Yehowa Si We Wɔ Kɔkɔɔkɔ

1-2. (a) Mɛni he je nɛ ke waa kɛ haomihi ngɛ kpee ɔ, wa ma nyɛ ma de ke Yehowa si we wɔ kɔkɔɔkɔ ɔ? (b) Mɛni he wa ma susu ngɛ ní kasemi nɛ ɔ mi?

KE WAA kɛ haomihi nɛ nya wa ngɛ kpee ɔ, eko ɔ, wa maa nu he kaa nɔ́ nɛ wa laa ngɛ hue tso kpii ko mi, nɛ wa li he nɛ wa maa gu. Se kɛ̃ ɔ, ke waa kɛ kahi ngɛ kpee ɔ, Yehowa piɛɛɔ wa he. Pi nɛ wa hiɔwe Tsɛ ɔ naa si fɔfɔɛ nɛ wa ngɛ mi gblee ɔ pɛ, mohu ɔ, e wo si kaa e maa ye bua wɔ konɛ wa nyɛ nɛ waa da nya. Yehowa je suɔmi mi nɛ e wo si ke: “Ma ye bua mo.”—Yes. 41:10.

² Ngɛ ní kasemi nɛ ɔ mi ɔ, wa ma susu níhi eywiɛ nɛ Yehowa peeɔ kɛ yeɔ buaa wɔ ɔ he. (1) E tsɔɔ wɔ blɔ. (2) E haa wɔ wa hiami níhi. (3) E poɔ wa he piɛ, kɛ (4) e woɔ wa bua. Yehowa haa wɔ nɔ mi mami kaa ke waa kɛ haomihi ngɛ kpee po ɔ, e hɛ be wa nɔ jee gblegbleegble, nɛ e be wɔ kuae hulɔ. Ngɛ anɔkuale mi ɔ, Yehowa si we wɔ kɔkɔɔkɔ.

YEHOWA TSƆƆ WƆ BLƆ

3-4. Mɛni Yehowa peeɔ kɛ tsɔɔ wɔ blɔ? (La 48:14)

³ Kane La 48:14. Yehowa le kaa e sa nɛ e tsɔɔ wɔ blɔ, ejakaa e le kaa wɔ nitsɛmɛ wa be nyɛe maa pee jã. Mɛni blɔ nɔ Yehowa guɔ kɛ tsɔɔ e sɔmɔli anɔkualetsɛmɛ blɔ mwɔnɛ ɔ? Blɔ kake nɔ nɛ e guɔ kɛ peeɔ jã ji Baiblo ɔ nɛ e kɛ ha wɔ ɔ. (La 119:105) Yehowa ha wɔ Baiblo ɔ konɛ e ye bua wɔ nɛ waa mwɔ yi mi kpɔhi nɛ da, waa pee wa ní kaa lɛ, nɛ wa susu níhi a he kaa bɔ nɛ e susuɔ níhi a he ɔ. Ke waa kɛ níhi nɛ e tsɔɔ wɔ ngɛ Baiblo ɔ mi ɔ tsuɔ ní ɔ, wa ma ná bua jɔmi amlɔ nɛ ɔ, nɛ wa maa hi si kɛ ya neneene.a Kaa nɔ hyɛmi nɔ́ ɔ, e tsɔɔ wɔ kaa ke wa nyɛmimɛ ɔmɛ tɔ̃ wa nɔ ɔ, waa ngmɛɛ abofu ɔ he nɛ wa kɛ ke mɛ, waa ye anɔkuale ngɛ nɔ́ fɛɛ nɔ́ mi, nɛ waa je wa tsui mi nɛ waa suɔ wa nyɛmimɛ ɔmɛ wawɛɛ. (La 37:8; Heb. 13:18; 1 Pet. 1:22) Ke wa jeɔ su nɛ ɔmɛ kpo ɔ, wa ba peeɔ fɔli, huɛmɛ, kɛ hunomɛ loo yigbayi kpakpahi.

