E Hi Kaa Waa Kɛ Wa Nyɛmimɛ Ɔmɛ Maa Bɔ Gbagbanii!

1-2. Mɛni ji nɔ́ ko nɛ he hia Yehowa wawɛɛ, nɛ mɛni e suɔ nɛ waa pee?

BƆ NƐ waa kɛ nihi hiɔ si ha a he hia Yehowa wawɛɛ. Yesu tsɔɔ wɔ kaa e sa nɛ waa suɔ wa nyɛmi kaa bɔ nɛ wa suɔ wa he ɔ. (Mat. 22:​37-39) Enɛ ɔ tsɔɔ kaa e sa nɛ wa je mi mi jɔmi kpo kɛ tsɔɔ nihi nɛ a sɔmɔ we Yehowa a po. Ke wa pee jã a, lɔ ɔ tsɔɔ kaa wa ngɛ Yehowa Mawu, nɔ nɛ “e haa nɛ e pu ɔ jeɔ ngɛ yayami peeli kɛ kpakpa peeli tsuo a nɔ, nɛ e haa nɛ hiɔmi nɛɛ kɛ haa dali kɛ nihi nɛ a dɛ tsuo” ɔ kasee.—Mat. 5:45.

² E ngɛ mi kaa Yehowa suɔ adesahi tsuo mohu lɛɛ, se e suɔ nihi nɛ a buɔ lɛ tue ɔ wawɛɛ. (Yoh. 14:21) E suɔ nɛ wɔ hu waa kase lɛ. Enɛ ɔ he ɔ, e deɔ wɔ kaa waa ‘suɔ wa sibi wawɛɛ nitsɛ’ nɛ waa ‘suɔ wa sibi a sane’ hulɔ. (1 Pet. 4:8; Rom. 12:10) Suɔmi nɛ ɔ nɛ wa ma je kpo ɔ ngɛ kaa suɔmi nɛ wa jeɔ kpo kɛ tsɔɔ wa wekuli loo wa huɛmɛ nɛ nyu bi ngɛ waa kɛ mɛ wa kpɛti ɔ.

3. Mɛni e sa nɛ wa kai kɛ kɔ suɔmi he?

³ Suɔmi ngɛ kaa tso loo mɔmɔ ko nɛ a du. Loko tso ɔ loo mɔmɔ ɔ maa wa a, e sa nɛ a hyɛ nɔ saminya. Jã nɔuu kɛ̃ nɛ e sa nɛ waa ya nɔ nɛ waa bɔ mɔde wawɛɛ konɛ suɔmi nɛ wa ngɛ kɛ ha wa nyɛmimɛ Kristofohi ɔ mi nɛ wa. Bɔfo Paulo wo Kristofo ɔmɛ he wami ke: “Nyɛ ha nɛ nyɛ nyɛmi suɔmi ɔ nɛ ya nɔ.” (Heb. 13:1) Yehowa suɔ nɛ waa ya nɔ nɛ waa suɔ ni kpahi. Ní kasemi nɛ ɔ maa ye bua wɔ konɛ waa na nɔ́ he je nɛ e sa nɛ waa kɛ wa nyɛmimɛ ɔmɛ nɛ bɔ gbagbanii, kɛ nɔ́ nɛ maa ye bua wɔ konɛ waa ya nɔ nɛ waa pee jã.

NƆ́ HE JE NƐ E SA NƐ WAA KƐ WA NYƐMIMƐ ƆMƐ NƐ BƆ GBAGBANII

4. Kaa bɔ nɛ a tsɔɔ ngɛ La 133:1 ɔ, mɛni maa ye bua wɔ konɛ waa ya nɔ nɛ waa na kake peemi nɛ ngɛ wa kpɛti ɔ kaa nɔ́ ko nɛ e he jua wa a? (Hyɛ foni ɔmɛ hulɔ.)

