Moo Kase Bɔ Nɛ Yehowa Kɛ Yesu Susuɔ Nɔ́ He Ha a

1-2. Mɛni nɛ suɔmi nɛ wa maa suɔ Yehowa a biɔ nɛ waa pee, nɛ kɛ Yesu pee enɛ ɔ he nɔ hyɛmi nɔ́ ha kɛɛ?

YESU tsɔɔ nɔ́ nɛ he hia pe kulaa ngɛ Mawu mlaa amɛ a kpɛti. E de ke: “E sa kaa o suɔ Yehowa o Mawu ɔ kɛ o tsui tsuo kɛ o susuma tsuo kɛ o he wami tsuo kɛ o juɛmi tsuo.” (Luka 10:27) Enɛ ɔ tsɔɔ kaa e sa nɛ waa suɔ Yehowa kɛ wa nɔ́ fɛɛ nɔ́. Wa nɔ́ fɛɛ nɔ́ nɛ waa kɛ maa suɔ Yehowa kɔɔ níhi nɛ wa bua jɔ he, wa he numi kɛ wa he wami tsuo nɛ waa kɛ ma sɔmɔ lɛ ɔ he. Jehanɛ hu ɔ, e kɔɔ bɔ nɛ wa susuɔ níhi a he ha a he. Ngɛ anɔkuale mi ɔ, wa be nyɛe maa nu bɔ nɛ Yehowa susuɔ níhi a he ha a sisi kɛ pi si. Se ke wa kase “Kristo juɛmi ɔ,” wa ma nyɛ maa nu Yehowa susumi ɔmɛ a sisi, ejakaa Yesu kase bɔ nɛ e Tsɛ ɔ susuɔ níhi a he ha a.—1 Kor. 2:16.

² Yesu suɔ Yehowa kɛ e juɛmi tsuo. E le nɔ́ nɛ Mawu suɔ kaa e pee, nɛ e fia e pɛɛ si kaa e maa pee jã. E ngɛ mi kaa jã peemi ma ha nɛ e na nɔ́ mohu lɛɛ, se kɛ̃ ɔ, e ya nɔ nɛ e pee jã. Akɛnɛ Yesu ngɔ e juɛmi kɛ ma e Tsɛ ɔ suɔmi nya ní peemi pɛ nɔ́ he je ɔ, e ha we nɛ nɔ́ ko nɔ́ ko nɛ je e juɛmi kɛ je jamɛ a oti ɔ nɔ.

3. Mɛni bɔfo Petro kase kɛ je Yesu ngɔ, nɛ mɛni e wo e nyɛmimɛ Kristofo ɔmɛ he wami kaa a pee? (1 Petro 4:1)

³ Petro kɛ bɔfo kpa amɛ ná he blɔ nɛ se be, ejakaa a kɛ Yesu nyɛɛ nɛ a kase bɔ nɛ e susuɔ níhi a he ha a. Benɛ mumi klɔuklɔu ɔ ye bua Petro nɛ e ngma e kekleekle sɛ womi ɔ kɛ ya ha Kristofo ɔmɛ ɔ, e wo mɛ he wami kaa a ngɔ Kristo juɛmi ɔ kɛ dla a he. (Kane 1 Petro 4:1.) Hela munyu nɛ Petro kɛ tsu ní kaa ‘nyɛ dla nyɛ he’ ɔ, tsɔɔ bɔ nɛ tabuli dlaa a he kɛ haa ta a. Enɛ ɔ he ɔ, ke Kristofohi kase Yesu, nɛ a ná e juɛmi ɔ eko loo a susuɔ níhi a he kaa lɛ ɔ, lɔ ɔ tsɔɔ kaa a dla a he nɛ a ma nyɛ maa hwu kɛ si akɔnɔ yayahi kɛ Satan je yaya nɛ ɔ.—2 Kor. 10:​3-5; Efe. 6:12.