⁴ Jehanɛ hu ɔ, Yehowa ha nɛ a ngma nihi nɛ mɛ hu a kɛ kahi kpe ɔ a he sane kɛ wo Baiblo ɔ mi. Mɛ hu a nu he kaa bɔ nɛ wa nuɔ he ɔ nɔuu. (1 Kor. 10:13; Yak. 5:17) Ke wa kane nihi kaa jã a, a he sane, nɛ waa kɛ níhi nɛ wa kase ngɛ a sane ɔ mi ɔ tsu ní ɔ, ke e hí kulaa a, wa ma ná he se ngɛ blɔ enyɔ nɔ. Kekleekle ɔ, e ma ha nɛ waa na kaa tsa pi wɔ pɛ nɛ waa kɛ si fɔfɔɛhi kaa jã a ngɛ kpee. Ni kpahi hu kɛ kpe nɛ Yehowa ye bua mɛ nɛ a nyɛ nɛ a da nya. (1 Pet. 5:9) Enyɔne ɔ, e maa ye bua wɔ konɛ waa le bɔ nɛ wa ma plɛ kɛ da wa nyagba amɛ a nya ha.—Rom. 15:4.

5. Mɛnɔmɛ a nɔ nɛ Yehowa guɔ kɛ tsɔɔ wɔ blɔ?

⁵ Jehanɛ hu ɔ, Yehowa to blɔ nya konɛ wa nyɛmimɛ ɔmɛ nɛ a tsɔɔ wɔ blɔ.b Kaa nɔ hyɛmi nɔ́ ɔ, kpɔ mi nɔ hyɛli ya slaa asafohi nɛ a woɔ nyɛmimɛ ɔmɛ he wami be fɛɛ be. Munyuhi nɛ a tuɔ ɔ woɔ wa hemi kɛ yemi ɔ mi he wami, nɛ e haa nɛ wa baa kake peemi nɛ se be nɛ ngɛ wa kpɛti ɔ yi. (Níts. 15:40–16:5) Asafo mi nikɔtɔma amɛ hu susuɔ nyɛmimɛ ɔmɛ a ti nɔ fɛɛ nɔ he wawɛɛ. (1 Pet. 5:​2, 3) Fɔli yeɔ buaa a bimɛ ɔmɛ konɛ a ná suɔmi kɛ ha Yehowa, nɛ a le bɔ nɛ a maa mwɔ yi mi kpɔhi nɛ nile ngɛ mi ha, nɛ a ba a je mi saminya. (Abɛ 22:6) Nyɛmimɛ yihi nɛ a nane pi si ɔ hu peeɔ nɔ hyɛmi nɔ́ kpakpa kɛ haa yihewi, nɛ a woɔ mɛ ga, nɛ a jeɔ mi mi jɔmi mi kɛ woɔ mɛ he wami.—Tito 2:​3-5.

6. Mɛni e sa kaa waa pee konɛ wa ná ga womi nɛ Yehowa kɛ haa wɔ ɔ he se?

⁶ Yehowa ha wɔ blɔ tsɔɔmihi nɛ wa hia a bɔ nɛ pee nɛ wa nyɛ nɛ waa mwɔ yi mi kpɔhi nɛ da, nɛ wa ná bua jɔmi. Mɛni wa ma nyɛ maa pee kɛ tsɔɔ kaa wa bua jɔ nɔ́ nɛ e pee kɛ ha wɔ ɔ he? Abɛ 3:​5, 6 de ke: “Ngɔɔ o hɛ kɛ fɔ Yehowa nɔ kɛ o tsui tsuo, nɛ koo ngɔ o hɛ kɛ fɔ mo nitsɛ o nɔ́ sisi numi nɔ.” Ke wa pee jã a, “e ma ha nɛ [wa] blɔ ɔmɛ maa da tlɔmɔɔ,” nɛ tsɔɔ kaa e maa ye bua wɔ konɛ waa yu wa he ngɛ nyagbahi fuu a he, nɛ wa bua nɛ jɔ. Ngɛ anɔkuale mi ɔ, wa bua jɔ kaa Yehowa haa wɔ ga womihi nɛ wa ti nɔ fɛɛ nɔ hia a!—La 32:8.