⁴ Kane La 133:1. Waa kɛ la polɔ ɔ kpaa gbi ngɛ nɔ́ nɛ e de ɔ he. E tsɔɔ kaa e “hi,” nɛ e ngɛ “fɛu” kaa waa kɛ nihi nɛ a suɔ Yehowa a maa pee huɛmɛ. Kaa nɔ hyɛmi nɔ́ ɔ, nɔ ko ma nyɛ maa hi nɔ́ ko nɛ e he jua wa ngɛ e we mi, se akɛnɛ e naa jamɛ a nɔ́ ɔ be fɛɛ be he je ɔ, ke e hyɛ we nɛ hí ɔ, e be nɔ́ ɔ nae kaa nɔ́ ko nɛ e he jua wa hu. Jã kɛ̃ nɛ wɔ hu ke wa hyɛ we nɛ hi ɔ, wa ma ma wa hɛ kɛ fɔ suɔmi kɛ kake peemi nɛ ngɛ waa kɛ wa nyɛmimɛ ɔmɛ wa kpɛti ɔ nɔ, nɛ wa maa na lɛ kaa nɔ́ ko nyafii. Wa naa wa nyɛmimɛ ɔmɛ be fɛɛ be. Eko ɔ, wa naa mɛ si abɔ ngɛ otsi ɔ mi. Mɛni maa ye bua wɔ konɛ waa ya nɔ nɛ waa na mɛ kaa a he jua wa? Ke wa he be kɛ pue wa yi mi tɛ ngɛ bɔ nɛ wɔ nitsɛmɛ kɛ asafo ɔ náa a he se ha a he ɔ, e maa ye bua wɔ konɛ suɔmi nɛ wa ngɛ kɛ ha mɛ ɔ mi nɛ wa.

5. Ke wa jeɔ suɔmi kpo kɛ tsɔɔ wa sibi ɔ, kɛ e náa ni kpahi a nɔ he wami ha kɛɛ?

⁵ Behi fuu ɔ, ke nihi ba wa kpe ɔmɛ a sisi kekleekle be, nɛ a na bɔ nɛ wa jeɔ suɔmi kpo kɛ tsɔɔ wa sibi ha a, e peeɔ mɛ nyakpɛ wawɛɛ. Enɛ ɔ pɛ po haa nɛ a náa nɔ mi mami kaa a na anɔkuale ɔ. Yesu de ke: “Ke suɔmi ngɛ nyɛ kpɛti ɔ, lɔ ɔ ma ha nɛ nihi tsuo maa le kaa nyɛ ji ye kaseli.” (Yoh. 13:35) Mo susu nyɛmiyo ko nɛ a tsɛɛ lɛ ke Chaithra a níhi a si kpami ɔ he nɛ o hyɛ. Benɛ e ngɛ yunivɛsiti yae ɔ, e kɛ Yehowa Odasefo ɔmɛ kaseɔ Baiblo ɔ. A fɔ lɛ nine kɛ ha kpokpa nɔ kpe ko, nɛ e kplɛɛ kaa e maa ya. Benɛ a gbe Soha kpe ɔ nya a, e de nɔ nɛ e kɛ lɛ kaseɔ Baiblo ɔ ke: “Ye fɔli ɔmɛ fua we mi gblee! Se ngɛ nyɛ kpe ɔ sisi ɔ, nihi fua mi si kakaaka 52 ngɛ ligbi kake pɛ mi. I nu he kaa Yehowa gu e we bi a nɔ kɛ je suɔmi kpo kɛ tsɔɔ mi. I suɔ nɛ ma piɛɛ weku nɛ ɔ he.” Chaithra ya e hɛ mi nɛ e ha nɛ a baptisi lɛ ngɛ jeha 2024 ɔ mi. Ngɛ anɔkuale mi ɔ, ke nihi na ní tsumi kpakpa nɛ wa ngɛ tsue kɛ suɔmi nɛ wa ngɛ kɛ ha wa sibi ɔ, behi fuu ɔ, e woɔ mɛ he wami nɛ a ba sɔmɔɔ Yehowa.—Mat. 5:16.

6. Ke wa hɛ kɛ su wa nyɛmimɛ ɔmɛ a he ɔ, kɛ lɔ ɔ ma nyɛ maa po wa he piɛ ha kɛɛ?

⁶ Ke wa hɛ kɛ su wa nyɛmimɛ ɔmɛ a he ɔ, e ma nyɛ maa po wa he piɛ. Paulo wo e nyɛmimɛ Kristofo ɔmɛ he wami ke: “Nyɛɛ ya nɔ nɛ nyɛɛ hi nyɛ sibi he wami woe daa ligbi . . . konɛ yayami he wami nɛ sisiɔ nɔ ɔ nɛ ko kplii nyɛ ti nɔ ko tsui.” (Heb. 3:13) Ke wa kɔni mi jɔ̃, nɛ e he waa ha wɔ kaa wa maa pee nɔ́ nɛ da a, Yehowa ma nyɛ maa gu nyɛmi ko nɛ e yɔse wa si fɔfɔɛ ɔ nɔ kɛ ye bua wɔ. (La 73:​2, 17, 23) Ngɛ anɔkuale mi ɔ, jamɛ a yemi kɛ buami ɔ ma nyɛ ma tsu wa nyagba a he ní ha wɔ.

