Anɛ Nɔ Yemi Ko Ngɛ Nɛ́ E Ngɛ Gbugbuugbu Nɛ́ Ma Nyɛ Maa Ye Zugba a Nɔ Lo?—⁠Mɛni Baiblo ɔ De?

Nɔ yemihi nɛ a ngɛ je ɔ mi tsuo ɔ kɛ nyagbahi ngɛ kpee. Ngɛ mahi nɛ e pee kaa níhi ngɛ nɔ yae saminya ngɛ a mi po ɔ, nya pomi munyuhi nɛ a tuɔ kɛ siɔ nɔ yemihi, sɔ fɔmihi nɛ a nya mɛ si kpakpa, ma kudɔmi kuhi nɛ a mi gba, kɛ nihi nɛ a peeɔ a ní basabasa ngɛ ma a mi ɔ ji nyagba komɛ nɛ ma nɔ yeli ɔmɛ kɛ kpeɔ.

Baiblo tsɔɔ kaa nɔ yemi ko ngɛ nɛ lɛɛ e ngɛ gbugbuugbu. Eko ɔ, o nu nɔ yemi nɛ ɔ he momo. Jamɛ nɔ yemi ɔ nɛ Yesu wo nɔ ta ngɛ sɔlemi he nɔ hyɛmi nɔ́ ɔ mi ɔ nɛ.

• “Enɛ ɔ he ɔ, nyɛɛ sɔle kikɛ nɛ ɔ:“‘Wa Tsɛ nɛ o ngɛ hiɔwe, ha nɛ o biɛ ɔ he nɛ tsɔ. Ha nɛ o Matsɛ Yemi ɔ nɛ ba. Ha nɛ a pee o suɔmi nya ní ngɛ zugba a nɔ kaa bɔ nɛ a peeɔ ngɛ hiɔwe ɔ.’”—Mateo 6:9, 10.

Mɛni Baiblo ɔ de kɛ kɔ Matsɛ Yemi nɛ ɔ he?

Matsɛ Yemi ɔ—⁠nɔ yemi nɛ ngɛ gbugbuugbu

Matsɛ Yemi ɔ maa ye nɔ kɛ je hiɔwe.

• Yesu tsɛ nɔ yemi nɛ ɔ ke “hiɔwe Matsɛ Yemi ɔ.” (Mateo 4:17; 5:3, 10, 19, 20) Enɛ ɔ he je ɔ, e de ke: “Ye Matsɛ Yemi ɔ, pi je nɛ ɔ mi nɔ.”—Yohane 18:36.

Nɔ yemi nɛ ɔ ma ba da adesahi a nɔ yemi ɔ nane mi.

• Baiblo ɔ de ke: “Matsɛ Yemi nɛ ɔ. . . maa ywia [adesa] matsɛ yemi nɛ ɔmɛ tsuo, nɛ e ma kpata a hɛ mi, nɛ lɛ pɛ lɛ e maa hi si kɛ maa ya neneene.”—Daniel 2:44.

A be Matsɛ Yemi nɛ ɔ nɛ Yesu ji e nya matsɛ ɔ hɛ mi kpatae kɔkɔɔkɔ.

• Baiblo ɔ de ke: “E nɔ yemi ɔ maa hi si kɛ maa ya neneene nɛ e se be poe, nɛ a be e matsɛ yemi ɔ hɛ mi kpatae.”—Daniel 7:13, 14.

Matsɛ Yemi ɔ maa ngɔ tue mi jɔmi kɛ slɔkee si himi kɛ ba zugba a nɔ.

• Baiblo ɔ de ke: “Nɔ tsuaa nɔ maa hi si ngɛ he jɔmi mi ngɛ e wai tso loo e ngmɔkɔ tso sisi, nɛ nɔ ko be nɔ ko he gbeye woe.”—Mika 4:4, Good News Translation.

Moo kase babauu kɛ kɔ Matsɛ Yemi nɛ ɔ he

Benɛ Yesu ngɛ zugba a nɔ ɔ, e kɛ e be tsuo “fiɛɛ Matsɛ Yemi ɔ he sane kpakpa a.” (Mateo 9:35) E gba kɛ fɔ si hu ke:

• “Nɛ sane kpakpa nɛ ɔ nɛ kɔɔ Matsɛ Yemi ɔ he ɔ, a maa fiɛɛ ngɛ zugba a nɔ hehi tsuo nɛ nimli ngɛ ɔ nɛ a kɛ maa ye je ma amɛ tsuo odase, nɛ lɔ ɔ se loko nyagbe ɔ maa ba.”—Mateo 24:14.

Mwɔnɛ ɔ, a ngɛ sane kpakpa a fiɛɛe ngɛ mahi nɛ hiɛ pe 240 a nɔ. Wa ngɛ mo nine fɔe konɛ o ba kase babauu kɛ kɔ matsɛ yemi nɛ ɔ he kɛ bɔ nɛ o ma na e nɔ yemi ɔ he se ha.

Wa kpa mo pɛɛ nɛ o hyɛ video ji Mɛni ji Mawu Matsɛ Yemi ɔ?