Yaa Nɔ Nɛ O Kase Ní Hehi Ngɛ Baiblo Sisije Tsɔɔmi Ɔmɛ A Mi

1. Benɛ o ba kase Baiblo ɔ mi sisije tsɔɔmi ɔmɛ ɔ, kɛ o nu he ha kɛɛ?

BAIBLO Ɔ mi sisije tsɔɔmihi nɛ wa kase ɔ tsake wa si himi. Kaa nɔ hyɛmi nɔ́ ɔ, benɛ wa kase kaa Mawu biɛ ji Yehowa a, wa bɔ mɔde kaa waa kɛ lɛ maa pee huɛ. (Yes. 42:8) Benɛ wa ba le si fɔfɔɛ mi nɛ nihi nɛ a gbo ɔ ngɛ ɔ, wa yi tsui hu kaa wa suɔli nɛ a gbo ɔ ngɛ nɔ́ nae. (Fiɛɛ. 9:10) Jehanɛ hu ɔ, benɛ wa ba kase kaa Mawu wo si kaa e maa pee zugba a Paradeiso ɔ, wa hɛwi hu ngɛ nɔ́ nɛ maa ba wa nɔ hwɔɔ se ɔ he. Wa ba ná nɔ mi mami kaa wa ma nyɛ maa hi si kɛ ya neneene, se pi jeha 70 loo 80 pɛ.—La 37:29; 90:10.

2. Ngɛ mɛni blɔ nɔ nɛ 2 Petro 1:​12, 13 ɔ ha nɛ wa na kaa Kristofohi nɛ a nane pi si ɔ po ma nyɛ ma ná Baiblo ɔ mi sisije tsɔɔmi ɔmɛ a he se?

² E sɛ nɛ wa hɛ nɛ je nɔ kaa Baiblo ɔ mi sisije tsɔɔmi ɔmɛ a he ngɛ se nami wawɛɛ. Bɔfo Petro ngma e sɛ womi nɛ ji enyɔne ɔ kɛ ha Kristofohi nɛ a ‘nane pi si ngɛ anɔkuale ɔ mi’ ɔ. (Kane 2 Petro 1:​12, 13.) Se ngɛ jamɛ a be ɔ mi nɔuu ɔ, nimli yayami komɛ ngɛ asafo ɔ mi nɛ a ngɛ mɔde bɔe kaa a ma ha nɛ nyɛmimɛ ɔmɛ nɛ a je anɔkuale ɔ mi. (2 Pet. 2:​1-3) Enɛ ɔ he ɔ, Petro bɔ mɔde kaa e maa wo e nyɛmimɛ ɔmɛ he wami konɛ a nyɛ nɛ a da si fɔfɔɛ nɛ ɔ nya. Lɔ ɔ he ɔ, e kai nyɛmimɛ ɔmɛ tsɔɔmi komɛ nɛ a le momo ɔ. Tsɔɔmi nɛ ɔmɛ maa ye bua mɛ konɛ a nyɛ nɛ a fĩ si kɛ ya si nyagbe.

3. Mɛni he je nɛ e sa kaa Kristofohi tsuo nɛ a ya nɔ nɛ a susu Baiblo sisije tsɔɔmi ɔmɛ a he ɔ? Mo ha enɛ ɔ he nɔ hyɛmi nɔ́

