Nɔ́ Nɛ Wa Ma Nyɛ Maa Kase Ngɛ Yesu He Benɛ E Piɛ Ligbi 40 Nɛ E Maa Ho Hiɔwe Ya a

1-2. Benɛ Yesu kaseli enyɔ ɔmɛ ngɛ nyɛɛe kɛ yaa Emao ɔ, mɛni lɛ ba?

NGƐ Nisan 16, jeha 33 ɔ nɔ ɔ, Yesu kaseli ɔmɛ ngɛ aywilɛho yee nɛ a ngɛ gbeye yee hulɔ. Kaseli ɔmɛ a kpɛti nihi enyɔ je Yerusalem kɛ yaa Emao, nɛ ji kɔpe ko nɛ e kɛ Yerusalem he kɛmi maa su si tomi kpaago. Nyumu nɛ ɔmɛ hao wawɛɛ nɛ a kɔni mi jɔ̃ ejakaa Yesu nɛ a ngɛ e se nyɛɛe ɔ gbo. Jinɛ a ngɛ blɔ hyɛe kaa Mesia a maa pee ní kpakpahi fuu kɛ ha Yudabi ɔmɛ. Se nɔ́ ko nɛ a hyɛ we blɔ ɔ ba.

² Nyumu ko kɛ mɛ kpe ngɛ blɔ ɔ nɔ, nɛ e kɛ mɛ bɔni nyɛɛmi. Kaseli ɔmɛ de nyumu ɔ kaa Yesu gbenɔ ɔ ha nɛ a kɔni mi jɔ̃. Kɛkɛ nɛ nyumu ɔ bɔni mɛ ní komɛ nɛ a hɛ be nɔ jee gblegbleegble ɔ demi. “E je sisi kɛ je Mose kɛ Gbali ɔmɛ tsuo a nɔ,” nɛ e tsɔɔ mɛ nɔ́ he je nɛ e sa kaa Mesia a nɛ e na nɔ́ nɛ e gbo ɔ. Benɛ nyumu etɛ ɔmɛ su Emao ɔ, kaseli enyɔ ɔmɛ yɔse kaa nɔ nɛ a kɛ lɛ ngɛ munyu tue ɔ ji Yesu nɛ Mawu tle lɛ si ɔ nɛ! Moo po bɔ nɛ kaseli ɔmɛ a bua maa jɔ wawɛɛ ha a he foni nɛ o hyɛ. Ngɛ anɔkuale mi ɔ, a bua jɔ kaa a tle Mesia a si!—Luka 24:​13-35.

3-4. Mɛni blɔ nɔ Yesu gu kɛ ye bua e kaseli ɔmɛ, nɛ mɛni wa maa kase ngɛ ní kasemi nɛ ɔ mi? (Ní Tsumi 1:3)

³ Benɛ a tle Yesu si ɔ, e ye ligbi 40 ngɛ zugba a nɔ loko e ho hiɔwe ya, nɛ e je e he kpo kɛ tsɔɔ e kaseli ɔmɛ si abɔ ngɛ ligbi 40 nɛ ɔ mi. (Kane Ní Tsumi 1:3.) Ngɛ jamɛ a be ɔ mi ɔ, Yesu wo kaseli ɔmɛ nɛ a hao nɛ a ngɛ gbeye yee ɔ he wami. Enɛ ɔ ha nɛ a bua jɔ nɛ a pee kã kɛ fiɛɛ nɛ a tsɔɔ nihi Matsɛ Yemi ɔ he sane kpakpa a.a

⁴ Wa ma nyɛ maa kase ní komɛ ngɛ nɔ́ nɛ Yesu pee ngɛ jamɛ a be ɔ mi ɔ mi. Ngɛ ní kasemi nɛ ɔ mi ɔ, wa maa hyɛ (1) bɔ nɛ Yesu wo kaseli ɔmɛ he wami ha, (2) bɔ nɛ e ye bua mɛ nɛ a nu Ngmami ɔ sisi saminya ha, kɛ (3) bɔ nɛ e tsɔse mɛ kɛ ha ní tsumi nɛ a ma tsu hwɔɔ se ɔ ha. Ke wa ngɛ oti nɛ ɔmɛ eko fɛɛ eko he susue ɔ, wa maa hyɛ bɔ nɛ wa ma plɛ kɛ kase Yesu nɔ hyɛmi nɔ́ ɔ ha.

