NÍ KASEMI 15
LA 30 Ye Tsɛ, Ye Mawu, Kɛ Ye Huɛ
‘E Hi Kaa Wa Maa Hɛ Kɛ Su Mawu He!’
“Se imi lɛɛ, e hi ha mi kaa ma hɛ kɛ su Mawu he.”—LA 73:28.
OTI NƐ NGƐ NÍ KASEMI Ɔ MI
Wa maa na nɔ́ nɛ wa maa pee konɛ huɛ bɔmi gbagbanii nɛ hi waa kɛ Yehowa wa kpɛti, kɛ bɔ nɛ wa ma ná he se ha.
1-2. (a) Mɛni wa ma nyɛ maa pee konɛ huɛ bɔmi gbagbanii nɛ hi waa kɛ nɔ ko wa kpɛti? (b) Mɛni he wa ma susu ngɛ ní kasemi nɛ ɔ mi?
ANƐ o ngɛ huɛ ko nɛ nyu bi ngɛ o kɛ lɛ nyɛ kpɛti lo? Mɛni lɛ ha nɛ nyɛ ba pee huɛmɛ ɔ? Eko ɔ, nyɛ ná be kɛ ha nyɛ sibi, nɛ nyɛ de nyɛ sibi nyagbahi nɛ nyɛɛ kɛ kpeɔ. Jehanɛ hu ɔ, nyɛ de nyɛ sibi níhi nɛ nyɛ suɔ kɛ níhi nɛ nyɛ sume. Enɛ ɔ ha nɛ o ba yɔse kaa o huɛ ɔ ngɛ su komɛ nɛ sa kadimi wawɛɛ, nɛ o suɔ nɛ o kase lɛ. Lɔ ɔ ha nɛ nyɛ huɛ bɔmi ɔ mi ba wa.
2 Loko huɛ bɔmi kpakpa maa hi o kɛ nɔ ko nyɛ kpɛti ɔ, e biɔ be kɛ mɔde bɔmi wawɛɛ. Jã kɛ̃ nɛ e ji ngɛ Yehowa Mawu nɛ waa kɛ lɛ maa pee huɛ ɔ hu blɔ fa mi. Enɛ ɔ he ɔ, ngɛ ní kasemi nɛ ɔ mi ɔ, wa maa na nɔ́ nɛ maa ye bua wɔ konɛ huɛ bɔmi kpakpa nɛ hi waa kɛ Mawu wa kpɛti kɛ bɔ nɛ wa ma ná he se ha. Se kekleekle ɔ, nyɛ ha nɛ waa hyɛ nɔ́ he je nɛ e hi wawɛɛ kaa wa maa hɛ kɛ su Yehowa nɛ ji wa Huɛ nɛ se be ɔ he ɔ.
3. Mɛni he je nɛ e he hia nɛ wa pue wa yi mi tɛ ngɛ se nɛ wa ma ná ke wa hɛ kɛ su Yehowa he ɔ he? Mo ha enɛ ɔ he nɔ hyɛmi nɔ́.
3 E ngɛ heii kaa o yɔse kaa se nami ngɛ he kaa o maa hɛ kɛ su Yehowa he. Se ke o pue o yi mi tɛ ngɛ se nami nɛ ngɛ jã nɛ o maa pee ɔ he ɔ, e maa wo mo he wami konɛ o ya nɔ nɛ o hɛ kɛ su Yehowa he. (La 63:6-8) Kaa nɔ hyɛmi nɔ́ ɔ, wa le kaa ke wa yeɔ niye ní kpakpa, wa gbɔleɔ wa kpɔ mi, wa jɔɔ wa he, nɛ wa nuɔ nyu bɔ nɛ sa a, wa ma ná he se. Se kɛ̃ ɔ, nihi fuu kɛ a juɛmi mɛ ní nɛ ɔmɛ a peemi nɔ, nɛ enɛ ɔ ha nɛ a be nɔmlɔ tso mi he wami kpakpa. Se ke wa pɔɔ se nami nɛ ngɛ ní nɛ ɔmɛ nɛ wa maa pee ɔ a he susumi ɔ, lɔ ɔ ma nyɛ maa wo wɔ he wami konɛ waa ya nɔ nɛ waa pee jã. Jã kɛ̃ nɛ e ji ngɛ Yehowa nɛ wa maa hɛ kɛ su e he ɔ hu blɔ fa mi. Ke wa pue wa yi mi tɛ ngɛ se nɛ wa ma ná ke wa hɛ kɛ su Yehowa he ɔ he ɔ, lɔ ɔ maa ye bua wɔ konɛ huɛ bɔmi gbagbanii nɛ hi waa kɛ lɛ wa kpɛti.—La 119:27-30.