³ Ke wa ngɛ anɔkuale ɔ mi jeha babauu ji nɛ ɔ po ɔ, wa ma nyɛ ma ná Baiblo ɔ mi sisije tsɔɔmi ɔmɛ a he se loloolo. Kaa nɔ hyɛmi nɔ́ ɔ, binyɛ ko nɛ e le ní hoomi saminya a kɛ e biyo nɛ kpaako e ngɛ ní hoomi kasee ɔ tsuo ma nyɛ maa ngɔ tomatosi, sabola, lo kɛ ní kpahi kɛ pee hwonyu. Se akɛnɛ binyɛ ɔ le ní hoomi saminya he je ɔ, e ma nyɛ maa ngɔ ní nɛ ɔmɛ nɔuu kɛ hoo niye ní slɔɔtohi nɛ ngɔɔ saminya. Jã kɛ̃ nɛ e ji ngɛ wa blɔ fa mi. Nihi nɛ a ngɛ anɔkuale ɔ mi jehahi babauu ji nɛ ɔ ma nyɛ maa kase ní hehi fuu ngɛ Baiblo ngmami ko mi pe nihi nɛ kpaako a ngɛ anɔkuale ɔ kasee ɔ. Ngɛ mɛni blɔ nɔ? Eko ɔ, kɛ je benɛ a baptisi wɔ kɛ ba si amlɔ nɛ ɔ, wa si fɔfɔɛ kɛ sɔmɔmi he blɔhi nɛ wa ngɛ ɔ tsake. Se ke wa susu Baiblo tsɔɔmihi nɛ wa kase kɛ be ɔ he amlɔ nɛ ɔ, wa maa na blɔ ehehi a nɔ nɛ wa maa gu kɛ ngɔ jamɛ a tsɔɔmi ɔmɛ kɛ tsu ní. Nyɛ ha nɛ waa hyɛ ní komɛ nɛ Kristofohi nɛ a nane pi si ɔ ma nyɛ maa kase kɛ je Baiblo ɔ mi sisije tsɔɔmi etɛ komɛ a mi.

YEHOWA JI BƆLƆ

4. Kɛ lemi nɛ wa ba le kaa Yehowa ji Bɔlɔ ɔ ná wa nɔ he wami ha kɛɛ?

⁴ “Nɔ nɛ e pee níhi tsuo ɔ ji Mawu.” (Heb. 3:4) Wa le kaa nɔ nɛ bɔ zugba a kɛ níhi tsuo nɛ ngɛ nɔ ɔ ji nɔ ko nɛ e le ní pe nɔ fɛɛ nɔ, nɛ e ngɛ he wami wawɛɛ. Lɛ nɛ e bɔ wɔ, enɛ ɔ he ɔ, e le wɔ saminya. Nɔ́ nɛ pe kulaa a, e susuɔ wa he, nɛ e le nɔ́ nɛ hi kɛ ha wɔ. Akɛnɛ wa le kaa Yehowa ji Bɔlɔ ɔ he je ɔ, lɔ ɔ ha nɛ wa si himi tsake ngɛ blɔhi fuu a nɔ.

5. Mɛni ji anɔkuale ko nɛ ma nyɛ maa ye bua wɔ nɛ waa ba wa he si? (Yesaya 45:​9-12)

⁵ Lemi nɛ wa ba le kaa Yehowa ji Bɔlɔ ɔ hu ma nyɛ maa ye bua wɔ konɛ waa ba wa he si. Kaa nɔ hyɛmi nɔ́ ɔ, Hiob de ní komɛ nɛ dɛ ngɛ Yehowa. E hɛ je nɔ́ nɛ he hia wawɛɛ ɔ nɔ, nɛ e ngɔ e juɛmi kɛ ma lɛ nitsɛ e nɔ, nɛ e bu e he dalɔ. Se Yehowa kai lɛ kaa lɛ ji Bɔlɔ nɛ pe kulaa. (Hiob 38:​1-4) Enɛ ɔ ye bua Hiob nɛ e na kaa Mawu blɔ ɔmɛ a nɔ kuɔ kulaa pe adesahi a nɔ́ ɔ. Enɛ ɔ he ɔ, gbalɔ Yesaya ngma ke: ‘Anɛ e sa kaa zu nɛ bi buɛ Puɛlɔ ɔ ke, “Mɛni lɛ o ngɛ puɛe ɔ?”’—Kane Yesaya 45:​9-12.

