Nɔ́ Nɛ Yehowa Peeɔ Kɛ Yeɔ Buaa Wɔ Konɛ Wa Nyɛ Nɛ Wa Fĩ Si

1. Mɛni he je nɛ e he ma nyɛ maa wa ha wɔ kaa wa ma fĩ si ɔ, nɛ mɛnɔ ma nyɛ maa ye bua wɔ konɛ waa pee jã? (1 Petro 5:10)

WƆ TSUO waa kɛ haomi slɔɔtohi kpeɔ. Enɛ ɔ he ɔ, be komɛ ɔ, e he ma nyɛ maa wa ha wɔ kaa wa ma fĩ si kɛ ya si nyagbe. Kaa nɔ hyɛmi nɔ́ ɔ, wa ti ni komɛ nu hiɔ be kɛkɛɛ ji nɛ ɔ. Ni komɛ hu ngɛ haoe ngɛ a suɔli nɛ a gbo ɔ he je. Jehanɛ hu ɔ, wa nyɛmimɛ komɛ a wekuli loo ma nikɔtɔmahi ngɛ mɛ yi mi wae. (Mat. 10:​18, 36, 37) Ke jã nɛ e ji ngɛ o blɔ fa mi ɔ, mo ná nɔ mi mami kaa Yehowa ma nyɛ maa ye bua mo konɛ o nyɛ nɛ o fĩ si.—Kane 1 Petro 5:10.

2. Mɛni yeɔ buaa wɔ nɛ wa nyɛɔ nɛ wa fĩɔ si?

² Ke nɔ ko kɛ nyagbahi ngɛ kpee loo a ngɛ lɛ yi mi wae, loo e kɛ si fɔfɔɛ ko nɛ ma nyɛ ma ha nɛ e pee yayami ngɛ kpee, se e yaa nɔ nɛ e yeɔ Yehowa anɔkuale nɛ e sɔmɔɔ lɛ kɛ bua jɔmi ɔ, lɔ ɔ tsɔɔ kaa e ngɛ si fĩe. Se wa be nyɛe ma fĩ si ngɛ wa dɛ he kɔkɔɔkɔ. Ja Yehowa ha wɔ “he wami nɛ pe adesahi a nɔ́ ɔ” loko wa ma nyɛ ma fĩ si. (2 Kor. 4:7) Ngɛ ní kasemi nɛ ɔ mi ɔ, wa ma susu níhi eywiɛ nɛ Yehowa ha wɔ konɛ wa nyɛ nɛ wa fĩ si ɔ he. Jehanɛ hu ɔ, wa maa na nɔ́ nɛ wa ma nyɛ maa pee konɛ wa ná ní nɛ ɔmɛ nɛ Yehowa kɛ ha wɔ ɔ eko fɛɛ ko he se.

SƆLEMI

3. Mɛni he je nɛ wa ma nyɛ ma de ke sɔlemi ji nyakpɛ nɔ́ ɔ?

³ Yehowa ha wɔ nɔ́ ko nɛ se be nɛ ma nyɛ maa ye bua wɔ konɛ wa fĩ si. E ngɛ mi kaa wa peeɔ yayami mohu lɛɛ, se e ha wɔ he blɔ konɛ waa kɛ lɛ nɛ sɛɛ ní, nɛ ke waa kɛ lɛ sɛɛ ní hu ɔ, e buɔ wɔ tue. (Heb. 4:16) Mo susu he nɛ o hyɛ: Wa ma nyɛ maa sɔle kɛ ha Yehowa be fɛɛ be, nɛ wa de lɛ nɔ́ fɛɛ nɔ́. Ke wa sɔle ngɛ gbi saisaa mi loo ngɛ he fɛɛ he ɔ, Yehowa maa bu wɔ tue. Ke wa ya je he ko banee loo a wo wɔ tsu po ɔ, Yehowa maa bu wa sɔlemi tue. (Yona 2:​1, 2; Níts. 16:​25, 26) Ke wa ngɛ tsui yee, nɛ wa li nɔ́ nɛ wa ma de Yehowa po ɔ, e nyɛɔ nɛ e leɔ nɔ́ nɛ wa ngɛ hlae ma de lɛ ɔ. (Rom. 8:​26, 27) Ngɛ anɔkuale mi ɔ, sɔlemi ji nyakpɛ nɔ́.