4. Kɛ ní kasemi nɛ ɔ maa ye bua wɔ konɛ waa kɛ Petro ga womi ɔ nɛ tsu ní ha kɛɛ?

⁴ Ngɛ ní kasemi nɛ ɔ mi ɔ, wa maa na bɔ nɛ Yesu susu níhi a he ha, kɛ bɔ nɛ wa ma plɛ kɛ kase lɛ ha. Wa maa na bɔ nɛ (1) wa ma plɛ kɛ kase bɔ nɛ Yehowa susuɔ níhi a he ha a, nɛ lɔ ɔ maa ye bua wɔ tsuo konɛ waa hɛɛ juɛmi kake, (2) bɔ nɛ wa maa ba wa he si ha, kɛ (3) bɔ nɛ wa ma plɛ kɛ ngɔ wa hɛ kɛ fɔ Yehowa nɔ ngɛ sɔlemi mi konɛ wa juɛmi mi nɛ tsɔ.

MOO KASE BƆ NƐ YEHOWA SUSUƆ NÍHI A HE HA A

5. Be ko ɔ, mɛni Petro pee nɛ tsɔɔ kaa e susuu we níhi a he kaa bɔ nɛ Yehowa susuɔ níhi a he ɔ?

⁵ Be ko ɔ, Petro pee nɔ́ ko nɛ tsɔɔ kaa e susuu we níhi a he kaa bɔ nɛ Yehowa peeɔ ɔ. Yesu de e bɔfo ɔmɛ kaa e sa nɛ e ya Yerusalem konɛ a ngɔ lɛ kɛ ha jami hɛ mi nyɛɛli ɔmɛ nɛ a wa lɛ yi mi nɛ a gbe lɛ ngɛ sɛumi tso nɔ. (Mat. 16:21) Petro le kaa Yesu ji Mesia nɛ a gba kɛ kɔ e he kaa e ma ba kpɔ̃ Mawu we bi ɔ nɛ. Enɛ ɔ he ɔ, eko ɔ, e he wa ha Petro kaa e maa kplɛɛ nɔ kaa Yehowa maa ngmɛ blɔ nɛ a gbe Yesu. (Mat. 16:16) Lɔ ɔ he ɔ, Petro tsɛ Yesu kɛ ya se, nɛ e de lɛ ke: “Nyɔmtsɛ, naa o he mɔbɔ; nɔ́ nɛ ɔ nɛ ko ba o nɔ kɔkɔɔkɔ.” (Mat. 16:22) Akɛnɛ Petro susuu we níhi a he kaa bɔ nɛ Yehowa susuɔ níhi a he he je ɔ, e kɛ Yesu kpa we gbi.

6. Mɛni Yesu pee kɛ tsɔɔ kaa e susuɔ níhi a he kaa bɔ nɛ e Tsɛ ɔ susuɔ níhi a he ɔ?

⁶ Yesu susuɔ níhi a he kaa bɔ nɛ e Tsɛ ɔ susuɔ níhi a he ɔ pɛpɛɛpɛ. Yesu de Petro ke: “Satan, bee kɛ ho ye se ya! O ji tɛmi tɛ kɛ ha mi, ejakaa o susuu we níhi a he kaa bɔ nɛ Mawu susuɔ níhi a he ɔ, mohu ɔ, o susuɔ níhi a he kaa adesahi.” (Mat. 16:23) Yesu le kaa Yehowa suɔmi nya ní nɛ e maa pee ɔ biɔ nɛ e na nɔ́ nɛ e gbo. Enɛ ɔ he ɔ, e ngɛ mi kaa Petro hɛɛ juɛmi kpakpa ngɛ Yesu he mohu lɛɛ, se Yesu kua e ga womi ɔ. Nɔ́ nɛ ya nɔ nɛ ɔ ye bua Petro nɛ e na kaa e sa kaa e susu níhi a he kaa bɔ nɛ Yehowa peeɔ ɔ. Wɔ tsuo wa ma nyɛ maa kase nɔ́ ko ngɛ nɔ́ nɛ Petro pee ɔ mi.

