Nɔ́ Nɛ Asafo Mi Nikɔtɔmahi Maa Pee Kɛ Ye Bua Nihi Nɛ A Je Mɛ Kɛ Je Asafo ɔ Mi

1-2. (a) Ke nɔ ko pee yayami nɛ hɛdɔ ngɛ he nɛ e tsakee we e tsui ɔ, kɛ Yehowa nuɔ he ha kɛɛ? (b) Mɛni Yehowa hyɛɛ blɔ kaa yayami peeli maa pee?

YEHOWA kplɛɛ we je mi bami saisaa ko nɔ. E hiɔ yayami. (La 5:​4-6) Yehowa hyɛɛ blɔ kaa waa ye e mlaa amɛ nɛ ngɛ Baiblo ɔ mi ɔ nɔ. Ngɛ anɔkuale mi ɔ, Yehowa le kaa akɛnɛ wa yi mluku he je ɔ, wa be nyɛe maa bu lɛ tue kɛ pi si. (La 130:​3, 4) Se kɛ̃ ɔ, Yehowa bua jɔɛ “nihi nɛ a yi Mawu gbeye nɛ a ngɔɔ wa Mawu ɔ dloomi ɔ kɛ jeɔ a nya kɛ ha nɔ buimi ngmlikiti ní peepeehi” ɔ a he. (Jud 4) Ngɛ anɔkuale mi ɔ, Baiblo ɔ tsɔɔ kaa a ma ‘kpata nimli nɛ a yi Mawu gbeye ɔmɛ a hɛ mi’ ngɛ Harmagedon ta a mi.—2 Pet. 3:7; Kpoj. 16:16.

² Se kɛ̃ ɔ, Yehowa sume nɛ a kpata nɔ ko nɔ ko hɛ mi. Kaa bɔ nɛ wa na ngɛ ní kasemihi nɛ sɛ hlami ɔ mi ɔ, Baiblo ɔ tsɔɔ heii kaa Yehowa “suɔ kaa nihi tsuo nɛ a tsake a tsui.” (2 Pet. 3:9) Kaa bɔ nɛ Yehowa peeɔ ɔ, asafo mi nikɔtɔma amɛ hu toɔ a tsui si nɛ a bɔɔ mɔde kaa a maa ye bua yayami peeli konɛ a tsake a tsui nɛ a hɛ kɛ su Yehowa he ekohu. Se be komɛ ɔ, pi yayami peeli tsuo nɛ a tsakeɔ a tsui. (Yes. 6:9) E ngɛ mi kaa asafo mi nikɔtɔma amɛ bɔɔ mɔde si abɔ kaa a maa ye bua yayami peeli mohu lɛɛ, se kɛ̃ ɔ, a ti ni komɛ yaa nɔ nɛ a peeɔ yayami. Ke e ba jã a, kɛ e sa nɛ asafo mi nikɔtɔma amɛ nɛ a tsu sane ɔ he ní ha kɛɛ?

“NYƐ JE NƆMLƆ YAYAMI Ɔ KƐ JE NYƐ KPƐTI”

3. (a) Ke nɔ ko pee yayami nɛ hɛdɔ ngɛ he nɛ e tsakee we e tsui ɔ, mɛni nɛ Baiblo ɔ de kaa a pee? (b) Ke a je nɔ ko nɛ e tsakee we e tsui ngɛ asafo mi ɔ, mɛni he je nɛ wa ma nyɛ ma de ke lɛ nitsɛ lɛ e hla kaa a je lɛ ngɛ asafo mi ɔ?

