Bɔ Nɛ O Ma Plɛ Kɛ Wo Nihi Ga Kpakpa Ha

1. Mɛnɔ lɛ e sa kaa e wo nɔ ko ga, nɛ mɛni he je?

ANƐ o bua jɔ he kaa o maa wo nihi ga lo? Ni komɛ ngɛ nɛ e he wɛ ha mɛ kulaa kaa a maa wo nihi ga. Ni komɛ hu ngɛ nɛ e he waa ha mɛ loo a yeɔ gbeye kaa a maa wo ni kpahi ga. Bɔ fɛɛ bɔ nɛ ji ɔ, e ji wɔ tsuo wa blɔ nya ní tsumi kaa wa maa wo nihi ga be komɛ. Mɛni he je? Ejakaa Yesu tsɔɔ kaa nɔ́ nɛ a kɛ ma yɔse e se nyɛɛli anɔkualetsɛmɛ ɔmɛ ji suɔmi nɛ a ma je kpo kɛ tsɔɔ a sibi ɔ. (Yoh. 13:35) Blɔ kake nɛ wa guɔ nɔ kɛ jeɔ suɔmi kpo kɛ tsɔɔ wa nyɛmimɛ ɔmɛ ji kaa wa woɔ mɛ ga ke e he hia nɛ waa pee jã. Baiblo ɔ tsɔɔ kaa ke huɛmɛ ‘je a tsui mi kɛ wo a sibi ga a,’ e haa nɛ a “huɛ bɔmi ɔ ngɔɔ.”—Abɛ 27:9.

2. Mɛni nɛ e sa kaa asafo mi nikɔtɔma amɛ nɛ a nyɛ nɛ a pee, nɛ mɛni he je? (Hyɛ daka nɛ ji “Ga Nɛ A Woɔ Ngɛ Otsi Kpɛti Kpe ɔ Mi” ɔ hulɔ.)

² E sa nɛ asafo mi nikɔtɔmahi titli nɛ a kase bɔ nɛ a maa wo nɔ ko ga kpakpa ha. Mɛni he je? Ejakaa Yehowa kɛ Yesu ngɔ ní tsumi kɛ wo nyumu nɛ ɔmɛ a dɛ kaa a hyɛ asafo ɔ nɔ. (1 Pet. 5:​2, 3) Blɔ kake nɛ a guɔ nɔ kɛ peeɔ jã ji kaa a daa Baiblo ɔ nɔ kɛ woɔ asafo ɔ ga ke a ngɛ munyu tue ngɛ asafo ɔ mi. Jehanɛ hu ɔ, ke e he ba hia nɛ a wo nɔ ko ga a, a peeɔ jã, nɛ a yeɔ buaa nihi nɛ a kpa Yehowa sɔmɔmi ɔ konɛ a kpale kɛ ba asafo ɔ mi. Mɛni ma nyɛ maa ye bua asafo mi nikɔtɔmahi kɛ wɔ tsuo ngɛ asafo ɔ mi konɛ wa nyɛ nɛ waa wo nihi ga kpakpa?

3. (a) Mɛni blɔ nɔ wa maa gu kɛ kase bɔ nɛ a woɔ nɔ ga kpakpa ha? (Yesaya 9:6; hyɛ daka nɛ ji “Moo Kase Yesu Ke O Ngɛ Nihi Ga Woe” ɔ hulɔ.) (b) Mɛni he wa ma susu ngɛ ní kasemi nɛ ɔ mi?

³ Ke wa kase nɔ hyɛmi níhi nɛ ngɛ Baiblo ɔ mi ɔ, e maa ye bua wɔ nɛ waa kase bɔ nɛ a woɔ ga kpakpa ha. Yesu ji nɔ ko nɛ e woɔ nihi ga nɛ se be. Sablaihi nɛ a kɛ tsɛɔ Yesu ɔ a kpɛti kake ji “Nyakpɛ Ga Wolɔ.” (Kane Yesaya 9:6.) Ngɛ ní kasemi nɛ ɔ mi ɔ, wa ma susu nɔ́ nɛ wa ma nyɛ maa pee ke nɔ ko de wɔ kaa waa wo lɛ ga a he, kɛ nɔ́ nɛ wa ma nyɛ maa pee ke e he hia nɛ waa wo nɔ ko ga be mi nɛ nɔ ɔ de we wɔ. Jehanɛ hu ɔ, wa maa na nɔ́ he je nɛ e he hia nɛ waa wo nihi ga ngɛ be nɛ sa mi kɛ ngɛ blɔ nɛ da nɔ.

