Wa Kase Ní Kɛ Je Wa Tsɔɔlɔ Kpanaa a Ngɔ Wa Wami Be Tsuo

NƆ HYƐMI NƆ́ KPAKPA NƐ YE FƆLI ƆMƐ PEE

Ngɛ jeha 1957 ɔ mi ɔ, ye fɔli ɔmɛ hia kɛ je Italy kɛ ya Kindersley nɛ ngɛ Saskatchewan ngɛ Canada a. E kɛ we kulaa nɛ ye fɔli ɔmɛ ba kase anɔkuale ɔ, nɛ anɔkuale ɔ ba pee nɔ́ nɛ he hia pe kulaa ngɛ wa si himi mi. I kai kaa benɛ i wɛ ɔ, wa weku ɔ ngɔɔ be babauu kɛ yaa fiɛɛmi, nɛ be komɛ ɔ, i kɛ peeɔ plasee nɛ i deɔ ke, i tsu blɔ “gbali a wali” ní tsumi ɔ benɛ i ye jeha kpaanyɔ!

Ye fɔli ɔmɛ be nɔ́ ko tsɔ mohu lɛɛ, se a pee nɔ hyɛmi nɔ́ kpakpa, nɛ a kɛ a he sã afɔle kɛ tsu ní ha Yehowa. Kaa nɔ hyɛmi nɔ́ ɔ, ngɛ jeha 1963 ɔ mi ɔ, ye fɔli ɔmɛ jua a weto ní komɛ konɛ a ná sika kɛ ya mahi a kpɛti kpe ko nɛ a pee ngɛ Pasadena nɛ ngɛ California ngɛ U.S.A. Ngɛ jeha 1972 ɔ mi ɔ, wa hia blɔ maa pee si tomi 620 kɛ ya Trail nɛ ngɛ British Columbia ngɛ Canada konɛ wa ya fiɛɛ ngɛ hehi nɛ nihi tuɔ Italy gbi ɔ ngɛ ɔ. Ye papaa dlaa ní tsumi hehi. Benɛ e ná he blɔ kaa e maa ya e hɛ mi ngɛ ní tsumi ɔ mi konɛ e ná sika fuu ɔ, e ngmɛɛ he blɔ nɛ ɔ he konɛ e ngɔ e juɛmi kɛ ma Yehowa sɔmɔmi nɔ.

Ye bua jɔ wawɛɛ kaa ye fɔli ɔmɛ pee nɔ hyɛmi nɔ́ kpakpa kɛ ha i kɛ ye nyɛmimɛ etɛ ɔmɛ. Kekleekle tsɔsemi nɛ i ná ngɛ Yehowa sɔmɔmi mi ji nɔ hyɛmi nɔ́ kpakpa nɛ ye fɔli ɔmɛ pee kɛ ha mi ɔ, nɛ ye hɛ be nɔ jee gblegbleegble. E ye bua mi nɛ i na kaa, ke i ngɔ Matsɛ Yemi ɔ kɛ pee nɔ́ titli ngɛ ye si himi mi ɔ, Yehowa maa hyɛ ye nɔ.—Mat. 6:33.

BE NƐ I KƐ JE BE TSUO SƆMƆMI NÍ TSUMI Ɔ SISI

Ngɛ jeha 1980 ɔ mi ɔ, i kɛ Debbie sɛ gba si himi mi. Debbie ji yo nɛ e he ngɛ fɛu, nɛ e kɛ mumi mi otihi ma e hɛ mi. Wɔ ni enyɔ ɔmɛ tsuo wa suɔ nɛ waa kɛ wa he nɛ wo be tsuo sɔmɔmi ní tsumi ɔ mi. Enɛ ɔ he ɔ, benɛ wa sɛ gba si himi mi nyɔhiɔ etɛ se ɔ, Debbie je blɔ gbami ní tsumi ɔ sisi. Benɛ wa sɛ gba si himi mi jeha kake se ɔ, wa hia kɛ ho asafo nyafii ko mi ya. Fiɛɛli fuu a he hia ngɛ lejɛ ɔ, lɔ ɔ he ɔ, i ba piɛɛ Debbie he ngɛ blɔ gbami ní tsumi ɔ mi.

