“Nyɛɛ Tsɔɔ Nɔ Nɛ Nyɛ Ma Sɔmɔ”

1. Mɛni e sa nɛ waa pee konɛ wa ná bua jɔmi nitsɛnitsɛ, nɛ mɛni he je? (Yesaya 48:​17, 18)

WA HIƆWE Tsɛ ɔ suɔ wɔ wawɛɛ, nɛ e suɔ nɛ wa ná bua jɔmi ngɛ si himi mi amlɔ nɛ ɔ kɛ hwɔɔ se. (Fiɛɛ. 3:​12, 13) E bɔ wɔ konɛ wɔ nitsɛmɛ wa nyɛ nɛ waa pee ní komɛ ngɛ wa dɛ he mohu lɛɛ, se kɛ̃ ɔ, e bɔɛ wɔ kaa waa ye wa sibi adesa nɔ aloo wɔ nitsɛmɛ waa tsɔɔ nɔ́ nɛ da kɛ nɔ́ nɛ dɛ. (Fiɛɛ. 8:9; Yer. 10:23) Yehowa le kaa loko wa ma ná bua jɔmi nitsɛnitsɛ ɔ, ja wa sɔmɔ lɛ nɛ wa ye e mlaa amɛ a nɔ.—Kane Yesaya 48:​17, 18.

2. Mɛni susumi Satan suɔ nɛ wa ná, nɛ mɛni Yehowa pee?

² Satan suɔ nɛ wa he ye kaa ke wa sɔmɔ we Yehowa po ɔ, wa ma nyɛ ma ná bua jɔmi. Enɛ ɔ tsɔɔ kaa Satan suɔ nɛ wa he ye kaa adesa ma nyɛ maa ye e nyɛmi adesa nɔ nɛ a be nyagba ko náe. (1 Mose 3:​4, 5) Bɔ nɛ pee nɛ waa na kaa Satan ji lakpatsɛ ɔ, Yehowa ngmɛ adesahi blɔ konɛ a ye a nyɛmi adesahi a nɔ kɛ ya si be ko. E ngɛ heii kaa adesahi a nɔ yemi yi manye. Se Baiblo ɔ tsɔɔ kaa nyumuhi kɛ yihi fuu nɛ a sɔmɔ Yehowa a lɛɛ a ná bua jɔmi wawɛɛ. A kpɛti nɔ kake ji Yesu Kristo. Kekleekle ɔ, nyɛ ha nɛ waa hyɛ yi mi tomihi a he je nɛ Yesu hla kaa e ma sɔmɔ Yehowa. Lɔ ɔ se ɔ, wa ma susu nɔ́ he je nɛ e sa nɛ wa sɔmɔ Yehowa a he. Nyagbe ɔ, wa ma susu yi mi tomi komɛ a he je nɛ wa hla kaa wa ma sɔmɔ Yehowa a he.

NƆ́ HE JE NƐ YESU HLA KAA E MA SƆMƆ YEHOWA

3. Mɛni he blɔ nɛ Satan kɛ ha Yesu, nɛ mɛni Yesu ma e juɛmi nya si kaa e maa pee?

³ Benɛ Yesu ngɛ zugba a nɔ ɔ, e he ba hia nɛ e hla nɔ nɛ e ma sɔmɔ. Benɛ a baptisi lɛ be bɔɔ se ɔ, Satan de lɛ kaa e maa ngɔ je nɛ ɔ mi matsɛ yemi ɔmɛ tsuo kɛ ha lɛ ke e kplã si nɛ e ja lɛ si kake pɛ po. Yesu ha lɛ heto ke: “Satan, jee hiɛ ɔ kɛ ho! Ejakaa a ngma ke: ‘Yehowa o Mawu ɔ ji nɔ nɛ e sa kaa o ja, nɛ lɛ pɛ nɛ e sa kaa o sɔmɔ ngɛ blɔ klɔuu nɔ.’” (Mat. 4:​8-10) Mɛni he je nɛ Yesu mwɔ e yi mi kpɔ kaa e ma sɔmɔ Yehowa pɛ ɔ? Nyɛ ha nɛ waa hyɛ yi mi tomi komɛ a he je nɛ e pee jã.