KE NƆ KO BI WƆ GA WOMI

4-5. Ke nɔ ko bi wɔ ga womi ɔ, mɛni sane e sa nɛ wa bi wa he kekle? Mo ha enɛ ɔ he nɔ hyɛmi nɔ́.

⁴ Ke nɔ ko bi wɔ ga womi ɔ, eko ɔ, wa bua maa jɔ kaa nɔ ɔ he wɔ ye, nɛ e suɔ nɛ waa ye bua lɛ. Enɛ ɔ ma ha nɛ waa nu he kaa e sa nɛ waa ye bua lɛ amlɔ nɔuu. Se kekleekle ɔ, e sa nɛ wa bi wa he ke, ‘Anɛ imi ji nɔ nɛ e sa kaa ma wo nɔ ɔ ga ngɛ e si fɔfɔɛ ɔ he lo?’ Be komɛ ɔ, nɔ́ nɛ se be nɛ wa ma nyɛ maa pee kɛ ye bua nɔ nɛ e bi wɔ ga womi ɔ ji kaa wa ma ha nɛ nɔ ko nɛ e ngɛ e si fɔfɔɛ ɔ mi níhi a si kpami ɔ nɛ wo lɛ ga.

⁵ Kaa nɔ hyɛmi nɔ́ ɔ, ngɔɔ lɛ kaa o huɛ ko nɛ o suɔ lɛ ɔ be he wami wawɛɛ, nɛ e tsɔɔ kaa e hla níhi a mi ngɛ blɔ slɔɔtohi a nɔ nɛ a ma nyɛ maa gu kɛ tsa lɛ ɔ he, nɛ e bi mo kaa o tsɔɔ lɛ hiɔ tsami blɔ nɔ tomi nɛ o susu kaa e hi. E ngɛ mi kaa o ma nyɛ maa tsɔɔ hiɔ tsami blɔ nɔ tomi nɛ o bua jɔ he mohu lɛɛ, se anɔkuale sane ji, tsa pi dɔkita ji mo, nɛ o ná we tsɔsemi nɛ maa ye bua mo kɛ tsa e hiɔ ɔ hulɔ. Ke jã a, lɛɛ blɔ nɛ se be nɛ o ma nyɛ maa gu nɔ kɛ ye bua o huɛ ɔ ji kaa o ma ha nɛ e ya bi ga womi kɛ je nɔ ko nɛ a tsɔse lɛ loo dɔkita ko ngɔ.

6. Mɛni e sa nɛ waa pee loko waa wo nɔ ko ga?

⁶ Ke o susu kaa o he su nɛ o ma nyɛ maa wo nɔ ko ga ngɛ sane ko he po ɔ, e maa hi wawɛɛ kaa o maa mlɛ bɔɔ loko o ha nɔ nɛ bi mo ga womi ɔ heto. Mɛni he je? Abɛ 15:28 ɔ tsɔɔ kaa “dalɔ pueɔ e yi mi tɛ loko e haa sane heto.” Nɛ ke wa susu kaa wa le heto ɔ hu nɛɛ? Loloolo ɔ, e maa hi wawɛɛ kaa wa ma ná be kɛ hla níhi a mi, nɛ waa sɔle, nɛ wa pue wa yi mi tɛ ngɛ sane ɔ he. Ke wa pee jã a, wa ma nyɛ ma ná nɔ mi mami kaa nɔ́ nɛ wa ma de nɔ ɔ kɛ Yehowa suɔmi nya ní ma kɔ. Mo susu gbalɔ Natan sane ɔ he nɛ o hyɛ.

7. Mɛni o kase ngɛ gbalɔ Natan sane ɔ mi?

⁷ Benɛ Matsɛ David de gbalɔ Natan kaa e suɔ nɛ e ma sɔlemi we ha Yehowa a, Natan kɛ oya yemi ha David heto kaa e ma nyɛ maa pee jã. Se e sa nɛ Natan ko bi Yehowa juɛmi ngɛ sane ɔ he kekle. Mɛni he je? Ejakaa Yehowa sume nɛ David nɛ e ma sɔlemi we ɔ. (1 Kron. 17:​1-4) Sane nɛ ɔ ha nɛ wa na kaa ke nɔ ko bi wɔ ga womi ɔ, e sɛ nɛ wa he nɛ “sɔ kɛ tu munyu.” Ke wa pee jã a, lɔ ɔ tsɔɔ kaa wa ji ní leli.—Yak. 1:19.