MOO WO NI KPAHI HE WAMI

5. Mɛni he je nɛ Yesu kaseli ɔmɛ hia he wami womi ɔ?

⁵ Yesu kaseli ɔmɛ hia he wami womi. Mɛni he je? Ejakaa ni komɛ je a wehi, a wekuli, kɛ a ní tsumihi a he nɛ a kɛ a be tsuo ba nyɛɛ Yesu se. (Mat. 19:27) A wa ni komɛ hu yi mi akɛnɛ a ba pee Yesu kaseli ɔ he je. (Yoh. 9:22) Se a pee klaalo kaa a maa pee tsakemi nɛ ɔmɛ tsuo ejakaa a ngɛ hemi kɛ yemi kaa Yesu ji Mesia nɛ a wo e he si ɔ nɛ. (Mat. 16:16) Se kɛ̃ ɔ, benɛ Yesu gbo ɔ, a ye aywilɛho wawɛɛ nɛ a kɔni mi jɔ̃, ejakaa a li nɔ́ nɛ maa ba pee se.

6. Mɛni Yesu pee benɛ a tle lɛ si pɛ ɔ?

⁶ Yesu le kaa tɔmi be he kaa e kaseli ɔmɛ maa ye aywilɛho ke e gbo ɔ. Jehanɛ hu ɔ, e le hu kaa aywilɛho nɛ a maa yee ɔ tsɔɔ we kaa a be hemi kɛ yemi. Enɛ ɔ he ɔ, kɛ je be nɛ a tle Yesu si pɛ ɔ, e bɔni e huɛmɛ ɔmɛ he wami womi. Kaa nɔ hyɛmi nɔ́ ɔ, Yesu je e he kpo kɛ tsɔɔ Maria Magdalena benɛ e ngɛ ya foe ngɛ e yɔkɔ ɔ he ɔ. (Yoh. 20:​11, 16) Jehanɛ se hu ɔ, e je e he kpo kɛ tsɔɔ kaseli enyɔ ɔmɛ nɛ wa tu a he munyu ngɛ ní kasemi nɛ ɔ sisije ɔ. E je e he kpo kɛ tsɔɔ bɔfo Petro hulɔ. (Luka 24:34) Mɛni wa ma nyɛ maa kase ngɛ Yesu nɔ hyɛmi nɔ́ ɔ mi? Mo susu nɔ́ nɛ ya nɔ benɛ Yesu je e he kpo kɛ tsɔɔ Maria Magdalena a he nɛ o hyɛ.

7. Mɛni Yesu na nɛ Maria ngɛ pee, nɛ mɛni e pee ha lɛ? (Yohane 20:​11-16) (Hyɛ foni ɔ hulɔ.)

⁷ Kane Yohane 20:​11-16. Nisan 16 mɔtu mla a, yihi anɔkualetsɛmɛ komɛ ya Yesu yɔkɔ ɔ he. (Luka 24:​1, 10) Nyɛ ha nɛ wa susu yi nɛ ɔmɛ a kpɛti nɔ kake nɛ ji Maria Magdalena a he nɛ waa hyɛ. Benɛ Maria ya su yɔkɔ ɔ he ɔ, Yesu gbogboe ɔ be lejɛ ɔ. Lɔ ɔ he ɔ, e ma fo nɛ e ya de Petro kɛ Yohane, nɛ mɛ hu a ma fo kɛ ya yɔkɔ ɔ he, nɛ Maria nyɛɛ a se. Benɛ Petro kɛ Yohane na kaa Yesu gbogboe ɔ be lejɛ ɔ, a kpale a se kɛ ba we mi. Se Maria lɛɛ e ya nɔ nɛ e hi lejɛ ɔ, nɛ e fo ya. Se e li kaa Yesu ngɛ lɛ hyɛe. Yesu na kaa Maria ngɛ ya foe ngɛ e he je, enɛ ɔ he ɔ, e suɔ nɛ e wo e bua. Lɔ ɔ he ɔ, e je e he kpo kɛ tsɔɔ Maria nɛ e pee nɔ́ ko nɛ́ wo lɛ he wami wawɛɛ. Yesu kɛ Maria tu munyu nɛ e ha lɛ ní tsumi ko nɛ he hia wawɛɛ. Yesu de lɛ kaa e ya de e nyɛmimɛ ɔmɛ kaa a tle lɛ si.—Yoh. 20:​17, 18.