³ Ke yayami peelɔ ko tsakee we e tsui ɔ, nɔ́ nɛ asafo mi nikɔtɔma amɛ maa pee pɛ ji kaa a kɛ blɔ tsɔɔmi nɛ ngɛ 1 Korinto Bi 5:13 ɔ ma tsu ní. Lejɛ ɔ de ke: “Nyɛ je nɔmlɔ yayami ɔ kɛ je nyɛ kpɛti.” Ngɛ blɔ ko nɔ ɔ, yayami peelɔ ɔ nitsɛ lɛ e hla kaa a je lɛ kɛ je asafo ɔ mi. Enɛ ɔ tsɔɔ kaa e ngɛ nɔ́ nɛ e du ɔ kpae. (Gal. 6:7) Mɛni he je nɛ wa de jã a? Ejakaa yayami peelɔ ɔ kua kaa e ma tsake e tsui ngɛ mɔde nɛ asafo mi nikɔtɔma amɛ bɔ kaa a maa ye bua lɛ si abɔ ɔ tsuo se. (2 Ma. 17:​12-15) E ngɔ e ní peepee kɛ tsɔɔ kaa e sume nɛ e kɛ Yehowa je mi bami he mlaa amɛ ma tsu ní.—5 Mose 30:​19, 20.

4. Mɛni he je nɛ ke a je yayami peelɔ ko nɛ e tsakee we e tsui ɔ kɛ je asafo ɔ mi ɔ, a fiaa he adafi ɔ?

⁴ Ke a je nɔ ko nɛ e tsakee we e tsui ngɛ asafo mi ɔ, a fiaa adafi ngɛ asafo ɔ mi kaa asimasi nɛ ɔ pi Yehowa Odasefono hu.a Pi nɛ a fiaa adafi nɛ ɔ konɛ a kɛ pue yayami peelɔ ɔ hɛ mi si. Mohu ɔ, a peeɔ jã konɛ asafo ɔ kɛ blɔ tsɔɔmi nɛ Ngmami ɔ kɛ ha kaa a kɛ jamɛ a nɔ ɔ nɛ “kpa bɔmi” nɛ a kɛ lɛ nɛ ko “ye ní tete po” ɔ nɛ tsu ní. (1 Kor. 5:​9-11) Yi mi tomi kpakpa ko he je nɛ Yehowa ngɔ jamɛ a blɔ tsɔɔmi ɔ kɛ ha a nɛ. Bɔfo Paulo ngma ke: “Masa nyafii haa nɛ ma a tsuo gboɔ.” (1 Kor. 5:6) Ke a je we yayami peelɔ ko nɛ e tsakee we e tsui ɔ kɛ je asafo ɔ mi ɔ, lɔ ɔ ma ha nɛ ni kpahi ma susu kaa e he hia we nɛ a kɛ Yehowa mlaa amɛ nɛ tsu ní.—Abɛ 13:20; 1 Kor. 15:33.

5. Ke a je nyɛmi ko kɛ je asafo ɔ mi ɔ, kɛ e sa kaa waa na lɛ ha kɛɛ, nɛ mɛni he je?

⁵ Ke a je nyɛmi ko kɛ je asafo ɔ mi ɔ, kɛ e sa kaa waa na lɛ ha kɛɛ? E ngɛ mi kaa waa kɛ nɔ ɔ be bɔe mohu lɛɛ, se e sa nɛ wa kai kaa e ji Mawu jijɔ nɛ laa, lɔ ɔ he ɔ, loloolo ɔ, hɛnɔkami ngɛ kɛ ha lɛ. Ke jijɔ ko laa a, e ma nyɛ maa kpale kɛ ba piɛɛ to kuu ɔ he ekohu. Mo kai kaa jijɔ nɛ laa a jɔɔ e he nɔ kɛ ha Yehowa. Se dɔmi sane ji kaa amlɔ nɛ ɔ, e yi e he nɔ jɔɔmi kitã a nɔ, nɛ enɛ ɔ ngɛ oslaa kɛ ha lɛ wawɛɛ. (Eze. 18:31) Se kɛ̃ ɔ, akɛnɛ Yehowa mɔbɔ nami ɔ se pui lolo he je ɔ, wa ma nyɛ maa hyɛ blɔ kaa yayami peelɔ ɔ maa kpale kɛ ba. Ke jã a, mɛni nɛ asafo mi nikɔtɔma amɛ ma nyɛ maa pee kɛ ye bua nɔ ko nɛ a je lɛ kɛ je asafo ɔ mi ɔ?