4-5. Mɛni yi mi tomi komɛ a he je nɛ Yesu hla kaa e ma sɔmɔ Yehowa a?

⁴ Yi mi tomi titli he je nɛ Yesu hla kaa e ma sɔmɔ Yehowa nɛ ji e Tsɛ ɔ ji kaa e suɔ lɛ wawɛɛ. (Yoh. 14:31) Jehanɛ se hu ɔ, Yesu sɔmɔ Yehowa ejakaa e le kaa lɔ ɔ ji nɔ́ nɛ e sa kaa e pee. (Yoh. 8:​28, 29; Kpoj. 4:11) Yesu le kaa Yehowa ngɔ nɛ wami tsuo je. Enɛ ɔ he ɔ, wa ma nyɛ ma he lɛ maa ye, ejakaa e ma ha wɔ ní kpakpahi tsuo nɛ wa hia a. (La 33:4; 36:9; Yak. 1:17) Yehowa yeɔ Yesu anɔkuale be fɛɛ be, nɛ lɛ nɛ e ngɔ he blɔhi tsuo nɛ Yesu ngɛ ɔ kɛ ha lɛ. (Yoh. 1:14) Se Satan lɛɛ e je ekpa kulaa ngɛ Yehowa he. E ha nɛ adesahi pee yayami nɛ a gbo. E yeɔ lakpa, e hɛ kɔ̃ɔ, nɛ e foɔ lɛ pɛ e nɔ́ mi. (Yoh. 8:44) Akɛnɛ Yesu le Satan saminya he je ɔ, e sume kaa e maa pee kaa lɛ konɛ e tsɔ Yehowa hɛ mi atuã.—Filip. 2:​5-8.

⁵ Yesu ngɛ yi mi tomi kpa ko hu he je nɛ e suɔ kaa e ma sɔmɔ Yehowa. E le kaa ke e pee jã a, Yehowa maa jɔɔ lɛ saminya. (Heb. 12:2) E le kaa ke e ya nɔ nɛ e ye anɔkuale ɔ, lɔ ɔ ma tsɔ e Tsɛ ɔ biɛ ɔ he, nɛ e ma je yayami kɛ gbenɔ nɛ Abosiami ngɔ kɛ ba a kɛ je.

NƆ́ HE JE NƐ E SA KAA WA SƆMƆ YEHOWA

6-7. Mɛni he je nɛ nihi fuu ja we Yehowa mwɔnɛ ɔ, se mɛni he je nɛ lɛ pɛ nɛ e sa kaa wa ja a?

⁶ Mwɔnɛ ɔ, nihi fuu sɔmɔ we Yehowa ejakaa a li Yehowa su kpakpa amɛ. Jehanɛ hu ɔ, a kase we ní kpakpahi tsuo nɛ e pee kɛ ha mɛ ɔ he ní lolo. Jã nɛ e ji ngɛ nihi nɛ bɔfo Paulo fiɛɛ kɛ ha mɛ ngɛ Atene ɔ hu a blɔ fa mi.—Níts. 17:​19, 20, 30, 34.

⁷ Bɔfo Paulo de nihi nɛ a ngɛ lɛ tue bue ɔ kaa anɔkuale Mawu ɔ “haa nihi tsuo wami kɛ mumi kɛ níhi tsuo.” E tsa nɔ ke: “Kɛ gu e nɔ nɛ wa ngɛ wami, nɛ wa yaa nɛ wa baa.” Akɛnɛ Mawu ji Bɔlɔ, nɛ e gu ‘nɔmlɔ kake nɔ kɛ pee ma fɛɛ ma kɛ e mi nimli’ he je ɔ, lɛ pɛ nɛ e sa kaa wa ja.—Níts. 17:​25, 26, 28.