8. Mɛni wa ma nyɛ maa pee kɛ kase Yesu?

⁸ Mɛni wa ma nyɛ maa pee kɛ kase Yesu? Ke wa wo wa nyɛmimɛ ɔmɛ he wami konɛ a ya nɔ nɛ a sɔmɔ Yehowa a, lɔ ɔ tsɔɔ kaa wa ngɛ Yesu kasee. Kaa bɔ nɛ Yesu pee ɔ, e sa nɛ wɔ hu waa le nyagbahi nɛ ni kpahi kɛ ngɛ kpee, nɛ waa bɔ mɔde kaa wa maa nu mɛ sisi nɛ waa wo a bua. Mo susu nyɛmiyo ko nɛ a tsɛɛ lɛ ke Jocelyn nɛ e nyɛmiyo ko gbo gbenɔ yeyee ɔ he nɛ o hyɛ. E de ke: “I hao wawɛɛ nyɔhiɔhi babauu.” Se kɛ̃ ɔ, nyɛminyumu ko kɛ e yo fɔ lɛ nine kɛ ba a we mi, nɛ a bu lɛ tue saminya benɛ e ngɛ e nyagba amɛ a he munyu tue ɔ, nɛ a de lɛ kaa Yehowa suɔ lɛ wawɛɛ. Jocelyn de ke: “I pee kaa nɔ ko nɛ e ngɛ mue ngɛ pa mi, se Yehowa gu nyɛminyumu nɛ ɔ kɛ e yo ɔ nɔ kɛ kpɔ̃ mi. A ye bua mi nɛ i ná suɔmi ɔ ekohu kaa ma ya nɔ nɛ ma sɔmɔ Yehowa.” Wɔ hu ke ni kpahi ngɛ wɔ a nyagbahi dee, nɛ wa bu mɛ tue saminya a, e maa wo mɛ he wami konɛ a ya nɔ nɛ a sɔmɔ Mawu.—Rom. 12:15.

MOO YE BUA NI KPAHI KONƐ A NU NGMAMI Ɔ SISI

9. Mɛni nyagba nɛ Yesu kaseli ɔmɛ kɛ kpe, nɛ mɛni Yesu pee kɛ ye bua mɛ?

⁹ Yesu kaseli ɔmɛ ná hemi kɛ yemi ngɛ Mawu Munyu ɔ mi, nɛ a bɔ mɔde kaa a kɛ ma tsu ní ngɛ a si himi mi. (Yoh. 17:6) Se a li nɔ́ he je nɛ a gbe Yesu kaa yayami peelɔ ɔ. Yesu le kaa e kaseli ɔmɛ ngɛ hemi kɛ yemi nɛ a suɔ Yehowa, se e yɔse hu kaa e he hia nɛ a nu Ngmami ɔ sisi saminya. (Luka 9:​44, 45; Yoh. 20:9) Lɔ ɔ he ɔ, e tsɔɔ mɛ kaa e sa nɛ a pue a yi mi tɛ ngɛ Ngmami ɔ he. Mo susu bɔ nɛ e pee jã ha a he nɛ o hyɛ benɛ e kaseli enyɔ ɔmɛ ngɛ nyɛɛe ngɛ blɔ nɔ kɛ yaa Emao ɔ.