YEHOWA HAA WƆ WA HIAMI NÍHI

7. Mɛni ji blɔ komɛ a nɔ nɛ Yehowa guɔ kɛ haa wɔ wa hiami níhi? (Filipi Bi 4:19)

⁷ Kane Filipi Bi 4:19. Pi blɔ tsɔɔmi pɛ nɛ Yehowa kɛ haa wɔ. E yeɔ buaa wɔ nɛ wa náa niye ní, tade, kɛ hwɔ he hulɔ. (Mat. 6:33; 2 Tɛs. 3:12) Tɔmi ko be he kaa wa maa hao ngɛ he lo nya níhi a he, se kɛ̃ ɔ, Yehowa woɔ wɔ he wami kaa wa ko ye tsui tsɔ ngɛ ní nɛ ɔmɛ a he. (Hyɛ study note nɛ ngɛ Mateo 6:25 ɔ, nwtsty.) Mɛni he je? Ejakaa wa hiɔwe Tsɛ ɔ be e sɔmɔli nɛ a yeɔ lɛ anɔkuale ɔ sie ngɛ haomi behi a mi kɔkɔɔkɔ. (Mat. 6:8; Heb. 13:5) Enɛ ɔ he ɔ, ke Yehowa de wɔ kaa e ma ha wɔ wa hiami níhi ɔ, wa ma nyɛ ma ná nɔ mi mami kaa e maa pee jã.

8. Mɛni Yehowa pee ha David?

⁸ Mo susu bɔ nɛ Yehowa plɛ kɛ ye bua David ha a he nɛ o hyɛ. Benɛ David ngɛ fo tue kɛ je Matsɛ Saul nya a, e kɛ si fɔfɔɛhi nɛ a mi wa kpe, se Yehowa ha e kɛ e tabuli ɔmɛ nɔ́ nɛ a hia konɛ a nyɛ nɛ a hi wami mi. Benɛ David susu nɔ́ nɛ Yehowa pee kɛ ye bua lɛ ngɛ jamɛ a be ɔ mi ɔ he ɔ, e ngma ke: “Kɛ je ye nihe mi kɛ ba si ye bwɔmi si nɛ ɔ, i nɛ kaa Mawu kua dalɔ ko gblee, nɛ e bimɛ hu, i nɛ kaa a ngɛ niye ní bae.” (La 37:25) Eko ɔ, ngɛ o si himi mi tsuo ɔ, o na odasehi nɛ tsɔɔ kaa Yehowa jeɔ suɔmi mi kɛ haa e sɔmɔli nɛ a yeɔ lɛ anɔkuale ɔ a hiami níhi.

9. Mwɔnɛ ɔ, ke oslaa ko ba a, mɛni blɔ nɔ nɛ Yehowa guɔ kɛ yeɔ buaa e we bi? (Hyɛ foni ɔmɛ hulɔ.)

⁹ Yehowa haa e we bi a hiami níhi ngɛ oslaa behi a mi hulɔ. Kaa nɔ hyɛmi nɔ́ ɔ, benɛ hwɔ ba ngɛ kaseli ɔmɛ a be ɔ mi ɔ, Kristofohi nɛ a je ma ekpaekpahi a nɔ ɔ ngɔ níhi kɛ mane a nyɛmimɛ nɛ a hia yemi kɛ buami ɔ. (Níts. 11:​27-30; Rom. 15:​25, 26) Mwɔnɛ ɔ hu ɔ, ke oslaa ko ba a, Yehowa jeɔ suɔmi mi nɛ e guɔ wa nyɛmimɛ ɔmɛ a nɔ kɛ haa nihi nɛ a ngɛ he nɛ oslaa a ba ngɛ ɔ ní komɛ kaa niye ní, nyu, tadehi, kɛ tsopahi. Nihi nɛ a maa asafo ɔ tsuhi ɔ dlaa nyɛmimɛ ɔmɛ a wehi, kɛ Matsɛ Yemi Asahi nɛ a puɛ ɔ. Jehanɛ hu ɔ, Yehowa sɔmɔli woɔ nihi nɛ a suɔli gbo loo a wehi a hɛ mi kpata a bua, nɛ a woɔ mɛ he wami oya nɔuu.c

10-11. Mɛni o kase ngɛ Borys níhi a si kpami ɔ mi?