8. Mɛni nɛ Yehowa be pee gblegbleegble? Moo tsɔɔ nya.

⁸ Akɛnɛ Yehowa ji Bɔlɔ kɛ Je ɔ Tsuo Nɔ Yelɔ he je ɔ, e ngɛ he blɔ kaa e peeɔ nɔ́ fɛɛ nɔ́ nɛ e suɔ. Ke e suɔ ɔ, e ma nyɛ maa nyɛ wa nɔ kaa wa sɔmɔ lɛ. Se kɛ̃ ɔ, e be jã pee gblegbleegble. E ha wɔ odasehi nɛ maa nɔ mi kaa e ji nɔ ko nɛ e ngɛ niinɛ, nɛ e suɔ wa kpɛti nɔ fɛɛ nɔ saminya. E suɔ nɛ nihi babauu nɛ a ba pee e huɛmɛ kɛ ya neneene. (1 Tim. 2:​3, 4) Enɛ ɔ he ɔ, Yehowa tsɔse wɔ konɛ waa tsɔɔ ni kpahi ní kɛ kɔ e yi mi tomi he, nɛ wa de mɛ ní kpakpahi tsuo nɛ e maa pee ha adesahi ɔ. (Mat. 10:​11-13; 28:​19, 20) Yehowa ngɔ wa ti nɔ fɛɛ nɔ kɛ wo asafo ko mi, nɛ e to blɔ nya konɛ asafo mi nikɔtɔmahi nɛ a ngɛ suɔmi ɔ nɛ a hyɛ wa nɔ.—Níts. 20:28.

9. Mɛni odasehi lɛ tsɔɔ kaa Yehowa suɔ wɔ?

⁹ Bɔ nɛ Yehowa kɛ nihi nɛ a he we yi kaa e ngɛ ɔ hiɔ si ha a tsɔɔ kaa e suɔmi ɔ se be kulaa. Mo susu sane nɛ ɔ he nɛ o hyɛ: Kɛ je blema tɔɔ ɔ, adesahi fuu hla kaa mɛ nitsɛmɛ a maa pee nɔ́ nɛ a suɔ mohu pe nɛ a maa bu Yehowa tue. Se kɛ̃ ɔ, Yehowa kua we mɛ, e je mi mi jɔmi mi nɛ e ha mɛ níhi tsuo nɛ a hia a konɛ a hi wami mi nɛ a bua nɛ jɔ. (Mat. 5:​44, 45; Níts. 14:​16, 17) Yehowa ha mɛ he blɔ konɛ a ná huɛmɛ kɛ wekuli nɛ a maa suɔ mɛ. Jehanɛ hu ɔ, e ha mɛ he blɔ konɛ a nyɛ nɛ a fɔ bimɛ, nɛ a tsu ní konɛ a bua nɛ jɔ ngɛ si himi mi. (La 127:3; Fiɛɛ. 2:24) Enɛ ɔmɛ tsuo maa nɔ mi kaa wa hiɔwe Tsɛ ɔ suɔ adesahi tsuo. (2 Mose 34:6) Amlɔ nɛ ɔ, nyɛ ha nɛ waa hyɛ nɔ́ he je nɛ wa hla kaa wa ma sɔmɔ Yehowa, kɛ bɔ nɛ e jɔɔ wɔ ha akɛnɛ wa sɔmɔɔ lɛ ɔ he je.