7. Mɛni tsakpa lɛ ngɛ suɔmi kɛ kake peemi a kpɛti? (Kolose Bi 3:​13, 14)

⁷ Wa piɛɛ nihi nɛ a ngɛ mɔde bɔe wawɛɛ kaa a ma je suɔmi kpo kɛ tsɔɔ a sibi ɔ he. Enɛ ɔ haa nɛ wa náa jɔɔmihi babauu. (1 Yoh. 4:11) Kaa nɔ hyɛmi nɔ́ ɔ, suɔmi woɔ wɔ he wami nɛ wa ‘yaa nɔ nɛ wa náa wa sibi a he tsui,’ nɛ enɛ ɔ haa nɛ kake peemi hiɔ wa kpɛti. (Kane Kolose Bi 3:​13, 14; Efe. 4:​2-6) Enɛ ɔ he ɔ, wa náa bua jɔmi ngɛ wa kpe ɔmɛ a sisi, nɛ wa tue mi hu jɔɔ wɔ saminya. O be enɛ ɔ nae ngɛ he ko he ko.

NYƐ JE BUMI KPO KƐ TSƆƆ NYƐ SIBI

8. Mɛni Yehowa peeɔ kɛ yeɔ buaa wɔ konɛ kake peemi nɛ hi waa kɛ wa nyɛmimɛ ɔmɛ wa kpɛti?

⁸ Kake peemi nɛ ngɛ wa kpɛti ngɛ je kɛ wɛ ɔ ji nyakpɛ nɔ́. E ngɛ mi kaa wa yi mluku mohu lɛɛ, se Yehowa lɛ ha nɛ kake peemi nɛ ɔ ngɛ wa kpɛti ɔ nɛ. (1 Kor. 12:25) Baiblo ɔ de ke ‘Mawu tsɔɔ wɔ kaa waa suɔ wa sibi.’ (1 Tɛs. 4:9) Enɛ ɔ tsɔɔ kaa Yehowa guɔ Baiblo ɔ nɔ kɛ tsɔɔ wɔ nɔ́ tutuutu nɛ e sa kaa waa pee konɛ wa nyɛ nɛ waa hɛ kɛ su wa sibi a he wawɛɛ. Ke wa kaseɔ Mawu Munyu ɔ nɛ waa kɛ tsuɔ ní ɔ, lɔ ɔ tsɔɔ kaa wa ha nɛ ‘Mawu ngɛ wɔ ní tsɔɔe.’ (Heb. 4:12; Yak. 1:25) Ngɛ anɔkuale mi ɔ, jã pɛpɛɛpɛ nɛ Yehowa Odasefo ɔmɛ bɔɔ mɔde kaa a maa pee.

9. Ngɛ Roma Bi 12:​9-13 ɔ nya a, mɛni wa kaseɔ kɛ kɔ bumi kpo nɛ wa ma je kɛ tsɔɔ wa sibi ɔ he?

⁹ Mɛni blɔ nɔ nɛ Mawu Munyu ɔ yeɔ buaa wɔ konɛ waa hɛ kɛ su wa sibi a he? Mo susu nɔ́ nɛ Paulo de ngɛ enɛ ɔ he, nɛ a ngma ngɛ Roma Bi 12:​9-13 ɔ he nɛ o hyɛ. (Kane.) Paulo de ke: “Ngɛ bumi nɛ e sa kaa nyɛɛ bu nyɛ sibi ɔ blɔ fa mi ɔ, nyɛɛ sɛ hlami kɛ pee jã.” Mɛni nɛ enɛ ɔ tsɔɔ? E sa nɛ waa sɛ hlami nɛ waa pee níhi kɛ tsɔɔ kaa wa ‘suɔ ni kpahi a sane.’ Kaa nɔ hyɛmi nɔ́ ɔ, e sa nɛ waa ngɔ nihi a he yayamihi kɛ ke mɛ, nɛ waa pee mɛ nibwɔ, nɛ wa je mi mi jɔmi kpo kɛ tsɔɔ mɛ. (Efe. 4:32) E sɛ nɛ waa mlɛ kaa wa nyɛmimɛ ɔmɛ nɛ a hɛ kɛ su wa he kekle. Mohu ɔ, e sa nɛ waa “sɛ hlami” kɛ pee jã. Kaa bɔ nɛ Yesu tsɔɔ ɔ, ke wa pee jã a, wa maa na kaa “bua jɔmi babauu ngɛ nɔ́ hami mi pe nɔ́ ngɔmi.”—Níts. 20:35.