8. Mɛni yi mi tomi kpa he je nɛ e sa kaa waa hyɛ nɛ hi loko waa wo nɔ ko ga?

⁸ Mo susu yi mi tomi kpa he je nɛ e sa kaa waa hyɛ nɛ hi loko waa wo nɔ ko ga a he nɛ o hyɛ: Ke wa wo nɔ ko ga, nɛ lɔ ɔ ha nɛ nɔ ɔ ya mwɔ yi mi kpɔ nɛ nile be mi ɔ, a ma pia wɔ wawɛɛ. Enɛ ɔ he ɔ, e he hia nɛ wa susu níhi a he saminya loko waa wo nɔ ko ga.

KE E HE HIA NƐ WAA WO NƆ KO GA BE MI NƐ NƆ Ɔ BI WE WƆ GA WOMI

9. Loko asafo mi nikɔtɔma amɛ maa wo nyɛmi ko ga a, mɛni nɔ mi mami nɛ e sa kaa a ná? (Galatia Bi 6:1)

⁹ Be komɛ ɔ, e he maa hia nɛ asafo mi nikɔtɔma amɛ nɛ a wo nyɛmi ko nɛ e “hia nane yaya” a ga. (Kane Galatia Bi 6:1.) E ma nyɛ maa ba kaa nɔ ɔ ngɛ ní komɛ pee nɛ nile be mi nɛ ma nyɛ ma ha nɛ e pee yayami nɛ hɛdɔ ngɛ he. Ke e ba jã a, e sa nɛ asafo mi nikɔtɔma amɛ nɛ a kɛ pee oti kaa a maa ye bua nɔ ɔ konɛ e kpale kɛ ba blɔ nɛ kɛ nɔ yaa neneene wami mi ɔ nɔ. (Yak. 5:​19, 20) Akɛnɛ Yehowa ha nɔ fɛɛ nɔ he blɔ kaa e da e he nile nɔ kɛ mwɔ yi mi kpɔ he je ɔ, loko asafo mi nikɔtɔma amɛ maa wo nɔ ko ga nɛ maa nu tso ɔ, e sa nɛ a ná nɔ mi mami kekle kaa nɔ ɔ hia nane yaya niinɛ. (Rom. 14:​1-4) Se ke nyɛmi ko mwɔ yi mi kpɔ nɛ ma nyɛ ma puɛ huɛ bɔmi nɛ ngɛ e kɛ Yehowa a kpɛti niinɛ, nɛ nikɔtɔma amɛ ma nya si kaa e he hia nɛ a wo lɛ ga a hu nɛɛ?

10-12. Mɛni e sa nɛ asafo mi nikɔtɔma amɛ nɛ a pee ke e he ba hia nɛ a wo nɔ ko ga be mi nɛ nɔ ɔ bi we mɛ ga womi? Ngɔɔ nɔ́ he tomi nɔ́ ko kɛ tsɔɔ mi. (Hyɛ foni ɔmɛ hulɔ.)

¹⁰ E be gbɔjɔɔ ha asafo mi nikɔtɔma amɛ kaa a maa wo nɔ ko nɛ e bi we mɛ ga womi ɔ ga. Mɛni he je? Bɔfo Paulo tsɔɔ kaa nɔ ko ma nyɛ maa hia nane yaya loko e hɛ maa ba e he nɔ. Enɛ ɔ he ɔ, loko asafo mi nikɔtɔma amɛ maa wo nɔ ko ga a, kekleekle ɔ, e sa nɛ a dla nɔ ɔ juɛmi bɔ nɛ pee nɛ e he nɛ ko wa ha lɛ kaa e maa kplɛɛ ga womi ɔ nɔ.

¹¹ Mo susu he nɛ o hyɛ: Ke ngmɔ hulɔ ko ngɛ hlae nɛ e du ní ngɛ zugba nɛ he wa nɔ ɔ, e jaa zugba a kekle. E peeɔ jã bɔ nɛ pee nɛ zu ɔ mi nɛ jɔ loko e du ní. Lɔ ɔ se ɔ, e duɔ ní ɔ. Nyagbenyagbe ɔ, e pueɔ ní ɔ nɛ e du ɔ nɔ nyu konɛ e wa. Jã nɔuu kɛ̃ nɛ loko asafo mi nɔkɔtɔma ko maa wo nɔ ko ga a, e ma bi nɛ e pee ní komɛ kɛ ye bua nɔ ɔ konɛ e he nɛ ko wa ha lɛ kaa e maa kplɛɛ e ga womi ɔ nɔ. Kaa nɔ hyɛmi nɔ́ ɔ, ngɛ be nɛ sa mi ɔ, asafo mi nɔkɔtɔma a deɔ nyɛmi ɔ nɛ e maa wo lɛ ga a kaa e susuɔ e he wawɛɛ, nɛ e suɔ nɛ e kɛ lɛ nɛ susu nɔ́ ko he. Ke asafo mi bimɛ ɔmɛ le asafo mi nɔkɔtɔma ko kaa e ji nɔ ko nɛ e ngɛ suɔmi nɛ e mi mi jɔ ɔ, e he be wae ha mɛ kaa a maa kplɛɛ e ga womi nɔ.