NƆ́ HE JE NƐ WA HLA KAA WA MA SƆMƆ YEHOWA

10. (a) Mɛni ji yi mi tomi titli he je nɛ wa sɔmɔɔ Yehowa? (Mateo 22:37) (b) Kɛ o ná Yehowa tsui si tomi ɔ he se ha kɛɛ? (La 103:​13, 14)

¹⁰ Kaa bɔ nɛ e ji ngɛ Yesu blɔ fa mi ɔ, nɔ́ titli he je nɛ wɔ hu wa sɔmɔɔ Yehowa ji kaa wa suɔ Lɛ wawɛɛ. (Kane Mateo 22:37.) Ke wa kase Yehowa su ɔmɛ a he ní ɔ, lɔ ɔ haa nɛ wa hɛɔ kɛ suɔ e he. Kaa nɔ hyɛmi nɔ́ ɔ, mo susu bɔ nɛ Yehowa toɔ e tsui si kɛ haa wɔ ɔ he nɛ o hyɛ. Benɛ Israelbi ɔmɛ gbo Mawu nɔ tue ɔ, e je he si bami mi nɛ e de mɛ ke: ‘I kpa nyɛ pɛɛ, nyɛɛ kpale nyɛ se kɛ je nyɛ blɔ yaya amɛ a nɔ.’ (Yer. 18:11) Yehowa kaiɔ kaa wa yi mluku, nɛ zu ji wɔ. (Kane La 103:​13, 14.) Ke o pue o yi mi tɛ ngɛ Yehowa tsui si tomi ɔ kɛ e su kpahi nɛ a se be ɔ he ɔ, anɛ lɔ ɔ wui mo he wami kaa o sɔmɔ lɛ lo?

11. Mɛni ji yi mi tomi kpa komɛ a he je nɛ wa hla kaa wa ma sɔmɔ Yehowa a?

¹¹ Jehanɛ hu ɔ, wa sɔmɔɔ Yehowa, ejakaa lɔ ɔ ji nɔ́ nɛ e sa kaa waa pee. (Mat. 4:10) Wa le kaa ke waa kɛ anɔkuale yemi sɔmɔ lɛ ɔ, wa ma ná he se. Ke waa kɛ anɔkuale yemi sɔmɔɔ Yehowa a, lɔ ɔ haa nɛ e biɛ ɔ he tsɔɔ, nɛ Abosiami ba peeɔ lakpatsɛ, nɛ Yehowa bua jɔɔ wawɛɛ nitsɛ. Ke wa hla kaa wa ma sɔmɔ Yehowa amlɔ nɛ ɔ, wa ma ná he blɔ kaa wa ma sɔmɔ lɛ kɛ ya neneene!—Yoh. 17:3.

12-13. Mɛni wa kaseɔ ngɛ Jane kɛ Pam a níhi a si kpami ɔ mi?

¹² Wa ma nyɛ ma ná suɔmi nɛ mi kuɔ kɛ ha Yehowa be mi nɛ wa wɛ lolo po, nɛ suɔmi nɛ ɔ mi maa ya nɔ maa wa ke wa ngɛ wae. Mo kadi nɔ́ nɛ Jane kɛ Pama nɛ a ji nɔ kɛ e senɔ ɔ pee. Benɛ a kɛ mɛ bɔni Baiblo ɔ kasemi ɔ, jamɛ a be ɔ, Jane ye jeha 11 nɛ Pam ye jeha 10. Ngɛ anɔkuale mi ɔ, a fɔli ɔmɛ a bua jɔɛ Baiblo ɔ kasemi he. Se kɛ̃ ɔ, a tsɔɔ kaa ke Jane kɛ Pam kɛ mɛ maa ya a sɔlemi ɔ Hɔ loo Hɔgba a, lɛɛ a maa ngmɛ mɛ blɔ konɛ a kɛ Odasefo ɔmɛ nɛ kase Baiblo ɔ. Jane de ke: “Ye juami bi ɔmɛ nyɛɔ ye nɔ kaa i kɛ ye he nɛ wo tsopa yaya kɛ ní tsumi kɛ ajuama bɔmi mi. Se nɔ́ nɛ Odasefo ɔmɛ tsɔɔ mi ngɛ Baiblo ɔ mi ɔ ye bua mi nɛ i nyɛ nɛ i da si fɔfɔɛ nɛ ɔ nya.”

