Moo Po O Bi ɔ He Piɛ Kɛ Je Ajuama Bɔmi He Fonihi Kɛ Videohi A Hyɛmi He

“Pi kaa wa yɔse we kaa oslaa ngɛ bɔmi nami he fonihi kɛ videohi a hyɛmi he​—wa le oslaa nɛ ngɛ he ɔ wawɛɛ​—se wa yɔse we kaa e be yee ha wa biyo ɔ kaa e maa na bɔmi nami he fonihi.”​—Nicole.

Ngɛ munyu nɛ ɔ mi ɔ

• Nɔ́ nɛ e sa nɛ o le

• Blɔ nɔ nɛ o maa gu kɛ po o bi ɔ he piɛ kɛ je ajuama bɔmi he fonihi kɛ videohi a hyɛmi he

• Ke o bi ɔ hyɛ ajuama bɔmi he fonihi kɛ videohi

Nɔ́ nɛ e sa nɛ o le

E ma nyɛ maa ba lɛ kaa jokuɛwi maa na bɔmi nami he fonihi benɛ a wɛ kulaa. Níhi a mi hlami tsɔɔ kaa jeha nɛ jokuɛwi yeɔ nɛ́ a kɛ jeɔ bɔmi nami he fonihi a hyɛmi sisi ngɛ wa be nɛ ɔ mi ji 11.

Jokuɛwi ma nyɛ maa hyɛ ajuama bɔmi he fonihi kɛ videohi nɛ pi kaa mɛ nitsɛmɛ lɛ a ya hlá. Kaa nɔ hyɛmi nɔ́ ɔ, jokuɛwi ma nyɛ maa na bɔmi nami he fonihi kɛ videohi ke a ngɛ níhi a mi hlae ngɛ Intanɛti ɔ nɔ aloo a ya social media a nɔ. Sɛ gbihi nɛ kɔɔ ajuama bɔmi he fonihi kɛ videohi a he ɔ ma nyɛ maa ba a fon ɔmɛ a nɔ be mi nɛ a ngɛ video game fiae ngɛ Intanɛti ɔ nɔ. Ajuama bɔmi he níhi baa ngɛ blɔ slɔɔtohi a nɔ, nɛ nɔ́ nɛ pɔ he ji fonihi kɛ videohi. Se kɛ̃ ɔ, ajuama bɔmi he níhi pɔ he ngɛ Intanɛti ɔ nɔ, nɛ e yi kulaa kaa nihi maa gbla nɛ́ a kane, nɛ́ a bu tue.

Jehanɛ hu ɔ, e sa nɛ fɔli a hɛ nɛ hi a he nɔ kaa nihi ma nyɛ maa ngɔ bɔmi nami he sɛ gbihi kɛ mane a bimɛ ɔmɛ ngɛ a fon ɔmɛ a nɔ. Ngɛ níhi a mi hlami ko nɛ a pee ɔ mi ɔ, a bi nihewi kɛ yihewi nɛ a yibɔ hiɛ pe 900 ɔ munyu, nɛ ngɛ yibɔ nɛ ɔ mi ɔ, yihi nɛ a he hiɛmi maa su lafa mi 90, kɛ nyumuhi nɛ a he hiɛmi maa su lafa mi 50 ɔ tsuo de ke a klas bi ɔmɛ pɔɔ mɛ ajuama bɔmi he fonihi kɛ videohi manemi ngɛ a fon ɔmɛ a nɔ.

Ajuama bɔmi he fonihi kɛ videohi pɔ he wawɛɛ, nɛ behi fuu ɔ, e kɔɔ yi wu tso níhi a he. Yi wu tso níhi nɛ a peeɔ yihi ɔ ji níhi nɛ e pɔ he wawɛɛ ngɛ ajuama bɔmi he fonihi kɛ videohi a mi, nɛ e yi kaa nɔ ko maa na fonihi kɛ video nɛ ɔmɛ.