6. Mɛni be nɛ e he maa hia kaa wa susu bɔ nɛ Yehowa nɛ ji wa Bɔlɔ ɔ ngɛ nile kɛ he wami ha a he? (Hyɛ foni ɔmɛ hulɔ.)

⁶ Ke Kristofono ko kɛ jeha babauu sɔmɔ Yehowa a, lɔ ɔ ma nyɛ ma ha nɛ e ngɔ e hɛ kɛ fɔ lɛ nitsɛ e nile nɔ, mohu pe nɛ e ma hla blɔ tsɔɔmi kɛ je Yehowa ngɔ aloo kɛ je Baiblo ɔ mi. (Hiob 37:​23, 24) Se ke e pue e yi mi tɛ ngɛ bɔ nɛ Yehowa nɛ ji Bɔlɔ ɔ le ní, nɛ e ngɛ he wami wawɛɛ ha a he ɔ, e ma ná he se wawɛɛ. (Yes. 40:22; 55:​8, 9) Ngɛ anɔkuale mi ɔ, sisije tsɔɔmi nɛ ɔ ma ha nɛ e na kaa e sa nɛ e ba e he si be fɛɛ be, nɛ e ngɔ e hɛ kɛ fɔ Yehowa nɔ, se pi lɛ nitsɛ e susumi nɔ.

7. Mɛni Rahela pee konɛ e nyɛ nɛ e kplɛɛ tsakemi ehe ko nɔ?

⁷ Rahela nɛ e ngɛ Slovenia a na kaa e Bɔlɔ ɔ he nɛ e susuɔ ɔ ye bua lɛ nɛ e kplɛɛ tsakemi ko nɛ asafo ɔ pee ɔ nɔ. E de ke: “Be komɛ ɔ, ke nihi nɛ a nyɛɛɔ asafo ɔ hɛ mi ɔ mwɔ yi mi kpɔ komɛ ɔ, e yeɔ ha mi kaa ma kplɛɛ nɔ. Kaa nɔ hyɛmi nɔ́ ɔ, i hyɛ 2023 Blɔ Tsɔɔmi Ajla Toli Amaniɛ Bɔmi #8 nɛ tsɔɔ kaa nyɛminyumu ko ma nyɛ maa to kpɛni ɔ mohu lɛɛ, se kekleekle be nɛ i na nyɛminyumu ko nɛ e to kpɛni kɛ ngɛ magbɛ nɔ munyu tue ɔ, ye nya kpɛ ye he wawɛɛ. Enɛ ɔ he ɔ, i sɔle konɛ Yehowa nɛ ye bua mi nɛ ma kplɛɛ blɔ tsɔɔmi nɛ ɔ nɔ.” Rahela yɔse kaa akɛnɛ Yehowa ji nɔ nɛ bɔ hiɔwe kɛ zugba a he je ɔ, e le blɔ nɛ hi pe kulaa nɛ e ma nyɛ maa gu nɔ kɛ tsɔɔ e we asafo ɔ blɔ be fɛɛ be. Ke a ngɔ blɔ tsɔɔmi ehe ko kɛ ha wɔ nɛ e he wa ha mo kaa o kɛ ma tsu ní ɔ, moo to o tsui si nɛ o pue o yi mi tɛ ngɛ bɔ nɛ wa Bɔlɔ ɔ le ní, nɛ e ngɛ he wami wawɛɛ ha a he.—Rom. 11:​33-36.

NƆ́ HE JE NƐ MAWU NGMƐ NƆ́ NAMI BLƆ

8. Amlɔ nɛ ɔ nɛ o ba le nɔ́ he je nɛ Mawu ngmɛ nɔ́ nami blɔ ɔ, kɛ o ná he se ha kɛɛ?

⁸ Mɛni he je nɛ Mawu ngmɛ nɔ́ nami blɔ ɔ? Nihi nɛ a li sane bimi nɛ ɔ heto ɔ a ti nihi babauu a mi mi fu Mawu, loo a ma a juɛmi nya si kaa Mawu ko be kulaa! (Abɛ 19:3) Se moo lɛɛ o ba kase kaa akɛnɛ wɔ tsuo wa yi mluku, nɛ wa ji yayami peeli ɔ he je nɛ wa ngɛ nɔ́ nae ɔ nɛ, se pi Yehowa nɛ pee. O ba kase hu kaa akɛnɛ Yehowa toɔ e tsui si kɛ haa adesahi he je ɔ, nimli ayɔhi abɔ ba le lɛ, nɛ a ba na kaa be maa su nɛ Yehowa maa po nɔ́ nami se kulaa. (2 Pet. 3:​9, 15) Akɛnɛ o ba le nɔ́ he je nɛ Yehowa ngmɛ nɔ́ nami blɔ he je ɔ, lɔ ɔ ha nɛ o tsui nɔ o mi, nɛ o hɛ kɛ su e he wawɛɛ.

