Mɛni He Je Nɛ E Sɛ Nɛ Ma Hyɛ Bɔmi Nami He Fonihi?

Anɛ o ma nyɛ maa yu o he ngɛ he lo?

Ke o kɛ Intanɛti tsuɔ ní ɔ, moo hyɛ blɔ kaa o ma nyɛ maa na ní komɛ nɛ sɛ. Hayley nɛ e ye jeha 17 ɔ de ke, “Amlɔ nɛ ɔ, nihi hla we bɔmi nami he fonihi hu, mohu ɔ, bɔmi nami he fonihi lɛ ngɛ nihi hlae.”

Ke o fia o pɛɛ si kaa o be bɔmi nami he fonihi hyɛe po ɔ, o kɛ e he ka ma nyɛ maa kpe. Greg nɛ e ye jeha 18 de ke, “I de ye he ke, i be bɔmi nami he foni hyɛe, se i nyɛ we. O be nyɛe ma de ke moo lɛɛ o be eko hyɛe gblee.”

Mwɔnɛ ɔ, bɔmi nami he fonihi pɔ he wawɛɛ pe be ko nɛ be ɔ. Behi fuu ɔ, nihewi kɛ yihewi komɛ poɔ mɛ nitsɛmɛ a he foni be mi nɛ a hɛɛ a he gu, nɛ a kɛ maneɔ ni kpahi.

Mo kadi: Mwɔnɛ ɔ, nihewi kɛ yihewi kɛ bɔmi nami he foni hyɛmi he kahi kpeeɔ wawɛɛ pe nɔ́ nɛ a fɔli kɛ kpe be ko nɛ be ɔ. Sane ɔ ji, anɛ o ma nyɛ maa yu o he ngɛ bɔmi nami he fonihi a hyɛmi he lo?​—La 97:10.

Heto ɔ ji ee. Ke o suɔ nɛ o yu o he ɔ, o ma nyɛ. Se kekleekle ɔ, e sa nɛ o le kaa bɔmi nami he foni hyɛmi hí. Ha nɛ wa susu lakpa munyuhi nɛ nihi tuɔ ngɛ bɔmi nami he fonihi a he kɛ anɔkuale nɛ kɔɔ he ɔ he nɛ waa hyɛ.

Lakpa munyuhi kɛ anɔkuale munyuhi

Lakpa munyu: Tɔmi ko be he kaa o maa hyɛ bɔmi nami he foni.

Anɔkuale munyu: Bɔmi nami he foni hyɛmi puɛɔ nɔ juɛmi kaa bɔ nɛ taba numi puɛɔ nɔ fakafaka a. E ma puɛ mo. Mawu to bɔmi nami he blɔ nya kɛ ha huno kɛ e yo konɛ suɔmi nɛ ngɛ a kpɛti ɔ mi nɛ wa. Se bɔmi nami he fonihi pueɔ blɔ nya nɛ Mawu to nɛ ɔ hɛ mi si. (1 Mose 2:​24) E haa nɛ nihi nɛ́ tɔmi ngɛ ní yayahi a he, nɛ a yeɔ nihi nɛ a peeɔ nɔ́ nɛ da a he fɛu. Kaa nɔ hyɛmi nɔ́ ɔ, womi mi ní leli komɛ tsɔɔ kaa yihi nɛ a peeɔ mɛ basabasa a he pee we nyumuhi nɛ a pɔɔ bɔmi nami he fonihi hyɛmi ɔ mɔbɔ.

Baiblo ɔ tsɔɔ kaa ni komɛ ngɛ nɛ “a zo tɔ ywia.” (Efeso Bi 4:19) A he nile gbo, lɔ ɔ he ɔ, ke a ngɛ ní yayahi pee ɔ, e hɛwi mɛ.

Lakpa munyu: Bɔmi nami he fonihi maa ye bua mo konɛ o kase bɔmi nami he ní.