Ajuama bɔmi he fonihi kɛ videohi a hyɛmi yeɔ jokuɛwi awi. Níhi a mi hlami tsɔɔ kaa, e he be wae kulaa kaa níhi nɛ nyɛɛ se nɛ ɔmɛ maa ba ngɛ jokuɛwi nɛ a hyɛɛ ajuama bɔmi he fonihi kɛ videohi ɔ a blɔ fa mi:

• a be nyɛe maa bɔ mɔde ngɛ sukuu

• e ma ha nɛ a pee yeyeeye, a hao wawɛɛ nɛ a nu he kaa a he be se nami

• e ma ha nɛ a na bɔmi nami ní peepeehi nɛ a maa nyɛ nihi a nɔ nɛ́ a kɛ a he maa wo mi ɔ kaa tɔmi ko be he

Nɔ́ nɛ e sa kaa o kadi: Ke jokuɛwi hyɛɛ ajuama bɔmi he fonihi kɛ videohi ɔ, e ma nyɛ ma ná a nɔ he wami ngɛ blɔ yaya nɔ, enɛ ɔ he je ɔ, fɔli ji nihi nɛ a ma nyɛ maa po a he piɛ kɛ je he.

Baiblo sisi tomi mlaa: “Mlaahi nɛ i ngɛ nyɛ woe mwɔnɛ ɔ, nyɛ hɛ nɛ hi a nɔ. Nyɛɛ tsɔɔ nyɛ bimɛ. Nyɛɛ sɛɛ he ní be nɛ nyɛ ngɛ we mi, be nɛ nyɛ hia blɔ, be nɛ nyɛ hwɔɔ si, kɛ be nɛ nyɛ te si.”​—5 Mose 6:6, 7.

Blɔ nɔ nɛ o maa gu kɛ po o bi ɔ he piɛ kɛ je ajuama bɔmi he fonihi kɛ videohi a hyɛmi he

Moo le ní komɛ nɛ a he hia. Mo susu be kɛ he nɛ e be yee ha o bi ɔ kaa e maa na ajuama bɔmi he fonihi kɛ videohi ngɛ ɔ he. Kaa nɔ hyɛmi nɔ́ ɔ, anɛ e náa he blɔ kɛ yaa Intanɛti ɔ nɔ ngɛ sukuu ke a ngɛ a he jɔɔe be mi nɛ nɔ ko kudɔɔ we lɛ aloo nɔ ko hɛngmɛ be e he lo?

Kase blɔ nɔ tomi komɛ nɛ a ngɛ ea fon ɔ nɔ, nɛ́ o kɛ ma nyɛ ma tsu ní kɛ gbɔ sɛ gbihi loo níhi nɛ a baa e fon ɔ nɔ ɔ he ní, nɛ o le app ɔmɛ kɛ fiɛmihi nɛ a ngɛ e fon ɔ nɔ ɔ saminya. Kaa nɔ hyɛmi nɔ́ ɔ, app komɛ nɛ a guɔ nɔ kɛ maneɔ sɛ gbi ɔ, ngɛ blɔ nɔ tomi ko nɛ haa nɛ ke o nine su sɛ gbihi, fonihi aloo videohi nɛ kɔɔ bɔmi nami he ɔ nɔ ngɛ́ o fon ɔ nɔ ɔ, e se be kɛe ngɛ nɔ kɛkɛ e laa. Nɛ video nɔ fiɛmihi fuu nɛ a ngɛ bae ɔ, haa nɛ nihi nɛ a fiɛɔ fiɛmi nɛ ɔmɛ ɔ hyɛɛ ajuama bɔmi he fonihi kɛ videohi, nɛ e haa nɛ nihi nɛ a fiɛɔ fiɛmi nɛ ɔmɛ nyɛɔ nɛ a peeɔ kaa nɔ́ nɛ a kɛ a he ngɛ bɔmi nami ní peepeehi a mi woe ngɛ fiɛmi ɔ mi ngɛ a fon ɔ nɔ.

“I ná enɛ ɔ mi níhi a si kpami: Ke o bi ɔ ngɛ fon nɛ a kɛ yaa Intanɛti ɔ nɔ ɔ, kaa fɔlɔ ɔ, e sa nɛ o le bɔ nɛ a kɛ fon ɔ tsuɔ ní ha, nɛ o le blɔ nɔ tomihi nɛ a ngɛ fon ɔ nɔ nɛ́ o kɛ ma nyɛ ma gbɔ níhi nɛ a baa e fon ɔ nɔ ɔ, nɛ o hyɛ blɔ nɔ nɛ o maa gu kɛ kudɔ nɔ́ nɛ o bi ɔ kɛ fon ɔ peeɔ.”​—David.