9. Mɛni behi a mi titli nɛ e sa kaa wa susu nɔ́ he je nɛ Yehowa ngmɛ nɔ́ nami blɔ ɔ he?

⁹ Be mi nɛ wa ngɛ mlɛe konɛ Yehowa nɛ ba po nɔ́ nami se ɔ, e sa nɛ waa to wa tsui si. Ke wa suɔlɔ ko gbo, aloo wa wekuno ko ngɛ nɔ́ nae, loo a yi wɔ dami sane ɔ, eko ɔ, wa ma bi kaa mɛni he je nɛ Yehowa pee we nɔ́ ko ngɛ sane ɔ he oya nɔuu. (Hab. 1:​2, 3) Ngɛ behi kaa kikɛ ɔ mi ɔ, nile ngɛ mi kaa wa ma susu nɔ́ he je nɛ Yehowa ngmɛɔ blɔ nɛ dali naa nɔ́ ɔ he.a (La 34:19) Jehanɛ hu ɔ, wa ma nyɛ ma pue wa yi mi tɛ ngɛ si nɛ Yehowa wo kaa e maa po nɔ́ nami se kulaa a he.

10. Kɛ Anne plɛ kɛ da e mami gbenɔ ɔ nya ha kɛɛ?

¹⁰ Akɛnɛ wa le nɔ́ he je nɛ Mawu ngmɛ nɔ́ nami blɔ he je ɔ, lɔ ɔ ma nyɛ maa ye bua wɔ konɛ wa fĩ si ngɛ kahi a mi. Anne nɛ e ngɛ Mayotte zugba kpɔ nɛ wo bɔle lɛ nɛ ngɛ India a de ke: “Benɛ ye mami gbo jeha bɔɔ komɛ nɛ be ɔ, i hao wawɛɛ. Se be fɛɛ be ɔ, i kaiɔ ye he kaa tsa pi Yehowa nɛ ha nɛ wa ngɛ nɔ́ nae. Ngɛ anɔkuale mi ɔ, e suɔ kaa e maa po nɔ́ nami tsuo se, nɛ e tle wa suɔli nɛ a gbo ɔ si. Ke i pue ye yi mi tɛ ngɛ si womi nɛ ɔmɛ a he ɔ, e haa nɛ ye tsui nɔɔ ye mi, nɛ e woɔ mi he wami.”

11. Akɛnɛ wa ba le nɔ́ he je nɛ Yehowa ngmɛ nɔ́ nami blɔ he je ɔ, mɛni blɔ nɔ lɔ ɔ woɔ wɔ he wami konɛ waa fiɛɛ be fɛɛ be?

¹¹ Akɛnɛ wa le nɔ́ he je nɛ Mawu ngmɛ nɔ́ nami blɔ he je ɔ, lɔ ɔ woɔ wɔ he wami nɛ wa yaa nɔ nɛ wa fiɛɛɔ. Petro tsɔɔ kaa Yehowa ngɛ e tsui si toe bɔ nɛ pee nɛ e he nihi nɛ a ma tsake a tsui ɔ a yi wami. Enɛ ɔ he ɔ, e de ke: “Nyɛ susu nimli tutuutu nɛ e sa kaa nyɛ ji ngɛ je mi bami klɔuklɔu ní peepeehi kɛ Mawu jami mi ní peepeehi a mi ɔ he.” (2 Pet. 3:11) ‘Mawu jami mi ní peepee nɛ ɔmɛ’ eko ji fiɛɛmi ní tsumi ɔ. Kaa bɔ nɛ Yehowa nɛ ji wa Tsɛ ɔ suɔ nimli ɔ, wɔ hu wa suɔ nimli, nɛ wa suɔ nɛ a hi Mawu je ehe ɔ mi. Yehowa ngɛ e tsui si toe kɛ ha nihi nɛ a ngɛ wa zugba kpɔ ɔ mi ɔ konɛ a ba sɔmɔ lɛ. Enɛ ɔ ji he blɔ nɛ se be nɛ o na kaa o maa piɛɛ Mawu he kɛ tsu ní kɛ ye bua nihi babauu nɛ a ba kase Yehowa he ní loko nyagbe ɔ nɛ ba!—1 Kor. 3:9.