4. Mɛni nɛ nɔ nɛ ngma La 73:28 ɔ de?
4 Kane La 73:28. Nɔ nɛ ngma La 73 ɔ ji Levino nɛ́ a hla lɛ kaa la polɔ ngɛ Yehowa sɔlemi we ɔ. Eko ɔ, la polɔ nɛ ɔ kɛ jehahi babauu sɔmɔ Yehowa ngɛ anɔkuale mi. Se kɛ̃ ɔ, e na kaa e he hia nɛ e kɛ ni kpahi nɛ a hɛ kɛ su Mawu he. Enɛ ɔ he je nɛ e de ke e hi kaa a maa “hɛ kɛ su Mawu he” ɔ nɛ. Ke wa hɛ kɛ su Yehowa he ɔ, mɛni se wa ma ná?
WA NÁA BUA JƆMI KE WA “HƐ KƐ SU MAWU HE”
5. (a) Mɛni he je nɛ ke wa hɛ kɛ su Yehowa he wawɛɛ ɔ, wa náa bua jɔmi ɔ? (b) Mɛni blɔ nɔ nɛ níhi nɛ Yehowa tsɔɔ mo ɔ yeɔ buaa mo nɛ e poɔ o he piɛ? (Abɛ 2:6-16)
5 Ke huɛ bɔmi gbagbanii ngɛ waa kɛ Yehowa wa kpɛti ɔ, wa ma ná bua jɔmi wawɛɛ. (La 65:4) Wa náa bua jɔmi nɛ ɔ ngɛ yi mi tomihi fuu a he je. Kaa nɔ hyɛmi nɔ́ ɔ, ke wa kaneɔ mlaahi nɛ Yehowa kɛ ha wɔ ngɛ Baiblo ɔ mi, nɛ waa kɛ tsuɔ ní ɔ, lɔ ɔ haa nɛ wa leɔ ní. Níhi nɛ Yehowa tsɔɔ wɔ ɔ poɔ wa he piɛ ngɛ níhi nɛ ma nyɛ maa ye wɔ awi ɔ he, nɛ wa yuɔ wa he ngɛ yayamihi nɛ hɛdɔ ngɛ a he ɔ he hulɔ. (Kane Abɛ 2:6-16.) Enɛ ɔ he je nɛ Baiblo ɔ de ke: “Nɔ nɛ e náa juɛmi, kɛ nɔ nɛ e náa nɔ́ se kɔmi ɔ ngɛ bua jɔmi” ɔ nɛ.—Abɛ 3:13.
6. Mɛni ha nɛ la polɔ ɔ ná we bua jɔmi hu ɔ?
6 Ngɛ anɔkuale mi ɔ, Yehowa huɛmɛ po haoɔ be komɛ. Benɛ nɔ nɛ ngma La 73 ɔ susu ní yayahi nɛ bɔle lɛ ɔ he ɔ, lɔ ɔ ha nɛ bua jɔmi nɛ e ngɛ ɔ nya ba si. E mi mi fu nɛ e hɛ kɔ̃ nihi nɛ a sɔmɔ we Yehowa a nɔ, ejakaa e susu kaa a ngɛ bua jɔmi nɛ a ye manye ngɛ si himi mi. E ná susumi nɛ dɛ kaa yiwutsotsɛmɛ kɛ nihi nɛ a woɔ a he nɔ ɔ náa ní, a ngɛ nɔmlɔ tso mi he wami kpakpa, nɛ a gbo we dengme ko kulaa. (La 73:3-7, 12) Enɛ ɔ ha nɛ la polɔ nɛ ɔ hao, nɛ e susu kaa se nami ko be he kaa e ma sɔmɔ Yehowa. E kɛ aywilɛho de ke: “Niinɛ, i ha nɛ ye tsui mi tsɔ yaka gu, nɛ i fɔ ye dɛ kɛ tsɔɔ kaa sane ko be ye he yaka gu.”—La 73:13.