4. Kɛ wa plɛ kɛ le kaa ke wa sɔle ha Yehowa kaa e ye bua wɔ nɛ wa fĩ si ɔ, e maa bu wɔ tue ha kɛɛ?

⁴ Baiblo ɔ ha nɛ wa na kaa ‘ke wa bi Yehowa nɔ́ ko nɛ́ e kɛ e suɔmi nya ní peemi kɔ ɔ, e buɔ wɔ tue.’ (1 Yoh. 5:14) Anɛ wa ma nyɛ ma bi Yehowa nɛ e ye bua wɔ nɛ wa nyɛ nɛ wa fĩ si lo? Ee! Jã nɛ wa maa pee ɔ kɛ Yehowa suɔmi nya ní kɔ. Mɛni he je nɛ wa ma nyɛ ma de jã a? Yehowa ha nɛ wa le kaa ke wa ya nɔ nɛ wa ye lɛ anɔkuale ɔ, e ma ná heto kɛ ha Satan Abosiami. (Abɛ 27:11) Jehanɛ hu ɔ, Baiblo ɔ ha nɛ wa na kaa Yehowa pee klaalo kaa e ma “je e he wami ɔ kpo ngɛ nihi nɛ a kɛ a tsui tsuo ha lɛ ɔ a blɔ fa mi.” (2 Kron. 16:9) Enɛ ɔ he ɔ, wa ma nyɛ ma ná nɔ mi mami kaa Yehowa ngɛ he wami nɛ e kɛ maa ye bua wɔ, nɛ e suɔ kaa e maa pee jã hulɔ.—Yes. 30:18; 41:10; Luka 11:13.

5. Mɛni blɔ nɔ sɔlemi ma nyɛ maa ye bua wɔ konɛ wa ná tue mi jɔmi? (Yesaya 26:3)

⁵ Baiblo ɔ tsɔɔ kaa ke wa je wa tsui mi nɛ wa sɔle kɛ ha Yehowa a, ‘Mawu tue mi jɔmi ɔ nɛ pã níhi a sisi numi tsuo ɔ maa bu wa tsui kɛ wa juɛmi he.’ (Filip. 4:7) Mo susu nɔ́ nɛ enɛ ɔ tsɔɔ ɔ he nɛ o hyɛ. Nihi nɛ a sɔmɔ we Yehowa a kɛ nyagbahi kpeɔ, nɛ a ti nihi fuu bɔɔ mɔde kaa a maa pee ní slɔɔtohi konɛ a tue mi nɛ jɔ mɛ. Se tue mi jɔmi nɛ Yehowa haa nɔ ɔ hi kulaa pe tue mi jɔmi kpa ko nɛ nɔ ko ma ná. Ke wa sɔleɔ kɛ haa Yehowa a, lɔ ɔ tsɔɔ kaa wa ngɔɔ wa hɛ kɛ fɔɔ e nɔ kɛ wa tsui tsuo, nɛ e ‘maa ya nɔ ma ha wɔ tue mi jɔmi.’ (Kane Yesaya 26:3.) Blɔ kake nɛ Yehowa guɔ nɔ kɛ haa wɔ tue mi jɔmi ji kaa e yeɔ buaa wɔ nɛ wa kaiɔ ngmamihi nɛ a woɔ nɔ bua nɛ wa kase momo ɔ. Ngmami nɛ ɔmɛ kaiɔ wɔ kaa Yehowa suɔ wɔ, nɛ e pee klaalo kaa e maa ye bua wɔ. Enɛ ɔ haa nɛ wa tsui nɔɔ wa mi wawɛɛ.—La 62:​1, 2.