¹⁰ Yehowa haa nihi nɛ a sɔmɔ we lɛ ɔ hu a hiami níhi faa. Wɔ hu wa kaseɔ Yehowa, nɛ wa hyɛɔ blɔhi a nɔ nɛ wa ma nyɛ maa gu kɛ je mi mi jɔmi kpo kɛ tsɔɔ nihi nɛ a be anɔkuale ɔ mi ɔ. (Gal. 6:10) Enɛ ɔ haa nɛ wa nyɛɔ nɛ wa yeɔ buaa nihi nɛ a ba leɔ nihi nɛ wa ji, nɛ a kaseɔ Yehowa he ní. Nyɛ ha nɛ wa susu Borys nɛ e hyɛɛ sukuu ko nɔ ngɛ Ukraine ɔ he nɛ waa hyɛ. E ngɛ mi kaa tsa pi Yehowa Odasefono ji lɛ mohu lɛɛ, se e jeɔ mi mi jɔmi kpo kɛ tsɔɔ e sukuu bimɛ nɛ a ji Yehowa Odasefohi ɔ, nɛ e ngɛ bumi kɛ ha mɛ hulɔ. Benɛ ta ba he nɛ Borys ngɛ ɔ, nɛ e he ba hia nɛ e je lejɛ ɔ kɛ ya he ko nɛ ngɛ slɔkee ngɛ ma a mi ɔ, nyɛmimɛ ɔmɛ ye bua lɛ. Pee se ɔ, Borys ya Kristo gbenɔ Kaimi ɔ. Benɛ e susu bɔ nɛ nyɛmimɛ ɔmɛ ye bua lɛ ha a he ɔ, e de ke: “Odasefo ɔmɛ je mi mi jɔmi kpo kɛ tsɔɔ mi wawɛɛ, nɛ a ye bua mi. Ye bua jɔ nɔ́ nɛ Yehowa Odasefo ɔmɛ pee ha mi ɔ he wawɛɛ.”

¹¹ Wɔ hu wa ma nyɛ maa kase wa hiɔwe Tsɛ nɛ e naa nɔ mɔbɔ ɔ, kɛ gu suɔmi kpo nɛ wa ma je kɛ tsɔɔ ni kpahi kɛ a hiami níhi nɛ wa ma ha mɛ ɔ nɔ, a ngɛ Yehowa sɔmɔe jio, a sɔmɔ we lɛ jio. (Luka 6:​31, 36) Wa ngɛ nɔ mi mami kaa ke wa bɔ mɔde nɛ wa je suɔmi kpo kɛ tsɔɔ nihi ɔ, lɔ ɔ maa wo mɛ he wami konɛ a ba pee Kristo kaseli. (1 Pet. 2:12) Se ke a ba pee Kristo kaseli jio, a ba pee we Kristo kaseli jio, wa bua maa jɔ wawɛɛ, ejakaa “bua jɔmi babauu ngɛ nɔ́ hami mi.”—Nít 20:35.

YEHOWA POƆ WA HE PIƐ

12. Mɛni Yehowa wo si kaa e maa pee ha e we bi tsuo? (La 91:​1, 2, 14)

¹² Kane La 91:​1, 2, 14. Mwɔnɛ ɔ, Yehowa wo si kaa e maa po wa he piɛ ngɛ nɔ́ fɛɛ nɔ́ nɛ ma nyɛ ma puɛ huɛ bɔmi nɛ ngɛ waa kɛ lɛ wa kpɛti ɔ he. E be hae nɛ Satan nɛ wo anɔkuale jami he mu kɔkɔɔkɔ. (Yoh. 17:15) Wa ma nyɛ ma ná nɔ mi mami nɛ mi wa kaa ke “amanehlu ngua” a je sisi ɔ, Yehowa maa ye si nɛ e wo kaa e maa po wa he piɛ ɔ nɔ, nɛ e maa ye bua wɔ konɛ wa hemi kɛ yemi ɔ mi nɛ wa hulɔ.—Kpoj. 7:​9, 14.