7. Ke wa hao ɔ, mɛni wa ma nyɛ maa pee? (Hyɛ foni ɔ hulɔ.)
7 E ngɛ mi kaa la polɔ ɔ kɔni mi jɔ̃ mohu lɛɛ, se e pee nɔ́ ko. Nɔ́ nɛ e pee ɔ ye bua lɛ nɛ e tsake e susumi. E ya “sɛ Mawu jami he ngua a,” nɛ lejɛ ɔ nɛ Yehowa dla e susumi ngɛ. (La 73:17-19) Ke wa hao ɔ, Yehowa nɛ e ji wa Huɛ nɛ se be ɔ le. Ke wa sɔle ha lɛ kaa e ye bua wɔ, nɛ wa kplɛɛ yemi kɛ buami nɛ e kɛ ma ha wɔ kɛ gu e Munyu ɔ kɛ e we asafo ɔ nɔ ɔ, lɔ ɔ maa wo wɔ he wami nɛ waa ya nɔ nɛ wa fĩ si, nɛ wa sɔmɔ lɛ daa. Ke wa hao wawɛɛ po ɔ, wa le kaa Yehowa maa wo wa bua, nɛ e maa ye bua wɔ.—La 94:19.a
Levino ɔ nɛ e ngma La 73 ɔ nɛ e daa si ngɛ “Mawu jami he ngua a” (Hyɛ kuku 7)
KE WA “HƐ KƐ SU MAWU HE” Ɔ, WA MA NÁ SI HIMI KPAKPA AMLƆ NƐ Ɔ KƐ HWƆƆ SE
8. Ke wa hɛ kɛ su Mawu he ɔ, mɛni blɔ kpahi a nɔ nɛ wa náa he se?
8 Ke wa hɛ kɛ su Mawu he ɔ, wa náa he se ngɛ blɔ enyɔ kpa komɛ a nɔ hulɔ. Kekleekle ɔ, e ma ha nɛ wa ma ná si himi kpakpa amlɔ nɛ ɔ. Enyɔne ɔ, wa ma ná jɔɔmihi hwɔɔ se. (Yer. 29:11) Amlɔ nɛ ɔ, nyɛ ha nɛ wa susu se nami enyɔ nɛ ɔmɛ a he kɛ ya tsitsaa.
9. Mɛni blɔ nɔ nɛ ke wa hɛ kɛ su Yehowa he ɔ, e haa nɛ wa si himi peeɔ kpakpa?
9 Ke wa hɛ kɛ su Yehowa he ɔ, e haa nɛ wa si himi peeɔ kpakpa. Mwɔnɛ ɔ, nihi fuu he we yi kaa Mawu ngɛ. Enɛ ɔ he ɔ, a li nɔ́ he je nɛ adesahi ngɛ wami mi, nɛ a susu kaa hwɔɔ se ɔ, adesa ko be si hie hu. Se Mawu Munyu ɔ nɛ wa ba kase ɔ ha nɛ wa ná nɔ mi mami kaa Mawu ‘ngɛ, nɛ e ba peeɔ nihi nɛ a ngɛ e se blɔ hlae wawɛɛ ɔ a hiɔ wolɔ.’ (Heb. 11:6) Amlɔ nɛ ɔ po ɔ, wa bua jɔɔ ngɛ si himi mi, ejakaa wa ngɛ nɔ́ nɛ e sa kaa waa pee ɔ pee, nɛ ji kaa wa ngɛ wa hiɔwe Tsɛ nɛ ji Yehowa a sɔmɔe.—5 Mose 10:12, 13.
10. Ngɛ La 37:29 ɔ nya a, mɛni Yehowa wo si kaa e maa pee ha nihi nɛ a ngɔɔ a hɛ kɛ fɔɔ e nɔ ɔ?
10 Mwɔnɛ ɔ, nihi fuu be hɛnɔkami ko kɛ ha hwɔɔ se. Nɔ́ nɛ a suɔ nɛ a pee pɛ ji kaa a tsu ní, a sɛ gba si himi mi, a fɔ bimɛ nɛ a to nɔ́ ko si kɛ ha hwɔɔ se. A li kaa Mawu wo si kaa wa ma ná si himi kpakpa hwɔɔ se. Se Yehowa sɔmɔli lɛɛ a ngɔɔ a hɛ kɛ fɔɔ Yehowa nɔ. (La 25:3-5; 1 Tim. 6:17) Wa ngɛ hɛ kɛ nɔ fɔmi ngɛ wa Mawu nɛ ji wa Huɛ ɔ mi, nɛ wa le kaa e maa ye si nɛ e wo ɔ nɔ. Wa ngɛ ní kpakpahi fuu blɔ hyɛe hwɔɔ se, nɛ wa ngɛ nɔ mi mami kaa wa ma sɔmɔ Yehowa kɛ ya neneene ngɛ Paradeiso ɔ mi.—Kane La 37:29.