6. Mɛni ji ní komɛ nɛ o ma nyɛ maa sɔle ngɛ he? (Hyɛ foni ɔ hulɔ.)

⁶ Nɔ́ nɛ o ma nyɛ maa pee. Ke o kɛ ka ko ngɛ kpee ngɛ o hemi kɛ yemi ɔ he je ɔ, “ngɔɔ o tlomi ɔ kɛ fɔ Yehowa nɔ,” nɛ o sɔle konɛ e ha mo tue mi jɔmi. (La 55:22) Jehanɛ hu ɔ, mo bi Yehowa konɛ e ha mo nile nɛ o kɛ tsu o nyagba a he ní. (Abɛ 2:​10, 11) Be mi nɛ o ngɛ Yehowa bie konɛ e ye bua mo nɛ o nyɛ nɛ o fĩ si ɔ, o hɛ nɛ ko je nɔ kaa o maa sɔle kɛ na lɛ si hulɔ. (Filip. 4:6) Daa ligbi ɔ, hyɛ kaa o maa na blɔhi a nɔ nɛ Yehowa guɔ kɛ yeɔ buaa mo ngɛ kahi nɛ o kɛ ngɛ kpee ɔ mi, nɛ o na lɛ si ngɛ ní kpakpahi tsuo nɛ e pee ha mo ɔ he. Eko ɔ, o nyagba a ha nɛ o ngɛ nɔ́ nae mohu lɛɛ, se o hɛ nɛ ko je ní kpakpahi nɛ Yehowa pee ha mo momo ɔ a nɔ.—La 16:​5, 6.

MAWU MUNYU Ɔ

7. Mɛni blɔ nɔ nɛ Baiblo ɔ nɛ wa maa kase ɔ maa ye bua wɔ?

⁷ Yehowa ha wɔ e Munyu ɔ konɛ e ye bua wɔ nɛ wa fĩ si. Ngmamihi fuu ngɛ Baiblo ɔ mi nɛ haa nɛ wa náa nɔ mi mami kaa Yehowa yeɔ buaa wɔ. Mo susu kake he nɛ o hyɛ. Mateo 6:8 ɔ de ke: “Nyɛ Tsɛ ɔ le níhi nɛ hia nyɛ ɔ momo po loko nyɛ biɔ lɛ.” Yesu lɛ tu munyu nɛ ɔ nɛ, nɛ e le Yehowa saminya kulaa pe adesahi tsuo. Enɛ ɔ he ɔ, atsinyɛ jemi ko be he kaa ke waa kɛ kahi ngɛ kpee ɔ, Yehowa le nɔ́ nɛ maa ye bua wɔ konɛ wa nyɛ nɛ waa da nya. Si womihi fuu ngɛ Baiblo ɔ mi nɛ ma nyɛ maa ye bua wɔ konɛ waa ya nɔ nɛ wa fĩ si ngɛ kahi a mi.—La 94:19.

8. (a) Mo ha nɔ hyɛmi nɔ́ ko nɛ tsɔɔ bɔ nɛ Baiblo sisi tomi mlaahi ma nyɛ maa ye bua wɔ nɛ wa fĩ si ha. (b) Mɛni maa ye bua wɔ konɛ wa kai Baiblo sisi tomi mlaahi ngɛ si fɔfɔɛ pɔtɛɛ ko mi?

⁸ Baiblo sisi tomi mlaahi ma nyɛ maa ye bua wɔ nɛ wa fĩ si. Ga womihi nɛ ngɛ mi ɔ ma nyɛ ma ha nɛ wa ná juɛmi kɛ mwɔ yi mi kpɔhi nɛ da. (Abɛ 2:​6, 7) Kaa nɔ hyɛmi nɔ́ ɔ, Baiblo ɔ woɔ wɔ he wami kaa wa ko hao tsɔ ngɛ hwɔɔ he, mohu ɔ, waa ngɔ wa hɛ kɛ fɔ Yehowa nɔ daa ligbi. (Mat. 6:34) Ke wa kɛ pee wa su kaa wa maa kane Baiblo ɔ nɛ wa pue wa yi mi tɛ ngɛ he be fɛɛ be ɔ, e he be wae kaa wa ma kai Baiblo sisi tomi mlaahi nɛ maa ye bua wɔ ngɛ be nɛ wa hia a mi.