NƆ́ NƐ ASAFO MI NIKƆTƆMA AMƐ PEEƆ KƐ YEƆ BUAA NIHI NƐ A JE MƐ NGƐ ASAFO Ɔ MI Ɔ

6. Mɛni nɛ asafo mi nikɔtɔma amɛ maa pee kɛ ye bua nɔ ko nɛ a je lɛ ngɛ a asafo ɔ mi ɔ?

⁶ Ke a je nɔ ko ngɛ asafo ɔ mi ɔ, anɛ asafo mi nikɔtɔma amɛ ngmɛɔ e he nɛ a yi bua lɛ konɛ e kpale kɛ ba Yehowa ngɔ lo? Dɛbi kulaa! Ke asafo mi nikɔtɔma amɛ de yayami peelɔ nɛ e tsakee we e tsui ɔ kaa a ma je lɛ kɛ je asafo ɔ mi ɔ, a haa nɛ e leɔ níhi nɛ e ma nyɛ maa pee konɛ e kpale kɛ ba asafo ɔ mi ekohu. Se asafo mi nikɔtɔma amɛ maa pee babauu pe jã. A ma de yayami peelɔ ɔ kaa a maa suɔ nɛ a kɛ lɛ nɛ kpe nyɔhiɔ bɔɔ komɛ a se konɛ a hyɛ kaa e tsake e tsui lo. Ke yayami peelɔ ɔ kplɛɛ nɛ asafo mi nikɔtɔma amɛ kɛ lɛ kpe ekohu ɔ, a maa wo lɛ he wami kaa e tsake e tsui nɛ e kpale kɛ ba. Ke loloolo ɔ, e tsakee we e tsui po ɔ, asafo mi nikɔtɔma amɛ maa to blɔ nya konɛ a pɔ lɛ slaami nɛ a wo lɛ he wami kaa e tsake e tsui.

7. Ke a je nɔ ko ngɛ asafo ɔ mi ɔ, mɛni nɛ asafo mi nikɔtɔma amɛ peeɔ kɛ tsɔɔ kaa a ngɛ Yehowa mi mi sami ɔ kasee? (Yeremia 3:12)

⁷ Ke asafo mi nikɔtɔma amɛ ngɛ nɔ ko nɛ a je lɛ kɛ je asafo ɔ mi ɔ ye buae ɔ, a bɔɔ mɔde kaa a maa kase Yehowa mi mi sami ɔ. Kaa nɔ hyɛmi nɔ́ ɔ, Yehowa mlɛ we konɛ Israelbi nɛ a tsɔ atuã a nɛ́ a tsake a tsui loko ji e ye bua mɛ. Mohu ɔ, e tsɔ e gbali ɔmɛ kɛ ya a ngɔ si abɔ loko a bɔni a tsui tsakemi. Kaa bɔ nɛ wa na ngɛ ní kasemi enyɔne nɛ ngɛ Hwɔɔmi Mɔ nɛ ɔ mi ɔ, e ngɛ mi kaa gbalɔ Hosea yo ɔ ya nɔ nɛ e pee yayami mohu lɛɛ, se Yehowa de lɛ kaa e ngɔ e yo ɔ he yayami kɛ ke lɛ, nɛ e kɛ lɛ nɛ hi si ekohu. Yehowa gu blɔ nɛ ɔ nɔ kɛ tsɔɔ e we bi kaa e mi mi sãa lɛ wawɛɛ ngɛ e sɔmɔli a he. (Hos. 3:1; Mal. 3:7) Jã nɔuu kɛ̃ nɛ asafo mi nikɔtɔma amɛ hu suɔ wawɛɛ kaa yayami peelɔ ɔ nɛ tsake e tsui nɛ e kpale kɛ ba asafo ɔ mi. Enɛ ɔ he ɔ, a pee we nɔ́ ko nɛ ma ha nɛ e he nɛ wa ha yayami peelɔ ɔ kaa e maa kpale kɛ ba.—Kane Yeremia 3:12.