11. Ke wa hɛ kɛ su Mawu he ɔ, kɛ wa nuɔ he ha kɛɛ, nɛ kɛ Mawu hu nuɔ he ha kɛɛ?
11 Ke wa hɛ kɛ su Mawu he ɔ, wa náa he se ngɛ blɔ kpahi fuu a nɔ. Kaa nɔ hyɛmi nɔ́ ɔ, Yehowa wo si kaa e maa ngɔ yayami peeli nɛ a tsake a tsui nɛ a hɛ kɛ su e he ɔ a he yayami kɛ ke mɛ. (Yes. 1:18) Jã nɛ e peeɔ ɔ yeɔ buaa wɔ wawɛɛ nɛ wa he nile bui wɔ fɔ ngɛ yayamihi nɛ wa pee kɛ be ɔ a he. (La 32:1-5) Lɔ ɔ hu haa nɛ wa peeɔ nɔ́ fɛɛ nɔ́ nɛ wa ma nyɛ konɛ Yehowa bua nɛ jɔ. (Abɛ 23:15) Ngɛ anɔkuale mi ɔ, ke waa kɛ Yehowa pee huɛ ɔ, ní kpakpahi fuu ngɛ nɛ wa ma ná. Amlɔ nɛ ɔ, nyɛ ha nɛ waa hyɛ nɔ́ nɛ wa ma nyɛ maa pee konɛ waa ya nɔ nɛ waa hɛ kɛ su Yehowa he.
NƆ́ NƐ MAA YE BUA MO KONƐ O YA NƆ NƐ O “HƐ KƐ SU MAWU HE”
12. Mɛni o pee konɛ o nyɛ nɛ o hɛ kɛ su Mawu he wawɛɛ?
12 Ke o ji Kristofono nɛ a baptisi mo ɔ, lɛɛ lɔ ɔ tsɔɔ kaa o pee níhi fuu momo nɛ ha nɛ o hɛ kɛ su Yehowa he. O kase anɔkualehi fuu nɛ kɔɔ Yehowa Mawu kɛ Yesu Kristo a he, nɛ o tsake o tsui ngɛ yayamihi nɛ o pee kɛ be ɔ he, nɛ o ná hemi kɛ yemi nɛ mi wa ngɛ Mawu mi. Jehanɛ hu ɔ, o fia o pɛɛ si kaa o maa ba o je mi bɔ nɛ Mawu suɔ. E sa nɛ o ya nɔ nɛ o pee ní nɛ ɔmɛ konɛ huɛ bɔmi gbagbanii nɛ hi o kɛ Mawu nyɛ kpɛti be fɛɛ be.—Kol. 2:6.
13. Mɛni níhi etɛ ma nyɛ maa ye bua wɔ konɛ waa ya nɔ nɛ waa hɛ kɛ su Yehowa he?
13 Mɛni maa ye bua wɔ konɛ waa ya nɔ nɛ waa hɛ kɛ su Yehowa he? (1) E sa nɛ waa ya nɔ nɛ waa kase Baiblo ɔ. Ke wa ngɛ Baiblo ɔ kasee ɔ, pi Mawu he sisije tsɔɔmi ɔmɛ pɛ nɛ e sa kaa waa kase. Mohu ɔ, e sa nɛ waa bɔ mɔde nɛ waa nu bɔ nɛ Mawu susuɔ níhi a he ha a sisi, nɛ wa yɔse nɔ́ nɛ e suɔ kaa waa pee, nɛ waa ba wa je mi ngɛ nya. (Efe. 5:15-17) (2) E sa nɛ wa ha nɛ wa hemi kɛ yemi ɔ mi nɛ wa, kɛ gu ní kpakpahi nɛ Yehowa pee kɛ ha wɔ nɛ wa ma pue wa yi mi tɛ ngɛ he ɔ nɔ. (3) E sa nɛ waa ya nɔ nɛ waa hiɔ níhi nɛ Yehowa sume ɔ, nɛ waa kɛ nihi nɛ a peeɔ jamɛ a ní ɔmɛ ɔ nɛ ko bɔ.—La 1:1; 101:3.