7. Pee se ɔ, mɛni Petro pee kɛ tsɔɔ kaa e suɔ nɛ e susu níhi a he kaa bɔ nɛ Yehowa susuɔ níhi a he ɔ? (Hyɛ foni ɔ.)

⁷ Pee se ɔ, Petro ngɔ e ní peepee kɛ tsɔɔ kaa e suɔ nɛ e susu níhi a he kaa bɔ nɛ Yehowa susuɔ níhi a he ɔ. Benɛ be su kaa Yehowa ma ha nɛ Ma Jeli nɛ a pui mɛ ɔ nɛ a ba piɛɛ e we bi a he ɔ, e tsɔ Petro konɛ e ya fiɛɛ ha Kornelio. Kornelio piɛɛ Ma Jeli nɛ a ba pee Kristofohi kekleekle ɔ a he. Yudabi kɛ Ma Jeli ɔmɛ yi kulaa. Enɛ ɔ he ɔ, e sa nɛ Petro nɛ tsake e susumi bɔ nɛ pee nɛ e nyɛ nɛ e fiɛɛ kɛ ha Ma Jeli ɔmɛ. Benɛ Petro yɔse bɔ nɛ Yehowa naa Ma Jeli ɔmɛ ha a, e tsake e susumi. Enɛ ɔ ha nɛ Petro pee kaa bɔ nɛ Yehowa fã lɛ ɔ, nɛ e kɛ ‘nɔ́ ko je we e nya.’ (Níts. 10:​28, 29) E ya fiɛɛ kɛ ha Kornelio kɛ e we mi bimɛ ɔmɛ nɛ a baptisi mɛ.—Níts. 10:​21-23, 34, 35, 44-48.

8. Mɛni wa ma nyɛ maa pee kɛ tsɔɔ kaa wa susuɔ níhi a he kaa bɔ nɛ Yehowa peeɔ ɔ? (1 Petro 3:8 kɛ sisi ningma)

⁸ Jeha komɛ a se ɔ, Petro wo e nyɛmimɛ Kristofo ɔmɛ he wami kaa a ha nɛ a “susumi nɛ kɔ.” (Kane 1 Petro 3:8 kɛ sisi ningma.) Ke wa susuɔ níhi a he kaa Yehowa kaa bɔ nɛ wa naa ngɛ e Munyu ɔ mi ɔ, lɔ ɔ ma ha nɛ waa kɛ wa nyɛmimɛ ɔmɛ a susumi ma kɔ. Kaa nɔ hyɛmi nɔ́ ɔ, Yesu wo e kaseli ɔmɛ he wami kaa a ngɔ Matsɛ Yemi ɔ kɛ pee nɔ́ titli ngɛ a si himi mi. (Mat. 6:33) Enɛ ɔ he ɔ, eko ɔ, nyɛmi ko nɛ o kɛ lɛ ngɛ asafo mi ɔ maa ngɔ e he kɛ wo blɔ gbami ní tsumi ɔ mi loo be tsuo sɔmɔmi ní tsumi ɔ fã ko mi. Ke e ba jã a, e sɛ nɛ wa de lɛ kaa e ya hla ní tsumi nɛ ma ha nɛ e ná sika konɛ e si himi nɛ pee gbɔjɔɔ, mohu ɔ, e sa nɛ waa wo lɛ he wami nɛ waa ye bua lɛ.

MOO BA O HE SI

9-10. Mɛni Yesu pee kɛ tsɔɔ kaa e baa e he si wawɛɛ?

⁹ Gbɔkuɛ nɛ e nɔ jena Yesu ma gbo ɔ, e tsɔɔ Petro kɛ bɔfo kpa amɛ kaa he si bami he hia wawɛɛ. Sisije ɔ, Yesu tsɔ Petro kɛ Yohane konɛ a ya dla he nɛ e kɛ mɛ maa ye nyagbe niye ní ɔ ngɛ ɔ. Eko ɔ, a to blɔ nya konɛ nyu kɛ papahu nɛ hi lejɛ ɔ, konɛ Yesu kɛ e bɔfo ɔmɛ nɛ a kɛ fɔ a nane he loko a ye ní ɔ. Se mɛnɔ lɛ maa je he si bami mi nɛ e ma fɔ ni kpa amɛ a nane he ha mɛ?