Anɔkuale munyu: Bɔmi nami he fonihi haa nɛ nɔ hɛ kɔ̃ɔ. E haa nihi susuɔ kaa a bɔ yihi loo nyumuhi kɛ ha a hɛja jemi. Níhi a mi hlami ko tsɔɔ kaa ke nihi nɛ bɔmi nami he fonihi hyɛmi tlɔ a he ɔ sɛ gba si himi mi ɔ, a nɛ́ bua jɔmi ngɛ bɔmi nami mi.

Baiblo ɔ deɔ Kristofohi kaa a kua ‘yo kɛ nyumu yakayaka fiɛmi, mu ní tsumi, akɔnɔ yaya, kɛ hɛ tsumi’​—kɛ níhi tsuo nɛ ma ha nɛ nɔ ko maa hyɛ bɔmi nami he fonihi.​—Kolose Bi 3:5.

Lakpa munyu: Nihi nɛ a hyɛ we bɔmi nami he fonihi ɔ a hɛ mi tsɔ we.

Anɔkuale munyu: Nihi nɛ a hyɛ we bɔ mi nami he fonihi ngɛ bumi nɛ mi kuɔ kɛ ha bɔmi nami. A naa bɔmi nami kaa nike ní nɛ Mawu bɔ kɛ ha nyumu kɛ yo nɛ a sɛ gba si himi mi pɛ. Ke nihi nɛ a hyɛ we bɔmi nami he fonihi sɛ gba si himi mi ɔ, a náa bua jɔmi.

Baiblo ɔ laa we níhi a nɔ ngɛ bɔ nami he. Kaa nɔ hyɛmi nɔ́ ɔ, Baiblo ɔ de hunomɛ ke: “O nihe mi yo kpeekpee ɔ, ná e he bua jɔmi. . . nɛ e suɔmi ɔ nɛ fi mo kɛ mɛtɛ e he daa.”​—Abɛ 5:​18, 19.

Bɔ nɛ o maa pee ha kɛ kua bɔmi nami he fonihi

Ke e peeɔ mo kaa e he maa wa kaa o ma kua bɔmi nami he fonihi a hyɛmi ɔ, mɛni ma nyɛ maa ye bua mo? Ní kasemi womi nɛ ji, “Mo Kua Bɔmi Nami He Fonihi” ɔ ma nyɛ maa ye bua mo.

Mo ná nɔ mi mami kaa o ma nyɛ ma kua bɔmi nami he fonihi. Ke o hyɛɛ eko po ɔ, o ma nyɛ ma kpa. Ke o pee jã a, o ma ná he se wawɛɛ.

Kaa nɔ hyɛmi nɔ́ ɔ, Calvin tsɔɔ kaa benɛ e ye maa pee jeha 13 nɛ e bɔni bɔmi nami he fonihi hyɛmi. E de ke: “I le kaa e hí mohu lɛɛ, se i nyɛ we nɛ ma kpa hyɛmi. Be tsuaa be nɛ ma hyɛ eko ɔ, i peeɔ basaa. Pee se ɔ, ye papaa na. Ngɛ anɔkuale mi ɔ, lɔ ɔ mohu ha nɛ ye he mi jɔ mi! Bɔɔbɔɔbɔɔ ɔ, e ye bua mi nɛ i kpa hyɛmi.”

Calvin ma e juɛmi nya si kaa e be bɔmi nami he fonihi hyɛe hu. E de ke: “E dɔɔ mi wawɛɛ kaa i hyɛ bɔmi nami he fonihi, ejakaa loloolo ɔ, i kaiɔ níhi nɛ i hyɛ ɔ. Niinɛ, be komɛ ɔ, e peeɔ mi kaa ma kpale ya hyɛ jamɛ a foni ɔmɛ ekohu. Se i naa kaa be tsuaa be nɛ ma pee Yehowa suɔmi nya ní ɔ, ye bua jɔɔ wawɛɛ. Enɛ ɔ ye bua mi nɛ i hyɛ we bɔmi nami he fonihi hu.”