9. Mɛni blɔ nɔ Baiblo mi nɔ hyɛmi níhi woɔ hɛ kɛ nɔ fɔmi nɛ wa ngɛ ngɛ Yehowa mi ɔ mi he wami?

⁹ Nɔ hyɛmi níhi fuu hu ngɛ Baiblo ɔ mi nɛ tsɔɔ bɔ nɛ ni komɛ ngɔ a hɛ kɛ fɔ Yehowa nɔ, nɛ e ye bua mɛ ha. (Heb. 11:​32-34; Yak. 5:17) Ke wa susuɔ nɔ hyɛmi ní nɛ ɔmɛ a he ɔ, lɔ ɔ haa nɛ wa náa hɛ kɛ nɔ fɔmi nɛ mi wa kaa Yehowa ji “wa wesa he kɛ wa he wami, [nɛ] wa ma nyɛ ma ná yemi kɛ buami ngɛ e ngɔ be fɛɛ be ngɛ haomi behi a mi.” (La 46:1) Ke wa pue wa yi mi tɛ ngɛ bɔ nɛ Yehowa sɔmɔli komɛ je hemi kɛ yemi kpo ha, nɛ a ya nɔ nɛ a sɔmɔ lɛ ngɛ haomi behi a mi ɔ he ɔ, lɔ ɔ maa wo wɔ he wami konɛ wɔ hu waa pee jã.—Yak. 5:​10, 11.

10. Mɛni o ma nyɛ maa pee konɛ o ná Baiblo ɔ he se kɛ pi si?

¹⁰ Nɔ́ nɛ o ma nyɛ maa pee. Moo kane Baiblo ɔ daa ligbi, nɛ o ngma ngmamihi nɛ o susu kaa a ma nyɛ maa ye bua mo ɔ kɛ fɔ si. Nihi fuu kaneɔ Mo Susu Ngmami ɔ He Daa Ligbi ɔ mɔtu, nɛ enɛ ɔ yeɔ buaa mɛ wawɛɛ nɛ a susuɔ ngmami ko nɛ woɔ nɔ bua a he ngɛ ligbi ɔ mi. Nyɛmiyo ko nɛ a tsɛɛ lɛ ke Mariea ɔ na kaa munyu nɛ ɔ ji anɔkuale. E papaa kɛ e mami tsuo ba ná kansa. Mɛni ye bua lɛ nɛ e nyɛ nɛ e fĩ si benɛ e piɛ bɔɔ nɛ a ma gbo ɔ? E de ke: “Daa mɔtu ɔ, i kaneɔ Mo Susu Ngmami ɔ He Daa Ligbi womiyo ɔ, nɛ i pueɔ ye yi mi tɛ ngɛ he. Enɛ ɔ nɛ i peeɔ ɔ ye bua mi nɛ i susuɔ Yehowa kɛ ní kpakpahi nɛ e tsɔɔ wɔ ngɛ e Munyu ɔ mi ɔ he, mohu pe nɛ ma hi ye nyagba a he susue.”—La 61:2.

WA NYƐMIMƐ ƆMƐ

11. Mɛni he je nɛ lemi nɛ wa le kaa pi wɔ pɛ nɛ waa kɛ haomihi ngɛ kpee ɔ woɔ wa bua a?

¹¹ Yehowa ha wɔ nyɛmimɛ Kristofohi ngɛ je kɛ wɛ konɛ a ye bua wɔ nɛ wa fĩ si ngɛ haomi behi a mi. Akɛnɛ wa le kaa “kikɛmɛ a amanehlu nɛ ɔmɛ nɔuu nɛ [wa] nyɛmimɛ a kuu ɔ tsuo ngɛ nae” he je ɔ, lɔ ɔ haa nɛ wa naa kaa tsa pi wɔ pɛ nɛ waa kɛ haomihi ngɛ kpee. (1 Pet. 5:9) Wa nyɛmimɛ kpahi hu kɛ haomihi nɛ ngɛ kaa wa nɔ ɔ kpe hyɛ, se a ya nɔ nɛ a fĩ si, nɛ a ye anɔkuale. Enɛ ɔ tsɔɔ kaa wɔ hu wa ma nyɛ ma fĩ si!—Níts. 14:22.