¹⁰ Akɛnɛ Yesu baa e he si wawɛɛ he je ɔ, e tui tsle kulaa kaa e maa pee jã. E ngɛ heii kaa e pee e bɔfo ɔmɛ nyakpɛ kaa Yesu tsu nyɔguɛhi a ní tsumi. Yesu je e tade klɔii ɔ nɛ e ngɔ papahu kɛ ha e mlɛ mi nɛ e plɛ nyu kɛ wo tsesi ko mi, nɛ e bɔni a nane he fɔmi. (Yoh. 13:​4, 5) Atsinyɛ jemi ko be he kaa e ma he be loko Yesu ma fɔ e bɔfo 12 ɔmɛ nɛ Yuda nɛ e maa tsɔɔ e se blɔ ɔ hu piɛɛ he ɔ a nane he. Se ngɛ enɛ ɔ tsuo se ɔ, Yesu ba e he si nɛ e fɔ a nane he. Lɔ ɔ se ɔ, e kɛ gbi blɛuu de ke: “Anɛ nyɛ nu nɔ́ nɛ i pee ha nyɛ ɔ sisi lo? Nyɛ tsɛɛ mi ke ‘Tsɔɔlɔ’ kɛ ‘Nyɔmtsɛ,’ nɛ e sa jã, ejakaa jã nɛ i ji. Enɛ ɔ he ɔ, ke imi nɛ i ji Nyɔmtsɛ kɛ Tsɔɔlɔ ɔ, i fɔ nyɛ nane he ɔ, lɛɛ e sa nɛ nyɛ hu nyɛ fɔ nyɛ sibi a nane he.”—Yoh. 13:​12-14.

11. Mɛni Petro pee kɛ tsɔɔ kaa e kase Yesu he si bami ɔ? (1 Petro 5:5) (Hyɛ foni ɔ hulɔ.)

¹¹ Petro kase Yesu he si bami ɔ. Benɛ Yesu kpale kɛ ho hiɔwe ya a, Petro pee nyakpɛ nɔ́ ko. E tsa nyumu ko nɛ a fɔ lɛ libɔɔ ɔ. (Níts. 1:​8, 9; 3:​2, 6-8) Enɛ ɔ ha nɛ nihi babauu ba Petro ngɔ. (Níts. 3:11) E ngɛ mi kaa he nɛ Petro je ɔ, nihi suɔ nɛ a je a yi loo a wo a hɛ mi nyami wawɛɛ mohu lɛɛ, se Petro sume nɛ ni ɔmɛ nɛ a wo e hɛ mi nyami. Petro ba e he si nɛ e ngɔ yi je mi ɔ kɛ ha Yehowa kɛ Yesu. E de ke: “Kɛ gu [Yesu] biɛ ɔ nɔ, kɛ jehanɛ se hu kɛ gu hemi kɛ yemi nɛ wa ngɛ ngɛ e biɛ ɔ mi ɔ nɔ nɛ nyumu nɛ ɔ nɛ nyɛ ngɛ lɛ hyɛe nɛ nyɛ le lɛ ɔ ba ná he wami ɔ nɛ.” (Níts. 3:​12-16) Pee se ɔ, Petro ngma sɛ womi ko kɛ ha Kristofo ɔmɛ kɛ kɔ he si bami he. Munyuhi nɛ Petro kɛ tsu ní ɔ tsɔɔ bɔ nɛ e he hia kaa a wo he si bami kaa bɔ nɛ a woɔ tade ɔ. Enɛ ɔ ha nɛ wa kaiɔ bɔ nɛ Yesu ngɔ papahu ɔ kɛ fi e mlɛ mi, nɛ e fɔ e bɔfo ɔmɛ a nane he ha mɛ ɔ.—Kane 1 Petro 5:5.