Pee nɔ́ fɛɛ nɔ́ nɛ o ma nyɛ kɛ po o bi ɔ he piɛ konɛ e ko hyɛ ajuama bɔmi he fonihi kɛ videohi. Moo pee nɔ́ fɛɛ nɔ́ nɛ o ma nyɛ konɛ e kɛ e he ko wo oslaa nɛ ɔ mi. Kaa nɔ hyɛmi nɔ́ ɔ: Moo pee tsakemihi ngɛ blɔ nɔ tomihi nɛ a ngɛ o bi ɔ fon ɔ nɔ ɔ kɛ kɔmpiuta klamahi tsuo nɛ a ngɛ we ɔ mi ɔ he, konɛ e tsi bɔmi nami he fonihi kɛ videohi a nya nɛ a ko ba e fon ɔ aloo klama kpa amɛ a nɔ. A ngɛ blɔ nɔ tomi ko ngɛ fon ɔmɛ a nɔ nɛ́ o kɛ ma nyɛ ma gbɔ níhi nɛ o bi ɔ naa kɛ hehi nɛ e yaa ngɛ e fon ɔ nɔ ɔ nɔ nɛ a tsɛɛ lɛ parental controls. Ha nɛ blɔ nɔ tomi nɛ ɔ nɛ hi ní tsue ngɛ o bi ɔ fon ɔ nɔ be fɛɛ be. Nɛ o le password nɛ o bi ɔ kɛ tsuɔ ní ɔ tsuo.

“I na kaa blɔ nya tomi nɛ ji parental controls ɔ nɛ i ha nɛ e ngɛ ní tsue ngɛ fon ɔmɛ a nɔ, nya tsimi komɛ nɛ i kɛ fɔ ní komɛ nɛ ye binyumu ɔ hyɛɛ ngɛ wa TV nɛ o kɛ ma nyɛ maa ya Intanɛti ɔ nɔ ɔ nɔ ɔ, kɛ jehanɛ e fon ɔ password ɔ nɛ i le ɔ ye bua wawɛɛ.”​—Maurizio.

“I ha we nɛ ye binyumu ɔmɛ nɛ a hyɛ videohi ngɛ a tsu ɔ mi be mi nɛ a fɔ a sinya a mi. Ke e su a si hwɔmi be ɔ, i ha we mɛ he blɔ nɛ a kɛ a klama amɛ nɛ ya a tsu ɔ mi.”​—Gianluca.

Mo dla o bi ɔ juɛmi ngɛ ajuama bɔmi he fonihi kɛ videohi a hyɛmi he. Binyɛ ko nɛ a tsɛɛ lɛ ke Flavia a de ke, “Fɔli komɛ sume kaa a kɛ a bimɛ ɔmɛ maa tu bɔmi nami he fonihi kɛ videohi a he munyu, kɛ susumi ɔ kaa a bimɛ ɔmɛ kɛ nyagba nɛ ɔ be kpee gblee.” Eko ɔ, fɔli kpa komɛ hu ma de ke, ‘Ke i kɛ ye bi ɔ sɛɛ he ní ɔ, lɔ ɔ ma ha nɛ ye bi ɔ ma ya hla se blɔ.’ Susumi kaa kikɛ ɔ dɛ. Fɔli nɛ a ji ní leli ɔ, tsɔseɔ a bimɛ ɔmɛ ngɛ oslaahi nɛ jeɔ ajuama bɔmi he fonihi kɛ videohi a hyɛmi mi kɛ baa a he loko a kɛ si fɔfɔɛ ko nɛ ma ha nɛ a hyɛ ajuama bɔmi he fonihi loo videohi ɔ nɛ kpe. Mɛni blɔ nɔ o maa gu kɛ pee enɛ ɔ?

Moo tsɔɔ o bimɛ nɛ a wɛ ɔ nɔ́ nɛ e sa nɛ a pee ke e ba lɛ kaa a hɛngmɛ ya gba bɔmi nami he fonihi loo videohi a nɔ. Kaa nɔ hyɛmi nɔ́ ɔ, a ma nyɛ ma ma a hɛngmɛ aloo a gbe a klama a. Moo wo mɛ he wami nɛ a kɛ mo nɛ sɛɛ níhi nɛ a na loo a nu ɔ he ní.b