12. Mɛni wa nyɛmimɛ ɔmɛ ma nyɛ maa pee kɛ ye bua wɔ, nɛ mɛni wɔ hu wa ma nyɛ maa pee ha mɛ? (2 Korinto Bi 1:​3, 4)

¹² Wa nyɛmimɛ ɔmɛ ma nyɛ maa ngɔ a ní peepee kɛ a munyu tutui kɛ wo wɔ he wami konɛ wa nyɛ nɛ wa fĩ si. Bɔfo Paulo na kaa munyu nɛ ɔ ji anɔkuale. Ngɛ sɛ womihi nɛ bɔfo Paulo ngma a mi ɔ, e wo nyɛmimɛ nɛ a ye bua lɛ benɛ a wo lɛ tsu ngɛ lɛ nitsɛ e we mi ɔ a biɛ ta, nɛ e na mɛ si. Nyɛmimɛ nɛ ɔmɛ wo Paulo he wami, nɛ a wo e bua, nɛ a pee ní komɛ kɛ ye bua lɛ hulɔ. (Filip. 2:​25, 29, 30; Kol. 4:​10, 11) Jã nɔuu kɛ̃ nɛ e ji mwɔnɛ ɔ. Ke wa ngɛ nɔ́ nae ɔ, wa nyɛmimɛ ɔmɛ yeɔ buaa wɔ konɛ wa nyɛ nɛ wa fĩ si, nɛ ke mɛ hu a hia yemi kɛ buami ɔ, wɔ hu wa yeɔ buaa mɛ.—Kane 2 Korinto Bi 1:​3, 4.

13. Mɛni ye bua Maya nɛ e fĩ si?

¹³ Ngɛ jeha 2020 ɔ mi ɔ, polisi komɛ nɛ a ngɛ Russia a ya sɛ nyɛmiyo ko nɛ a tsɛɛ lɛ ke Maya a we mi, nɛ a gbɛ e níhi tsuo a mi. Lɔ ɔ se ɔ, e he ba hia nɛ e ya fã e he ngɛ kojomi he ngɛ e hemi kɛ yemi ɔ nɛ e fiɛɛɔ kɛ tsɔɔ nihi ɔ he je. Maya tsɔɔ kaa benɛ e kɛ si fɔfɔɛhi nɛ a mi wa nɛ ɔmɛ ngɛ kpee ɔ, nyɛmimɛ ɔmɛ wo lɛ he wami wawɛɛ nitsɛ. E de ke: “Ngɛ jamɛ a be ɔ mi ɔ, i hao, nɛ i ye aywilɛho wawɛɛ, nɛ pɔ hu tɔ ye he. Se nyɛmimɛ ɔmɛ tsɛɔ mi ngɛ fon nɔ, nɛ a ngmaa sɛ womihi kɛ haa mi. A ha nɛ i ná nɔ mi mami kaa a suɔ mi wawɛɛ nitsɛ. I le kaa nyɛmimɛ ɔmɛ suɔ mi nɛ a ji ye wekuli hulɔ. Se nɔ́ nɛ nyɛmimɛ ɔmɛ pee ha mi ɔ ha nɛ i ná nɔ mi mami nitsɛnitsɛ kaa a suɔ mi wawɛɛ.”