12. Mɛni wa ma nyɛ maa pee kɛ tsɔɔ kaa wa suɔ nɛ waa ya nɔ nɛ waa ba wa he si kaa bɔ nɛ Petro pee ɔ?

¹² Wa ma nyɛ maa kase Petro nɔ hyɛmi nɔ́ ɔ konɛ waa ya nɔ nɛ waa ba wa he si. Mo kai kaa pi wa munyu tutui pɛ nɛ waa kɛ ma nyɛ maa tsɔɔ kaa wa baa wa he si. Munyu nɛ Petro kɛ tsu ní kɛ ha he si bami ɔ kɔɔ wa susumi, nɛ ji “he si bami juɛmi” nɛ wa ma ná a he. Pi nɛ wa suɔ kaa a je wa yi he je nɛ wa peeɔ nihi kpakpa, mohu ɔ, wa peeɔ jã ejakaa wa suɔ Yehowa kɛ adesahi. Ke waa kɛ bua jɔmi sɔmɔɔ Yehowa kɛ wa nyɛmimɛ ɔmɛ ɔ, lɔ ɔ tsɔɔ kaa wa baa wa he si ke ni kpahi nɛ nɔ́ nɛ wa ngɛ pee ɔ po.—Mat. 6:​1-4.

O ‘JUƐMI MI NƐ TSƆ’

13. Ke a ke nɔ ko ‘juɛmi mi tsɔ’ ɔ, mɛni e tsɔɔ?

¹³ Ke a ke nɔ ko ‘juɛmi mi tsɔ’ ɔ, mɛni e tsɔɔ? (1 Pet. 4:7) Kristofono nɛ e juɛmi mi tsɔ ɔ mwɔɔ yi mi kpɔhi nɛ tsɔɔ kaa e susuɔ níhi a he kaa bɔ nɛ Yehowa peeɔ ɔ. Kristofono kaa jã a le kaa nɔ́ ko be nɛ e he hia pe huɛ bɔmi nɛ ngɛ e kɛ Yehowa a kpɛti ɔ. Jehanɛ hu ɔ, e susuu we kaa e nɔ kuɔ pe ni kpahi, nɛ e le hu kaa tsa pi nɔ́ fɛɛ nɔ́ nɛ e le. E jeɔ he si bami mi nɛ e sɔleɔ be fɛɛ be kɛ tsɔɔ kaa e ngɔɔ e hɛ kɛ fɔɔ Yehowa nɔ.

14. Be ko ɔ, mɛni ha nɛ Petro nyɛ we nɛ e ngɔ e hɛ kɛ fɔ Yehowa nɔ ɔ?

¹⁴ Nyɔ mi nɛ e nɔ jena Yesu ma gbo ɔ, e bɔ e kaseli ɔmɛ kɔkɔ ke: “Nyɔ nɛ ɔ mi ɔ, nyɛ tsuo nyɛ nane maa tɔ̃tɔ̃ ngɛ ye he.” Petro kɛ nɔ mi mami ha lɛ heto ke: “Ke ni kpa amɛ tsuo a nane maa tɔ̃tɔ̃ ngɛ o he po ɔ, imi lɛɛ ye nane be tɔ̃tɔ̃e gblegbleegble!” Jamɛ a nyɔ ɔ mi ɔ, Yesu bɔ e kaseli ɔmɛ a ti ni komɛ kɔkɔ ke: “Nyɛɛ ya nɔ nɛ nyɛɛ hwɔɔ nɛ nyɛɛ hi sɔlee.” (Mat. 26:​31, 33, 41) Petro ngɔɛ ga womi nɛ ɔ kɛ tsu ní. Kaa Petro pee jã a, pee se ɔ, jinɛ e ko nyɛ pee kã nɛ e ko de ke Yesu kaselɔ ji lɛ. Mohu ɔ, e kua e Nyɔmtsɛ ɔ, nɛ pee se ɔ, e pia e he wawɛɛ.—Mat. 26:​69-75.