10. Ke wa yeɔ buaa ni kpahi ɔ, mɛni blɔ nɔ nɛ lɔ ɔ tsɔɔ kaa wa ‘hɛ mi wa kɛ ní tsumi’? (Hyɛ foni ɔ hulɔ.)

¹⁰ Benɛ Paulo de wɔ kaa waa sɛ hlami nɛ wa je bumi kpo kɛ tsɔɔ wa sibi ɔ se ɔ, e kɛ we nɛ e wo wɔ he wami kaa wa ‘hɛ mi nɛ wa kɛ ní tsumi, nɛ wa ko pee hejɔ.’ Nɔ nɛ e hɛ mi wa kɛ ní tsumi ɔ kɛ kã tsuɔ ní wawɛɛ. Ke a ha lɛ ní tsumi ko kaa e tsu ɔ, e tsuɔ he ní saminya. Abɛ 3:​27, 28 ɔ wo wɔ he wami ke: “Nihi nɛ e sa kaa o pee mɛ kpakpa a, ko ma o hɛ kɛ fɔ kpakpa nɛ e sa kaa o pee mɛ ɔ nɔ ke e ngɛ o he wami mi kaa o maa ye bua mɛ.” Ngɛ anɔkuale mi ɔ, ke wa na kaa nɔ ko he fĩ lɛ ɔ, wa bɔɔ mɔde kaa wa maa ye bua lɛ. Wa tui tsle, nɛ wa susuu we kaa nɔ kpa ko maa ye bua lɛ.—1 Yoh. 3:​17, 18.

11. Mɛni ma nyɛ maa ye bua wɔ konɛ waa hɛ kɛ su wa sibi a he?

¹¹ Nɔ́ kpa ko nɛ wa ma nyɛ maa pee kɛ tsɔɔ kaa wa buɔ wa sibi ji kaa ke a tɔ̃ wa nɔ ɔ, waa kɛ a tɔmi ɔ maa ke mɛ oya nɔuu. Efeso Bi 4:26 de ke: “Nyɛ ko ha nɛ pu nɛ nɔ si be mi nɛ nyɛ mi mi fu loloolo.” Mɛni he je? Kuku 27 ɔ tsɔɔ kaa ke wa hɛɛ abofu ɔ mi ɔ, wa ma “ha Abosiami blɔ.” Ngɛ Baiblo ɔ mi ɔ, Yehowa de wɔ si abɔ kaa waa ngɔ wa nyɛmimɛ a tɔmihi kɛ ke mɛ. Kolose Bi 3:13 ɔ woɔ wɔ he wami kaa waa ‘ya nɔ nɛ waa ngɔ kɛ ke wa sibi faa.’ Ke wa ngɔ wa sibi a yayami kɛ ke ɔ, e maa ye bua wɔ wawɛɛ konɛ waa hɛ kɛ su wa sibi a he wawɛɛ. Ke wa peeɔ jã a, wa maa “hɛɛ mumi ɔ kake peemi ɔ mi ngɛ tue mi jɔmi nɛ fĩɔ [wɔ] kɛ peeɔ kake ɔ mi.” (Efe. 4:3) Ke wa ma de ɔ, wa nyɛmimɛ a tɔmihi nɛ waa kɛ maa ke mɛ ɔ ji nɔ́ titli nɛ ma ha nɛ kake peemi kɛ tue mi jɔmi nɛ hi wa kpɛti.