14. Mɛni wa ma nyɛ maa pee konɛ wa nyɛmimɛ ɔmɛ nɛ a nyɛ nɛ a ye bua wɔ nɛ wa fĩ si? (Hyɛ foni ɔ hulɔ.)

¹⁴ Nɔ́ nɛ o ma nyɛ maa pee. Ke o kɛ ka ko ngɛ kpee ɔ, ko je o he ngɛ o nyɛmimɛ ɔmɛ a he, nɛ koo gbla o nane si kaa o ma ha nɛ asafo mi nikɔtɔma amɛ nɛ a ye bua mo. A ma nyɛ maa pee ‘kaa laami he ngɛ kɔɔhiɔ nya, kɛ wesa he ngɛ hiɔmi kɛ e mi kɔɔhiɔ nya.’ (Yes. 32:​2, sisi ningma.) Mo kai kaa o nyɛmimɛ Kristofo ɔmɛ hu kɛ haomihi ngɛ kpee, se a ngɛ si fĩe. Ke o je mi mi jɔmi mi kɛ ye bua nɔ ko nɛ e hia yemi kɛ buami ɔ, lɔ ɔ ma ha nɛ o ma ná juɛmi nɛ da, nɛ o ma nyɛ ma fĩ si ngɛ o ka a mi.—Níts. 20:35.

WA HƐNƆKAMI Ɔ

15. (a) Mɛni blɔ nɔ nɛ hɛnɔkami nɛ Yesu ngɛ ɔ ye bua lɛ? (Hebri Bi 12:2) (b) Mɛni blɔ nɔ nɛ wɔ hu wa hɛnɔkami ɔ yeɔ buaa wɔ?

¹⁵ Yehowa ha wɔ hɛnɔkami nitsɛnitsɛ konɛ wa nyɛ nɛ wa fĩ si. (Rom. 15:13) Mo kai kaa Yesu kɛ haomihi nɛ a nya wa pe kulaa a kpe ngɛ ligbi nɛ a gbe lɛ ɔ nɔ, se hɛnɔkami ye bua lɛ nɛ e nyɛ nɛ e fĩ si. (Kane Hebri Bi 12:2.) Yesu le kaa ke e ya nɔ nɛ e ye anɔkuale ɔ, lɔ ɔ maa ye bua kɛ tsɔ Yehowa biɛ ɔ he. Jehanɛ hu ɔ, Yesu ngɛ hɛnɔkami kaa e ma ya piɛɛ e Tsɛ ɔ he ekohu, nɛ pee se ɔ, e kɛ e nyɛmimɛ ɔmɛ nɛ ji nimli 144,000 ɔ ma ya ye Matsɛ ngɛ hiɔwe. Wɔ hu wa ngɛ hɛnɔkami kaa wa maa hi si kɛ ya neneene ngɛ je ehe nɛ Mawu wo si ɔ mi. Hɛnɔkami nɛ ɔ yeɔ buaa wɔ nɛ wa fĩɔ si ngɛ kahi nɛ waa kɛ ngɛ kpee ngɛ Satan je nɛ ɔ mi ɔ mi.

16. Mɛni blɔ nɔ nɛ hɛnɔkami ye bua nyɛmiyo ko nɛ e nyɛ nɛ e fĩ si, nɛ mɛni o kase ngɛ nɔ́ nɛ e de ɔ mi?

¹⁶ Mo susu bɔ nɛ Matsɛ Yemi ɔ he hɛnɔkami ɔ ye bua nyɛmiyo ko nɛ a tsɛɛ lɛ ke Anna nɛ e ngɛ Russia a he nɛ o hyɛ. A wo e huno ɔ tsu, nɛ e ngɛ mlɛe a ye e sane. Anna de ke: “I sɔleɔ nɛ i pueɔ ye yi mi tɛ ngɛ hɛnɔkami nɛ i ngɛ ɔ he, nɛ lɔ ɔ ha we nɛ ye kɔni mi nɛ jɔ̃ tsɔ. I le kaa waa kɛ haomihi ngɛ kpee mohu lɛɛ, se ní kpakpahi ngɛ wa hɛ mi kɛ ma. Yehowa maa ye kunimi, nɛ wɔ hu wa maa ye kunimi kokooko.”