10. Mɛni Yesu pee kɛ ye bua e kaseli ɔmɛ nɛ a na kaa lɛ ji Mesia a niinɛ? (Luka 24:​18-27)

¹⁰ Kane Luka 24:​18-27. Mo kadi kaa sisije ɔ, Yesu je we e he si kɛ tsɔɔ kaseli ɔmɛ, mohu ɔ, e bi mɛ sanehi. Mɛni he je nɛ e pee jã a? Eko ɔ, e suɔ nɛ a de lɛ bɔ nɛ a ngɛ he nue ha. Nɛ jã pɛpɛɛpɛ nɛ a pee. A de lɛ kaa a susu kaa Yesu ma ba pee Matsɛ ngɛ Israel nɛ e ma ba kpɔ̃ mɛ kɛ je Roma nɔ yemi ɔ sisi. Benɛ a de Yesu bɔ nɛ a ngɛ he nue ha a se ɔ, Yesu ngɔ Ngmami ɔ kɛ ye bua mɛ nɛ a ba na kaa e gbenɔ ɔ ha nɛ gbamihi fuu ba mi.b Jamɛ a gbɔkuɛ ɔ, Yesu kɛ e kaseli kpa amɛ hu ya kpe nɛ e ha nɛ a nu gbami nɛ ɔmɛ a sisi saminya. (Luka 24:​33-48) Mɛni wa ma nyɛ maa kase ngɛ sane nɛ ɔ mi?

11-12. (a) Kɛ wa ma plɛ kɛ kase bɔ nɛ Yesu tsɔɔ anɔkualehi nɛ ngɛ Baiblo ɔ mi ɔ ha kɛɛ? (Hyɛ foni ɔmɛ hulɔ.) (b) Kɛ nɔ nɛ e kɛ Nortey kase Baiblo ɔ ye bua lɛ ha kɛɛ?

¹¹ Mɛni wa ma nyɛ maa pee kɛ kase Yesu? Kekleekle ɔ, ke o kɛ nihi ngɛ Baiblo ɔ kasee ɔ, moo gu ga blɔ nɔ kɛ bi sanehi nɛ ma ha nɛ a de mo bɔ nɛ a ngɛ he nue ha tutuutu. (Abɛ 20:5) Ke o nu bɔ nɛ a ngɛ he nue ha a sisi saminya a, moo ye bua mɛ nɛ a le bɔ nɛ a ma plɛ kɛ na ngmamihi nɛ maa ye bua mɛ kɛ da si fɔfɔɛ ɔ nya. Ko de mɛ nɔ́ nɛ e sa kaa a pee, mohu ɔ, moo ye bua mɛ nɛ a susu ngmami ɔmɛ a he, nɛ a le bɔ nɛ a kɛ Baiblo sisi tomi mlaahi ma tsu ní ha ngɛ a si himi mi. Mo susu nyɛminyumu ko nɛ tsɛɛ lɛ ke Nortey nɛ e ngɛ Ghana a he nɛ o hyɛ.