8. Mɛni blɔ nɔ nɛ Yesu nɔ́ he tomi nɔ́ nɛ kɔɔ bi nɛ laa a he ɔ ye bua wɔ nɛ wa na heii kaa Yehowa mi mi sãa lɛ ngɛ nihi nɛ a je mɛ kɛ je asafo ɔ mi ɔ a he? (Luka 15:7)

⁸ Ngɛ nɔ́ he tomi nɔ́ nɛ kɔɔ bi nɛ laa a he nɛ Yesu kɛ tsu ní ɔ mi ɔ, anɛ o kai bɔ nɛ bitsɛ ɔ pee e ní ha a lo? Benɛ e hɛngmɛ gba e binyumu ɔ nɛ e kpale kɛ ma we ɔ mi ɔ nɔ ɔ, “e kɛ fo ya fua lɛ, nɛ e fĩɔ e nya he.” (Luka 15:20) Mo kadi kaa tsɛ ɔ mlɛ we nɛ e bi ɔ nɛ ba kpa lɛ pɛɛ loko e kɛ e he yayami ɔ nɛ ke lɛ. Mohu ɔ, benɛ e na e bi ɔ nɛ e ma a, e ma fo kɛ ya e ngɔ ejakaa e suɔ lɛ. Jã nɛ Yehowa nuɔ he ngɛ nihi nɛ a je mɛ kɛ je asafo ɔ mi ɔ a he, nɛ asafo mi nikɔtɔma amɛ hu bɔɔ mɔde kaa a maa kase lɛ. Asafo mi nikɔtɔma amɛ suɔ nɛ nihi nɛ a je Yehowa he ɔ nɛ a kpale kɛ ba e ngɔ ekohu. (Luka 15:​22-24, 32) Ke yayami peelɔ ko kpale kɛ ba Yehowa ngɔ ɔ, e haa nɛ Yehowa, Yesu, bɔfo ɔmɛ kɛ asafo ɔ tsuo a bua jɔɔ wawɛɛ nitsɛ!—Kane Luka 15:7.

9. Mɛni Yehowa suɔ nɛ yayami peeli nɛ a pee?

⁹ Kɛ ba si hiɛ ɔ, e ba pee heii kaa Yehowa be blɔ ngmɛe nɛ nihi nɛ a pee yayami nɛ hɛdɔ ngɛ he nɛ a tsakee we a tsui ɔ nɛ a ya nɔ nɛ a hi asafo ɔ mi. Se kɛ̃ ɔ, e bɔɔ mɔde kaa e maa ye bua mɛ. E suɔ nɛ a kpale kɛ ba e ngɔ. A tsɔɔ bɔ nɛ Yehowa nuɔ he ha ngɛ yayami peeli nɛ a tsake a tsui ɔ a he ngɛ Hosea 14:4 ɔ. Lejɛ ɔ de ke: “Ma ha ye ma a maa kpale kɛ ba ye ngɔ kɛ a tsui tsuo, ejakaa ye mi mi nɛ fu mɛ ɔ se po.” Akɛnɛ wa na bɔ nɛ Yehowa nuɔ he ha ngɛ yayami peeli nɛ a tsake a tsui ɔ a he he je ɔ, e sa nɛ asafo mi nikɔtɔma amɛ nɛ a bɔ mɔde kaa a maa na nɔ́ ko nɛ tsɔɔ kaa nɔ ɔ ngɛ e tsui tsakee. Jehanɛ hu ɔ, e sa nɛ munyu nɛ ɔ nɛ e wo nihi tsuo nɛ a je mɛ kɛ je asafo ɔ mi ɔ he wami nɛ a na kaa Yehowa suɔ mɛ wawɛɛ, nɛ e suɔ nɛ a kpale kɛ ba e ngɔ.

10-11. Mɛni nɛ asafo mi nikɔtɔma amɛ maa pee kɛ ye bua nihi nɛ a je mɛ kɛ je asafo ɔ mi jehahi babauu ji nɛ ɔ?