14. Ngɛ 1 Korinto Bi 10:31 ɔ nya a, mɛni ji ní komɛ nɛ wa ma nyɛ maa pee daa ligbi konɛ waa sa Yehowa hɛ mi? (Hyɛ foni ɔmɛ hulɔ.)
14 Kane 1 Korinto Bi 10:31. E he hia nɛ waa pee níhi nɛ maa sa Yehowa hɛ mi. Enɛ ɔ biɔ babauu pe asafo mi kpe kɛ fiɛɛmi pɛ nɛ wa maa ya. E sa nɛ nɔ́ fɛɛ nɔ́ nɛ wa peeɔ ngɛ wa si himi mi daa ligbi ɔ nɛ sa Yehowa hɛ mi. Kaa nɔ hyɛmi nɔ́ ɔ, ke wa yeɔ anɔkuale ngɛ níhi tsuo a mi, nɛ wa haa ni kpahi níhi nɛ wa ngɛ ɔ eko ɔ, e haa nɛ Yehowa bua jɔɔ wawɛɛ. (2 Kor. 8:21; 9:7) Jehanɛ hu ɔ, Yehowa suɔ nɛ waa pee níhi nɛ maa tsɔɔ kaa wa ngɛ bumi kɛ ha wami nɛ e kɛ ha wɔ ɔ. Ke wa hyɛɔ wa ní yemi kɛ wa ní numi saminya, nɛ wa pee níhi nɛ ma ha nɛ wa ná nɔmlɔ tso mi he wami kpakpa a, wa maa hɛ kɛ su Mawu nɛ lɛ ji nɔ nɛ haa nɔ wami ɔ he wawɛɛ. Ke Yehowa na kaa wa ngɛ mɔde bɔe kaa wa maa pee e suɔmi nya ní ngɛ nɔ́ fɛɛ nɔ́ mi ɔ, suɔmi nɛ e ngɛ kɛ ha wɔ ɔ mi maa wa wawɛɛ.—Luka 16:10.
Ní komɛ nɛ wa ma nyɛ maa pee kɛ sa Yehowa hɛ mi ji, nɛ wa maa hɛɛ lɔle saminya, wa ma gbɔle wa kpɔ mi, wa maa hyɛ wa ní yemi kɛ wa ní numi saminya, nɛ waa pee nihi nibwɔ (Hyɛ kuku 14)
15. Kɛ Yehowa hyɛɔ blɔ kaa waa kɛ nihi nɛ hi si ha kɛɛ?
15 Yehowa jeɔ mi mi jɔmi kpo kɛ tsɔɔ nihi nɛ a sɔmɔɔ lɛ kɛ nihi nɛ a sɔmɔ we lɛ ɔ tsuo. (Mat. 5:45) Enɛ ɔ he ɔ, e suɔ nɛ wɔ hu wa je mi mi jɔmi kpo kɛ tsɔɔ nihi. Kaa nɔ hyɛmi nɔ́ ɔ, e sɛ nɛ waa ‘tu nɔ ko he munyu yayami, nɛ wa ko pee wa he nihi nɛ a suɔ pɛ, se mohu ɔ, wa he nɛ jɔ wawɛɛ kɛ ha nihi tsuo.’ (Tito 3:2) Enɛ ɔ he ɔ, ke nihi be hemi kɛ yemi ngɛ Yehowa mi po ɔ, wa susuu we kaa wa nɔ kuɔ pe mɛ. (2 Tim. 2:23-25) Ke wa jeɔ mi mi jɔmi kpo kɛ tsɔɔ nɔ fɛɛ nɔ ɔ, e maa ye bua wɔ konɛ waa hɛ kɛ su Yehowa he.
WA MA NYƐ MAA “HƐ KƐ SU MAWU HE” KE WA TƆ̃ PO
16. Benɛ nɔ nɛ po La 73 ɔ sɔmɔ Yehowa be komɛ a se ɔ, kɛ e nu he ha kɛɛ?
16 Be komɛ ɔ, eko ɔ, o maa nu he kaa o kɛ Yehowa nyɛ kpɛti kɛ ngɛ tɔmi ko nɛ o tɔ̃ ɔ he je. Nɔ́ ko kaa jã ba nɔ nɛ ngma La 73 ɔ nɔ. E de ke: “E piɛ nguɛ nya nɛ ye nane tla blɔ; e piɛ bɔɔ nɛ ye nane sane.” (La 73:2) E kplɛɛ nɔ kaa e “tsui hao,” nɛ e “susuu we nɔ́ he,” nɛ e “pee kaa lohwe nɛ be juɛmi” ngɛ Yehowa hɛ mi. (La 73:21, 22) Anɛ tɔmi nɛ e tɔ̃ ɔ ha nɛ e nu he kaa Yehowa sume lɛ, nɛ e kɛ e yayami ɔ be lɛ kee lo?