¹² Ngɛ ní sɛɛmi ɔ mi ɔ, asafo mi nɔkɔtɔma a ma nyɛ ma kai nyɛmi ɔ kaa nɔ fɛɛ nɔ ko tɔ̃ɔ, lɔ ɔ he ɔ, wɔ tsuo wa hia ga womi be komɛ. Ke e pee jã a, e he be wae ha nyɛmi ɔ kaa e maa kplɛɛ ga womi ɔ nɔ. (Rom. 3:23) Jehanɛ hu ɔ, e sa nɛ asafo mi nɔkɔtɔma a nɛ e je bumi kpo kɛ tsɔɔ nɔ ɔ, nɛ e kɛ gbi blɛuu nɛ tsɔɔ lɛ kɛ je Ngmami ɔ mi kaa e pee nɔ́ ko nɛ dɛ. Ke nɔ ɔ kplɛɛ nɔ kaa e tɔ̃ niinɛ ɔ, asafo mi nɔkɔtɔma a maa tsɔɔ lɛ nɔ́ nɛ e sa kaa e pee konɛ e nyɛ nɛ e pee tsakemi. Ngɛ ní sɛɛmi ɔ nyagbe ɔ, asafo mi nɔkɔtɔma a ma pue nɔ́ nɛ e du ɔ nɔ nyu kɛ gu e tsui mi nɛ e maa je kɛ je nɔ ɔ yi, nɛ e kɛ lɛ maa sɔle ɔ nɔ. Ke e pee jã a, e he be wae ha nyɛmi ɔ kaa e maa kplɛɛ ga womi ɔ nɔ.—Yak. 5:15.

13. Ke asafo mi nikɔtɔmahi wo nɔ ko ga a, mɛni maa ye bua mɛ konɛ a ná nɔ mi mami kaa nɔ ɔ nu ga womi ɔ sisi?

¹³ Be komɛ ɔ, nɔ nɛ a ngɛ lɛ ga woe ɔ ma nyɛ maa nu nɔ́ nɛ ga wolɔ ɔ ngɛ dee ɔ sisi ngɛ blɔ kpa nɔ. Mɛni asafo mi nikɔtɔmahi ma nyɛ maa pee konɛ nɔ́ ko kaa jã nɛ ko ba? A kɛ hɛ si kami kɛ bumi ma nyɛ ma bi nɔ ɔ sanehi konɛ e na oti ɔ. (Fiɛɛ. 12:11) Heto nɛ nɔ ɔ ma ha a ma ha nɛ nikɔtɔma amɛ nɛ a ná nɔ mi mami kaa nɔ ɔ nu ga womi ɔ sisi.

MOO WO GA NGƐ BE NƐ SA MI KƐ NGƐ BLƆ NƐ DA NƆ

14. Anɛ e sa kaa waa wo nɔ ko ga be mi nɛ wa mi mi fu lo? Moo tsɔɔ nya.

¹⁴ Wɔ tsuo wa yi mluku, lɔ ɔ he ɔ wa ma nyɛ maa pee nɔ́ ko loo wa de nɔ́ ko nɛ ma ha nɛ ni kpahi a mi mi ma fu. (Kol. 3:13) Mawu Munyu ɔ tsɔɔ kaa be komɛ ɔ, nɔ ko ma nyɛ maa pee nɔ́ ko loo e de nɔ́ ko nɛ maa wo wa mi mi la. (Efe. 4:26) Se e sɛ nɛ waa wo nihi ga be mi nɛ wa mi mi fu. Mɛni he je? Ejakaa “adesa mi mi fumi ɔ ngɔɛ Mawu dami kɛ bɛ.” (Yak. 1:20) Ke wa wo nihi ga be mi nɛ wa mi mi fu ɔ, lɔ ɔ ma nyɛ ma puɛ sane ɔ kulaa. Enɛ ɔ tsɔɔ we kaa wa be nyɛe ma je wa susumi kɛ bɔ nɛ wa ngɛ he nue ha a kpo kɛ tsɔɔ nɔ nɛ wo wa mi mi la a. Se kɛ̃ ɔ, e maa hi wawɛɛ kaa wa maa mlɛ nɛ wa tsui he nɛ jɔ loko waa kɛ nɔ ɔ nɛ sɛɛ ní. Wa ma nyɛ maa kase nɔ́ ko ngɛ Elihu nɛ e wo Hiob ga kpakpa a nɔ hyɛmi nɔ́ ɔ mi.