Se be bɔɔ se ɔ, wa kɔni mi ba jɔ̃, nɛ wa mwɔ wa yi mi kpɔ kaa wa maa je ma a mi. Se waa kɛ kpɔ mi nɔ hyɛlɔ ɔ sɛɛ he ní kekle. E kɛ wɔ tu munyu ngɛ suɔmi mi, se kɛ̃ ɔ, e de wɔ ke: “Nyɛ hu nyɛ piɛɛ he nɛ nyɛ kɔni mi jɔ̃ ɔ nɛ. Nyɛ ngɔ nyɛ juɛmi kɛ ma nyagbahi nɛ nyɛɛ kɛ ngɛ kpee ɔ nɔ tsɔ. Ke nyɛ ngɔ nyɛ juɛmi kɛ ma jɔɔmihi nɛ nyɛ ngɛ náe ɔ nɔ ɔ, nyɛ bua maa jɔ wawɛɛ.” Ga womi nɛ kpɔ mi nɔ hyɛlɔ ɔ kɛ ha wɔ ɔ ba ngɛ be nya. (La 141:5) Waa kɛ e ga womi ɔ tsu ní oya nɔuu, nɛ wa na kaa ní kpakpahi fuu ngɛ nɛ e sa kaa waa ngɔ wa juɛmi kɛ ma nɔ. Nihi fuu ngɛ asafo ɔ mi nɛ a suɔ kaa a maa pee babauu ha Yehowa. A kpɛti ni komɛ ji nihewi kɛ yihewi, kɛ nihi nɛ a hunomɛ aloo a yihi be asafo ɔ mi. Enɛ ɔ ji ní kasemi ngua kɛ ha wɔ. Wa kase kaa e sa nɛ waa ngɔ wa juɛmi kɛ ma ní kpakpahi a nɔ, nɛ waa mlɛ Yehowa konɛ e tsu si fɔfɔɛhi nɛ waa kɛ ngɛ kpee ɔ he ní. (Mika 7:7) Enɛ ɔ ha nɛ wa ná bua jɔmi ekohu, nɛ wa si fɔfɔɛ ɔ hu tsake.

Nyɛmimɛ nɛ a tsɔɔ wɔ ní ngɛ wa kekleekle blɔ gbali a sukuu nɛ wa ya a sɔmɔ ngɛ ma kpahi a nɔ hyɛ. A ngɔ foni komɛ kɛ tsɔɔ wɔ, nɛ a tu jɔɔmihi nɛ a ná kɛ nyagbahi nɛ a kɛ kpe benɛ a ngɛ sɔmɔe ngɛ ma kpahi a nɔ ɔ he munyu. Enɛ ɔ ha nɛ wa ná suɔmi kɛ ha ma se sane kpakpa fiɛɛmi ní tsumi ɔ. Lɔ ɔ he ɔ, waa kɛ pee oti kaa wa ma sɔmɔ kaa ma se sane kpakpa fiɛɛli.

Bɔ nɛ pee nɛ waa su oti nɛ ɔ he ɔ, wa hia kɛ ya Quebec kpokpa nɛ a tuɔ French ngɛ ɔ, ngɛ jeha 1984 ɔ mi. Kɛ je British Columbia kɛ yaa Quebec ɔ kɛmi maa su si tomi 2,485 kɛ se. Ngɛ anɔkuale mi ɔ, e he ba hia nɛ waa kase kusumi ehe kɛ gbi kpa. Jehanɛ hu ɔ, waa kɛ sika he nyagba kpe. E ba su be ko ɔ, ngmɔtsɛ ko ngmɛɔ wɔ blɔ nɛ wa ya kukuɔɔ anago ngɛ e ngmɔ nɔ loko wa náa wa nya ngma. Debbie ngɔɔ anago ɔ kɛ peeɔ niye ní slɔɔtoslɔɔtohi nɛ ngɔɔ wawɛɛ! Ngɛ nyagba nɛ ɔmɛ tsuo se ɔ, wa nyɛ nɛ wa fĩ si kɛ bua jɔmi. Enɛ ɔ ha nɛ wa na kaa Yehowa ngɛ wa nɔ hyɛe saminya.—La 64:10.