17. (a) Benɛ la polɔ ɔ hao wawɛɛ po ɔ, mɛni e pee? (b) Mɛni wa ma nyɛ maa kase ngɛ e sane ɔ mi? (Hyɛ foni ɔmɛ hulɔ.)
17 Ke la polɔ ɔ nu he kaa Yehowa kua lɛ po ɔ, eko ɔ, he numi nɛ ɔ se kɛ we. Be mi nɛ e hao wawɛɛ po ɔ, e le kaa e sa nɛ e hɛ kɛ su Yehowa he. Enɛ ɔ he ɔ, e ngma ke: “Se amlɔ nɛ ɔ, i kɛ mo [Yehowa] ngɛ daa; o pɛtɛ ye hiɔ nine he. O kɛ o ga womi ɔ tsɔɔ mi blɔ, nɛ pee se ɔ, o maa nyɛɛ ye hɛ mi kɛ ya hɛ mi nyami mi.” (La 73:23, 24) Ke wɔ hu wa nu he kaa wa hemi kɛ yemi ɔ mi ngɛ gbɔjɔe, loo tɔmi ko nɛ wa tɔ̃ ɔ ha nɛ wa kɔni mi jɔ̃ ɔ, e sa nɛ wa de Yehowa nɛ e wo wɔ he wami. (La 73:26; 94:18) Ke wa pee yayami nɛ hɛdɔ ngɛ he po ɔ, wa ma nyɛ maa kpale kɛ ba Yehowa ngɔ ekohu, nɛ́ wa ná nɔ mi mami kaa e ‘pee klaalo kaa e kɛ wa yayami ɔ maa ke’ wɔ. (La 86:5) Ke wa kɔni mi jɔ̃ ɔ, e he hia wawɛɛ kaa wa maa hɛ kɛ su Mawu he.—La 103:13, 14.
Ke wa gbɔjɔ ngɛ mumi mi ɔ, e sa nɛ waa hɛ kɛ su Yehowa he wawɛɛ, kɛ gu Mawu jami mi ní peepee nɛ waa kɛ wa he maa wo mi vii ɔ nɔ (Hyɛ kuku 17)
MOO “HƐ KƐ SU MAWU HE” KƐ YA DAA
18. Mɛni he je nɛ wa ma nyɛ maa hɛ kɛ su Yehowa he kɛ ya daa a?
18 Wa ma nyɛ maa hɛ kɛ su Yehowa he kɛ ya daa. Wa maa ya nɔ maa kase e he ní. Baiblo ɔ tsɔɔ kaa Yehowa blɔ ɔmɛ, e nile, kɛ e juɛmi ɔ, nɔ ko “be nyɛe maa nu kulaa sisi.”—Rom. 11:33.
19. Mɛni nɛ La womi ɔ ha nɛ wa le kɛ kɔ hwɔɔ se he?
19 La 79:13 ɔ de ke: “Wɔ nɛ wa ji o we bi kɛ to kuu nɛ ngɛ o lohwehi a ní yemi he ɔ maa na mo si kɛ ya neneene; nɛ wa maa jaje o yi jemi ɔ yi nɔhi tsuo.” Mo hu o ma nyɛ ma ná nɔ mi mami kaa ke o ya nɔ nɛ o hɛ kɛ su Yehowa he wawɛɛ ɔ, e maa jɔɔ mo kɛ ya daa. Ke e ba jã a, mo hu o kɛ nɔ mi mami ma de ke: “Mawu ji tɛsa kɛ ha ye tsui, kɛ ye blɔ fa mi nɔ́ kɛ yaa neneene.”—La 73:26.
LA 32 Mo Fĩ Yehowa Se!
a Eko ɔ, e ma bi nɛ ni komɛ nɛ a haoɔ loo a yeɔ aywilɛho be kɛkɛɛ ɔ nɛ a ya na dɔkita nɛ e ye bua mɛ. Ke o ngɛ hlae nɛ o le babauu ɔ, hyɛ Blɛfo gbi Hwɔɔmi Mɔ, No. 1 2023 ɔ.