13. Mɛni blɔhi a nɔ nɛ Yehowa guɔ kɛ poɔ wa kpɛti nɔ fɛɛ nɔ he piɛ?

¹³ Mɛni blɔ nɔ nɛ Yehowa guɔ kɛ poɔ wa kpɛti nɔ fɛɛ nɔ he piɛ? E guɔ Baiblo ɔ nɔ kɛ yeɔ buaa wɔ konɛ waa le nɔ́ nɛ da kɛ nɔ́ nɛ dɛ. (Heb. 5:14) Ke waa kɛ sisi tomi mlaahi nɛ ngɛ Mawu Munyu ɔ mi ɔ tsuɔ ní ɔ, wa poɔ huɛ bɔmi nɛ ngɛ waa kɛ Yehowa wa kpɛti ɔ he piɛ, wa mwɔɔ yi mi kpɔhi nɛ ma ha nɛ wa bua nɛ jɔ ngɛ si himi mi, nɛ waa hi slɔkee. (La 91:4) Jehanɛ se hu ɔ, Yehowa guɔ e we asafo ɔ nɔ kɛ poɔ wa he piɛ. (Yes. 32:​1, 2) Wa nyɛmimɛ ɔmɛ ngɛ asafo ɔ mi ɔ suɔ Yehowa nɛ a buɔ lɛ tue. Enɛ ɔ he ɔ, ke waa kɛ mɛ bɔɔ ngɛ asafo mi kpehi a sisi kɛ fiɛɛmi mi, nɛ waa kɛ mɛ jeɔ wa hɛja a, lɔ ɔ maa ye bua wɔ konɛ waa yu wa he ngɛ yayami he.—Abɛ 13:20.

14. (a) Mɛni he je nɛ Mawu pui wa he piɛ ngɛ kahi tsuo a he ɔ? (b) Mɛni nɔ mi mami nɛ La 9:10 haa nɛ wa náa? (Hyɛ sisi ningma a hulɔ.)

¹⁴ Blema a, Yehowa po e we bi a he piɛ ngɛ oslaahi a he. Se pi be fɛɛ be nɛ e peeɔ jã. Be komɛ ɔ, ‘níhi nɛ wa hyɛ we blɔ’ ɔ baa wa nɔ. (Fiɛɛ. 9:11) Jehanɛ hu ɔ, Yehowa ngmɛ blɔ nɛ a wa e sɔmɔli ɔmɛ a kpɛti ni komɛ yi mi, nɛ a gbe mɛ po. E pee jã konɛ e kɛ ha nɛ nihi nɛ a na kaa Satan ji lakpatsɛ. (Hiob 2:​4-6; Mat. 23:34) Mwɔnɛ ɔ hu ɔ, Yehowa ma nyɛ maa ngmɛ blɔ konɛ níhi kaa jã a nɛ ba wa nɔ. Eko ɔ, Yehowa be kahi nɛ waa kɛ kpeɔ ɔ jee kɛ je, se wa ma nyɛ ma ná nɔ mi mami kaa e be nihi nɛ e suɔ mɛ ɔ kuae kɔkɔɔkɔ.d—La 9:10.

YEHOWA WOƆ WA BUA

15. Ngɛ mɛni blɔ nɔ nɛ sɔlemi, Mawu Munyu ɔ, kɛ wa nyɛmimɛ Kristofo ɔmɛ woɔ wɔ he wami? (2 Korinto Bi 1:​3, 4)

¹⁵ Kane 2 Korinto Bi 1:​3, 4. Be komɛ ɔ, wa haoɔ, nɛ wa yeɔ tsui wawɛɛ. Eko ɔ, o kɛ si fɔfɔɛ ko nɛ mi wa ngɛ kpee amlɔ nɛ ɔ, nɛ e ha nɛ o ngɛ he nue kaa e piɛ mo pɛ. Anɛ nɔ ko ngɛ nɛ e nuɔ bɔ nɛ o ngɛ he nue ha a sisi lo? Ee, nɔ ko ngɛ. Lɛ ji Yehowa. Ke waa kɛ kahi ngɛ kpee ɔ, pi nɛ Yehowa nuɔ he kɛ haa wɔ pɛ kɛkɛ, mohu ɔ, e “woɔ wa bua ngɛ wa kahi tsuo a mi” hulɔ. Ngɛ mɛni blɔ nɔ? Ke wa sɔle wawɛɛ ha lɛ ɔ, e haa wɔ “Mawu tue mi jɔmi ɔ nɛ pã níhi a sisi numi tsuo ɔ.” (Filip. 4:​6, 7) Jehanɛ hu ɔ, ke wa kane e munyu ɔ ngɛ Baiblo ɔ mi ɔ, e woɔ wa bua. Ngɛ Baiblo ɔ mi ɔ, Yehowa tsɔɔ wɔ bɔ nɛ e suɔ wɔ ha, bɔ nɛ wa ma plɛ kɛ pee juɛmitsɛmɛ ha, nɛ e haa wɔ hɛnɔkami hulɔ. Jehanɛ hu ɔ, Yehowa guɔ wa nyɛmimɛ ɔmɛ nɛ waa kɛ mɛ bɔɔ, kɛ Baiblo ɔ nɛ wa kaseɔ ngɛ asafo mi kpehi a sisi ɔ nɔ kɛ woɔ wa bua.