WA NGƐ “NYAGBE LIGBI ƆMƐ A MI”

12. Kɛ lemi nɛ wa le kaa wa ngɛ “nyagbe ligbi ɔmɛ a mi” ɔ yeɔ buaa wɔ ha kɛɛ?

¹² Baiblo ɔ tsɔɔ bɔ nɛ nihi maa ba a je mi ha tutuutu ngɛ “nyagbe ligbi ɔmɛ a mi.” (2 Tim. 3:​1-5) Ke wa na bɔ nɛ nihi baa a je mi ha ngɛ wa kpɔ ɔmɛ a mi ɔ, wa naa kaa nɔ́ nɛ Mawu Munyu ɔ de ɔ ji anɔkuale niinɛ. Bɔ nɛ nihi a je mi bami puɛ wawɛɛ ha a, ha nɛ wa ná nɔ mi mami kaa Mawu Munyu ɔ ji anɔkuale.—2 Tim. 3:​13-15.

13. Ngɛ nɔ́ he tomi nɔ́ nɛ Yesu kɛ tsu ní ngɛ Luka 12:​15-21 ɔ nya a, mɛni sanehi wa ma nyɛ ma bi wa he?

¹³ Lemi nɛ wa le kaa wa ngɛ “nyagbe ligbi ɔmɛ a mi” ɔ hu yeɔ buaa wɔ nɛ waa kɛ wa be tsuɔ ní saminya. Nɔ́ he tomi nɔ́ nɛ Yesu kɛ tsu ní ngɛ Luka 12:​15-21 ɔ maa ye bua wɔ nɛ waa na nɔ́ he je nɛ e he hia nɛ waa pee jã. (Kane.) Mɛni he je nɛ Mawu de ke nyumu niatsɛ ɔ “susuu we níhi a he” ɔ? Pi niatsɛ nɛ nyumu ɔ ji ɔ he je, mohu ɔ, e de jã ejakaa nyumu ɔ ngɔ e juɛmi kɛ ma níhi nɛ a he hia we tsɔ ɔ a nɔ. Nyumu nɛ ɔ ‘to juetli si kɛ ha e he, se e pi niatsɛ ngɛ Mawu hɛ mi.’ Mɛni he je nɛ nile be nɔ́ nɛ nyumu ɔ pee ɔ mi ɔ? Ejakaa Mawu de lɛ ke: “Nyɔ nɛ ɔ mi ɔ, a ngɛ o wami ngɔe ngɛ o dɛ.” Kɛ sane nɛ ɔ maa ye bua wɔ ha kɛɛ mwɔnɛ ɔ? E be kɛe nɛ nyagbe ɔ maa ba, enɛ ɔ he ɔ, e sa nɛ wa bi wa he ke: ‘Anɛ otihi nɛ i kɛ ma ye hɛ mi ɔ tsɔɔ kaa i ngɔ ye juɛmi kɛ ma níhi nɛ a he hia wawɛɛ ɔ a nɔ lo? Mɛni otihi lɛ i woɔ ye bimɛ ɔmɛ he wami kaa a kɛ ma a hɛ mi? Anɛ níhi nɛ i ngɔɔ ye he wami, ye be, kɛ ye he lo nya níhi kɛ peeɔ ɔ tsɔɔ kaa i toɔ juetli si ngɛ hiɔwe, aloo i toɔ juetli si kɛ haa imi nitsɛ pɛ ye he lo?’