Ligbi ko ɔ, nɔ́ ko ya nɔ nɛ wa hyɛ we blɔ. A tsɛ wɔ ngɛ tɛlifoo nɔ, nɛ a de wɔ ke wa ba sɔmɔ ngɛ Canada Betel. E ngɛ mi kaa wa bua jɔ mohu lɛɛ, se pi lɔ ɔ nɛ wa ngɛ blɔ hyɛe ejakaa wa suɔ nɛ waa ya Gilead Sukuu ɔ eko. Se kɛ̃ ɔ, wa kplɛɛ nine fɔmi ɔ nɔ. Benɛ wa ya su Canada Betel ɔ, wa bi Nyɛminyumu Kenneth Little nɛ e ngɛ sɔmɔe kaa Asafo ɔ Ní Tsumi Kɔni Ajla Toli ɔmɛ a kpɛti nɔ kake ɔ ke: “Nɛ ke a fɔ wɔ nine kaa waa ya Gilead Sukuu ɔ hu nɛɛ?” E de wɔ ke: “Nyɛ ko pa hwonyu ɔ ngɛ fufui ɔ he. Ke be ɔ su ɔ, wa maa hyɛ bɔ nɛ wa maa pee lɛ ha.”

Otsi kake se ɔ, a fɔ i kɛ Debbie nine kaa waa ya Gilead Sukuu ɔ. Enɛ ɔ he ɔ, e he ba hia nɛ waa mwɔ yi mi kpɔ. Nyɛminyumu Little de wɔ ke: “Ke nyɛ hla kake nɛ nyɛ si kake po ɔ, hwɔɔ se ko ɔ, kaketsɛ ɔ hu ma jlo nyɛ. Ngɛ anɔkuale mi ɔ, Yehowa maa jɔɔ eko fɛɛ eko nɛ nyɛ maa hla a nɔ, ejakaa enyɔ ɔmɛ tsuo hi.” Wa kplɛɛ nɔ kaa wa maa ya Gilead Sukuu ɔ. Ngɛ wa si himi mi tsuo ɔ, wa na kaa nɔ́ nɛ Nyɛminyumu Little de wɔ ɔ ji anɔkuale. Ke nyɛmimɛ ɔmɛ a yi mi ngɛ mɛ pee enyɔɔnyɔ ngɛ sɔmɔmi he blɔ nɛ a maa hla a he ɔ, wɔ hu waa kɛ Nyɛminyumu Little munyu ɔ woɔ mɛ he wami.

WA SƆMƆ KAA MA SE SANE KPAKPA FIƐƐLI

Wa bua jɔ kaa wa piɛɛ nihi 24 nɛ a ya Gilead Sukuu nɛ to nɔ 83 ɔ a he. A pee sukuu nɛ ɔ ngɛ Brooklyn, ngɛ New York, ngɛ April 1987 ɔ mi. Nyɛminyumu Ulysses Glass kɛ Nyɛminyumu Jack Redford ji wa tsɔɔli titli. Benɛ wa ke hɛliɔ si ɔ, nyɔhiɔ enuɔ su momo. Wa gbe sukuu ɔ nya ngɛ September 6, 1987 ɔ mi, nɛ a ha nɛ waa kɛ John kɛ Marie Goode ya sɔmɔ ngɛ Haiti.

Kɛ je benɛ a fiee nyɛmimɛ nɛ a ya sɔmɔ kaa ma se sane kpakpa fiɛɛli ngɛ Haiti ngɛ jeha 1962 ɔ mi ɔ, a ha we nɛ nɔ ko nɛ ya sɔmɔ ngɛ lejɛ ɔ kaa ma se sane kpakpa fiɛɛlɔ hu. Benɛ wa gbe sukuu ɔ nya otsi etɛ se ɔ, wa ya sɔmɔ ngɛ asafo nyafii ko mi ngɛ Haiti yoku ɔmɛ a nɔ. Fiɛɛli 35 lɛ ngɛ asafo nɛ ɔ mi. I kɛ ye yo ɔ pɛ lɛ wa ngɛ we mi. Jamɛ a be ɔ mi ɔ, wa wɛ tsɔ, nɛ níhi fuu ngɛ nɛ kpaako wa maa kase. Ma mi bi ɔmɛ be nɔ́ ko kulaa, nɛ a kpɛti nihi fuu li ní kanemi hulɔ. Benɛ wa ngɛ lejɛ ɔ, nihi nɛ a ngɛ kpɔ ɔ mi ɔ peeɔ basabasa ngɛ ma kudɔmi sanehi a he je, ejakaa a ka kaa a ma je nɔ yelɔ ɔ ngɛ nɔ. Jehanɛ se hu ɔ, kɔɔhiɔ nɛ nya wa fiaa ngɛ ma a mi.