16. Mɛni o kase ngɛ Nathan kɛ Priscilla a níhi a si kpami ɔ mi?

¹⁶ Bɔ nɛ pee nɛ waa na bɔ nɛ Yehowa woɔ wa bua nɛ e woɔ wɔ he wami kɛ guɔ e Munyu ɔ nɔ ɔ, nyɛ ha nɛ wa susu Nathan kɛ e yo Priscilla nɛ a ngɛ United States ɔ a nɔ hyɛmi nɔ́ ɔ he nɛ waa hyɛ. Jeha komɛ nɛ be ɔ, a ma a juɛmi nya si kaa a maa hia kɛ ya he nɛ fiɛɛli fuu a he hia ngɛ. Nathan de ke: “Wa ngɛ hemi kɛ yemi kaa Yehowa maa jɔɔ wa mɔde bɔmi ɔ nɔ.” Se benɛ a ya su he nɛ a ma sɔmɔ ngɛ ɔ, hiɔ ko fia mɛ ni enyɔ ɔmɛ tsuo tlukaa, nɛ a kɛ sika he nyagba hu kpe. Enɛ ɔ he ɔ, e he ba hia nɛ a kpale kɛ ho a ma a mi. Se benɛ a kpale kɛ ba a ma a mi po ɔ, loloolo ɔ, a nɛ lɛ gbɔjɔɔ ngɛ sika blɔ fa mi. Nathan de ke: “I li nɔ́ he je nɛ Mawu jɔɔ we wɔ kaa bɔ nɛ wa hyɛ blɔ ɔ. I susu po kaa eko ɔ, i pee yayami ko.” Se pee se ɔ, Nathan kɛ Priscilla ba yɔse kaa Mawu si we mɛ, mohu ɔ, e ye bua mɛ ngɛ si fɔfɔɛhi nɛ a kɛ kpe ɔ mi. Nathan tsa nɔ ke: “Benɛ waa kɛ si fɔfɔɛ nɛ ɔmɛ ngɛ kpee ɔ, Baiblo ɔ ba pee kaa huɛ ko nɛ e ngɛ nile, nɛ e woɔ wa bua, nɛ e tsɔɔ wɔ blɔ. Akɛnɛ wa ngɔɛ wa juɛmi kɛ mɛ nyagbahi nɛ waa kɛ ngɛ kpee ɔ nɔ, se mohu, wa ngɔ wa juɛmi kɛ ma bɔ nɛ Yehowa ye bua wɔ nɛ wa fĩ si ha a nɔ he je ɔ, lɔ ɔ ha nɛ wa ná nɔ mi mami kaa Yehowa maa ye bua wɔ hwɔɔ se.”

17. Kɛ nyɛmiyo ko nɛ a tsɛɛ lɛ ke Helga a plɛ kɛ ná bua womi ha kɛɛ? (Hyɛ foni ɔ hulɔ.)

¹⁷ Wa nyɛmimɛ ɔmɛ hu ma nyɛ maa pee ní komɛ kɛ wo wa bua. Ngɛ mɛni blɔ nɔ? Kaa nɔ hyɛmi nɔ́ ɔ, mo susu Helga nɛ e ngɛ Hungary ɔ he nɛ o hyɛ. Jehahi babauu nɛ be ɔ, e kɛ si fɔfɔɛ slɔɔtohi nɛ a mi wa kpe. Enɛ ɔ ha nɛ e hao, nɛ e susu kaa e he be se nami. Se benɛ e susu e si fɔfɔɛ ɔ he ɔ, e na kaa mamoo Yehowa wo e bua kɛ gu e we asafo ɔ nɔ. E ngma ke: “Ní tsumi nɛ i ngɛ tsue, ye bi ɔ nɛ e be he wami nɛ i ngɛ e nɔ hyɛe, kɛ nyagba kpahi nɛ i kɛ ngɛ kpee ɔ haa nɛ ye he wami nɔ gbɔɔ. Be fɛɛ be nɛ Yehowa maa na kaa ye he wami nɔ gbɔ ɔ, e woɔ mi he wami. Ngɛ jeha 30 nɛ be ɔ mi tsuo ɔ, Yehowa ye si nɛ e wo kaa e maa hyɛ ye nɔ ɔ nɔ daa ligbi. Behi fuu ɔ, e guɔ bua womi munyuhi nɛ nyɛmimɛ ɔmɛ tuɔ ɔ nɔ kɛ woɔ mi he wami. Be komɛ ɔ, a maneɔ mi sɛ gbi, loo kaadi, loo yi jemi munyu ko ngɛ be nɛ sa mi.”