12. Mɛni blɔ nɔ nɛ Yehowa yeɔ buaa wɔ konɛ waa kɛ wa sibi a tɔmihi nɛ ke mɛ?

¹² Ngɛ anɔkuale mi ɔ, e he ma nyɛ maa wa kɛ ha wɔ kaa waa kɛ nihi nɛ a tɔ̃ wa nɔ ɔ a yayami maa ke mɛ. Se Mawu mumi ɔ ma nyɛ maa ye bua wɔ nɛ waa ye manye. Benɛ Baiblo ɔ wo wɔ he wami kaa waa “suɔ wa sibi a sane” nɛ wa “hɛ mi nɛ wa kɛ ní tsumi” ɔ se ɔ, e de hu ke: “Nyɛ ha nɛ mumi ɔ nɛ wo nyɛ kã.” Enɛ ɔ tsɔɔ kaa Mawu mumi ɔ ma nyɛ ma ha nɛ wa nɔ gbagba nɛ te nɛ waa pee kã wawɛɛ. (Rom. 12:11) Enɛ ɔ he ɔ, Mawu mumi ɔ ma nyɛ maa wo wɔ he wami konɛ waa suɔ wa nyɛmimɛ a sane, nɛ waa ngɔ a tɔmihi kɛ ke mɛ faa. Ke jã a, lɛɛ e sa nɛ waa je wa tsui mi nɛ wa kpa Yehowa pɛɛ konɛ e ye bua wɔ.—Luka 11:13.

“E SƐ NƐ MI GBAMI KO NƐ HI NYƐ KPƐTI”

13. Mɛni ma nyɛ maa ngɔ mi gbami kɛ ba wa kpɛti?

¹³ “Nimli slɔɔtohi” nɛ a je he slɔɔtohi lɛ a ngɛ asafo ɔ mi. (1 Tim. 2:​3, 4) Enɛ ɔ he ɔ, e slo yi mi kpɔ nɛ wa kpɛti nɔ fɛɛ nɔ mwɔɔ ngɛ he dlami, hiɔ tsami, kɛ hɛja jemi he. Ke wa hyɛ we nɛ hi ɔ, ní nɛ ɔmɛ ma nyɛ maa ngɔ mi gbami kɛ ba wa kpɛti. (Rom. 14:4; 1 Kor. 1:10) Akɛnɛ ‘Mawu tsɔɔ wɔ kaa waa suɔ wa sibi’ he je ɔ, e sa nɛ waa hyɛ nɛ hi nɛ wa ko ngɔ wa susumi kɛ nyɛ ni kpahi a nɔ, kɛ yi mi tomi ɔ kaa wa nɔ kuɔ pe mɛ.—Filip. 2:3.

14. Mɛni e sa nɛ waa bɔ mɔde kaa wa maa pee be fɛɛ be, nɛ mɛni he je?

¹⁴ Jehanɛ hu ɔ, ke wa bɔɔ mɔde kaa wa maa wo ni kpahi he wami be fɛɛ be ɔ, e maa ye bua wɔ konɛ mi gbami nɛ ko ba asafo ɔ mi. (1 Tɛs. 5:11) Lingmi nɛ ɔ, nihi fuu nɛ a kpa fiɛɛmi kɛ asafo mi kpe yami loo a je mɛ kɛ je asafo ɔ mi ɔ kpale kɛ ba ekohu. Wa nya nihi kaa jã a tsuo a he! (2 Kor. 2:8) Mo kadi nɔ́ nɛ ya nɔ benɛ nyɛmi ko nɛ e kpa fiɛɛmi kɛ asafo mi kpe yami jeha nyɔngma a kpale kɛ ya Matsɛ Yemi Asa a nɔ ekohu ɔ. E de ke: “Benɛ i su Matsɛ Yemi Asa a nɔ ɔ, nyɛmimɛ ɔmɛ kɛ bua jɔmi nga mi nɛ a ta ye dɛ.” (Níts. 3:19) Kɛ mi mi jɔmi nɛ ɔ nɛ nyɛmimɛ ɔmɛ je kpo kɛ tsɔɔ lɛ ɔ ná e nɔ he wami ha kɛɛ? E de ke, “I nu he kaa Yehowa nitsɛ lɛ ngɛ mi ye buae konɛ ma ná bua jɔmi ekohu.” Ke wa bɔ mɔde kaa wa maa wo nihi tsuo he wami ɔ, Kristo ma nyɛ maa gu wa nɔ kɛ ha nɛ nihi nɛ a ‘tloo tlomi nɛ e ngɛ mɛ gbee ɔ’ a he mi nɛ jɔ mɛ.—Mat. 11:​28, 29.