“Waa kɛ wa binyumu ɔ bɔni oslaa nɛ ngɛ ajuama bɔmi he fonihi kɛ videohi a hyɛmi he ɔ he ní sɛɛmi kɛ je e jokuɛwi a si. Benɛ e ye maa pee jeha 11 ɔ, ajuama bɔmi he fonihi kɛ videohi he adafi fiami bɔni kpo jemi ngɛ game ko nɛ e gbla ngɛ e fon ɔ nɔ ɔ nɔ. Benɛ foni nɛ ɔmɛ ba e fon ɔ nɔ ɔ, e na sɛ gbi komɛ hulɔ nɛ́ piɛɛ foni ɔmɛ a he nɛ́ a bi lɛ kaa lɛ hu é ngɔ e foto kɛ mane. Akɛnɛ waa kɛ lɛ susu nɔ́ nɛ e sa nɛ e pee ɔ he he je ɔ, e ba ye ngɔ oya nɔuu nɛ e ba de mi nɔ́ nɛ ya nɔ ɔ.”​—Maurizio.

Moo ye bua o bimɛ nɛ a wa bɔɔ ɔ konɛ ke a ya je si fɔfɔɛ ko mi nɛ ma ha nɛ a hyɛ ajuama bɔmi he fonihi, a bu tue, loo a kane ɔ, a nyɛ nɛ a kua. Kaa nɔ hyɛmi nɔ́ ɔ, o ma nyɛ maa ye bua o bi ɔ nɛ e to blɔ nya konɛ e ngma nɔ́ nɛ e maa pee ke e hɛngmɛ gba bɔmi nami he fonihi kɛ videohi a nɔ, kɛ nɔ́ he je nɛ e suɔ kaa e pee jã a kɛ fɔ si. Ha nɛ e ngma nyagbahi nɛ ma nyɛ maa ba ke e je blɔ nɛ e hyɛ ajuama bɔmi he fonihi kɛ videohi ɔ, ekomɛ ji, lɔ ɔ ma ha nɛ e be e he nae kaa nɔ ko nɛ e he hia hu, e fɔli be e mi hemi kɛ yemi náe hu, nɛ huɛ bɔmi nɛ ngɛ e kɛ Mawu a kpɛti ɔ hu ma puɛ.c

“Be mi nɛ jokuɛwi ɔmɛ ngɛ wae ɔ, moo ye bua mɛ nɛ a susu nyagbahi nɛ maa je ajuama bɔmi he fonihi kɛ videohi a hyɛmi mi kɛ ba amlɔ nɛ ɔ, kɛ hwɔɔ se ɔ he, konɛ lɔ ɔ nɛ ye bua mɛ nɛ a yu a he kɛ je he.”​—Lauretta.

“Ke wa bimɛ ɔmɛ nu bɔ nɛ Yehowa nuɔ he ha ke a hyɛ ajuama bɔmi he fonihi kɛ videohi ɔ sisi, se pi nyagba nɛ maa je mi kɛ ba a pɛ ɔ, lɔ ɔ ma ha nɛ e he be wae ha mɛ kaa a maa yu a he kɛ je he.”​—David.

Nyɛɛ sɛɛ ní be fɛɛ be. E ji anɔkuale kaa jokuɛwi suɔ nɛ a kɛ a fɔli maa sɛɛ bɔmi nami he ní, nɛ́ ajuama bɔmi he fonihi kɛ videohi a hyɛmi hu piɛɛ he, ke e he wa ha fɔli kaa a ma he ye po. Dame Rachel de Souza nɛ e ji Children’s Commissioner kɛ ha England ɔ de ke, “Wa kase kaa be fɛɛ be ɔ, bimɛ suɔ nɛ a kɛ a fɔli nɛ sɛɛ bɔmi nami he ní ke a wɛ po. Jokuɛwi suɔ nɛ a da jeha nɛ a ye ɔ nɔ nɛ a kɛ mɛ nɛ sɛɛ bɔmi nami he ní. Ke a ngɛ wae hu ɔ, a suɔ nɛ a kɛ mɛ nɛ sɛɛ ní nɛ ɔmɛ a he ní kɛ ya tsitsaa.”

“Benɛ i ngɛ wae ɔ, ní komɛ ngɛ nɛ ye fɔli ɔmɛ kɛ mi sɛɛ we he ní gblee. I ná nɛ wa je wa tsui mi kɛ sɛɛ ní faa. Amlɔ nɛ ɔ nɛ i ji fɔlɔ ɔ, i peeɔ nɔ́ fɛɛ nɔ́ nɛ ma nyɛ konɛ i kɛ ye bimɛ ɔmɛ nɛ sɛɛ bɔmi nami he ní be fɛɛ be ngɛ mi mi jɔmi mi.”​—Flavia.