Wa kase níhi fuu ngɛ bɔ nɛ wa nyɛmimɛ nɛ a ngɛ Haiti ɔ kɛ bua jɔmi fĩ si ha a mi. Ngɛ nyagbahi nɛ a kpɛti nihi fuu kɛ ngɛ kpee tsuo se ɔ, a suɔ Yehowa, nɛ a ngɔɔ a he kɛ woɔ fiɛɛmi ní tsumi ɔ mi. Nyɛmiyo ko nɛ e wa ngɛ jeha mi nɛ e li ní kanemi ɔ kase ngmamihi maa pee 150 kɛ wo e yi mi. Níhi nɛ yaa nɔ daa ligbi ɔ ha nɛ wa na kaa Mawu Matsɛ Yemi ɔ pɛ lɛ ma nyɛ maa po adesahi a nyagbahi a se. Enɛ ɔ wo wɔ he wami nɛ waa kɛ wa he wo fiɛɛmi ní tsumi ɔ mi wawɛɛ. Benɛ wa na kaa nihi nɛ waa kɛ mɛ je Baiblo ɔ kasemi sisi kekleekle ɔ a kpɛti ni komɛ bɔni sɔmɔmi kaa daa blɔ gbali, blɔ gbali klɛdɛɛ kɛ asafo mi nikɔtɔmahi ɔ, wa bua jɔ wawɛɛ.

Benɛ wa ngɛ Haiti ɔ, waa kɛ niheyo ko nɛ a tsɛɛ lɛ ke Trevor nɛ e ngɛ Latter-Day Saints jami ɔ mi ɔ kpe. Be komɛ ɔ, wa náa he blɔ nɛ waa kɛ lɛ kaseɔ Baiblo ɔ. Jeha komɛ a se ɔ, ye nine su sɛ womi ko nɔ kɛ je Trevor ngɔ, nɛ i hyɛ we blɔ kulaa. E ngma ke: “A maa baptisi mi ngɛ kpe nɛ e be kɛe nɛ a maa pee ɔ sisi! I suɔ nɛ ma kpale kɛ ba Haiti nɛ ma ba sɔmɔ kaa blɔ gbalɔ klɛdɛɛ ngɛ kpɔ ɔ mi he nɛ jinɛ i fiɛɛɔ ngɛ kaa ma se sane kpakpa fiɛɛlɔ benɛ i ngɛ Latter-Day Saints jami ɔ mi ɔ.” Niinɛ hu ɔ, Trevor kɛ e yo ɔ ya sɔmɔ kaa blɔ gbali klɛdɛɛ ngɛ lejɛ ɔ jehahi babauu.

WA YA SƆMƆ NGƐ EUROPE—LƆ Ɔ SE Ɔ, AFRIKA

A ha nɛ wa ya fiɛɛ ngɛ Yuropa he ko nɛ e he be wae kaa wa maa fiɛɛ sane kpakpa a ngɛ lejɛ ɔ. Ngɛ jeha 1992 ɔ mi ɔ, wa ya Ljubljana ngɛ Slovenia ngɛ he nɛ ye fɔli ɔmɛ wa ngɛ loko a ho Italy ya a kasa nya. Loloolo ɔ, a ngɛ ta hwue ngɛ ma nɛ be ko nɛ be ɔ a tsɛɛ ke Yugoslavia a he komɛ. Jamɛ a be ɔ mi ɔ, nyɛmimɛ nyumuhi nɛ a ngɛ Vienna ngɛ Austria, Zagreb ngɛ Croatia, kɛ Belgrade ngɛ Serbia lɛ a ngɛ fiɛɛmi ní tsumi ɔ nɔ hyɛe ngɛ kpokpa nɛ ɔ nɔ. E he ba hia nɛ ma nɛ ɔmɛ eko fɛɛ eko nɛ ná asafo ní tsumi kɔni.

