—Yes. 65:20.
Daniel 12:2 ɔ de ngɛ New World Translation Baiblo ɔ mi ke, nihi nɛ a gbo ɔ a kpɛti ni komɛ maa te si kɛ “ya neneeene wami mi, nɛ ni komɛ hu a hɛ mi ma pue si nɛ a maa bu mɛ kaa nyangemi níhi kɛ ya daa.” Ngmami nɛ ɔ tsɔɔ nɔ́ nɛ nyagbenyagbe ɔ, e maa ba nihi nɛ a ma tle mɛ si ɔ a nɔ. Ni komɛ ma ná “neneene wami,” nɛ ni komɛ hu a maa bu mɛ kaa “nyangemi níhi kɛ ya daa.” Enɛ ɔ he ɔ, ngɛ jeha 1,000 ɔ nyagbe ɔ, ni komɛ ma ná neneene wami, nɛ a ma kpata ni komɛ hu a hɛ mi kɛ maa ya neneene.—Kpoj. 20:15; 21:3, 4.
Mo susu nɔ́ he tomi nɔ́ nɛ ɔ he nɛ o hyɛ. Waa kɛ ku enyɔ nɛ ɔ nɛ a ma tle mɛ si ɔ a si fɔfɔɛ ɔ ma nyɛ maa to nibwɔhi nɛ a suɔ nɛ a maa ya ma kpa nɔ ɔ a he. Nihi nɛ a da a ngɛ kaa nihi nɛ a ngɛ visa nɛ a ma nyɛ kɛ tsu ní ngɛ ma a mi loo e haa nɛ a náa he yemi kɛ he blɔ komɛ kaa bɔ nɛ ma a mi bi ɔmɛ ngɛ ɔ. Se nihi nɛ a dɛ ɔ lɛɛ, a ngɛ kaa nihi nɛ a ngɛ visa nɛ a kɛ ma nyɛ ma ya slaa nɔ ko ngɛ ma kpa nɔ be kpiti ko, loo a kɛ ma nyɛ maa hia blɔ kɛ ya ma ko mi be kpiti ko. E sa nɛ a ba a je mi saminya loko a maa kplɛɛ a nɔ kaa a ya nɔ nɛ a hi jamɛ a ma a mi. Jã kɛ̃ nɛ nihi nɛ a dɛ nɛ a ma tle mɛ si ɔ, e sa kaa a kɛ Yehowa mlaahi nɛ tsu ní konɛ a na mɛ kaa nihi nɛ a da, nɛ́ a ya nɔ nɛ a hi Paradeiso ɔ mi. Ngɛ nibwɔhi nɛ a hiaa blɔ kɛ yaa ma kpa nɔ ɔ a blɔ fa mi ɔ, visa fɛɛ visa nɛ a ná kɛ ya a, nyagbenyagbe ɔ, a ma nyɛ ma ha ni komɛ he blɔ nɛ a hi si ngɛ ma a mi kaa ma a mi nihi, nɛ a ma nyɛ maa fiee ni komɛ hulɔ. Bɔ nɛ nɔ ko maa ba e je mi ha ngɛ ma ehe ɔ mi ɔ lɛ maa tsɔɔ kaa amlaalo ɔmɛ maa ngmɛ lɛ blɔ nɛ e hi jamɛ a ma a mi kaa ma a mi no loo a maa kpale lɛ kɛ ho e ma mi ya. Jã kɛ̃ nɛ nihi nɛ a ma tle mɛ si ɔ, nyagbenyagbe ɔ, a maa da anɔkuale nɛ a maa ye, kɛ bɔ nɛ a maa pee a ní ha ngɛ je ehe ɔ mi ɔ nɔ kɛ kojo mɛ.
Yehowa ji Mawu nɛ ngɛ suɔmi, se pi lɔ ɔ pɛ, e yeɔ dami sane hulɔ. (5 Mose 32:4; La 33:5) E ma tle nihi nɛ a da kɛ nihi nɛ a dɛ tsuo si kɛ ba wami mi, ejakaa e suɔ mɛ. Se e maa hyɛ nɛ mɛ tsuo a ye e dami mlaahi nɛ a nɔ kuɔ ɔ nɔ. Nihi nɛ a maa suɔ Yehowa, nɛ́ a maa ye e mlaa amɛ a nɔ ɔ pɛ nɛ a maa ngmɛ mɛ blɔ nɛ́ a ya nɔ nɛ a hi je ehe ɔ mi.