15. Mɛni wa kaseɔ ngɛ Elihu nɔ hyɛmi nɔ́ ɔ mi? (Hyɛ foni ɔ hulɔ.)

¹⁵ Benɛ Hiob huɛmɛ ɔmɛ po e nya nɛ e ngɛ e he fãe ɔ, Elihu kɛ ligbi fuu bu Hiob tue. Enɛ ɔ ha nɛ Elihu mi mi sã lɛ ngɛ Hiob he. Se Elihu mi mi fu Hiob hulɔ, ejakaa Hiob bu e he dalɔ, nɛ e de ní komɛ ngɛ Yehowa he nɛ a be mi. E ngɛ mi kaa Elihu mi mi fu mohu lɛɛ, se kɛ̃ ɔ, e mlɛ kɛ ya si be nɛ e su e nɔ loko e kɛ Hiob tu munyu. Nɛ e je bumi kɛ mi mi jɔmi mi kɛ wo Hiob ga. (Hiob 32:2; 33:​1-7) Elihu nɔ hyɛmi nɔ́ ɔ tsɔɔ wɔ anɔkuale ko nɛ e he hia wawɛɛ. Lɔ ɔ ji: E sa nɛ waa je bumi kɛ suɔmi mi kɛ wo ga, nɛ waa pee jã ngɛ be nɛ sa mi kɛ ngɛ blɔ nɛ da nɔ hulɔ.—Fiɛɛ. 3:​1, 7.

YAA NƆ NƐ O WO NIHI GA NƐ O KPLƐƐ GA WOMI NƆ

16. Mɛni o kase ngɛ La 32:8 ɔ mi?

¹⁶ Kaa bɔ nɛ ngmami nɛ a ngɔ ní kasemi nɛ ɔ kɛ da nɔ ɔ tsɔɔ ɔ, Yehowa de ke, ‘e maa wo wɔ ga, nɛ e hɛngmɛ maa hi wa he.’ (Kane La 32:8.) Enɛ ɔ tsɔɔ kaa e maa ya nɔ maa tsɔɔ wɔ ní. Pi ga pɛ nɛ Yehowa woɔ wɔ, e yeɔ buaa wɔ konɛ waa ngɔ e ga womi ɔmɛ kɛ tsu ní hulɔ. Enɛ ɔ ji nɔ hyɛmi nɔ́ kpakpa nɛ wɔ tsuo wa ma nyɛ maa kase! Ke wa ná he blɔ kaa wa maa wo ni kpahi ga a, e sa nɛ waa kase Yehowa, nɛ wa hɛngmɛ nɛ hi a he, nɛ waa ye bua mɛ konɛ a mwɔ yi mi kpɔhi nɛ nile ngɛ mi.

17. Ke asafo mi nikɔtɔma amɛ da Baiblo ɔ nɔ kɛ wo wɔ ga a, kɛ lɔ ɔ haa nɛ wa nuɔ he ha kɛɛ? (Yesaya 32:​1, 2)

¹⁷ Amlɔ nɛ ɔ ji be nɛ e he hia kaa waa bu ga womi tue wawɛɛ, nɛ waa wo nihi ga kpakpa hulɔ. (2 Tim. 3:1) Asafo mi nikɔtɔmahi nɛ a daa Baiblo ɔ nɔ kɛ woɔ wɔ ga a ngɛ kaa “pahi ngɛ zugba kadokado nɔ.” (Kane Yesaya 32:​1, 2.) Wa bua jɔɔ wawɛɛ kaa wa ngɛ huɛmɛ nɛ a woɔ wɔ ga nɛ wa hia, se pi ga womi nɛ wa suɔ nɛ waa nu. A ga womi ɔmɛ ngɛ kaa “sika tsu tso yiblii ngɛ sika hiɔ níhi a mi.” (Abɛ 25:11) Nyɛ ha nɛ wɔ tsuo waa ya nɔ nɛ waa kase bɔ nɛ a woɔ nihi ga kpakpa ha, nɛ waa bu ga womi tue hulɔ.