Enɛ ɔ tsɔɔ kaa e he maa hia nɛ waa kase kusumi kpa kɛ gbi ehe. Ma a mi bi ɔmɛ po deɔ ke: “Jezik je težek,” nɛ e sisi ji, “gbi ɔ mi wa.” Nɛ niinɛ hu ɔ, gbi ɔ mi wa. Nyɛmimɛ ɔmɛ pee klaalo kaa a maa kplɛɛ tsakemi fɛɛ tsakemi nɛ asafo ɔ maa pee ɔ nɔ. Wa na kaa Yehowa jɔɔ mɛ wawɛɛ, nɛ wɔ hu wa bua jɔ a he. Si kake ekohu ɔ, wa na kaa Yehowa jeɔ suɔmi mi nɛ e tsuɔ sanehi a he ní ngɛ be nɛ sa mi. Benɛ wa ya hi Slovenia a, wa kase níhi fuu. Enɛ ɔ ye bua wɔ nɛ wa nyɛ nɛ wa fĩ si ngɛ nyagbahi nɛ waa kɛ kpe ɔ mi.

Se loloolo ɔ, nyagbahi fuu ngɛ wa hɛ mi kɛ ma. Ngɛ jeha 2000 ɔ mi ɔ, a de wɔ kaa wa ya sɔmɔ ngɛ Côte d’Ivoire ngɛ West Africa. Ngɛ November 2002 ɔ mi ɔ, wa tu fo kɛ je Côte d’Ivoire kɛ ho Sierra Leone ya ngɛ ta a he je. Jamɛ a be ɔ mi ɔ, ta ko nɛ ngɛ nɔ yae ngɛ Sierra Leone nɛ e ye jeha 11 ɔ ba nyagbe pɛ. Wa nɛ lɛ gbɔjɔɔ kaa wa maa je Côte d’Ivoire ma a mi oya nɔuu. Se níhi nɛ wa kase ɔ ye bua wɔ nɛ wa ya nɔ nɛ wa ná bua jɔmi.

Wa ngɔ wa juɛmi kɛ ma nihi nɛ a suɔ nɛ a kase anɔkuale ɔ, kɛ wa nyɛmimɛ nɛ a fĩ si jehahi babauu ngɛ ta a mi ɔ a nɔ. E ngɛ mi kaa a be nɔ́ ko tsɔ mohu lɛɛ, se a suɔ kaa a kɛ a sibi nɛ gba níhi nɛ a ngɛ ɔ. Nyɛmiyo ko ke Debbie bohi. Jinɛ Debbie sume kaa e maa ngɔ bo ɔmɛ, se nyɛmiyo ɔ nyɛ e nɔ kaa e ngɔ, nɛ e de lɛ ke: “Benɛ ta a ngɛ nɔ yae ɔ, nyɛmimɛ nɛ a ngɛ ma kpahi a nɔ ɔ ye bua wɔ, lɔ ɔ amlɔ nɛ ɔ, be su nɛ e sa nɛ wɔ hu waa ye bua.” Enɛ ɔ he ɔ, waa kɛ pee oti kaa wa maa kase a nɔ hyɛmi nɔ́ ɔ.

Nyagbenyagbe ɔ, wa kpale kɛ ho Côte d’Ivoire ya. Se ma kudɔmi sane ha nɛ basabasa peemi je sisi ekohu. Ngɛ November 2004 ɔ mi ɔ, wa ngɔ helicopter kɛ tu fo kɛ je ma a mi. I kɛ ye yo ɔ wa hɛɛ baagi kakaaka. Helicopter ngɔ wɔ kɛ ya France tabuli a sito he ɔ. Gbɔkuɛ ɔ, wa hwɔ zugba ngɛ lejɛ ɔ, nɛ e nɔ jena a, a ngɔ wɔ kɛ ho Switzerland ya. Benɛ wa ya su asafo ɔ ní tsumi kɔni ɔ nyɔ mi ɔ, Asafo ɔ Ní Tsumi Kɔni ɔ Ajla Toli ɔmɛ kɛ nihi nɛ a tsɔɔ ní ngɛ Sɔmɔli A Tsɔsemi Sukuu ɔ kɛ a yi ɔmɛ nya wa he wawɛɛ nɛ a fua wɔ. A ha wɔ niye ní kalakala kɛ chocolate fuu. Enɛ ɔ ta wa tsui he wawɛɛ.