Ke o bi ɔ hyɛ ajuama bɔmi he fonihi kɛ videohi

Moo pee kpoo. Ke o ná le kaa o bi ɔ hyɛ ajuama bɔmi he fonihi kɛ videohi, aloo e bu tue aloo e kane ɔ, bɔɔ mɔde nɛ o ye o he nɔ. Eko ɔ, nɔ́ nɛ ba a hao lɛ momo, aloo e pee lɛ nyakpɛ aloo lɔ ɔ ha nɛ e he nile bu lɛ fɔ. O mi mi nɛ ma fu lɛ ɔ ma puɛ sane ɔ kulaa, nɛ lɔ ɔ ma ha nɛ ke sane ko kpale ba hwɔɔ se ɔ, e kɛ mo be he ní sɛɛe hu.

Moo le munyu ɔ mi saminya. Loko o maa mwɔ o yi mi kpɔ ngɛ sane ɔ he ɔ, mo bi o he sane bimi komɛ konɛ o kɛ le blɔ nɔ nɛ o bi ɔ gu kɛ na ajuama bɔmi he fonihi loo videohi ɔ. Kaa nɔ hyɛmi nɔ́ ɔ, anɛ nɔ ko lɛ e kɛ foni ɔ mane lɛ, aloo lɛ nitsɛ nɛ e ya hlá? Anɛ kekleekle be ji nɛ ɔ nɛ e hyɛ nɔ́ ko kaa jã aloo e hyɛ eko hyɛ? Anɛ blɔ nɔ tomi nɛ́ ngɛ e fon ɔ nɔ nɛ o kɛ ma nyɛ maa tsi sɛ gbi komɛ nɛ a baa e fon ɔ nɔ ɔ nya aloo o kɛ gbɔ hehi nɛ e yaa ngɛ e fon ɔ nɔ ɔ ngɛ ní tsue lo? Ke jã a, anɛ e gu blɔ nigii ko nɔ konɛ e kɛ ya nɔ nɛ e hyɛ ajuama bɔmi he fonihi kɛ videohi lo? Mo kai kaa oti ɔ ji, o suɔ nɛ o wo o bi ɔ he wami konɛ e je e tsui mi nɛ e kɛ mo nɛ sɛɛ ní se pi kaa o ma lɛ munyu bimi nɛ o kɛ hlá e he sane.

Moo pee si fɔfɔɛ ɔ he nɔ́ ko. Kaa nɔ hyɛmi nɔ́ ɔ, ke tlukaa nɛ o bi ɔ hɛngmɛ ya gba ajuama bɔmi he fonihi loo videohi a nɔ ɔ, e ma bi nɛ o ngɔ blɔ nɔ tomihi nɛ a tsɛɛ ke parental controls kɛ ekpahi nɛ ngɛ e fon ɔ nɔ nɛ o kɛ ma nyɛ ma kudɔ bɔ nɛ o bimɛ kɛ fon ɔ ma tsu ní ha a kɛ tsi ní komɛ nɛ a baa e fon ɔ nɔ ɔ nya aloo o kɛ gbɔ hehi nɛ e yaa ngɛ fon ɔ nɔ ɔ nɔ.

Ke o ba yɔse kaa lɛ nitsɛ lɛ e ya hlá ajuama bɔmi he fonihi loo videohi ɔ, ngɔɔ o nane kɛ ma si ngɛ tsɔsemi nɛ e sa nɛ o kɛ ha lɛ ɔ he, se o je suɔmi mi kɛ pee jã. Moo wo suɔmi nɛ o bi ɔ ngɛ kaa e ma kua bɔmi nami he fonihi kɛ videohi ɔ mi he wami kɛ gu ngmami komɛ kaa Hiob 31:1, La 97:10; kɛ La 101:3 nɛ o kɛ lɛ ma susu a he ɔ nɔ.d Jehanɛ se hu ɔ, ha nɛ e le kaa daa otsi ɔ, o kɛ lɛ maa sɛɛ ní nɛ ɔmɛ a he ní konɛ o kɛ hyɛ bɔ nɛ e ngɛ e he mɔde bɔe ha, kɛ he komɛ nɛ e maa hia yemi kɛ buami ngɛ konɛ o ye bua lɛ.