¹³ Jeha bɔɔ komɛ a se ɔ, mɛ tsuo a ba pee fiɛɛli. Pee se ɔ, a je blɔ gbami ní tsumi ɔ sisi be mi nɛ a ngɛ a fɔli nɛ a wa ngɛ jeha mi ɔ a nɔ hyɛe. Benɛ a susu níhi a si kpamihi nɛ a ná a he ɔ, Jane de ke: “I ba na kaa Yehowa hyɛɛ e sɔmɔli a nɔ, nɛ kaa bɔ nɛ 2 Timoteo 2:19 ɔ tsɔɔ ɔ, ‘Yehowa le nihi nɛ a ji e nihi.’” Niinɛ, Yehowa hyɛɛ nihi nɛ a hla kaa a ma sɔmɔ lɛ, nɛ a jeɔ suɔmi kpo kɛ tsɔɔ lɛ ɔ a nɔ!

14. Mɛni blɔ nɔ nɛ wa ngɔɔ wa ní peepee kɛ wa munyu tutui kɛ fãa Yehowa biɛ ɔ he? (Hyɛ foni ɔmɛ hulɔ.)

¹⁴ Wa suɔ nɛ waa ye bua kɛ tsɔ Yehowa biɛ ɔ he. Mo susu he nɛ o hyɛ: Ngɔɔ lɛ kaa o ngɛ huɛ ko nɛ e peeɔ nɔ kpakpa, nɛ e mi mi jɔ nɛ e kɛ yayami keɔ nɔ. Se ligbi ko ɔ, o nu kaa nɔ ko gbe e he guɛ kaa e yi mi wa, nɛ e yeɔ lakpa hulɔ. Ke e ba jã a, kɛ o maa pee o ní ha kɛɛ? E ngɛ heii kaa o ma fã e he. Jã kɛ̃ nɛ e ji ngɛ Yehowa blɔ fa mi. Ke wa na kaa Satan kɛ e sisi bimɛ ɔmɛ ngɛ Yehowa he lakpa munyuhi gbɛe kɛ ngɛ fiae ɔ, wa fãa Yehowa he, nɛ wa deɔ nihi anɔkuale nɛ kɔɔ e he ɔ. (La 34:1; Yes. 43:10) Wa ngɔɔ wa ní peepee kɛ wa munyu tutui kɛ tsɔɔ kaa wa suɔ nɛ wa sɔmɔ Yehowa kɛ wa tsui tsuo.

15. Kɛ bɔfo Paulo ná tsakemihi nɛ e pee ngɛ otihi nɛ e kɛ ma e hɛ mi ɔ he se ha kɛɛ? (Filipi Bi 3:​7, 8)

¹⁵ Wa jeɔ suɔmi mi nɛ wa peeɔ tsakemi ngɛ otihi nɛ waa kɛ maa wa hɛ mi ɔ a he, konɛ wa nyɛ nɛ wa sɔmɔ Yehowa kɛ pi si loo wa tsu babauu ngɛ e sɔmɔmi mi. Kaa nɔ hyɛmi nɔ́ ɔ, bɔfo Paulo hla kaa e maa ngmɛɛ blɔ nya ngua nɛ e ngɛ ngɛ Yuda jami ɔ mi ɔ he bɔ nɛ pee nɛ e nyɛɛ Kristo se nɛ e sɔmɔ Yehowa. (Gal. 1:14) Enɛ ɔ ha nɛ e ná jɔɔmihi babauu, nɛ e ná he blɔ hu kaa e maa piɛɛ Kristo he kɛ ye matsɛ ngɛ hiɔwe. Ngɛ anɔkuale mi ɔ, bɔfo Paulo pia we e he kaa e sɔmɔ Yehowa, nɛ wɔ hu wa be wa he piae kɔkɔɔkɔ.—Kane Filipi Bi 3:​7, 8.