A ha nɛ wa ya sɔmɔ ngɛ Ghana be bɔɔ, nɛ benɛ basabasa peemi ɔ nya ba si ɔ, wa kpale kɛ ho Côte d’Ivoire ya. Mi mi jɔmi nɛ nyɛmimɛ ɔmɛ je kpo kɛ tsɔɔ wɔ ɔ ye bua wɔ nɛ wa nyɛ nɛ wa da si fɔfɔɛ nɛ mi wa nɛ ɔ nya. E ngɛ mi kaa suɔmi ngɛ Yehowa we bi nɛ a ngɛ je kɛ wɛ ɔ a kpɛti mohu lɛɛ, se i kɛ Debbie wa ma wa juɛmi nya si kaa wa be suɔmi nɛ nyɛmimɛ ɔmɛ je kpo kɛ tsɔɔ wɔ ɔ nae kaa nɔ́ ko nyafii kulaa. E ngɛ mi kaa waa kɛ si fɔfɔɛhi nɛ a mi wa kpe mohu lɛɛ, se kɛ̃ ɔ, Yehowa gu si fɔfɔɛ nɛ ɔmɛ a nɔ kɛ tsɔse wɔ, nɛ wa kase níhi fuu.

WA YA SƆMƆ NGƐ MIDDLE EAST

Ngɛ jeha 2006 mi ɔ, wa nine su sɛ womi ko nɔ kɛ je asafo ɔ ní tsumi yi ɔ kaa wa ya sɔmɔ ngɛ Middle East. Si kake ekohu ɔ, e he ba hia nɛ waa kase ní ehehi, gbi kpa, kɛ kusumi ehe. Jehanɛ hu ɔ, waa kɛ nyagba komɛ kpe. Wa na kaa níhi fuu ngɛ nɛ e sa kaa waa kase, ejakaa ma kudɔmi sanehi kɛ jami ɔmɛ ha nɛ haomihi pɔ he wawɛɛ. Wa bua jɔ gbi slɔɔtoslɔɔtohi nɛ a tuɔ ngɛ asafo ɔmɛ a mi ɔ he, nɛ wa na hu kaa kake peemi ma nyɛ maa hi wa kpɛti ke waa kɛ teokrase blɔ tsɔɔmi tsu ní. Wa suɔ nyɛmimɛ ɔmɛ a sane wawɛɛ, ejakaa a fĩ si ngɛ si temi kɛ womi nɛ a wekuli, a sukuubi, nihi nɛ a kɛ mɛ tsuɔ ní kɛ a kpɔ mi bi ɔmɛ kɛ ba a nɔ ɔ tsuo se.

Ngɛ jeha 2012 ɔ mi ɔ, wa ya kpe klɛdɛɛ ko nɛ a pee ngɛ Tel Aviv ngɛ Israel ɔ. Kɛ je be nɛ kaseli ɔmɛ bua a he nya ngɛ jeha 33 ngɛ Pentekoste ligbi ɔ nɔ se ɔ, kpe nɛ ɔ ji kekleekle kpe nɛ Yehowa we bi pee ngɛ jamɛ a kpokpa a nɔ. Nihi babauu ba kpe nɛ ɔ kaa bɔ nɛ e ji ngɛ Pentekoste ligbi ɔ nɔ ɔ. Wa hɛ be nɔ jee gblegbleegble!

Ngɛ jamɛ a jeha a mi ɔ, a ha nɛ wa ya ma ko nɛ a tsi wa ní tsumi ɔ nya ngɛ mi ɔ mi. Wa ngɔ asafo ɔ womi ɔmɛ ekomɛ kɛ ya, nɛ waa kɛ wa he wo fiɛɛmi ní tsumi ɔ mi, nɛ wa ya kpe nyafinyafi komɛ hulɔ. E ngɛ mi kaa tabuli kɛ a dɛ mi tuhi po blɔ ngɛ he fɛɛ he mohu lɛɛ, se wa ngɛ slɔkee, ejakaa waa kɛ hɛ si kami tsu ní, nɛ wa nyɛɛ we kutuu.