15. Mɛni ji nɔ́ kpa ko nɛ wa ma nyɛ maa pee konɛ kake peemi nɛ ya nɔ nɛ e hi wa kpɛti? (Hyɛ foni ɔ hulɔ.)

¹⁵ Nɔ́ kpa ko nɛ wa ma nyɛ maa pee kɛ ha nɛ kake peemi nɛ ya nɔ nɛ e hi wa kpɛti ji kaa wa maa hyɛ wa munyu tutui saminya. Hiob 12:11 ɔ de ke: “Tue lɛ a kɛ buɔ munyu tue saminya konɛ a kɛ le nɔ́ nɛ hi kɛ nɔ́ nɛ hí kaa bɔ nɛ a kɛ lilɛ hu saa niye ní nya hyɛɔ ɔ.” Kaa bɔ nɛ ke nɔ ko ngɛ ní hooe ɔ, e saa e nya nɛ e hyɛɔ kaa niye ní ɔ ngɔɔ loko e gbaa kɛ haa nihi ɔ, wɔ hu e sa nɛ wa susu níhi nɛ wa suɔ nɛ wa de ɔ he loko wa de. (La 141:3) E sa nɛ wa kɛ pee oti kaa nɔ́ fɛɛ nɔ́ ko nɛ maa je wa nya a nɛ pee nɔ́ nɛ maa wo nɔ he wami, nɛ e maa fia nɔ kɛ ma si “konɛ e he nɛ ba se nami kɛ ha nihi nɛ a nuɔ ɔ.”—Efe. 4:29.

16. Mɛnɔmɛ titli nɛ e sa kaa a ngɔ a munyu tutui kɛ wo ni kpahi he wami?

¹⁶ E sa nɛ hunomɛ kɛ fɔli titli nɛ a bɔ mɔde kaa a maa ngɔ a munyu tutui kɛ wo ni kpahi he wami. (Kol. 3:​19, 21; Tito 2:4) E sa nɛ asafo mi nikɔtɔma amɛ hu nɛ a ha nɛ Yehowa jijɔ ɔmɛ a he mi nɛ jɔ mɛ, nɛ a wo a bua. (Yes. 32:​1, 2; Gal. 6:1) Abɛ ko nɛ ngɛ Baiblo ɔ mi ɔ de ke: “Munyu nɛ a tuɔ ngɛ be nɛ sa mi ɔ—hyɛ bɔ nɛ e hi ha!”—Abɛ 15:23.

MOO SUƆ NIHI “NGƐ NÍ PEEPEE KƐ ANƆKUALE MI”

17. Mɛni maa ye bua wɔ konɛ waa je wa tsui mi kɛ je suɔmi kpo kɛ tsɔɔ wa nyɛmimɛ ɔmɛ?

¹⁷ Bɔfo Yohane wo wɔ he wami kaa wa ko “suɔ nɔmlɔ ngɛ munyu tutui mi aloo ngɛ lilɛ nɔ, mohu ɔ, ngɛ ní peepee kɛ anɔkuale mi.” (1 Yoh. 3:18) Wa suɔ nɛ waa je wa tsui mi kɛ je suɔmi kpo kɛ tsɔɔ wa nyɛmimɛ ɔmɛ. Mɛni ma nyɛ maa ye bua wɔ konɛ wa nyɛ nɛ waa pee jã? Ke wa ná be kɛ ha wa nyɛmimɛ ɔmɛ nɛ waa kɛ mɛ bɔɔ ɔ, lɔ ɔ ma ha nɛ waa hɛ kɛ su wa sibi a he wawɛɛ nɛ suɔmi nɛ wa ngɛ kɛ ha wa sibi ɔ mi maa wa. Enɛ ɔ he ɔ, ke o ya asafo mi kpe loo nyɛ ngɛ fiɛɛmi mi ɔ, moo ngɔ jamɛ a he blɔ ɔ konɛ o kɛ ni kpahi nɛ bɔ. Mo ná be nɛ o ya slaa nihi. Ke wa pee jã a, lɔ ɔ tsɔɔ kaa waa kɛ nɔ́ nɛ ‘Mawu ngɛ wɔ tsɔɔe kaa waa suɔ wa sibi’ ɔ ngɛ ní tsue. (1 Tɛs. 4:9) Nɛ enɛ ɔ ma ha nɛ wɔ nitsɛmɛ waa na kaa ‘e hi nɛ e ngɛ fɛu kaa nyɛmimɛ maa hi si ngɛ kake peemi mi!’—La 133:1.