¹⁰ Mɛni nɛ asafo mi nikɔtɔma amɛ ma nyɛ maa pee kɛ ye bua nihi nɛ a je mɛ kɛ je asafo ɔ mi jehahi babauu ji nɛ ɔ? Eko ɔ, nimli nɛ ɔmɛ kpa yayami nɛ ha nɛ a je mɛ kɛ je asafo ɔ mi ɔ peemi. Ngɛ ni komɛ a blɔ fa mi po ɔ, eko ɔ, a kaii we nɔ́ he je nɛ a je mɛ kɛ je asafo ɔ mi. Bɔ fɛɛ bɔ nɛ ji ɔ, e sa nɛ asafo mi nikɔtɔma amɛ nɛ a bɔ mɔde kaa a ma hla nimli nɛ ɔmɛ a se blɔ nɛ a ya slaa mɛ. Ke a ya slaa mɛ ɔ, a kɛ mɛ maa sɔle nɛ a maa wo mɛ he wami kaa a kpale kɛ ba asafo ɔ mi ekohu. Atsinyɛ jemi ko be he kaa nɔ ko nɛ e je asafo ɔ mi jehahi babauu ɔ ma gbɔjɔ ngɛ mumi mi. Enɛ ɔ he ɔ, ke e ha nɛ asafo mi nikɔtɔma amɛ le kaa e suɔ nɛ e kpale kɛ ba asafo ɔ mi ɔ, a ma nyɛ maa to blɔ nya konɛ nɔ ko kɛ lɛ nɛ kase Baiblo ɔ ke a ngɔɛ lɛ ngɛ asafo ɔ mi lolo po. Ke e ba jã a, asafo mi nikɔtɔma amɛ ji nihi nɛ a maa to Baiblo mi ní kasemi ɔ he blɔ nya.

¹¹ Asafo mi nikɔtɔma amɛ bɔɔ mɔde kaa a maa kase Yehowa mi mi sami ɔ. Enɛ ɔ he ɔ, e sa nɛ asafo mi nikɔtɔma amɛ nɛ a bɔ mɔde kaa a ma hla nihi tsuo nɛ a je mɛ kɛ je asafo ɔ mi ɔ a se blɔ konɛ a wo mɛ he wami kaa a kpale kɛ ba Yehowa ngɔ ekohu. Ke yayami peelɔ ko ha nɛ e pee heii kaa e tsake e tsui, nɛ e kpa yayami ɔ peemi ɔ, a ma nyɛ maa ngɔ lɛ ekohu.—2 Kor. 2:​6-8.

12. (a) Mɛni si fɔfɔɛhi a mi nɛ e sa nɛ asafo mi nikɔtɔma amɛ nɛ a hyɛ nɛ hi saminya? (b) Mɛni he je nɛ e sɛ nɛ wa susu kaa Yehowa be nihi nɛ a pee yayami pɔtɛɛ komɛ a yayami ɔ ngɔe kɛ ke mɛ ɔ? (Hyɛ sisi ningma a hulɔ.)

¹² Ngɛ si fɔfɔɛ komɛ a mi ɔ, e sa nɛ asafo mi nikɔtɔma amɛ nɛ a hyɛ saminya loko a ngɔ nɔ ko ngɛ asafo ɔ mi ekohu. Kaa nɔ hyɛmi nɔ́ ɔ, ke nɔ ko pee jokuɛ ko nisɛ ní loo nɔ ko kua hemi kɛ yemi ɔ, loo e je blɔ nɛ e puɛ gba a, e ma bi nɛ asafo mi nikɔtɔma amɛ nɛ a ná nɔ mi mami kaa nɔ ɔ tsake e tsui niinɛ. (Mal. 2:14; 2 Tim. 3:6) E sa nɛ asafo nikɔtɔma amɛ nɛ a po asafo ɔ he piɛ. Se ngɛ jamɛ a be ɔ mi nɔuu ɔ, e sa nɛ wa kai kaa Yehowa maa ngɔ yayami peelɔ ko nɛ e tsake e tsui niinɛ nɛ e kpa yayami peemi ɔ he yayami kɛ ke lɛ. Enɛ ɔ he ɔ, e ngɛ mi kaa e sa nɛ asafo mi nikɔtɔma amɛ nɛ a hyɛ saminya ngɛ nihi nɛ a pee yayami nɛ hɛdɔ ngɛ he kɛ si ni kpahi ɔ a he wawɛɛ mohu lɛɛ, se e sɛ nɛ asafo mi nɔkɔtɔma amɛ nɛ a susu kaa Yehowa kɛ jamɛ a nɔ ɔ he yayami be lɛ kee gblee.b—1 Pet. 2:10.