14. Ngɛ mɛni blɔ nɔ Miki níhi a si kpami ɔ maa ye bua wɔ konɛ waa le nɔ́ he je nɛ e he hia nɛ wa kai kaa wa ngɛ nyagbe ligbi ɔmɛ a mi?

¹⁴ Ke e ngɛ wa juɛmi mi kaa wa ngɛ nyagbe ligbi ɔmɛ a mi niinɛ ɔ, lɔ ɔ maa ye bua wɔ konɛ waa le yi mi kpɔhi nɛ e sa kaa waa mwɔ. Jã nɛ nyɛmiyo ko nɛ a tsɛɛ lɛ ke Miki ɔ pee. E de ke: “Benɛ i gbe nɔ tsami sukuu nya a, i suɔ nɛ ma ya yunivɛsiti konɛ ma ya kase lohwehi a he ní. Se ngɛ jamɛ a be ɔ mi nɔuu hu ɔ, i suɔ nɛ ma pee daa blɔ gbalɔ nɛ ma ya sɔmɔ ngɛ he nɛ fiɛɛli fuu a he hia ngɛ. Ye huɛmɛ nɛ a nane pi si ngɛ asafo ɔ mi ɔ wo mi ga kaa ma susu he saminya nɛ ma hyɛ ke ji ma nyɛ ma ya yunivɛsiti ɔ, nɛ ngɛ jamɛ a be ɔ mi nɔuu ɔ, ma su mumi mi otihi nɛ i kɛ ma ye hɛ mi ɔ he lo. A kai mi kaa e be kɛe nɛ je yaya nɛ ɔ maa ba nyagbe. A de mi hu kaa ngɛ je ehe ɔ mi ɔ, ma ná he blɔ kɛ kase lohwe ɔmɛ tsuo a he ní kɛ ya neneene. Enɛ ɔ he ɔ, i ya pee course ko nɛ be ye be fuu ngɔe, nɛ maa ye bua mi nɛ ma ná ní tsumi. Enɛ ɔ ha nɛ i ná ní tsumi, nɛ i nyɛ nɛ i tsu blɔ gbami ní tsumi ɔ hulɔ. Pee se ɔ, i ya sɔmɔ ngɛ he nɛ fiɛɛli fuu a he hia ngɛ ngɛ Ecuador.” Amlɔ nɛ ɔ, Miki kɛ e huno ɔ ngɛ kpɔ mi nɔ hyɛmi ní tsumi ɔ tsue ngɛ lejɛ ɔ.

15. Eko ɔ, kɛ nihi maa pee a ní ngɛ sane kpakpa a he ha kɛɛ? Mo ha enɛ ɔ he nɔ hyɛmi nɔ́. (Hyɛ foni ɔmɛ hulɔ.)

¹⁵ Ke wa fiɛɛ sane kpakpa a kɛ tsɔɔ nihi, nɛ a bui tue po ɔ, e sɛ nɛ wa kɔni mi nɛ jɔ̃. Mɛni he je? Ejakaa nihi a si fɔfɔɛ ma nyɛ ma tsake. Mo susu Yesu nyɛminyumu Yakobo he nɛ o hyɛ. E le Yesu jokuɛ mi, kɛ benɛ e wa nɛ e ba pee Mesia a. Jehanɛ hu ɔ, benɛ Yesu ba pee tsɔɔlɔ nɛ se be ɔ, e na. Se kɛ̃ ɔ, Yakobo nyɛɛ we Yesu se ngɛ jamɛ a be ɔ mi. Se benɛ Yesu gbo nɛ a tle lɛ si ɔ se loko Yakobo ba pee kaselɔ nɛ e ngɛ kã!b (Yoh. 7:5; Gal. 2:9) Ke o wekuli a bua jɔɛ anɔkuale ɔ he ɔ, o kɔni mi nɛ ko jɔ̃. Jehanɛ hu ɔ, yaa nɔ nɛ o fiɛɛ kɛ ha nihi nɛ a bui mo tue be ko nɛ be ɔ. Mo kai kaa wa ngɛ nyagbe ligbi ɔmɛ a mi, nɛ e he hia nɛ waa kɛ hɛdɔ nɛ tsu fiɛɛmi ní tsumi ɔ. Eko ɔ, nihi kaa jã a ma susu nɔ́ nɛ o de mɛ ɔ he, nɛ a kɛ ma nyɛ ma tsu ní ngɛ amanehlu ngua a mi po.c