¹² Benɛ Nortey ye jeha 16, e bɔni Baiblo ɔ kasemi. Se e kɛ we nɛ e wekuli te si kɛ wo lɛ. Mɛni ye bua lɛ nɛ e ya nɔ nɛ e kase Baiblo ɔ? Loko e kɛ si temi kɛ womi ɔ maa kpe ɔ, nɔ nɛ e kɛ lɛ kaseɔ Baiblo ɔ sɛ hlami nɛ e kɛ lɛ susu Mateo yi 10 he, nɛ e ha nɛ e na kaa a maa wa Kristofohi anɔkualetsɛmɛ yi mi. Nortey de ke: “Benɛ a bɔni mi yi mi wami ɔ, i ná nɔ mi mami kaa i na anɔkuale ɔ.” Nɔ nɛ e kɛ lɛ kaseɔ Baiblo ɔ hu kɛ lɛ susu Mateo 10:16 he bɔ nɛ pee nɛ ke e ngɛ e hemi kɛ yemi ɔ he fãe ngɛ e wekuli ɔmɛ a hɛ mi ɔ, e kɛ nile nɛ tsu ní saminya, nɛ e je bumi kpo kɛ tsɔɔ mɛ. Benɛ a baptisi Nortey se ɔ, e suɔ nɛ e pee blɔ gbalɔ, se e papaa hu suɔ nɛ e ya yunivɛsiti. Nɔ nɛ e kɛ Nortey kaseɔ ní ɔ de we lɛ nɔ́ nɛ e sa nɛ e pee, mohu ɔ, e bi lɛ sanehi nɛ maa ye bua lɛ konɛ e susu Baiblo sisi tomi mlaahi a he nɛ e nyɛ nɛ e mwɔ yi mi kpɔ nɛ da. Mɛni je mi kɛ ba? Nortey ma e juɛmi nya si kaa e ma tsu be tsuo sɔmɔmi ní tsumi ɔ, nɛ enɛ ɔ ha nɛ e papaa fiee lɛ kɛ je we ɔ mi. Kɛ Nortey nu he ha kɛɛ? E de ke: “I ngɛ nɔ mi mami kaa yi mi kpɔ nɛ i mwɔ ɔ da.” Ngɛ anɔkuale mi ɔ ke wa ye bua ni kpahi konɛ a susu Ngmami ɔ he ɔ, e maa ye bua mɛ nɛ a ba pee Kristofohi nɛ a wa ngɛ mumi mi.—Efe. 3:​16-19.

TSƆSE NYUMUHI KONƐ A BA PEE ‘NIKE NÍ KƐ HA ASAFO Ɔ’

13. Mɛni Yesu pee konɛ ke e ho hiɔwe ya a, e kaseli ɔmɛ nɛ a nyɛ nɛ a tsa fiɛɛmi ní tsumi ɔ nɔ? (Efeso Bi 4:8)

¹³ Benɛ Yesu ngɛ zugba a nɔ ɔ, e tsu ní tsumi nɛ e Tsɛ ɔ kɛ wo e dɛ ɔ kɛ pi si. (Yoh. 17:4) Se Yesu susuu we kaa lɛ pɛ lɛ e ma nyɛ ma tsu nɔ́ nɛ Yehowa ngɛ hlae nɛ a tsu ɔ. Ngɛ jeha etɛ kɛ fã nɛ e kɛ tsu e sɔmɔmi ní tsumi ɔ mi ɔ, e tsɔse ni kpahi konɛ mɛ hu a nyɛ nɛ a tsu fiɛɛmi ní tsumi ɔ. Loko Yesu maa kpale kɛ ho hiɔwe ya a, e ngɔ ní tsumi kɛ wo e kaseli ɔmɛ a dɛ kaa a hyɛ e jijɔ ɔmɛ nɛ a he jua wa a nɔ, nɛ a nyɛɛ hɛ mi ngɛ fiɛɛmi ní tsumi ɔ mi. Eko ɔ, jamɛ a be ɔ mi ɔ, a kpɛti ni komɛ yi jeha 30 lolo. (Kane Efeso Bi 4:8.) Nyumu nɛ ɔmɛ ji anɔkualetsɛmɛ nɛ a kɛ Yesu tsu ní wawɛɛ. Se loko Yesu maa kpale kɛ ho hiɔwe ya a, e tsɔse mɛ saminya bɔ nɛ pee nɛ a ba pee ‘nike níhi nɛ a kɛ ha ngɛ adesahi a mi.’—Efe 4:8.

14. Benɛ e piɛ ligbi 40 nɛ Yesu maa ya hiɔwe ɔ, mɛni e pee kɛ ye bua e kaseli ɔmɛ konɛ a wa ngɛ mumi mi? (Hyɛ foni ɔ hulɔ.)