NƆ́ NƐ ASAFO Ɔ MI BIMƐ ƆMƐ MA NYƐ MAA PEE

13. Ke a kã nɔ ko hɛ mi ngɛ asafo ɔ mi ɔ, kɛ waa kɛ lɛ hiɔ si ha kɛɛ, nɛ ke a je nɔ ko ngɛ asafo ɔ mi hu ɔ, kɛ waa kɛ lɛ hiɔ si ha kɛɛ?

¹³ Kaa bɔ nɛ wa susu he ngɛ ní kasemi nɛ sɛ enɛ ɔ hlami ɔ mi ɔ, be komɛ ɔ, a maa fia adafi kaa a kã nɔ ko hɛ mi. Ke e ba jã a, loloolo ɔ, waa kɛ lɛ maa ya nɔ maa bɔ, ejakaa wa le kaa e tsake e tsui nɛ e kpa jamɛ a yayami ɔ peemi. (1 Tim. 5:20) Loloolo ɔ, e piɛɛ asafo ɔ he, nɛ e he hia nɛ nyɛmimɛ ɔmɛ nɛ a wo lɛ he wami konɛ e ya nɔ nɛ e pee nɔ́ nɛ da. (Heb. 10:​24, 25) Se ke a je nɔ ko ngɛ asafo ɔ mi ɔ, e si fɔfɔɛ ɔ ngɛ ekpa kulaa. Ke e ba jã a, waa kɛ lɛ ‘kpaa bɔmi, nɛ waa kɛ lɛ yi ní tete po.’—1 Kor. 5:11.

14. Ke a je nɔ ko kɛ je asafo ɔ mi ɔ, mɛni yi mi kpɔ nɛ Kristofono fɛɛ Kristofono ma nyɛ maa mwɔ ngɛ bɔ nɛ a kɛ jamɛ a nɔ ɔ maa hi si ha a he? (Hyɛ foni ɔ hulɔ.)

¹⁴ Anɛ nɔ́ nɛ wa susu he nɛ ɔ tsɔɔ kaa ke a je nɔ ko ngɛ asafo ɔ mi ɔ, e sa nɛ waa yu wa he kulaa ngɛ nɔ ɔ he lo? Pi doo. Ngɛ anɔkuale mi ɔ, waa kɛ lɛ be bɔe. Se ke e ji wa wekuno loo nɔ ko nɛ jinɛ nyu bi ngɛ waa kɛ lɛ wa kpɛti ɔ, wa ma nyɛ maa da wa he nile nɛ waa kɛ Baiblo ɔ tsɔse lɛ ɔ nɔ kɛ hla kaa wa maa fɔ lɛ nine kɛ ba asafo mi kpe loo wa be jã pee. Ke wa fɔ lɛ nine nɛ e ba asafo mi kpe ɔ, kɛ e sa kaa waa pee wa ní ha kɛɛ? Jinɛ be ko nɛ be ɔ, wa be nɔ ko kaa jã a ngae. Se amlɔ nɛ ɔ, Kristofono fɛɛ Kristofono maa da e he nile nɛ e kɛ Baiblo ɔ tsɔse ɔ nɔ kɛ mwɔ e yi mi kpɔ ngɛ sane nɛ ɔ he. Ni komɛ ma nyɛ maa ma a juɛmi nya si kaa ke nɔ ko kaa jã ba asafo mi kpe ɔ, a ma nga lɛ loo a ma nya e he. Se e sɛ nɛ waa kɛ lɛ nɛ sɛɛ ní be kɛkɛɛ, aloo waa kɛ lɛ nɛ bla kɛ pee ní kpahi.