16. Mɛni wa kaseɔ ngɛ Julia níhi a si kpami ɔ mi? (Hyɛ foni ɔmɛ hulɔ.)

¹⁶ Ke wa ngɔ Yehowa sɔmɔmi kɛ pee nɔ́ titli ngɛ wa si himi mi ɔ, wa ma ná jɔɔmihi amlɔ nɛ ɔ kɛ hwɔɔ se tsuo. Mo susu nyɛmiyo ko nɛ a tsɛɛ lɛ ke Julia níhi a si kpami ɔ he nɛ o hyɛ. Loko Julia ma ba kase anɔkuale ɔ, e piɛɛ lali a kuu ko he ngɛ a sɔlemi ɔ mi kɛ je e jokuɛ mi tɔɔ. Akɛnɛ e laa wawɛɛ he je ɔ, nɔ ko nɛ e kɛ lami pee e ní tsumi ɔ bɔ mɔde kaa e ma tsɔse Julia konɛ e he nɛ be ngɛ lami mi. E kɛ we nɛ Julia he biɛ, nɛ e ya laa ngɛ hehi nɛ nihi le wawɛɛ. Benɛ Julia ngɛ la fiami sukuu ko nɛ e he biɛ ɔ yae ɔ, nɔ ko nɛ lɛ hu e ngɛ sukuu nɛ ɔ eko yae ɔ kɛ lɛ bɔni Mawu he ní sɛɛmi, nɛ e tsɔɔ Julia kaa a tsɛɛ Mawu ke Yehowa. E kɛ we kulaa nɛ Julia bɔni Baiblo ɔ kasemi, nɛ e kaseɔ ní ɔ si enyɔ ngɛ otsi ɔ mi. Nyagbenyagbe ɔ, Julia fia e pɛɛ si kaa e maa ngɔ e juɛmi kɛ ma Yehowa sɔmɔmi nɔ mohu pe nɛ e ma he biɛ ngɛ lami mi. Se kɛ̃ ɔ, e nɛ lɛ gbɔjɔɔ kulaa. E de ke: “Nihi fuu de mi kaa i kɛ nike ní nɛ Mawu kɛ ha mi ɔ tsu we ní saminya. Se kɛ̃ ɔ, i suɔ nɛ ma ngɔ ye wami kɛ sɔmɔ Yehowa kɛ pi si.” Amlɔ nɛ ɔ, kɛ Julia nuɔ he ha kɛɛ ngɛ tsakemi nɛ e pee jeha 30 nɛ be ɔ he? E de ke: “I ngɛ tue mi jɔmi nitsɛnitsɛ, nɛ i ngɛ hɛnɔkami kaa hwɔɔ se ɔ, Yehowa ma ha mi níhi tsuo nɛ ye tsui suɔ.”—La 145:16.

YAA NƆ NƐ O SƆMƆ YEHOWA

17. Kɛ nyagbe ɔ nɛ e ma kɛ fo ɔ maa sa nihi nɛ kpaako a maa hla kaa a ma sɔmɔ Yehowa, kɛ nihi nɛ a ngɛ Yehowa sɔmɔe momo ɔ a he ha kɛɛ?

¹⁷ Je nɛ ɔ nyagbe ɔ ma kɛ fo. Bɔfo Paulo ngma ke: “Ejakaa e ‘piɛ bɔɔ pɛ’ nɛ́ ‘nɔ nɛ e ma a ma ba su, nɛ e be se kpɛe.’” (Heb. 10:37) Kɛ munyu nɛ ɔ kɔɔ wa he ha kɛɛ? Be nɛ e piɛ nɛ nihi kɛ maa hla kaa a ma sɔmɔ Yehowa a pi kulaa. (1 Kor. 7:29) Jehanɛ hu ɔ, ke wa mwɔ wa yi mi kpɔ momo kaa wa ma sɔmɔ Yehowa a, lɛɛ wa le kaa waa kɛ haomihi maa kpe, se “e piɛ bɔɔ pɛ” nɛ a se maa po.