¹⁴ Yesu ngɔ ga womi nɛ he hia kaa e kaseli ɔmɛ a nine nɛ su nɔ ɔ kɛ ha mɛ. Kaa nɔ hyɛmi nɔ́ ɔ, e yɔse kaa e kaseli ɔmɛ ekomɛ he we yi kaa e gbo nɛ a tle lɛ si. Enɛ ɔ he ɔ, e ye bua mɛ nɛ e wo mɛ ga. (Luka 24:​25-27; Yoh. 20:27) Jehanɛ hu ɔ, e ha nɛ a na kaa e sa nɛ a ngɔ ní tsumi nɛ e kɛ wo a dɛ kaa a hyɛ asafo ɔ nɔ ɔ kɛ pee nɔ́ titli ngɛ a si himi mi pe a he lo nya ní tsumihi. (Yoh. 21:15) E kai mɛ kaa a ko ngɔ nɔ́ nɛ a nyɛɔ tsuɔ ngɛ Yehowa sɔmɔmi mi ɔ kɛ to nɔ́ nɛ ni kpahi nyɛɔ tsuɔ ɔ he. (Yoh. 21:​20-22) Jehanɛ hu ɔ, e dla a juɛmi ngɛ susumi nɛ dɛ nɛ a hɛɛ ngɛ Matsɛ Yemi ɔ he ɔ he, nɛ e ye bua mɛ konɛ a ngɔ a juɛmi kɛ ma sane kpakpa a nɛ a maa fiɛɛ ɔ nɔ. (Níts. 1:​6-8) Mɛni asafo mi nikɔtɔmahi ma nyɛ maa kase ngɛ Yesu he?

15-16. (a) Mɛni blɔhi a nɔ asafo mi nikɔtɔmahi ma nyɛ maa gu kɛ kase Yesu? Moo tsɔɔ nya. (b) Kɛ ga womi ye bua Patrick ha kɛɛ?

¹⁵ Mɛni blɔ nɔ nɛ asafo mi nikɔtɔmahi ma nyɛ maa kase Yesu? E sa nɛ asafo mi nikɔtɔmahi nɛ a tsɔse nyumuhi tsuo, a wa jio, a wɛ jio, nɛ a ye bua mɛ konɛ a tsu babauu ngɛ asafo ɔ mi.c Asafo mi nikɔtɔmahi hyɛ we blɔ kaa nihi nɛ a ngɛ mɛ tsɔsee ɔ maa pee a ní kaa nihi nɛ a ye mluku. E sa nɛ a je suɔmi mi kɛ wo nihewi nɛ a ngɛ mɛ tsɔsee ɔ ga konɛ a ba a he si, a pee nihi nɛ a ma nyɛ maa fĩa kɛ fɔ a nɔ, nɛ a pee klaalo hu kaa a ma sɔmɔ ni kpahi.—1 Tim. 3:1; 2 Tim. 2:2; 1 Pet. 5:5.

¹⁶ Mo susu bɔ nɛ nyɛminyumu ko nɛ a tsɛɛ lɛ ke Patrick ɔ ná ga nɛ a wo lɛ ɔ he se ha. Benɛ e ji niheyo ɔ, e kɛ nihi tuɔ munyu basabasa, nɛ e kɛ nihi hí si saminya, nɛ́ nyɛmimɛ yihi po piɛɛ he. Asafo mi nɔkɔtɔma ko nɛ e wa ngɛ mumi mi ɔ to Patrick he hɛ. Enɛ ɔ he ɔ, e je mi mi jɔmi mi kɛ wo lɛ ga, nɛ e kɛ nɔ́ ko laa we lɛ. Patrick de ke: “Ye bua jɔ kaa e kɛ mi sɛɛ he ní. Ke i na kaa ni kpahi a nine su he blɔhi nɛ i ngɛ hlae ɔ nɔ ɔ, ye kɔni mi jɔ̃ɔ wawɛɛ. Se nɔ́ nɛ asafo mi nɔkɔtɔma a de mi ɔ ye bua mi nɛ i na kaa e sa nɛ ma ba ye he si nɛ ma sɔmɔ nyɛmimɛ ɔmɛ mohu pe nɛ ma ngɔ ye juɛmi kɛ ma he blɔ komɛ nɛ ye nine maa su nɔ ngɛ asafo ɔ mi ɔ nɔ.” Mɛni lɛ je ga nɛ a wo lɛ ɔ mi kɛ ba? Benɛ Patrick ye jeha 23 ɔ, a hla lɛ kaa asafo mi nɔkɔtɔma.—Abɛ 27:9.