15. Yayami peeli te nɛmɛ nɛ a tu a he munyu ngɛ 2 Yohane 9-11 ɔ? (Hyɛ daka nɛ ji, “Anɛ Yayami Kake ɔ Nɔuu Nɛ Yohane Kɛ Paulo Tsuo Ngɛ He Munyu Tue Lo?” ɔ hulɔ.)

¹⁵ Baiblo ɔ tsɔɔ kaa e sɛ nɛ wa nga yayami peeli pɔtɛɛ komɛ. Ke wa nga nihi kaa jã a, lɔ ɔ tsɔɔ kaa waa ‘kɛ mɛ pee kake ngɛ a ní tsumi yayami ɔmɛ a mi.’ (Kane 2 Yohane 9-11.) Ngmami nɛ ɔ kɔɔ hemi kɛ yemi kuali kɛ nihi nɛ a woɔ ni kpahi he wami konɛ a pee nɔ́ nɛ dɛ ɔ a he. (Kpoj. 2:20) Enɛ ɔ he ɔ, ke nɔ ko ngɛ hemi kɛ yemi kuali a tsɔɔmihi tsɔɔe loo e ngɛ ni kpahi he wami woe konɛ a pee yayami ɔ, asafo mi nikɔtɔma amɛ be blɔ nya toe kaa a ma ya slaa jamɛatsɛ ɔ. Se kɛ̃ ɔ, hɛnɔkami ngɛ kaa e hɛ maa ba e he nɔ ekohu. Se ke loloolo ɔ, e pee we tsakemi ɔ, lɛɛ e sɛ nɛ wa nga lɛ loo waa fɔ lɛ nine kɛ ba asafo mi kpe.

MOO KASE YEHOWA MI MI SAMI Ɔ KƐ E MƆBƆ NAMI Ɔ

16-17. (a) Mɛni Yehowa ngɛ hlae nɛ yayami peeli nɛ a pee? (Ezekiel 18:32) (b) Mɛni nɛ asafo mi nikɔtɔmahi ma nyɛ maa pee kɛ tsɔɔ kaa a kɛ Yehowa pee kake kɛ ngɛ ní tsue?

¹⁶ Mɛni wa kase ngɛ ní kasemi enuɔ nɛ ɔmɛ tsuo a mi? Wa na kaa Yehowa sume nɛ nɔ ko nɔ ko hɛ mi nɛ kpata! (Kane Ezekiel 18:32.) E suɔ nɛ yayami peeli nɛ a dla a kɛ lɛ a kpɛti. (2 Kor. 5:20) Enɛ ɔ he je nɛ be fɛɛ be ɔ, Yehowa woɔ e sɔmɔli nɛ a kpa lɛ sɔmɔmi ɔ he wami kaa a tsake a tsui nɛ a kpale kɛ ba e ngɔ ɔ nɛ. E ji he blɔ ngua nɛ asafo mi nikɔtɔma amɛ ná kaa a kɛ Yehowa maa pee kake kɛ tsu ní konɛ a ye bua nihi nɛ a pee yayami nɛ hɛdɔ ngɛ he ɔ nɛ a tsake a tsui.—Rom. 2:4; 1 Kor. 3:9.

¹⁷ Ke yayami peelɔ ko tsake e tsui ɔ, bua jɔmi baa hiɔwe! Yehowa nɛ ji wa hiɔwe Tsɛ ɔ bua jɔɔ wawɛɛ ke e jijɔ ko nɛ laa a kpale e se kɛ ba asafo ɔ mi. Ke wa pueɔ wa yi mi tɛ ngɛ Yehowa mi mi sami ɔ kɛ e mɔbɔ nami ɔ kɛ dloomi ɔ he ɔ, suɔmi nɛ wa ngɛ kɛ ha lɛ ɔ mi maa wa wawɛɛ.—Luka 1:78.