O BUA NƐ JƆ YEHOWA KAIMI ƆMƐ A HE

16. Kɛ o ná Yehowa kaimi ɔmɛ a he se ha kɛɛ? (Hyɛ daka nɛ ji, “Ngɔɔ Kɛ Ye Bua Ni Kpahi” ɔ hulɔ.)

¹⁶ A to mumi mi niye ní pɔtɛɛ komɛ a he blɔ nya kɛ ha nihi nɛ a li Baiblo ɔ he nɔ́ ko tsɔ ɔ. Kaa nɔ hyɛmi nɔ́ ɔ, a to magbɛ nɔ munyu nɛ a tuɔ daa otsi, munyu kɛ video komɛ nɛ ngɛ jw.org ɔ nɔ, kɛ womi tɛtlɛɛhi nɛ a pee kɛ ha ma bi ɔ a he blɔ nya kɛ ha nihi nɛ tsa pi Odasefohi ji mɛ ɔ. Se wɔ hu wa náa ní nɛ ɔmɛ a he se. A yeɔ buaa wɔ nɛ suɔmi nɛ wa ngɛ kɛ ha Yehowa a mi waa, nɛ wa náa hemi kɛ yemi nɛ mi wa ngɛ Mawu Munyu ɔ mi. Jehanɛ hu ɔ, a yeɔ buaa wɔ nɛ wa tsɔɔ ni kpahi Baiblo ɔ mi sisije tsɔɔmi ɔmɛ saminya.—La 19:7.

17. Ngɛ mɛni si fɔfɔɛhi a mi lɛ e ma bi nɛ wa pue wa yi mi tɛ ngɛ Baiblo sisije tsɔɔmi ɔmɛ a he?

¹⁷ Ke wa ná sisi numi ehe ko ngɛ ngmami ko he ɔ, wa bua jɔɔ. Se kɛ̃ ɔ, wa bua jɔɔ Baiblo sisije tsɔɔmihi nɛ ha nɛ wa hɛ kɛ su Yehowa he ɔ he wawɛɛ. Kaa bɔ nɛ wa ba kase ɔ, Baiblo sisije tsɔɔmi nɛ ɔmɛ ma nyɛ maa ye bua wɔ loloolo. Ke wa nine su blɔ tsɔɔmi ko nɔ nɛ wa susu kaa nile be mi ɔ, e sa nɛ waa je he si bami mi nɛ wa kai kaa Yehowa nɛ ji wa Bɔlɔ nɛ́ e le ní, nɛ e ngɛ he wami ɔ lɛ ngɛ asafo ɔ kudɔe. Ke wɔ nitsɛmɛ loo wa suɔlɔ ko ngɛ nɔ́ nae ɔ, e sa nɛ waa to wa tsui si, nɛ wa pue wa yi mi tɛ ngɛ nɔ́ he je nɛ Yehowa ngmɛ nɔ́ nami blɔ ɔ he. Jehanɛ hu ɔ, ke wa ngɛ yi mi kpɔ mwɔe ngɛ nɔ́ nɛ waa kɛ wa be kɛ wa he lo nya níhi maa pee ɔ he ɔ, e sa nɛ wa kai kaa wa ngɛ nyagbe ligbi ɔmɛ a mi, nɛ e be kɛe nɛ nyagbe ɔ maa ba. Nyɛ ha nɛ wɔ tsuo waa ya nɔ nɛ waa ngɔ Yehowa blɔ tsɔɔmi ɔmɛ kɛ tsu ní nɛ waa ye lɛ anɔkuale konɛ waa pee ní leli.