17. Mɛni Yesu pee kɛ tsɔɔ kaa e he e kaseli ɔmɛ ye?

¹⁷ Yesu ngɔ he blɔ kɛ ha e kaseli ɔmɛ kaa a fiɛɛ sane kpakpa a kɛ tsɔɔ nihi, nɛ a tsɔɔ mɛ Ngmami ɔ mi. (Moo hyɛ munyu nɛ ji, “teaching them,” nɛ ji study note nɛ ngɛ Matthew 28:20; NW ɔ he ɔ.) Eko ɔ, kaseli ɔmɛ nu he kaa a he sui kɛ ha ní tsumi nɛ ɔ, se kɛ̃ ɔ, Yesu ngɛ nɔ mi mami kaa a ma nyɛ ma tsu. Enɛ ɔ he ɔ, e kɛ nɔ mi mami de mɛ ke: “Kaa bɔ nɛ ye Tsɛ ɔ tsɔ mi ɔ, jã kɛ̃ nɛ imi hu i ngɛ nyɛ tsɔe.”—Yoh. 20:21.

18. Mɛni asafo mi nikɔtɔmahi ma nyɛ maa pee kɛ kase Yesu?

¹⁸ Mɛni blɔ nɔ nɛ asafo mi nikɔtɔmahi ma nyɛ maa kase Yesu? Asafo mi nikɔtɔmahi nɛ a ngɛ níhi a si kpami ɔ bɔɔ mɔde kaa a maa ngɔ ní tsumi kɛ wo nihi a dɛ konɛ a kɛ tsɔse mɛ. (Filip. 2:​19-22) Kaa nɔ hyɛmi nɔ́ ɔ, asafo mi nikɔtɔmahi ma nyɛ maa ngɔ ní tsumihi kɛ wo nihewi a dɛ ke a ngɛ Matsɛ Yemi Asa a nɔ kɛ e he ɔ dlae ɔ. Asafo mi nikɔtɔmahi ma nyɛ maa ngɔ ní tsumihi kɛ wo nyɛmimɛ nyumuhi a dɛ, nɛ a tsɔɔ mɛ bɔ nɛ a ma tsu lɛ ha, nɛ a ná hɛ kɛ nɔ fɔmi kaa a ma nyɛ ma tsu ní tsumi ɔ kɛ pi si. Matthew nɛ e ji asafo mi nɔkɔtɔma ehe ɔ tsɔɔ kaa e bua jɔ wawɛɛ kaa asafo mi nikɔtɔmahi nɛ a ngɛ níhi a si kpami ɔ tsɔse lɛ saminya konɛ e nyɛ nɛ e tsu ní tsumi nɛ a kɛ wo e dɛ ɔ. Jehanɛ hu ɔ, e bua jɔ kaa a ná hɛ kɛ nɔ fɔmi ngɛ e mi kaa e ma nyɛ ma tsu ní tsumi ɔ. E de ke: “Ke i tɔ̃ ɔ, a yeɔ buaa mi nɛ i kaseɔ ní kɛ jeɔ ye tɔmi ɔmɛ a mi, nɛ a yeɔ buaa mi nɛ i yaa ye hɛ mi.”d

19. Mɛni nɛ e sa nɛ waa fia wa pɛɛ si kaa wa maa pee?

¹⁹ Yesu ngɔ ligbi 40 nɛ e piɛ loko e maa ya hiɔwe ɔ kɛ wo e kaseli ɔmɛ he wami, nɛ e tsɔɔ mɛ ní, nɛ e kɛ tsɔse mɛ hulɔ. E sa nɛ waa fia wa pɛɛ si kaa wa maa nyɛɛ e nɔ hyɛmi nɔ́ ɔ se haa. (1 Pet. 2:21) Yesu maa ye bua wɔ konɛ wa nyɛ nɛ waa pee jã. Ejakaa e de ke: “I kɛ nyɛ ngɛ ligbi ɔmɛ tsuo kɛ yaa si níhi a blɔ nya tomi ɔ nyagbe be ɔ.”—Mat. 28:20.