18. Mɛni wa ma nyɛ maa pee kɛ wo ni kpahi a bua?

¹⁸ Wɔ hu wa ma nyɛ maa wo ni kpahi a bua kɛ tsɔɔ kaa wa ngɛ Mawu kasee. Mɛni blɔ nɔ wa ma nyɛ maa gu kɛ pee ja? Ke waa kɛ nihi nɛ a hao ɔ ngɛ munyu tue ɔ, wa ma nyɛ maa bu mɛ tue, nɛ waa tu bua womi munyuhi kɛ tsɔɔ mɛ, nɛ waa pee ní pɔtɛɛ komɛ kɛ ye bua mɛ. (Abɛ 3:27) Wa suɔ nɛ waa wo nihi tsuo nɛ a ngɛ nɔ́ nae ɔ a bua, nɛ nihi nɛ a sɔmɔ we Yehowa lolo ɔ po piɛɛ he. Ke nɔ ko nɛ ngɛ wa kpɔ ɔ mi ɔ hao loo e ngɛ tsui yee ɔ, wa ma nyɛ maa slaa lɛ nɛ waa bu lɛ tue, nɛ waa tu bua womi munyu ko nɛ ngɛ Baiblo ɔ mi ɔ kɛ tsɔɔ lɛ. Ke wa kase Yehowa nɛ ji “bua womi tsuo Mawu ɔ,” lɔ ɔ ma ha nɛ waa ye bua wa nyɛmimɛ ɔmɛ konɛ a fĩ si ngɛ kahi a mi. Se pi lɔ ɔ pɛ, e maa ye bua nihi nɛ a sɔmɔ we Yehowa a konɛ mɛ hu a ba kase Yehowa he ní.—Mat. 5:16.

YEHOWA MAA YE BUA MO BE FƐƐ BE

19. Mɛni Yehowa peeɔ kɛ haa wɔ, nɛ mɛni blɔ nɔ wa maa gu kɛ kase lɛ?

¹⁹ Yehowa susuɔ nihi tsuo nɛ a suɔ lɛ ɔ a he wawɛɛ nitsɛ. Ke wa ngɛ nɔ́ nae ɔ, e si we wɔ. Kaa bɔ nɛ fɔlɔ ko jeɔ suɔmi mi nɛ e hyɛɔ e bi ko nɔ ɔ, jã kɛ̃ nɛ Yehowa hu hyɛɔ e sɔmɔli anɔkualetsɛmɛ a nɔ. Ngɛ anɔkuale mi ɔ, e tsɔɔ wɔ blɔ, e haa wɔ wa hiami níhi, nɛ e woɔ wa bua. Ke wa yeɔ buaa ni kpahi nɛ a kɛ haomihi ngɛ kpee, nɛ wa woɔ mɛ he wami ɔ, lɔ ɔ tsɔɔ kaa wa ngɛ wa hiɔwe Tsɛ nɛ e ngɛ suɔmi ɔ kasee. E ngɛ mi kaa waa kɛ nyagbahi loo tsui yemi sanehi maa kpe mohu lɛɛ, se wa ma nyɛ ma ná nɔ mi mami kaa Yehowa be wɔ sie kɔkɔɔkɔ. E wo si ke: “Koo ye gbeye, ejakaa i kɛ mo ngɛ.” (Yes. 41:10) Si womi nɛ ɔ haa nɛ wa náa nɔ mi mami kaa Yehowa be wɔ kuae gblegbleegble!