18. Mɛni Yesu kɛ Yehowa suɔ kaa waa pee?

¹⁸ Pi nɛ Yesu wo e kaseli ɔmɛ mɛ he wami kaa a ba nyɛɛ e se pɛ kɛkɛ, mohu ɔ, e de mɛ kaa a ya nɔ nɛ a pee jã. (Mat. 16:24) Enɛ ɔ he ɔ, ke o kɛ jeha babauu ngɛ Yehowa sɔmɔe po ɔ, moo ya nɔ nɛ o pee jã. O kɔni mi nɛ ko jɔ̃. E sa nɛ waa bɔ mɔde wawɛɛ konɛ wa nyɛ nɛ wa sɔmɔ Yehowa daa. Eko ɔ, wa be lɛ náe gbɔjɔɔ, se wa ma nyɛ ma ná nɔ mi mami kaa Yehowa maa jɔɔ wɔ amlɔ nɛ ɔ po!—La 35:27.

19. Mɛni wa kaseɔ ngɛ Gene níhi a si kpami ɔ mi?

¹⁹ Ni komɛ susuɔ kaa Yehowa nɛ wa ma sɔmɔ ɔ biɔ nɛ waa ngɔ níhi fuu kɛ sã afɔle. Ke o ji niheyo loo yiheyo ɔ, anɛ e peeɔ mo kaa ke o ngɛ Yehowa sɔmɔe ɔ, ní komɛ maa ngmɛɛ mo lo? Nyɛminyumu wayoo ko nɛ a tsɛɛ lɛ ke Gene ɔ de ke: “I nu he kaa akɛnɛ i ji Yehowa Odasefono ɔ he je ɔ, i be nyɛe ma je ye hɛja. E ngɛ kaa nɔ́ nɛ ye juami bi fuu a bua jɔɔ ngɛ si himi mi akɛnɛ a yaa he nya buamihi, nɛ a peeɔ plã loo a fiaa video games nɛ yiwutso ní peepee ngɛ mi ɔ he je. Se imi lɛɛ i kɛ ye be ɔ yaa asafo mi kpe kɛ fiɛɛmi.” Kɛ susumi nɛ ɔ ná Gene nɔ he wami ha kɛɛ? E de ke: “Enɛ ɔ ha nɛ i bɔni ní nɛ ɔmɛ ekomɛ peemi ngɛ laami mi kɛ jeɔ ye hɛja. Se kɛ̃ ɔ, i ná we bua jɔmi nitsɛnitsɛ. Lɔ ɔ he ɔ, i bɔni Baiblo anɔkualehi nɛ i kɛ tsu we ní ɔ he susumi ekohu, nɛ i ma ye juɛmi nya si kaa ma sɔmɔ Yehowa kɛ ye tsui tsuo. Kɛ je lɔ ɔ se ɔ, i na kaa Yehowa ha ye sɔlemi ɔmɛ eko fɛɛ eko heto.”

20. Mɛni e sa nɛ waa fia wa pɛɛ si kaa wa maa pee?

²⁰ La polɔ ko la ha Yehowa ke: “Nɔ nɛ o hla nɛ o ngɔ lɛ kɛ ba o kasa nya konɛ e ba hi o sɔlemi we ɔ yale ɔ mi ɔ ngɛ bua jɔmi.” (La 65:4) Nyɛ ha nɛ wɔ hu waa fia wa pɛɛ si kaa wa maa ya nɔ ma sɔmɔ Yehowa kaa bɔ nɛ Yoshua pee ɔ. E de ke: “Imi kɛ ye we ɔ lɛɛ, wa ma sɔmɔ Yehowa.”—Yosh. 24:15.