WA KPALE KƐ BA AFRIKA

Ngɛ jeha 2013 ɔ mi ɔ, asafo ɔ ha wɔ ní tsumi kpa kaa wa ya sɔmɔ ngɛ asafo ɔ ní tsumi kɔni nɛ ngɛ Kinshasa ngɛ Congo ɔ. Ma nɛ ɔ kle wawɛɛ nɛ e mi ngɛ fɛu saminya. Se a be sika, nɛ ta hu pɔ he ngɛ lejɛ ɔ. Sisije ɔ, wa de ke: “Wa le Afrika, lɔ ɔ he ɔ, wa pee klaalo kaa wa maa ya.” Se kɛ̃ ɔ, níhi fuu ngɛ nɛ e sa kaa waa kase ke e ba kaa waa hia blɔ kɛ ya hehi nɛ blɔ ɔmɛ hí ngɛ ɔ. Wa na ní kpakpahi fuu nɛ wa ma nyɛ maa ngɔ wa juɛmi kɛ ma nɔ. E ngɛ mi kaa nyɛmimɛ ɔmɛ kɛ sika he nyagbahi ngɛ kpee mohu lɛɛ, se a ngɛ si fĩe nɛ a ngɛ bua jɔmi. Jehanɛ hu ɔ, a bua jɔ fiɛɛmi ní tsumi ɔ he, nɛ a bɔɔ mɔde kaa a maa ya asafo mi kpehi kɛ kpɔ mi kpehi be fɛɛ be. Wɔ nitsɛmɛ wa na kɛ wa hɛngmɛ kaa nihi babauu ba ngɛ anɔkuale ɔ kasee akɛnɛ Yehowa ngɛ fiɛɛmi ní tsumi ɔ nɔ jɔɔe nɛ e ngɛ mɛ ye buae ɔ he je. Jeha babauu nɛ waa kɛ sɔmɔ ngɛ Congo ɔ ha nɛ wa kase níhi fuu nɛ a he hia, nɛ wa ná huɛmɛ nɛ a ba pee kaa wa wekuli hulɔ.

Ngɛ jeha 2017 ɔ nyagbe ɔ, a ha wɔ ní tsumi kpa kaa wa ya sɔmɔ ngɛ South Africa. Asafo ɔ ní tsumi kɔni nɛ ɔ kle pe asafo ɔ ní tsumi kɔni kpahi nɛ wa ya sɔmɔ ngɛ ɔ. Ní tsumi nɛ a ha wɔ ngɛ lejɛ ɔ ba pee nɔ́ ehe kɛ ha wɔ. Si kake ekohu ɔ, níhi fuu ngɛ nɛ e sa kaa waa kase, se níhi nɛ wa kase kɛ be ɔ hu ye bua wɔ. Wa bua jɔ nyɛmimɛ nɛ a kɛ anɔkuale yemi fĩ si kɛ sɔmɔ Yehowa jeha babauu ɔ a he. E ngɛ mi kaa e slo nyɛmimɛ nɛ a ngɛ Betel weku ɔ mi ɔ a he womi nɔ su kɛ a kusumi mohu lɛɛ, se wa bua jɔ bɔ nɛ a peeɔ kake kɛ tsuɔ ní, nɛ tue mi jɔmi ngɛ a kpɛti ɔ he. Enɛ ɔ maa nɔ mi niinɛ kaa Yehowa ngɛ e we bi jɔɔe wawɛɛ nitsɛ, ejakaa a ngɛ mɔde bɔe kaa a maa wo su ehe ɔ, nɛ́ a kɛ Baiblo sisi tomi mlaahi nɛ tsu ní.

Ngɛ jehahi nɛ be ɔ mi ɔ, i kɛ Debbie tsu ní tsumihi nɛ ngɛ bua jɔmi, nɛ wa kase kusumi ehehi kɛ gbi kpahi hulɔ. E ngɛ mi kaa wa ná we lɛ gbɔjɔɔ mohu lɛɛ, se wa na bɔ nɛ Yehowa gu asafo ɔ, kɛ nyɛmimɛ a nɔ kɛ je suɔmi nɛ se pui kpo kɛ tsɔɔ wɔ ha a. (La 144:2) Wa na kaa níhi fuu nɛ wa kase ngɛ be tsuo sɔmɔmi ní tsumi ɔ mi ɔ ye bua wɔ nɛ wa nane pi si ngɛ Mawu jami mi.

Ye bua jɔ bɔ nɛ ye fɔli ɔmɛ tsɔse mi ha a he wawɛɛ. Jehanɛ hu ɔ, ye hɛ sa yemi kɛ buami nɛ ye yo Debbie kɛ ha mi, kɛ nɔ hyɛmi nɔ́ kpakpa nɛ nyɛmimɛ nɛ a ngɛ je kɛ wɛ ɔ pee ɔ. Bɔ fɛɛ bɔ nɛ wa si fɔfɔɛ ma ji ha hwɔɔ se ɔ, wa fia wa pɛɛ si kaa wa maa ya nɔ maa kase ní kɛ je wa Tsɔɔlɔ Kpanaa a ngɔ.