15. Nyɔ mi nɛ e nɔ jena Yesu ma gbo ɔ, mɛni e pee kɛ tsɔɔ kaa e juɛmi mi tsɔ?

¹⁵ Yesu ngɔ e hɛ kɛ fɔ Yehowa nɔ kɛ e tsui tsuo. Yesu ye mluku, se kɛ̃ ɔ, e sɔle ha Yehowa si abɔ. Jã nɛ e pee ɔ ye bua lɛ nɛ e pee kã nɛ e pee Yehowa suɔmi nya ní. (Mat. 26:​39, 42, 44; Yoh. 18:​4, 5) E ngɛ heii kaa Petro hɛ ji nɔ kaa Yesu sɔle si abɔ kɛ ha e Tsɛ ɔ nyɔ mi nɛ e nɔ jena e ma gbo ɔ, nɛ enɛ ɔ ná Petro nɔ he wami e wami be ɔ tsuo.

16. Pee se ɔ, mɛni Petro pee kɛ tsɔɔ kaa e juɛmi mi tsɔ? (1 Petro 4:7)

¹⁶ Pee se ɔ, Petro ngɔ e hɛ kɛ fɔ Yehowa nɔ wawɛɛ kɛ gu sɔlemi nɔ. Yesu nɛ a tle lɛ si ɔ ha nɛ Petro kɛ bɔfo kpa amɛ ná nɔ mi mami kaa mumi klɔuklɔu ɔ maa ye bua mɛ konɛ a nyɛ nɛ a fiɛɛ sane kpakpa a. Se Yesu de mɛ kaa a mlɛ ngɛ Yerusalem kɛ ya si be nɛ e ma ha mɛ mumi klɔuklɔu ɔ. (Luka 24:49; Níts. 1:​4, 5) Benɛ a ngɛ mlɛe ɔ, mɛni Petro pee? E kɛ e nyɛmimɛ Kristofo ɔmɛ “hɛɛ sɔlemi mi.” (Níts. 1:​13, 14) Pee se benɛ Petro ngma e kekleekle sɛ womi ɔ, e wo e nyɛmimɛ Kristofo ɔmɛ he wami kaa a ha nɛ a juɛmi mi nɛ tsɔ nɛ a ngɔ a hɛ kɛ fɔ Yehowa nɔ kɛ gu sɔlemi nɔ. (Kane 1 Petro 4:7.) Petro ngɔ e hɛ kɛ fɔ Yehowa nɔ, nɛ enɛ ɔ ha nɛ e nyɛ nɛ e wo nyɛmimɛ ɔmɛ he wami nɛ e ye bua mɛ.—Gal. 2:9.

17. Ke wɔ nitsɛmɛ wa nyɛɔ nɛ wa peeɔ ní komɛ ngɛ wa dɛ he po ɔ, mɛni e sa nɛ waa ya nɔ nɛ waa pee? (Hyɛ foni ɔ hulɔ.)

¹⁷ E sa nɛ waa sɔle kɛ ha Yehowa be fɛɛ be konɛ wa juɛmi mi nɛ tsɔ. Ke wa nyɛɔ nɛ wa peeɔ ní komɛ ngɛ wa dɛ he po ɔ, e he hia nɛ waa ya nɔ nɛ waa sɔle ha Yehowa konɛ e ye bua wɔ. Enɛ ɔ he ɔ, ke wa maa mwɔ yi mi kpɔ ko nɛ he hia a, wa sɔleɔ ha Yehowa konɛ e tsɔɔ wɔ blɔ, ejakaa wa le kaa e le nɔ́ nɛ hi kɛ ha wɔ.

18. Mɛni maa ye bua wɔ konɛ waa ya nɔ nɛ wa susu níhi a he kaa bɔ nɛ Yehowa peeɔ ɔ?

¹⁸ Wa bua jɔ kaa Yehowa bɔ wɔ konɛ wa nyɛ nɛ wa je e su ɔmɛ kpo. (1 Mose 1:26) Ngɛ anɔkuale mi ɔ, wa be nyɛe maa kase Yehowa kɛ pi si. (Yes. 55:9) Se kaa bɔ nɛ Petro pee ɔ, wa suɔ nɛ wɔ hu waa ya nɔ nɛ wa susu níhi a he kaa bɔ nɛ Yehowa peeɔ ɔ, nɛ waa bɔ mɔde nɛ waa ba wa he si, nɛ wa ha nɛ wa juɛmi mi nɛ tsɔ.