17. Mɛni wa ma nyɛ maa pee kɛ tsɔɔ kaa wa bua jɔ hɛ kɛ nɔ fɔmi nɛ Yehowa ha wɔ ɔ he? (Hyɛ foni ɔ hulɔ.)

¹⁷ Nɔ́ nɛ o ma nyɛ maa pee. Mo he be kɛ susu si nɛ Yehowa wo kɛ kɔ hwɔɔ se he ɔ he. Moo po he foni kaa o ngɛ je ehe nɛ Mawu wo he si ɔ mi, nɛ o po jɔɔmihi nɛ o ma ná ngɛ mi ɔ hu he foni. Enɛ ɔ maa ye bua mo nɛ o maa na kaa ka fɛɛ ka nɛ waa kɛ ngɛ kpee amlɔ nɛ ɔ, “se be kɛe nɛ e mi jiɔ we” hulɔ. (2 Kor. 4:17) Jehanɛ hu ɔ, moo bɔ mɔde kaa o ma de ni kpahi si nɛ Mawu wo kɛ kɔ hwɔɔ se he ɔ. Mo susu si fɔfɔɛ nɛ nihi nɛ a sɔmɔ we Yehowa a ngɛ mi ɔ he nɛ o hyɛ. A kɛ nyagbahi fuu ngɛ kpee, se a li kaa Yehowa wo si kaa wa nine maa su ní kpakpahi a nɔ hwɔɔ se. Ke o tu Matsɛ Yemi ɔ he munyu kpiti kɛ tsɔɔ mɛ po ɔ, lɔ ɔ ma nyɛ ma ha nɛ a bua nɛ jɔ kaa a maa kase babauu.

18. Mɛni he je nɛ wa ma nyɛ ma ná nɔ mi mami kaa Yehowa si womi ɔmɛ maa ba mi ɔ?

¹⁸ Benɛ Hiob fĩ si ngɛ kahi fuu a mi se ɔ, e de Yehowa ke: “Jehanɛ ɔ lɛɛ, i na kaa o nyɛɔ peeɔ nɔ́ fɛɛ nɔ́, nɛ nɔ́ ko nɔ́ ko be nɛ o to o yi mi kaa o maa pee nɛ́ o be nyɛe maa pee.” (Hiob 42:2) Hiob na kaa nɔ́ ko nɔ́ ko be nyɛe maa tsi Yehowa si womi ɔmɛ blɔ. Enɛ ɔ ma nyɛ maa wo wɔ he wami konɛ wa fĩ si. Kaa nɔ hyɛmi nɔ́ ɔ, ngɔɔ lɛ kaa yo ko be he wami be kɛkɛɛ, nɛ e kɔni mi jɔ̃ ejakaa e kpa dɔkitahi babauu a nɔ, se a nyɛ we nɛ a tsa lɛ. Se dɔkita ko nɛ e ngɛ níhi a si kpami, nɛ nihi ngɛ hɛ kɛ nɔ fɔmi ngɛ e mi ɔ yɔse yo nɛ ɔ si fɔfɔɛ ɔ, nɛ e tsɔɔ lɛ blɔhi a nɔ nɛ e maa gu kɛ tsa lɛ. Enɛ ɔ ha nɛ yo ɔ tsui nɔ e mi amlɔ nɔuu. E ngɛ mi kaa e ma he be loko e ma ná tsami mohu lɛɛ, se akɛnɛ e le kaa dɔkita a ma nyɛ ma tsa lɛ he je ɔ, e he be wae ha lɛ kaa e ma fĩ si. Akɛnɛ wɔ hu wa ngɛ hemi kɛ yemi nɛ mi wa kaa Paradeiso ɔ maa ba he je ɔ, lɔ ɔ yeɔ buaa wɔ nɛ wa fĩɔ si.

19. Mɛni maa ye bua wɔ konɛ wa nyɛ nɛ wa fĩ si?

¹⁹ Kaa bɔ nɛ wa na a, Yehowa guɔ sɔlemi, e Munyu ɔ, wa nyɛmimɛ ɔmɛ kɛ wa hɛ kɛ nɔ fɔmi ɔ nɔ kɛ yeɔ buaa wɔ konɛ wa fĩ si ngɛ kahi a mi. Ke wa ngɔ ní nɛ ɔmɛ kɛ tsu ní saminya a, Yehowa maa ye bua wɔ kɛ gblee haomi fɛɛ haomi nɛ waa kɛ maa kpe ɔ mi kɛ ya si be nɛ e maa po nɔ́ nami se kulaa ngɛ Satan je nɛ ɔ mi.—Filip. 4:13.